1 Lekeni sambi iwanu woniseka,

iwanu iwali wadodo ghendo kubita nene,

hata aba tsawo ng'awabamighwe baye

wekighwe hamwe na wambwa wangu iwokalitsa wang'olo wangu.

2 Angu ning'apatile choni kulawa mna tsingufu tsa ghamoko ghao,

iwanu wamalile tsingupfu?

3 Tsawasoka kwaapfila tsawana nzala ng'ani, na wahela chinu,

tsawatsunguluka nechilo mna isi isakale na ilihela chinu cha ukuja.

4 Tsawabawa mitsani ya kubagho watenda chijo,

waja mbaka imitsitsi ya imibiki.

5 Tsawawingighwa wakale kutali na iwanu,

na iwanu wawakemelela ka pfawokemelela imbapfi.

6 Tsawabamighwa wakale mna ipfikolongo ipfinyalile,

mna ghamapondo, na mna tsimango tsa ghamabambalawe.

7 Ako kubagho walila ka wanyama,

na tsawelundika hamwe hana libagho.

8 Wao wana wa wabotsi na wana wa iwanu wehile,

wawingighwa kwa kufapulighwa walawe muisi.

9 Lelo sambi iwana wawo wonibetsa kwa kunyimbila wila,

na nene niwa munu wa ukusekighwa na wawo.

10 Wawo wonyihila, na wonihepa.

ng'awopfuka baye kunitemela ghamate mchihanga.

11 Kwaapfila Imulungu kanenda niwe nyondenyonde, na kanidununza,

nawo wonitendela ka apfila pfawobama.

12 Kuna ghumoko ghwangu ghwa kujilo iwanu wonyinukila,

woninanahitsa nitsume,

wanibamila nzila tsa ukunikoma.

13 Woidiwa inzila yangu,

wakongetsa ghamaghayo ghangu,

na kuduhu munu iyonyapfila.

14 Wonitsila ka wanu iwobita hanu hakulu habomoke,

wakutsa haghati ghati ha ghamahame wanitowe.

15 Nyingilighwa na wogha ghendo,

ukulu wangu wose upfosa ka beho,

ukubweda kwangu kupfosa ka bingu.

16 Na sambi nahabehi na ukuhupa,

na matsuwa gha maghayo ghangogha.

17 Nechilo imipate yangu yose yonitama,

na usungu wanipata ng'auleka baye.

18 Kwa tsingupfu tsake, Imulungu kawa ka gwanda kuna nene,

kanikwida ka isingo ya ligwanda lyangu.

19 Kanyasa mna likododo,

na nene niwa ka timbwisi na lipfu.

20 Nokulilila ghweghwe Imulungu unyapfile,

lekeni ghweghwe ng'unyidika baye,

nakwima nokulomba lekeni ghweghwe kondolesa hela.

21 Ghweghwe kughaluka kuwa msughu kuna nene,

konitowa kwa ghumoko ghwako ghuna ingupfu.

22 Konyinula konighala kuchanya kuna libeho,

konikunughitsa akuno na akuno mna inyahemu.

23 Nomanya ghendo kongala kuna lifwa,

hanu hawekilighwe iwanu wose wana ugima.

24 Angu imunu iyoghaya ng'olomba yapfilighwe baye?

Na imunu iyodununzika pfihi ng'olomba baye wamwonele libatsi?

25 Angu nene siwalilile baye awala iwakalile mna ghamaghayo,

na ghumoyo ghwangu ng'aghuwonele usungu baye iwanu iwahingwa?

26 Lekeni handolele nibokele ighanoghile, baho ighehile ghanitsila,

na hanibetetse mbone ghumwanga, baho ichisi chitsa.

27 Munda mwangu mtibuka, wala ng'amleka baye,

na matsuwa gha maghayo ghanitsila.

28 Nakwanga aku nolakala, lekeni si kwa tsuwa baye,

nakwima hana ghumtingano, nolila nyapfilighwe.

29 Nene nolila ka wambwa wa kumuhulo,

na pfipfila nolila ka chimulu.

30 Ngotsi yangu yobambuka bambuka,

na mipate yangu yakwaka moto,

31 ichinubi changu chiwa chinu ukudomboketsela,

na ifilimbi yangu iwa litsi lya ukudomboketsala.