1 Kuya Elihu kaghendelela kulonga,

2 Angu ghweghwe kwakona alino linogha,

kolonga, "Nene nahela totso, lekeni Imulungu kana totso."

3 Naghwe koghutsa, "Angu chanibweda choni na chanipata choni kwa ukuleka kutenda nzambi?"

4 Lelo nene nokwidika ghweghwe,

hamwe na sale tsako.

5 Ulole kulanga na wone,

lola ghamabingu pfaghali kutali kuchanya kubita ghweghwe.

6 Ka kotenda nzambi, angu yeye umtendile choni?

Na ka tsinzambi tsako tsongetseka, yeye umtendele choni?

7 Ka ghweghwe kwahela matotso, apfi ghweghwe umwing'a choni,

au yeye yobokela choni kulawa kuna ghumoko ghwako?

8 Ighehile ghautenda ghodaha kumlagha imunu iyali ka ghweghwe,

na ighanoghile ghautenda ghodaha ukumwapfila imunu.

9 "Iwanu wolila ahala hawodununzighwa sideke,

wolomba wapfilighwe walawe mna ghumoko ghwa imunu yana ingupfu.

10 Wala kuduhu yolonga, ‘Yalikwani Imulungu, iyali Maumba wangu,

yeye iyonenda nimbe tsiwila nechilo,

11 iyotufunda pfinu pfingi kubita wanyama wali muisi,

iyotutenda tukengele kubita wapfideghe wali mlanga.’

12 Yeye ng'akwidika baye iwanu hawolila,

kwaapfila iwanu awo wehile wana chidandali.

13 Imulungu ghendo ng'otegheletsa baye chililo chao cha hela,

Imulungu yana tsingupfu ng'akwalangitsa baye ichililo ka acho.

14 Lelo yokwidikatse ka ghweghwe mwenyegho kolonga ng'umwona baye,

akuno lighomba lyako lya hambele hake, naghwe kombetetsa yeye!

15 Pfipfila kolonga, ka yeye ng'otutowa baye kwa imaya yake,

na yeye ng'owalangula baye iwanu ahala hawototsa.

16 Apfo Ayubu koghendelela kulonga pfinu pfa ubotsi,

kalonga pfinu pfingi aku ing'apfimanyile baye."