1 Ayubu kedika keli kalonga,

2 Ng'apfu ning'awile ka ghumwande,

imiyaka aila Imulungu hayang'ali yondolagha,

3 ahala hayang'ali yonimwemwesela itala yake mna litwi lyangu,

nene tsanyanga mchisi kwa ghumwanga ghwake agho,

4 ka pfanikalile mna ghamtsuwa ghangu gha ukubweda,

ahala Imulungu hayakalile sale yangu mkulu mna ing'anda yangu,

5 aho Imulungu yana ingupfu hayang'ali yokala hamwe na nene,

aku iwanangu wonitsunguluka.

6 Matsuwa agho imifugho yangu inga'li ilapfa matsiwa mengi.

na mitseituni yangu ing'ali ikula pfinoghile mna lidongo lya mabwemabwe.

7 Hang'endile kuna lilango kulu lya ghumji,

na kukala hanu hangu hana ichibwalu cha ukwitinganila,

8 iwasongolo hawambonile wang'ali wakwima mmbalimbali,

na iwabala iwakalile hasi wang'ali wakwinuka,

9 na iwakulu wang'ali woleka ukulonga,

aku wodiwa imilomo yawo kwa ghamoko ghawo.

10 Ipfilongotsi nawo tsawenyamala,

aku milimi yawo inanahila mna imilomo yawo.

11 Chila munu yanihulike, tsakanonga pfinoghile,

na ayula iyambonile i kanitoghola ghendo.

12 Kwaapfila tsanimkombola munu mhingwa iyanililile nimwapfile,

imchuwa, na ayula iyalihela munu wa kumwapfila.

13 Na ayula iyakalile habehi na ukufa tsakanibaliki,

na tsanighutenda ghumoyo ghwa ichitsuka ghwimbe kwa ukudeng'elela.

14 Tsanitenda ighali gha ihaki ka gwanda lyangu,

ukutenda ighanoghile kuwa ka lijoho lyangu na chilemba changu.

15 Nene ning'ali niwalongotsa ipfifita,

na ning'ali niwalongotsa ipfimbete,

16 tsaniwa aba wa iwanu wahingwa,

nimwamila imgheni mna lighomba lyake.

17 Nitsibena tsingupfu tsa iwanu wehile,

na niwaswekula awala iwaghoghighwe nawo.

18 Baho nonga, ghamatsuwa ghangu ghatsakongetseka ka msanga.

na nitsakufila mna ing'anda yangu,

19 nene tsaniwa ka mbiki, imitsitsi yangu ipfika kuna ghamatsi.

na litungwe likala chilo chose mna ghamaputila ghangu.

20 Ukulu wangu utsoghendelela kuwa wa sambi.

na tsingupfu tsangu tsitsakuwa ka minde ya sambi mna ghumoko ghwangu.

21 Iwanu tsawanihulikitsa,

wenyamala tulu wahulike chaniwalongela.

22 Na hanimalitsa ukulonga wokala wahela cha kulonga,

ghamalonga ghangu ghawengila ghendo mna ghamaghutwi ghawo.

23 Tsawanibetetsa ka munu iyobetetsa imvula,

wabokela ghamalonga ka iwanu iwolima pfawobetetsa imvula ya kuhandila.

24 Hawakalile watenyuka, nene niwasekela,

na hanisangalamke wawo wona chinu chikulu.

25 Niwasaghulila inzila, na nene niwa chilongotsi wao,

tsang'ala ka mfalume mna maasikali wake,

niwa ka imunu iyowakanza iwanu iwodomboketsa.