1 Angu komanya iwamene wa kupfidunda wakweleka tsuwachi?

Angu mala kumwona idondolo hayakweleka iwanaghe?

2 Angu kodaha kupeta imiyetsi yao mbaka hawakweleka?

Apfi komanya imisimu yawo ya ukweleka?

3 Wakwinama wakweleka iwana wawo,

na usungu wao wa ukweleka womala.

4 Iwana wawo wokula na wakongetseka tsingupfu kuko kubagho,

kuya wakuka kutali, na ng'awakuya keli baye.

5 Nani iyamlekelele chihongwe wa kubagho yoke?

Nani iyamdohole imitsabi yake?

6 Ayula yanimwing'ile lijangwa liwe kaye yake,

na isi ya munyu iwe hanu hake ha ukukala.

7 Yeye kokala kutali na ghumji,

wala ng'ohulika baye ukukemelela kwa mwimilitsi.

8 Kakwanga kwanga mpfidunda kobama ichijo,

na kobama bama imitsani mibisi yaje.

9 Pfihi mbogho kodaha kutoghola yakusang'anile?

Na pfihi kodaha kukala hawowasa wanyama wako?,

10 Apfii kodaha kumwoha lutsabi mbogho yalime?

Au yeye kodaha kulima ghumghunda aku kakuchughu kwako?

11 Angu kwitsemuhuwila yeye kwaapfila kana ngupfu?

Au ing'onde yako kutsomlekela yeye?

12 Pfihi kutsomlolela yaghale ipfijo ukaye,

na yaghale ipfijo apfo hana ichibwalu cha ukubetela?

13 Ghamabawa gha ichideghe mbuni ghepamana kwa ukwighoda,

lekeni ng'aghodaha baye kwighala na ghamabawa gha ichideghe kolongo iyana imighala,

14 kwaapfila imbuni kopfisa mafinga ghake hasi ha lidongo,

na koghaleka ghatsumbuke mna ghumsanga,

15 lekeni kesemwa ghengo ka mghulu ghwodaha kughatula,

au mnyama wa kubagho kodaha kughabajugha.

16 Imbuni kowatendela ukali iwanaghe, ka apfila si wake baye,

hata ing'onde yake ing'awa hela yeye kakona si chinu baye,

17 kwaapfila Imulungu kamwima ihekima,

wala ng'amwing'ile baye tsimbutsi.

18 Yeye hayepamana ghamabawa ghake yatsume,

komseka ghendo ifalasi na ayula iyamdinile.

19 Angu ghweghwe yuyo yumwing'a ifalasi tsingupfu tsake,

au ghweghwe yukwika imighala mitali ihighisika mna isingo yake?

20 Pfihi ghweghwe yumtendile yaghuluke ka nzighe?

Na yeye hayolila koghela wogha.

21 Yeye kopalula palula lidongo kunyika, na kodeng'elela tsingupfu tsake,

hayoghenda kwitingana na wana tsisilaha.

22 Kouseka wogha aku yeye ng'opfuka chinu baye,

wala ng'akuya kuchughu baye hayolyona lipanga.

23 Iyala ya ukwikila imishale yomwasukila ifalasi,

hamwe na ghumgoha na limaghe ilimeletseka.

24 Yeye kotsuma aku kohighisika na kaghudubuka,

wala ng'akwima baye ahala imalati hailtowighwa.

25 Na imalati hailila, kolonga Aha,

na kohulika ing'ondo pfainung'a kulawa kutali,

kohulika walongotsa ng'ondo pfawokemelela.

26 Pfihi tsimbutsi tsako tsiso tsimfundile ichitema kughuluka,

akuno ghabawa ghake ghopamanika yaghuluke yaghende kusini?

27 Angu ghweghwe yumlaghitsa magengele yaghuluke mchanya,

na yatsenge ichibali chake kuchanya? 28 Yeye kokala mna ghamabambalawe,

na mumo kotenda iwe kaye yake.

29 Kulawa kuko kobama ichijo chake,

na tsinenge tsake tsakona chayowinda kulawa kutali.

30 Na iwanaghe nawo wakunwa idamu,

na kuna ghumtsogha yeye kuko kwayali.