1 Kuya Sofari, iyolawa Naamati kamwidika Ayubu, kalonga,

2 Pfihi aghano ghose ghaulonga ghaleke kwidikighwa?

Angu kulonga longa ako kokutenda woneka kwahela totso.

3 Angu ukulongeleka kwako kuwatende iwanu wenyamale?

Naghwe haubetsa imunu yaleke kukumanila?

4 Kwaapfila kolonga, chanilonga nolongesa,

na nene nyela hambele ha Imulungu.

5 Ka Imulungu yang'alongile,

na yang'asame ghumlomo ghwake yakwidike,

6 yakulongele ihekima ipfisike iyali nayo,

kwaapfila kuna pfinu pfingi pfa Imulungu ing'apfimanyika,

na umanye ghendo ka nzambi tsako tsingi Imulungu katsisemwa.

7 Pfihi kodaha kutanga ipfinu pfose ipfipfisike pfa Imulungu?

Pfihi kodaha kumanya Imulungu yana ingupfu pfayakwanzila na pfayotsighila?

8 Ukulu wake wobita kulanga, udaha kutenda choni ghweghwe?

Ukughenda hasi kwake kobita kutsimu, angu umanya choni ghweghwe?

9 Ung'aulinga na isi, wobita isi yose,

hata ughatsi wa ibahali woubita.

10 Ka Imulungu kobita,

na kowaghogha iwanu yawaghale kuna libalatsa,

nani yodaha kumghoma?

11 Yeye katsowatanga ghendo iwanu iwaghutsu,

Angu yang'ona ghehile, ng'otenda chinu baye?

12 Lekeni imunu mbotsi ng'odaha kuwa na mbutsi baye,

ka apfila ichihongwe wa kubagho pfang'odaha kweleka munu.

13 Ung'aghulapfa ghumoyo ghwako ghwose kuna yeye,

na ung'agholosa ghamoko ghako kuna yeye umlombe,

14 ka kuna nzambi mmoko mwako, tsase kutali,

na uleke kutoghola ghehile ghakale mkaye yako.

15 Baho kutsakwinula ichihanga chako bila koneka ka kutotsa,

kutsakuwa na ngupfu na ng'utsopfuka baye.

16 Naghwe kwitsesemwa ghamaghayo ghako,

naghwe kutsoghakumbuka ka apfila matsi gha imvula ighabitile.

17 Ugima wako utsong'aika kubita tsuwa ilikwalika nemisi,

hata ka kutsakuwa na chisi, kutsakoneka ka nemitondo.

18 Naghwe kutsakuwa kwahela wogha kwapfila kunacho cha ukulolela,

Imulungu katsokukinga na kutsobwihila tseghamba.

19 Pfipfila kutsowasa aku kuduhu munu iyokutenda upfuke,

na wanu wengi watsokubama uwatendele ighanoghile.

20 Lekeni tsinenge tsa iwanu iwehile tsisakwingila chisi,

na ng'awatsoyona baye inzila ya ukutsumila,

na wololela chinu chimwe, nacho lifwa.