1 Apfo iwanu awala wadatu waleka ukumwidika Ayubu, kwaapfila tsakebona kahela totso mnange mwake imwenyegho. 2 Apfo Elihu mwana wa Barakeli, munu wa Buzi iyolawa mna lukolo lwa Rama kamghudubukila Ayubu kwa kwibona mwenyegho kahela matotso na si Imulungu baye. 3 Pfipfila kawaghudubukila sale awala wadatu, kwaapfila ng'awalanguse baye chayatotsile Ayubu, lekeni wamhigha ka katotsa. 4 Elihu tsakabeta mbaka iwabala awo wadatu wamalitse kulonga na Ayubu kwaapfila yeye tsamdodo kubita wawo. 5 Baho Elihu hayonile iwanu awo wadatu wahela chinu cha ukumwidika Ayubu, kaghudubuka. 6 Apfo Elihu imwana wa Barakeli, wa lukolo lwa Buzi, kanza kulonga,

"Nene namsongolo,

mwemwe mlala, apfo tsanipfuka ukumlongelani,

sibamile baye kuwalongela achila chanimanya,

7 Nilongela mmoyo,

‘Waleke iwakalile matsuwa mengi walonge,

wana imiyaka mingi wafunde ihekima.’

8 Lekeni iloho ili mghati mwa imunu,

ghumuhe ghwa Imulungu yana tsingufu ghugho ighumwing'a ukumanya.

9 Si wa iwanzehe waliyeka baye wana tsimbutsi,

wala si awala baye wana imiyaka mingi waliyeka iwomanya chinu chachi chinoghile.

10 Apfo nobama, mnitegheletse,

mndeke na nene nonge chanipfikitsa.

11 Nene tsanibetetsa hamng'ali mlonga,

nihulikitsa aghala ghamlongile,

ahala hamng'ali mbama bama cha ukulonga.

12 Niwahulikitsa ghoya,

lekeni kuduhu hata munu yumwe mna mwemwe iyalanguse ka Ayubu katotsa,

na kuduhu hata yumwe mna mwemwe iyedike ghayalongile Ayubu.

13 Na mleke ukulonga, ‘Tupata ihekima,

mlekeni Imulungu yalonge ka katotsa, na si imunu baye.’

14 Ghayalongile Ayubu ng'anongile nene baye,

na nene sitsomwidika baye ka pfammwidike mwemwe.

15 Baho sale awala wadatu wakangawala, ng'awedike keli baye,

nawo wahela cha ukulonga.

16 Pfihi na nene nibetetse kwaapfila mwahela cha ukulonga,

mana mwinyamala tulu, mwahela cha ukwidika?

17 Nene pfipfila nitsolonga ghakwangu,

na nitsolonga chanimanya.

18 Kwapfila ninagho mengi gha ukulonga,

na iloho ili mghati mwangu yonikomangitsa nilonge.

19 Mghati mwangu niwa ka chikoba cha ngotsi chimemile dipfai,

ka chikoba cha ngotsi chimemile dipfai ya sambi chibama kutulika.

20 Nolonga, ili chidogho mbone ng'apfu,

nakwasama ghumlomo ghwangu nyidike.

21 Sitsolola chihanga cha munu baye,

wala sibama imunu wowose yanitoghole baye.

22 Ka ning'abamile ukutogholighwa na iwanu,

Imulungu wangu yang'asumke ukunyasa kutali."