1 Kuya Ayubu kawedika,

2 Ona, mwemwe mwa wanu ghendo

na ihekima itsomala ahala mwemwe hamtsakufa.

3 Lekeni na nene nina mbutsi ka mwemwe,

nene sili munu hela baye kuna mwemwe,

Angu nani ng'aghamanyile baye aghano ghose?

4 Nene niwa munu wa kusekighwa na sale tsangu,

tsanimkema Imulungu, naye tsakanyidika.

lekeni niwa munu wa kusekighwa,

hata ka nene nina haki na nahela totso.

5 Imunu iyobweda kowaseka iwoghaya,

chayofikitsa yeye ukughaya kowatsila awala iwateletse.

6 Ghamahema gha iwanu iwoboka ghokala tseghamba,

na awala iwomghobola Imulungu wokala wagima,

awala iwomwika imulungu wawo mna ghamoko ghawo.

7 Lekeni sambi muwaghutse wanyama, nawo watsowafunda,

waghutseni wapfideghe wali mlanga, nawo watsowalongela.

8 Ighutse isi, nayo isi itsokufunda,

na waghutseni wasomba wali mna ibahali, nawo watsowapetela.

9 Angu nani mna awano wose ing'amanyile baye,

ka ghumoko ghwa IMNDEWA ghugho ighutendile aghano?

10 Yeye mmoko mwake mna ugima wa chila chiumbe,

na imuhe ya chila munu pfipfila ya mmoko mwake.

11 Apfi si lighutwi baye ililghetsa ghamalonga,

ka apfila ilulimi pfalulanza ichijo?

12 Iwanu iwalalile wawo iwali na hekima

na awala iwakalile matsuwa mengi wawo iwomanya.

13 Lekeni ihekima na ngupfu yakwake yeye Imulungu.

yeye kana tsimbutsi tsose na komanya chila chinu,

14 yeye yang'abomola, kuduhu iyodaha kutsenga keli,

yang'amwoha imunu, kuduhu iyodaha kumdohola,

15 yang'akima ghamatsi, twopata chiyanga yanga,

yang'aghalekelela, isi yomema ghamatsi.

16 Kuna yeye kuna ngupfu na ihekima,

iwoghutsuka na iwoghutsukighwa wose wake yeye.

17 Yeye kowatenda iwakulu wange chidako,

na iwalamlitsi kowatenda wawe wabotsi.

18 Yeye kowatsula iwafalume itsikofiya tsawo.

na kowoha misipi ya utumwa mna ipfuno pfawo.

19 Yeye kowatsula iwatambika ghamagwanda ghawo,

na kowaghwisa hasi iwanu wana tsingupfu

20 Yeye kowaboka ingufu ya ukulonga iwanu awala iwotogholeka,

na kowaboka ihekima iwanzehe.

21 Kowaghela chinyala iwatawala,

na kowaboka tsisilaha awala wana tsingupfu.

22 Koghubula kulawa mchisi aghala ighapfisike,

na kogheka hatselu aghala ighakalile mna ichisi totolo.

23 Kotsitenda tsiisi tsiwe ng'ulu, kuya hambele kotsihinya.

kowongetsa iwanu wa isi wawe wengi, kuya kowaleka wapwililike.

24 Kowaboka ipfilongotsi wa tsiisi tsimbutsi tsawo,

na kowaleka wange wange kunyika kulihela nzila,

25 kuko wobamasabamasa mchisi kulihela ghumwanga,

na kowatenda watsenzeuke ka imunu iyapatike.