Milagres de Jesus

O Isus sasljarela e korolen hem e kašuken

27 Koga o Isus džala peske sine adathar, duj korole manuša džana sine pala leste, vikindor: "Žalin amen, Čhavo e Davideskoro!"

28 Koga khugja ko kher, o korole manuša ale ki leste, hem ov pučlja len: "Verujnena li deka šaj te kerav adava?"

Ola odgovoringe: "Oja, Gospode."

29 Togaš pipingja lengere jakha hem phengja: "Neka ovel spored tumari vera."

30 Hem irasalilo lengoro dikhibe. A o Isus silno opomeningja len vakerindor: "Nikoj ma te džanel bašo akava."

31 Ama ola iklile hem vakerge bašo akava sarinenge ko adava than.

O Isus sasljarela duje korole manušen

29 Dži kote o Isus hem o učenikija leskere iklona sine taro Erihon, pala leste džana sine bari gužva.

30 I akje, duj korole manuša bešena sine uza ko drumo, i koga šunge deka nakhela o Isus vikinge: "Gospode, Čhavo e Davideskoro, ov milostlivo prema amende!"

31 But džene zaptinge len hem phenge lenge te na vikinen, ama ola poviše vikinge: "Gospode, Čhavo e Davideskoro, ov milostlivo prema amende!"

32 O Isus ačhilo, vikingja len hem pučlja: "So mangena te kerav tumenge?"

33 Ola odgovoringe: "Gospode, mangaja te dikha."

34 E Isuseske pelo žal baši lenge hem čhigja pe vasta upro lengere jakha, i ola odma dikhle hem gele pala leste.

O Isus sasljarela korole manuše ki Vitsaida

22 Koga resle ki Vitsaida, nesave manuša ange ko Isus jekhe korole manuše hem molinge le te čhivel pe vasta upro leste. 23 O Isus astargja e korole manuše taro vas hem ikalgja le avrik taro gav, i čhungargja leske ko jakha hem čhigja pe vasta upro leste.

I pučlja le: "Dikheja li nešto?"

24 Ov počmingja te dikhel hem vakergja: "Dikhava e manušen. Dikhona sar te phene kašta phirena."

25 Panda jekh puti o Isus čhigja pe vasta leskere jakhende, hem o manuš phragja pe jakha, irangja pe leske o dikhibe hem dikhela sine sa šukar.

26 Togaš o Isus bičhalgja le khere hem phengja leske: "Ma khuv ko gav."

O Isus sasljarela jekhe manuše soj kašuko hem laloro

31 I palem o Isus iklilo taro Tir gelo ko Sidon hem palo adava gelo ko Galilejsko ezero, hem ko thana taro Dekapolis. 32 Nesave manuša ange ko Isus jekhe manuše, so sine kašuko hem phareste kerela sine lafi, i molinge le te čhivel po vas upro leste.

33 O Isus koga cidingja le ki jekh strana podur taro manuša hem čhigja pe naja ko leskere kana. Togaš čhungargja ko pe naja hem pipingja leskiri čhib. 34 Palo adava o Isus dikhla upre ko nebo, hor izdišingja hem vakergja leske: "Effata!" (So značinela: "Phravgjov!").

35 Odma phravdile leskere kana hem leskiri čhib, i počmingja šukar te kerel lafi.

36 I o Isus zapovedingja e manušenge nikaske te na vakeren bašo akava. Ama kozom zapovedinela sine lenge te na vakeren, ola poviše vakerena sine. 37 A o manuša but čudinena pe sine hem vakerena: "Sa šukar kerela – dži o kašuke te šunen hem o lalore te keren lafi."

O Isus sasljarela e korole Vartimeje

46 I agjar ale ko Erihon. Koga o Isus pe učenikoncar hem bute manušencar iklola sine taro Erihon, ko drumo bešela sine jekh korolo manuš so rodela peske sine pare. Leskoro anav sine Vartimej (so značinela "čhavo e Timejeskoro"). 47 Koga šungja deka nakhela o Isus taro Nazaret, vikingja: "Isuse, Čhavo e Davideskoro, ov milostlivo prema mande!"

48 But džene zaptinena le sine te na vikinel, ama ov poviše vikinela sine: "Čhavo e Davideskoro, ov milostlivo prema mande!"

49 O Isus ačhilo hem vakergja: "Vikinen le."

I ola vikinge e korole hem vakerge leske: "Ma dara! Ušti, o Isus vikinela tut!"

50 O Vartimej frdingja po mantili, uštingja ko pre hem alo anglo Isus.

51 I o Isus pučlja le: "So mangeja te kerav tuke?"

O korolo manuš vakergja: "Učitele, mangava te dikhav."

52 A o Isus phengja leske: "Dža tuke, ti vera sasljargja tut."

O manuš odma dikhla hem počmingja te džal palo Isus.

O Isus sasljarela e korole manuše

35 Koga o Isus alo paše uza ko Erihon, ko drumo bešela sine jekh korolo manuš so mangela peske sine. 36 Koga šungja sar o narodo nakhena, pučlja soj adava. 37 I vakerge leske: "O Isus taro Nazaret nakhela."

38 Togaš o korolo manuš vikingja: "Isuse, Čhavo e Davideskoro, ov milostlivo prema mande!"

39 A okola so phirena sine anglo Isus zaptinena le sine te na vikinel, ama ov poviše vikinela sine: "Čhavo e Davideskoro, ov milostlivo prema mande!"

40 O Isus ačhilo hem zapovedingja te anen le ki leste e korole manuše. Koga ange le uza leste, o Isus pučlja le: 41 "So mangeja te kerav tuke?"

O korolo manuš odgovoringja: "Gospode, mangava te dikhav."

42 I o Isus vakergja leske: "Dikh! Ti vera sasljargja tut."

43 O manuš odma dikhla hem gelo palo Isus, slavindor e Devle. Koga sa o manuša dikhle adava, slavinge e Devle.

2 Taro jekh puti alo jekh manuš so sine le lepra, pelo ko kočaka anglo leste hem phengja: "Gospode, te manglan šaj sasljareja man."

3 O Isus pružingja po vas, pipingja le hem phengja: "Mangava! Saslov!"

I odma saslilo tari lepra.

4 Togaš o Isus vakergja leske: "Ma vaker nikaske, samo dža hem sikav tut e sveštenikoske hem de žrtva sar so naredingja o Mojsej, te šaj te ovel svedoštvo lenge."

2 Nesave manuša ange ki leste jekhe sakate manuše, pašlo ki postela.

Koga dikhla o Isus lengiri vera, vakergja e sakateske: "Ma dara mo čhavo, oprostime tane te grevija."

3 Togaš nesave učitejla e Zakoneskere vakerge ki peste: "Akava hulinela!"

4 A o Isus džangja so mislinena, i pučlja len: "Soske agjar mislinena lošno ko tumare srcija? 5 Soj polokhe te vakerel pe: ‘Oprostime tane te grevija’, ili te vakerav leske: ‘Ušti hem phir’? 6 Ama ka dokažinav tumenge deka o Čhavo Manušeskoro isi le vlast ki phuv te oprostinel grevija." Togaš phengja e sakateske: "Ušti! Le ti postela hem dža tuke khere."

7 Ov uštilo hem gelo peske khere.

10 Hem adathe sine jekh manuš so leskoro vas sine šuko hem našti sine te koristinel le. A o fariseja rodena sine šanca te šaj te tužinen i pučle le: "Dali dozvolimo te sasljarel pe ki sabota?"

11 Ov phengja lenge: "Ako nekoj tumendar isi le bakhro hem pelo ki dupka ki sabota, nane li te astaren le hem te ikaven le? 12 A kozom i povredno o manuš taro bakhro! Adaleske ki sabota i dozvolimo te kerel pe šukaripe."

13 Togaš phengja e manušeske: "Pružin to vas!" Ov pružingja po vas hem leskoro vas saslilo, isto sar o dujto.

30 A andre sine pašli i sasuj e Simoneskiri so sine la bari treska, i odma adava vakerge e Isuseske. 31 Togaš o Isus alo uza late, astargja lakoro vas hem vazdingja la. Hem i treska odma mukhla la, i oj služingja lenge.

O Isus sasljarela leprozno manuše

40 Jekh manuš, so sine nasvalo tari lepra, alo anglo Isus, pelo ko kočaka hem silno molingja le: "Te manglan tu, šaj te sasljare man!"

41 E Isuseske pelo doborom žal, pružingja po vas, pipingja le hem vakergja: "Mangava! Saslov!"

42 Samo so phengja adava o Isus, i lepra taro manuš našavdili, hem ov saslilo.

3 Togaš sine štar džene so mangle te anen anglo Isus jekhe sakate manuše. 4 Pa koga dikhle deka našti avena anglo Isus taro narodo, phrage o krovi e khereskoro hem mukhle e sakate pe postelaja anglo Isus.

5 Koga o Isus dikhla lengiri vera, vakergja e sakateske: "Mo čhavo, oprostime tane te grevija!"

6 A adathe sine nesave učitejla e Zakoneskere so korkori pes pučle: 7 "Sar šaj akava te vakerel agjar? Koj šaj te oprostinel o grevija, osven o Devel? Ov hulinela!"

8 O Isus odma pe duhoja svatingja so ola mislinena, hem pučlja len: "Soske agjar mislinena ko tumare srcija? 9 Soj polokhe te vakerel pe akale sakateske: ‘Oprostime tane te grevija’ ili te vakerav leske: ‘Ušti, le ti postela hem dža tuke?’ 10 Ama ka dokažinav tumenge deka o Čhavo Manušeskoro isi le vlast ki phuv te oprostinel grevija" – i vakergja e sakateske: 11 "Tuke vakerava: Ušti! Le ti postela hem dža khere!"

12 I ov uštilo odma, lela pi postela hem iklilo avrik anglo sarinen.

I agjar sarine čudisalile hem počminge te slavinen e Devle vakerindor: "Asavko nešto nikat na dikhlem!"

O Isus sasljarela ki sabota

1 I khugja palem o Isus ki sinagoga, a adathe sine manuš so leskoro vas sine šuko hem našti sine te koristinel le. 2 Adathe sine manuša so adžikerena sine te dikhen dali o Isus ka sasljarel e manuše ki sabota, te šaj te tužinen le.

3 Togaš o Isus vakergja e manušeske so sine leskoro vas šuko: "Ava hem tergjov maškaral!" 4 I pučlja len: "Soj dozvolimo te kerel pe ki sabota: šukaripe ili lošnipe? Te spasinel pe životo ili te mudarel pe?"

A ola kjutinena sine.

5 I o Isus dikhla len holamo, hem sine leske but pharo bašo lengere barale vile. Hem phengja e manušeske: "Pružin to vas!"

Ov pružingja po vas hem leskoro vas saslilo.

O Isus sasljarela leprozno manuše

12 Dži kote o Isus sine ko jekh gradi, alo jekh manuš so sine le lepra ko celo telo. Koga dikhla e Isuse, pelo anglo leste mujeja dži ki phuv hem molingja le vakerindor: "Gospode, te manglan tu šaj te sasljare man."

13 O Isus pružingja po vas, pipingja le hem vakergja: "Mangava! Saslov!"

I odma i lepra našavdili lestar.

18 I nesave manuša legarena sine jekhe sakate manuše, pašlo ki postela. Ola mangle te anen le andre hem te čhiven le anglo Isus, 19 i adaleske so našti sine taro narodo te arakhen kotar te khuven, uklinge upro kher, phrage o krovi hem mukhle le sa e postelaja anglo Isus.

20 Koga o Isus dikhla lengiri vera, vakergja: "Manušeja, oprostime tane te grevija!"

21 A o fariseja hem o učitejla e Zakoneskere pučle pe ki peste: "Koj tano akava so hulinela? Koj šaj te oprostinela o grevija, osven o Devel?"

22 A o Isus džangja so mislinena i pučlja len: "Soske agjar mislinena ko tumare srcija? 23 Soj polokhe te vakerel pe: ‘Oprostime tane te grevija’, ili te vakerel pe: ‘Ušti hem phir’? 24 Ama ka dokažinav tumenge deka o Čhavo Manušeskoro isi le vlast ki phuv te oprostinel o grevija." Togaš phengja e sakateske: "Ušti! Le ti postela hem dža tuke khere."

25 I o manuš odma uštilo anglo lende, lela pi postela hem gelo khere slavindor e Devle.

O Isus sasljarela ki sabota

6 Ki javer sabota, khugja palem o Isus ki sinagoga hem sikavela sine, a adathe sine jekh manuš so leskoro desno vas šukilo hem našti sine te koristinel le. 7 Togaš o učitejla e Zakoneskere hem o fariseja adžikerena sine te dikhen dali o Isus ka sasljarel e manuše ki sabota, te šaj te tužinen le.

8 Ama o Isus džangja lengere misle i phengja e manušeske so sine leskoro vas šuko: "Ušti hem tergjov maškaral!"

Ov uštilo hem terdilo.

9 Togaš vakergja lenge: "Te pučav tumen: soj dozvolimo te kerel pe ki sabota: šukaripe ili lošnipe? Te spasinel pe životo ili te mudarel pe?"

10 I o Isus dikhla sarinende, hem phengja e manušeske: "Pružin to vas!"

Ov pružingja po vas hem leskoro vas saslilo.

E Rimsko kapetaneskiri vera

1 Koga o Isus završingja pe lafencar anglo manuša, khugja ko gradi Kapernaum. 2 A jekh Rimsko kapetani sine le sluga, so but poštojnela le sine, a o sluga sine meribaja jekh. 3 I koga o kapetani šungja bašo Isus, bičhalgja ki leste nesave Evrejska starešinen te molinen le te avel te sasljarel leskere sluga.

4 Koga ale ko Isus but molinge le vakerindor: "Ov zaslužinela te kere leske adava, 5 adaleske so ov mangela amare narodo hem kergja amenge i sinagoga."

6 I o Isus gelo lencar.

Koga sine paše uza ko kher, o kapetani bičhalgja leske pe amalen vakerindor: "Gospode, ma mučin tut, soske na zaslužinava te ave me khereste. 7 Adaleske so me na dikhava man dostojno te avav dži ki tute. Nego vaker samo jekh lafi hem mo sluga ka sasljol. 8 Soske me da sijum manuš telo avtoriteti, hem isi man vojnikija teli mande. Koga phenava jekheske: ‘Dža’ – ov džala, a javereske: ‘Ava’ – ov avela. Hem koga vakerava me slugaske: ‘Ker akava’ – ov kerela."

9 Koga šungja adava o Isus, čudingja pe, irangja pe ko narodo so džana sine pala leste hem phengja: "Vakerava tumenge, na arakhlum nikas ko Izrael, te ovel le doborom vera."

10 Togaš o manuša so sine bičhavde, irange pe ko kher hem arakhle e sluga sasto.

11 A adathe sine jekh romni, so o lošno duho kerela la sine te ovel nasvali. Oj sine grbalika dešuofto berš hem našti sine nisar te ispravinel pe.

12 Koga o Isus dikhla la, vikingja la ki peste hem phengja lake: "Manušnije, oslobodimi sijan taro to nasvalipe!"

13 I o Isus čhigja pe vasta upro late, i oj odma ispravingja pe hem počmingja te slavinel e Devle.

O Isus sasljarela e manuše ki sabota

1 Jekh sabota, o Isus gelo ko kher ko nesavo farisejsko vodači te hal. Sarinen so sine adathe, šukar pratinena le sine, 2 adaleske so adathe anglo leste sine jekh nasvalo manuš, so leskere vasta hem leskere pre sine pherde pani.

3 O Isus pučlja e farisejen hem e učitelen e Zakoneskere: "Dozvolimo li te sasljarel pe ki sabota ili na?" 4 Ama ola kjutinena sine. Togaš o Isus čhigja po vas upro nasvalo manuš, sasljargja le hem mukhla le te džal.

O Isus sasljarela deše leprozno manušen

11 Koga o Isus gelo ko Erusalim, nakhla maškar i granica tari Samarija hem tari Galileja. 12 Dži kote khuvela sine ko jekh gav, ki leste ale deš leprozna manuša so terdile podur lestar 13 hem vikinge sa pe glasoja: "Isuse, Učitele, ov milostlivo upra amende!"

14 Koga dikhla len o Isus, vakergja lenge: "Džan hem sikaven tumen e sveštenikonge!"

I dži kote džana sine ko drumo, sine sasljarde tari lepra.

15 I jekh lendar koga dikhla deka saslilo, irangja pe ko Isus slavindor e Devle sa pe glasoja. 16 Pelo anglo leskere pre mujeja dži ki phuv hem blagodaringja leske. A ov sine Samarijanco.

17 Togaš o Isus pučlja le: "Na saslilen li so deš džene? Kaj tane okola enja? 18 Nijekh li lendar na irangja pe te slavinel e Devle, osven akava manuš so nane Evrejco?"

19 I vakergja e manušeske: "Ušti hem dža! Ti vera sasljargja tut!"

20 Ko adava momenti ali pala leste jekh romni so dešuduj berš thavdela sine latar rat. I pipingja le ko krajo taro leskere šeja. 21 Soske oj phengja ki peste: "Samo te pipinav man ko leskere šeja, ka sasljovav."

22 O Isus irangja pe, dikhla la hem phengja lake: "Ma dara, mi čhaj, ti vera sasljargja tut."

Hem i romni ko adava momenti saslili.

25 Maškar lende sine jekh nasvali romni, so dešuduj berš thavdela sine latar rat. 26 But cidingja ko doktojra, sa pe pare trošingja mislindor deka ka ovel lake pošukar, a pološno uli. 27 Koga šungja e Isuseske, nakhla maškar o manuša hem palaldan pipingja leskere šeja. 28 Adaleske so akaja romni phengja ki peste: "Samo te pipinav man ko leskere šeja, me ka sasljovav." 29 I odma o rat čhinagja te thavdel latar, a oj osetingja pe deka saslili.

43 Maškar lende sine jekh nasvali romni, so dešuduj berš thavdela sine latar rat. Oj trošingja sa so sine la ko doktori, ama nikoj našti sine te sasljarel la. 44 Oj ali palo Isus hem pipingja le ko krajo taro leskere šeja, i odma ačhilo o rat te thavdel latar.

45 A o Isus pučlja: "Koj pipingja man?"

Sekoj lendar phenge: "Na sijum me." A o Petar phengja leske: "Učitele, sar te džana koga but džene khedinge pe hem gurinena pe upro tute."

46 A o Isus vakergja leske: "Nekoj pipingja man. Osetingjum deka iklili mandar sila."

47 Togaš i romni dikhla deka našti garavela pe, tresindor tari dar ali hem peli mujeja anglo leskere pre hem vakergja anglo sa o manuša soske pipingja le hem sar odma saslili.

48 A o Isus phengja lake: "Mi čhaj, ti vera sasljargja tut! Dža tuke mireja."

O Isus vazdela e čhaja taro mule hem sasljarela e nasvale romna

18 Dži kote o Isus vakerela sine akava, alo jekh vodači tari sinagoga, pelo ko kočaka anglo leste hem vakergja leske: "Mi čhaj samo so muli. Ama ava hem čhiv to vas upro late, hem oj ka ovel dživdi."

19 O Isus uštilo hem zaedno pe učenikoncar gelo pala leste.

23 Koga o Isus khugja ko kher e vodačeskoro tari sinagoga, dikhla e manušen so bašalena sine flejta baši muli čhaj hem bute manušen so rovena, 24 i vakergja lenge: "Džan tumenge! I čhaj na muli, oj sovela."

A ola asandile leske.

25 Koga o manuša iklile avrik, o Isus khugja kote so sine i čhaj, astargja lakoro vas hem oj uštili.

22 Togaš alo ko Isus o Jair, jekh taro vodačija e sinagogakere hem pelo ko kočaka anglo leskere pre. 23 I silno molingja le: "Mi čhaj i meribaja jekh! Ava čhiv te vasta upro late te sasljol hem te živinel!"

24 I o Isus gelo leja. A but manuša džana sine pala leste hem gurinena pe sine upro leste.

38 Koga ale dži ko kher e Jairesko, o Isus dikhla bute manušen, sar rovena hem vikinena sa pe glasoja. 39 Khugja andre hem vakergja: "Soske rovena hem vikinena? I čhaj na muli, oj sovela!" 40 A ola asandile leske.

I o Isus zapovedingja sarinenge te iklon avrik, samo te ačhoven andre o dad hem i daj e čhajakiri hem leskere trin učenikija so ale pala leste. Hem khugja adathe kote so sine i čhaj pašli.

41 Ov astargja o vas e čhajakoro hem vakergja lake: "Talita, kumi!" (So značinela: "Čhaje, tuke vakerava, ušti!").

42 I čhaj odma uštili hem počmingja te phirel, hem sarine čudisalile. A la sine la dešuduj berš.

31 I o Isus phengja: "Togaš soleja te sporedinav akaja generacija? Soleja tani slično? 32 Ola tane sar čhave so bešena ko pazajra hem vakerena jekh jekheske:

‘Bašalgjem tumenge ki flejta,

a na khelgjen.

Gilagjem tumenge tažna gijla,

a na rungjen.’

33 Soske koga alo o Jovan Krstitel, ni hala ni pila sar javera, a tumen vakerena: ‘Isi le demoni.’ 34 Alo o Čhavo Manušeskoro, hala hem pijela, a tumen vakerena: ‘Akje o bokhalo hem o pijanica, amal e danočnikongoro hem e javere grešnikongoro.’ 35 Ama i mudrost dokažinela pe taro lakere čhave."

I grešnica pomazinela e Isuse

36 Jekh taro fariseja so sine leskoro anav Simon vikingja e Isuse te avel te hal ki leste. Ov khugja ko kher e farisejeske hem alo uza ko astali. 37 I akje ko adava gradi sine jekh džuvli so džanela pe deka sine grešnica. Koga šungja deka o Isus hala ko kher e farisejeskoro, ali hem angja šiši kerdo taro mermeri, a andre ki leste sine mirizlivo ujle.

41 Togaš alo ko Isus jekh manuš so vikinela pe sine Jair, so sine vodači ki sinagoga. Ov pelo anglo pre e Isuseskere hem molinela le sine te avel leste ko kher. 42 Adaleske so e Jaire sine le jekh čhaj, so sine la dešuduj berš hem sine meribaja jekh.

Dži kote o Isus džala sine palo Jair, but manuša gurinena pe sine upro leste.

49 Dži kote kerela sine lafi o Isus, alo nesavo manuš taro kher e Jaireskoro, o vodači e sinagogakoro hem vakergja leske: "Ti čhaj muli; ma dosadin više e učitele."

50 Koga šungja akava o Isus vakergja e Jaireske: "Ma dara! Samo verujn hem oj ka ovel sasti."

51 I koga resla o Isus ko kher e Jaireskoro, nikas na mukhla te khuven leja, osven e Petare, e Jovane e Jakove hem e čhajakere dade hem e daja. 52 A sarinen so sine ko kher, rovena sine hem tugujnena palo late.

A o Isus phengja: "Ma roven! Oj nane muli, nego sovela."

53 I ola asandile leske soske džange deka tani muli.

54 A o Isus gelo hem astargja la taro vas hem vakergja: "Čhaje, ušti!" 55 I lakoro duho irangja pe ki late hem oj odma uštili. Togaš o Isus vakergja te den la te hal. 56 Lakoro dad hem lakiri daj sine but čudime, ama o Isus zapovedingja lenge ma te vakeren nikaske so ulo.

O Isus smirinela i bura

23 Togaš o Isus khugja ko čamco, a pala leste khuge hem leskere učenikija. 24 I taro jekh puti ko ezero astargja len bari bura, adaleja so o čamco počmingja te phergjol pani taro talasija, a o Isus sovela sine.

25 O učenikija gele hem vazdinge le, vakerindor: "Gospode, spasin amen! Ka taslova!"

26 O Isus pučlja len: "Tikne verakere, soske doborom darana?" Togaš uštilo, zapovedingja e bavlalake hem e ezeroske te ačhon, i uli bari tišina.

27 A o manuša čudisalile hem pučle: "Koj akava so i bavlal da hem o talasija da šunena le?"

15 I koga sine kasno, ale o učenikija uza leste hem phenge leske: "Kasno i više, a ko akava than nane ništo. Mukh e manušen te džan ko gava te šaj kinena peske maro."

16 A o Isus vakergja lenge: "Na trebela te džan. Den len tumen nešto hajbaske."

17 Ola odgovoringe leske: "Akate isi amen samo pandž mare hem duj mačhe."

18 A ov phengja: "Anen len mange akate." 19 I naredingja e manušenge te bešen ki čar.

Togaš lela o pandž mare hem o duj mačhe dikhla upre ko nebo, blagodaringja hem phagla o mare. Palo adava dengja pe učenikonge, a o učenikija denge len e manušenge. 20 Sarinen hale hem čalile, a taro adava so ačhilo o učenikija khedinge dešuduj korpe hajbe. 21 A adala so hale sine paše pandž ilade murša, bizo te gejnen pe o romna hem o čhave.

25 A maškar o trin dži ko šov o sati sabajle, o Isus alo ki lende phirindor upro pani.

O Isus parvarela poviše taro štar ilade manuša

32 O Isus vikingja pe učenikon uza peste hem phengja lenge: "Pharo mange akale manušenge. Trin dive tane mancar a nane len so te han. Na mangava te mukhav len bokhale, te na peren ko drumo."

33 A leskere učenikija pučle le: "Kaj šaj arakhaja ko akava čučo than dovolno maro bašo sa akala manuša te čajloven?"

34 O Isus pučlja len: "Kozom mare isi tumen?"

Ola odgovoringe: "Efta mare hem nekozom tikne mačhe."

35 Togaš o Isus vakergja e manušenge te bešen tele ki phuv. 36 Lela o efta mare, hem o mačhe, blagodaringja lenge, phagla len hem dengja pe učenikonge, a ola delinge len e manušenge. 37 Sarinen hale hem čalile. A taro adava so ačhilo o učenikija khedinge efta pherde bare korpe. 38 Adala so hale sine štar ilade murša, bizo te gejnen pe o romna hem o čhave.

E Hrameskoro danok

24 Koga o Isus hem leskere učenikija resle ko Kapernaum, ale ko Petar nesave manuša so khedena sine danok e hrameskoro so sine duj drahme, i pučle le: "Tumaro učiteli platinela li danok e Hrameske?"

25 O Petar odgovoringja: "Oja, platinela."

Koga o Petar khugja ko kher, o Isus angleder leste phengja hem pučlja le: "So mislineja, Simone, kastar o cajra e phuvijakere khedena carina hem danok? Taro pe čhave ili taro javera?"

26 O Petar odgovoringja: "Taro javera."

Togaš o Isus phengja: "Znači o čhave na trebela te platinen. 27 Ama, te na uvredžina len, dža ko ezero hem frde i jadica. O prvo mačho so ka astare, phrav o muj leskoro hem ka arakhe pare taro štar drahme. Le hem platin lenge baši mange hem tuke o danok."

O Isus prokletinela i smokva

18 Rano sabajleja dži kote o Isus iranela pe sine ko gradi bokhalilo. 19 Koga dikhla jekh smokva uza ko drumo, gelo uza late, ama ki late na arakhla ništo osven listija.

I togaš ov phengja: "Nikat više te na de plodija!" I odma o kaš šukilo.

20 Koga dikhle adava o učenikija, čudisalile hem pučle: "Sar šaj sine o kaš odma te šukjol?"

21 A o Isus odgovoringja: "Čače, vakerava tumenge, ako isi tumen vera hem na sumningjen tumen, na samo so šaj te keren adava so ulo e smokvaja, nego hem šaj te vakeren akale planinake: ‘Ušti hem frde tut ko more’, hem ka ovel agjar. 22 Ako verujnena, ka dobinen sa so ka roden ki molitva."

37 Hem taro jekh puti ko ezero astargja bari bura. I počminge silna talasija te khuven ko čamco, adaleja so o čamco počmingja te phergjol pani. 38 A ko adava momenti o Isus sine pašlo ko jastuko hem hor zasuto.

A o učenikija koga dikhle deka sovela, uštarge le hem vakerge leske: "Učitele, nane li tuke pharo so ka mera?"

39 O Isus uštilo, zapovedingja e bavlalake te ačhol, hem phengja e ezeroske: "Smirin tut!" I bavlal ačhili hem uli bari tišina.

40 I o Isus vakergja pe učenikonge: "Soske doborom darana? Panda li nane tumen vera?"

41 Ola but darandile hem pučle pe maškar peste: "Koj tano akava so i bavlal da hem o talasija da šunena le?"

35 I koga sine kasno, ale leskere učenikija hem phenge leske: "Kasno i više a ko akava than nane ništo. 36 Mukh e manušen te džan ko najpaše gava hem thana te šaj kinena peske maro."

37 O Isus phengja lenge: "Den len tumen nešto hajbaske!"

Ola pučle le: "Kotar? Amenge trebela pare so dena pe jekhe beršeske te šaj te kina maro sa akale manušenge!"

38 A ov pučlja len: "Kozom mare isi tumen? Džan hem dikhen."

Koga dikhle, vakerge: "Pandž mare hem duj mačhe."

39 Togaš o Isus vakergja sarinenge te bešen ko grupe tele ki zeleno čar. 40 Hem bešle ko grupe po šel hem po pinda džene.

41 Ov lela o pandž mare hem o duj mačhe, dikhla upre ko nebo, hem blagodaringja bašo hajbe. Phagla o mare hem dengja pe učenikonge te delinen e manušencar, hem isto agjar ov delingja sarinenge adala duj mačhe. 42 I sarinen hale hem čalile. 43 Sa adava so ačhilo, khedinge, hem ačhilo len panda dešuduj korpe maro hem mačhe. 44 A adala so hale sine pandž ilade murša (bizo te gejnen pe o romna hem o čhave).

48 Hem dikhla e učenikon sar phareste veslinena o čamco, soske prema lende phudela sine i bavlal. A sine paše maškar o trin dži ko šov o sati sabajle. Togaš ov alo ki lende phirindor upro pani hem haričkake ka nakhel sine uza lende, 49 ama ola, koga dikhle le sar phirela upro pani, počminge te vikinen, soske mislinge deka tano duho. 50 Sarinen dikhle le hem uklingja len bari dar. A o Isus odma phengja lenge: "Oven silna! Ma daran! Me sijum."

51 Togaš khugja ko čamco hem i bavlal ačhili. A ola but čudinge pe taro sa akava,

O Isus parvarela štar ilade manušen

1 Ko adala dive palem khedisalili bari gužva. I adaleske so na sine len so te han, o Isus vikingja pe učenikon uza peste hem phengja lenge: 2 "Pharo mange akale manušenge. Trin dive tane mancar, a nane len so te han. 3 Ako mukhlum len te džan peske bokhale khere, ka peren ko drumo, soske nesave lendar ale duraldan."

4 A o učenikija pučle le: "Kaj šaj te arakha ko akava čučo than dovolno maro bašo sa akala manuša te čajloven?"

5 O Isus pučlja len: "Kozom mare isi tumen?"

Ola phenge: "Efta."

6 Togaš vakergja e manušenge te bešen tele ki phuv, lela o efta mare, blagodaringja e marenge, phagla len, hem dengja pe učenikonge, a ola delinge len e manušenge. 7 Hem isto agjar sine len nekozom tikne mačhe. O Isus blagodaringja lenge da, hem phengja e učenikonge len da te delinen. 8 Sarinen hale hem čalile. Hem khedinge efta korpe taro adava so ačhilo. 9 Adala so hale sine štar ilade manuša. Palo adava o Isus mukhla len te džan peske.

O Isus prokletinela i smokva

12 O tajsutno dive, koga iklilo tari Vitanija, o Isus bokhalilo. 13 A duraldan dikhla jekh smokva, so sine učhardi listoncar, hem alo te dikhel dali isi la plodija. Koga alo uza late, dikhla deka nane la ništo samo listija, soske na sine o vreme bašo smokve.

14 Togaš phengja e kašteske: "Nikoj te na hal više taro to plodi!"

A leskere učenikija šunge so phengja adava.

I lekcija e smokvakiri

20 Tajsutno dive, dži kote nakhena sine, dikhle i smokva so šukili taro koreno.

21 O Petar setingja pe hem phengja e Isuseske: "Učitele, dikh! I smokva, so prokletingja la, šukili!"

22 A o Isus odgovoringja: "Neka ovel tumen vera ko Devel. 23 Čače, vakerava tumenge ako nekoj vakergja akale planinake: ‘Ušti hem frde tut ko more,’ hem na sumningja pe ko po srce, hem verujnela deka ka ovel adava so phengja, ka ovel čače kerdo. 24 Adaleske vakerava tumenge, sa so ka roden ki molitva, verujnen deka primingjen adava hem ka ovel tumaro adava. 25 Koga tergjovena ki molitva, oprostinen te isi tumen nešto protiv nekaste, te šaj tumaro Dad soj ko nebo te oprostinel tumare grevija."

O Isus vikinela e prvo učenikon

1 Jekh dive dži kote o Isus tergjola sine uza ko Galilejsko ezero, i gužva gurinena pe sine uza leste hem šunena sine o lafi e Devleskoro. 2 Ov dikhla duj čamcija uza ko ezero, so o ribajra mukhle len adathe, soske thovena sine pumare mreže. 3 I khugja ko jekh čamco, so sine e Simoneskoro, i zamolingja le te cidel pe hari taro kopno. Palo adava bešla ko čamco hem sikavela sine e manušen.

4 Koga završingja vakerindor, phengja e Simoneske: "Dža e čamcoja ko hor hem frden tumare mreže te astaren mačhe."

5 A o Simon odgovoringja leske: "Gospodare, celo rat mučingjem amen hem ništo na astargjem, ama ako tu pheneja, ka frdav o mreže."

6 Koga kerge adava, astarge sa doborom mačhe so o mreže počminge te pharavgjoven. 7 I vastencar vikinge pumare amalen, so sine ko javer čamco, te aven te pomožinen len. I ola ale hem pherge o solduj čamcija doborom so počminge te batinen ko pani.

8 A koga dikhla adava o Simon o Petar, pelo ko kočaka anglo Isus hem phengja leske: "Dža tuke mandar, Gospode, me sijum grešno manuš!" 9 Adaleske so uklingja le dar, le hem sarinen so sine leja bašo o baro astariba e mačhengoro. 10 A isto agjar uklingja len dar e Jakove hem e Jovane, e Zavedejeskere čhaven so sine e Simoneskere amala.

Togaš o Isus phengja e Simoneske: "Ma dara! Taro akava dive nane te astare mačhe, nego manušen."

11 I koga cidinge o čamcija ko kopno, mukhle sa hem gele palo Isus.

O Isus smirinela i bura

22 Jekh dive o Isus phengja pe učenikonge: "Te nakha tari okoja strana taro ezero!"

I uklinge ko čamco hem cidinge. 23 Dži kote plovinena sine, o Isus zasukja. I astargja jekh silno bura upro ezero. Adaleja so o čamco počmingja te phergjol pani hem ola sine ki bari opasnost.

24 O učenikija gele ko Isus hem vazdinge le vakerindor: "Učitele, učitele ka tasavgjova!"

O Isus uštilo hem zapovedingja e bavlalake hem e ezeroske te ačhon, a i bura ačhili hem sine tišina.

25 Togaš ov pučlja e učenikon: "Kaj tani tumari vera?"

A ola darandile hem čudinge pe, i pučle pe maškar peste: "Koj tano akava, so i bavlal da hem o talasija da šunena le?"

O Isus smirinela i bura

22 Jekh dive o Isus phengja pe učenikonge: "Te nakha tari okoja strana taro ezero!"

I uklinge ko čamco hem cidinge. 23 Dži kote plovinena sine, o Isus zasukja. I astargja jekh silno bura upro ezero. Adaleja so o čamco počmingja te phergjol pani hem ola sine ki bari opasnost.

24 O učenikija gele ko Isus hem vazdinge le vakerindor: "Učitele, učitele ka tasavgjova!"

O Isus uštilo hem zapovedingja e bavlalake hem e ezeroske te ačhon, a i bura ačhili hem sine tišina.

25 Togaš ov pučlja e učenikon: "Kaj tani tumari vera?"

A ola darandile hem čudinge pe, i pučle pe maškar peste: "Koj tano akava, so i bavlal da hem o talasija da šunena le?"

O Isus ikalela demonen taro manuš

26 O Isus hem leskere učenikija resle ki Gadarinsko phuv, soj tano tari okoja strana taro Galilejsko ezero.

12 I koga počmingja te perel o kham, o dešuduj apostojla ale ko Isus hem phenge leske: "Mukh e manušen te džan ko najpaše gava hem thana te šaj arakhena nešto hajbaske hem than sojbaske. Adaleske so amen sijem akate ko čučo than kote so nane ništo."

13 O Isus odgovoringja lenge: "Den len tumen nešto hajbaske!"

Ola phenge: "Amen isi amen samo pandž mare hem duj mačhe, osven ako gelem te kina maro bašo sa akava narodo." 14 A adathe sine pandž ilade murša.

Togaš o Isus phengja pe učenikonge: "Neka bešen ko grupe po pinda."

15 I ola kerge agjar, hem čhige sarinen te bešen. 16 O Isus lela o pandž mare hem o duj mačhe, dikhla upre ko nebo, hem blagodaringja bašo hajbe. Phagla len hem dengja pe učenikonge te delinen e manušencar. 17 I sarinen hale hem čalile, a taro adava so ačhilo o učenikija khedinge dešuduj korpe hajbe.