1 Pali sabota, rano sabajle ko prvo dive taro kurko, i Marija tari Magdala hem okoja Marija gele te dikhen o grobo.

2 Taro jekh puti sine baro zemjotres, adaleske so o angeli e Gospodareskoro hulingja taro nebo, alo ko grobo, cidingja o bar hem bešla upro leste. 3 Leskoro izgled sine sar o gromi hem leskere šeja sine parne sar o iv. 4 O čuvajra doborom darandile so počminge te tresinen hem ule sar mule.

5 A o angeli phengja e romnenge: "Ma daran! Džanava deka rodena e Isuse so mulo ko krsto. 6 Ov nane akate; uštilo taro mule, sar so phengja tumenge. Aven hem dikhen o than kaj so pašlilo. 7 I džan sigate hem vakerena leskere učenikonge: ‘Uštilo taro mule hem džala angleder tumendar ki Galileja. Adathe ka dikhen le.’ Akje vakergjum tumenge."

8 I ola sigate gele peske daraja taro grobo hem so bari radost prastandile te vakeren leskere učenikonge.

9 Taro jekh puti resla len o Isus hem phengja lenge: "Zdravo!"

A ola ale uza leste, astarge leskere pre hem pokloninge pe leske.

10 Togaš o Isus phengja lenge: "Ma daran. Džan hem vakeren me phralenge te džan ki Galileja. Adathe ka dikhen man."

11 Dži kote o romnja sine ko drumo, nesave taro čuvajra khuge ko gradi hem vakerge e prvosveštenikonge sa so ulo. 12 Ola khedinge pe e starešinencar hem dogovoringe pe te den but pare e vojnikonge.

13 I phenge lenge: "Vakeren: ‘Leskere učenikija ale rakjate hem čorge leskoro telo dži kote amen sovaja sine.’ 14 A te šungja bašo akava o Pilat, amen ka kera leja lafi hem ka sredina te na ovel tumen problemija."

15 O vojnikija lele o pare hem kerge sar so sine lenge phendo. Hem akaja prikazna vakerela pe maškar o Evreja sa dži avdive.

16 Togaš o dešujekh učenikija gele ki Galileja, ki planina kaj so phengja lenge o Isus. 17 I koga dikhle le, pele ko kočaka anglo leste. Ama nesave lendar sumninge pe.

18 Togaš o Isus alo uza lende hem phengja lenge: "Dendi mange celo vlast ko nebo hem ki phuv. 19 Adaleske džan hem keren e manušen taro sa o nacije te oven me učenikija hem krstinen len ko anav e Dadeske, e Čhaveske hem e Sveti Duhoske 20 hem sikaven len te ikeren sa so zapovedingjum tumenge. Akje, me sijum tumencar ko sa o dive, dži ko krajo e svetoskoro."