1 O Isus palem počmingja te vakerel ko parabole: 2 "O carstvo nebesno tano sar caro so kergja bijav pe čhaveske. 3 Ov bičhalgja pe slugjen, te vikinen okolen so sine pokanime ko bijav, ama ola na mangle te aven.

4 Palo adava bičhalgja javeren slugjen hem phengja: ‘Vakeren okolenge soj pokanime deka o hajbe i kerdo. Pekljem najšužo guruvano mas. Sa i kerdo, "Aven ko bijav."’

5 Ama ola na šunge nego gele – jekh ki pi niva, a javer ki pi buti. 6 A javera astarge e caroskere slugjen, marge len hem mudarge len.

7 A o caro holangja, i bičhalgja pe vojska hem mudargja adalen so mudarge leskere slugjen hem thargja lengoro gradi.

8 Togaš phengja pe slugjenge: ‘O bijav i spremimo, ama okolen so pokaningjum na zaslužinge te aven. 9 Adaleske, džan avrik taro gradi hem vikinen kas ka arakhen ko bijav.’ 10 Agjar o sluge iklile ko drumija hem khedinge sa e manušen so šaj sine te arakhen hem lošna hem šukar. A i sala e bijaveskiri pherdili gostencar.

11 Koga o caro khugja te dikhel e gosten, dikhla jekhe manuše so na sine uravdo bijaveskere šeja, 12 i pučlja le: ‘Amala, sar khugjan tu akate, a na sijan uravdo bijaveskere šeja?’ A ov kjutinela sine.

13 Togaš o caro phengja pe slugjenge: ‘Phanden leskere vasta hem leskere pre hem frden le avrijal ko najtemno than, kote so ka ovel rojba hem krckjiba dandencar.’

14 Adaleske but tane vikime, ama hari tane birime."

15 Togaš o fariseja iklile hem dogovoringe pe sar te astaren e Isuse ko lafi. 16 Ola bičhalge ko Isus pumare učenikon zaedno e Irodeskere manušencar te pučen le: "Učitele, džanaja deka vakereja o čačipe hem na ikereja nikaskiri strana, soske na dikheja koj tano koj, nego čače sikaveja o drumo e Devleskoro. 17 Vaker amenge so mislineja? Trebela li te da e Cezareske o danok ili na?"

18 Ama o Isus džangja lengere lošna misle hem phengja lenge: "Dujemujengere! Soske mangena te mestinen man? 19 Sikav mange o dinari soleja platinena o danok."

Ola ange leske o dinari, 20 hem ov pučlja len: "Kaskiri slika hem kaskoro anav tano ko dinari?"

21 Ola phenge: "E Cezareskoro."

Togaš o Isus vakergja lenge: "Hem agjar, adava soj e Cezareskoro den le e Cezareske, a adava soj e Devleskoro, den le e Devleske."

22 Koga ola šunge adava iznenadisalile, mukhle le hem gele.

23 Ko adava dive nesave sadukeja so vakerena sine deka nane uštibe taro mule ale ko Isus hem pučle le: 24 "Učitele, o Mojsej phengja: ‘Ako nesavo ženimo manuš mulo, a na mukhla čhave pala peste, leskoro phral trebela te lel leskere romna te šaj oj te bijanel čhave so ka ovel nasledniko e muleskoro.’

25 Agjar sine efta phrajla maškar amende. O prvo lela romni hem mulo, ama adaleske so na mukhla čhave pala peste, pe romna mukhla la pe dujtone phraleske. 26 Agjar mulo o dujto hem o trito phral, hem agjar sa dži ko eftato phral. 27 Ki krajka muli hem i romni. 28 Togaš kaskiri romni ka ovel oj, koga ka uštel pe taro mule, a sa o phrajla ikerge la?"

29 O Isus odgovoringja lenge: "Hovavge tumen, soske na džanena o Sveto Lil hem i sila e Devleskiri. 30 Koga ka ušten taro mule, o manuša nane te len pe, nego ka oven sar angejla ko nebo. 31 Ama bašo uštiba taro mule, na čitingjen li ko Sveto Lil so o Devel phengja tumenge: 32 ‘Me sijum o Devel e Avraameskoro, e Isakoskoro hem e Jakoveskoro’ so mule angleder? Adaleske ov nane Devel e mulengoro, nego e dživdengoro."

33 Koga o manuša šunge adava, but čudisalile taro leskoro učibe.

34 Koga šunge o fariseja deka o Isus phandla o muj e sadukejengoro khedinge pe, 35 i jekh lendar so sine učiteli e Zakoneskoro, mangla te astarel e Isuse jekhe pučibaja: 36 "Učitele, koja tani i najbari zapoved ko Zakoni e Mojseskoro?"

37 O Isus odgovoringja leske: " ‘Mang te Gospodare te Devle sa te srceja, sa te dušaja hem sa te gogjaja.’ 38 Akaja tani i prvo hem najbari zapoved. 39 A i dujto tani slično sar akaja: ‘Mang te pašutne sar tut so mangeja.’ 40 Sa o zapovedija taro Zakoni hem o lila e prorokongere tane ko akala duj zapovedija."

41 Dži kote o fariseja sine khedime, o Isus pučlja len: 42 "So mislinena bašo Hristos? Kaskoro čhavo tano?"

Ola odgovoringe leske: "E Davideskoro."

43 A ov pučlja len: "Sar togaš o David, kerindor lafi preku o Duho vikinela le ‘Gospode?’ Soske ov phengja:

44 ‘O Gospodari phengja me Gospodareske:

Beš tari mi desno strana

sa dži kote na čhivava te dušmanen

telo te pre.’✝

45 Ako o David vikingja le ‘Gospode’, sar šaj o Hristos te ovel leskoro čhavo?"

46 Nikoj na džangja so te phenel leske ko adala lafija. I taro adava dive nikoj više na alo te pučel le.