1 Ko adava vreme o Isus ki sabota nakhla maškar o nive, a o učenikija leskere bokhalile hem počminge te phagen klasija giv hem te han.

2 Koga dikhle adava o Fariseja vakerge leske: "Dikh, te učenikija kerena adava so nane dozvolimo taro Zakoni ki sabota."

3 A o Isus odgovoringja lenge: "Na čitingjen li so o David kergja, koga sine bokhale ov hem o manuša so sine leja? 4 Ov khugja ko kher e Devleskoro, i ov hem okola so sine leja hale o maro so sine posvetimo, so nasminela sine nikoj te hal osven o sveštenikija. 5 Ili na čitingjen li ko Zakoni deka o sveštenikija phagena o Zakoni adaleja so kerena buti ki sabota ko Hrami, a palem nane kriva. 6 A me phenava tumenge deka akate tano adava soj pobaro taro Hrami. 7 Te džanen sine so značinena akala lafija: ‘Milost mangava a na samo žrtva’, nane sine te sudinen akalen so nane kriva. 8 Adaleske o Čhavo Manušeskoro tano Gospodari e sabotakoro."

9 I adathar o Isus gelo ki lengiri sinagoga. 10 Hem adathe sine jekh manuš so leskoro vas sine šuko hem našti sine te koristinel le. A o fariseja rodena sine šanca te šaj te tužinen i pučle le: "Dali dozvolimo te sasljarel pe ki sabota?"

11 Ov phengja lenge: "Ako nekoj tumendar isi le bakhro hem pelo ki dupka ki sabota, nane li te astaren le hem te ikaven le? 12 A kozom i povredno o manuš taro bakhro! Adaleske ki sabota i dozvolimo te kerel pe šukaripe."

13 Togaš phengja e manušeske: "Pružin to vas!" Ov pružingja po vas hem leskoro vas saslilo, isto sar o dujto. 14 A o fariseja iklile hem počminge te dogovorinen pe sar te mudaren e Isuse.

15 Koga doznangja adava o Isus, cidingja pe adathar. A palo leste džana sine bari gužva hem ov sasljargja sa e nasvalen. 16 Hem opomeningja len te na vakeren javerenge baši leske. 17 Te šaj te phergjol adava soj phendo preku prorok Isaija:

18 "Akje tano mo Sluga, so biringjum le.

Mo manglo, so ki leste mi duša bahtali.

Ka čhivav mo Duho upro leste,

hem ov ka sikavel i pravda e narodonge.

19 Nane te košel pe ili te vikinel,

nikoj nane te šunel o glaso leskoro ko ulice.

20 Ni o gazime trske nane te phagel,

hem nane te ačhavel i momoli so pohari thablola

sa dži kote na anela i pravda ki pobeda.

21 Ko leskoro anav o narodo ka nadinen pe."✝

22 Togaš anglo Isus ange jekhe manuše so sine opsednimo demonencar. Ov sine korolo hem laloro, i o Isus sasljargja le, te šaj te dikhel hem te kerel lafi. 23 Hem sa o narodo čudisalilo hem vakergja: "Te nane akava o Čhavo e Davideskoro?"

24 Ama koga šunge adava o fariseja, vakerge: "Akava ikalela e demonen e Veelzevuleskere silaja, o gospodari e demonengoro."

25 O Isus džangja lengere misle hem vakergja: "Sekova carstvo soj maškar peste delimo ka ovel uništimo, hem sekova gradi ili kher so maškar peste tano delimo, ka perel. 26 Ako o Beng ikalela e Benge, ov tano delimo maškar peste. Sar togaš šaj ačhola leskoro carstvo? 27 Ako me ikavava e demonen e Veelzevuleskere silaja, tumare učenikija kaskere silaja ikavena len? Adaleske ola ka oven tumare sudije. 28 Ama, ako e Devleskere Duhoja ikagjum demonen, togaš e Devleskoro carstvo alo upra tumende.

29 Ili sar šaj nekoj te khuvel ko kher kote so bešela zoralo manuš hem te čorel le, osven ako angleder na phandla le? Togaš, koga ka phandel le, ka šaj te čorel sa taro kher.

30 Koj nane mancar, ov tano protiv mande, a koj na khedela mancar, ov rasturinela. 31 Adaleske phenava tumenge: e manušenge šaj te oven oprostime sa o grevija hem o hule so hulinena, ama nane te ovel lenge oprostimo i hula upro Sveti Duh. 32 Hem sekoj so ka vakerel lafi protiv o Čhavo Manušeskoro šaj te ovel leske oprostimo, ama sekoj so ka kerel lafi protiv o Sveti Duh nane te ovel leske oprostimo, ni ko akava sveto ni ko okova so avela.

33 Sadinen šukar kaš, i leskere plodija ka oven šukar, ili ako sadingjen lošno kaš, leskere plodija ka oven lošna, soske o kaš pendžarela pe taro leskoro plodi. 34 Tumen e sapeskere čhave, sar šaj tumen so sijen lošna te vakeren nešto šukar? Soske o muj vakerela adava soleja o srce tano pherdo. 35 O šukar manuš ikalela šukar bukja taro šukaripe so isi ki leste, a o lošno manuš ikalela lošna bukja taro lošnipe so isi ki leste. 36 Ama phenava tumenge deka sekoj ka odgovorinel ko sudno dive baši sekova jekh čučo lafi so vakergja. 37 Soske te lafencar ka ove ili opravdimo ili sudimo."

38 Togaš nesave učitejla e Zakoneskere hem o fariseja phenge leske: "Učitele, mangaja te dikha znako tutar."

39 A o Isus odgovoringja lenge: "I lošno hem i neverno generacija rodela znako! Ama nisavo znako nane te del pe, osven o znako so ulo e prorokoja e Jonaja. 40 Soske sar o Jona so sine trin dive hem trin rakja ko vogi e bare mačheske, agjar o Čhavo Manušeskoro ka ovel trin dive hem trin rakja ko najhor than tari phuv. 41 Ko sudno dive, o manuša taro gradi Ninevija ka ušten protiv akaja generacija hem ka sudinen la, soske ola pokajnge pe koga o Jona propovedingja, a akate tano nekoj pobaro taro Jona. 42 Ko sudno dive, i kralica taro jug ka uštel protiv akaja generacija hem ka sudinel la, soske oj ali taro krajo e svetoskoro te šunel e Solomoneskiri mudrost, a akate tano nekoj pobaro taro Solomon."

43 "Koga o lošno duho iklola taro manuš, ov nakhela taro šuke thana rodindor odmor. Koga na arakhela 44 vakerela: ‘Ka iranav man ko kher kotar so iklilum.’ I koga ka resel arakhela o kher čučo, čistimo hem namestimo. 45 Togaš džala hem lela peja efta javera duhija soj pološna lestar, hem ola khuvena hem živinena adathe. I ko krajo adava manuš ovela pološno nego angleder. Agjar ka ovel akale lošno generacijaja."

46 Dži kote o Isus kerela sine lafi e manušencar, i daj leskiri hem leskere phrajla tergjona sine avrik hem adžikerena sine te keren leja lafi. 47 I nekoj phengja leske: "Ti daj hem te phrajla tergjona avrijal hem mangena te keren tuja lafi."

48 A o Isus odgovoringja leske: "Koj tani mi daj hem koj tane me phrajla?" 49 Togaš sikavgja vasteja ko pe učenikija hem vakergja: "Akje akala tane mi daj hem me phrajla. 50 Soske koj kerela i vojla me Dadeskiri soj ko nebo, ov tano mo phral, mi phen hem mi daj."