1 Koga o Isus hulilo tari planina, pala leste džana sine but manuša. 2 Taro jekh puti alo jekh manuš so sine le lepra, pelo ko kočaka anglo leste hem phengja: "Gospode, te manglan šaj sasljareja man."

3 O Isus pružingja po vas, pipingja le hem phengja: "Mangava! Saslov!"

I odma saslilo tari lepra.

4 Togaš o Isus vakergja leske: "Ma vaker nikaske, samo dža hem sikav tut e sveštenikoske hem de žrtva sar so naredingja o Mojsej, te šaj te ovel svedoštvo lenge."

5 Koga o Isus khugja ko Kapernaum, alo ki leste jekh Rimsko kapetani hem rodingja lestar te pomožinel le 6 vakerindor: "Gospode, mo sluga pašlola khere sakati hem but mučinela pe."

7 O Isus phengja leske: "Ka avav hem ka sasljarav le."

8 A o kapetani phengja leske: "Gospode, na zaslužinava te ave me khereste. Ama vaker samo jekh lafi hem mo sluga ka ovel sasto. 9 Soske me da sijum manuš telo avtoriteti hem isi man vojnikija teli mande. Koga phenava jekheske: ‘Dža’ – ov džala. A javereske: ‘Ava’ – ov avela. Hem vakerava me slugaske: ‘Ker akava’ – ov kerela."

10 Koga šungja adava o Isus, čudingja pe hem vakergja okolenge so džana sine pala leste: "Čače vakerava tumenge, na arakhlum nikas ko Izrael, te ovel le doborom vera. 11 A vakerava tumenge deka but džene ka aven taro istok hem taro zapad hem ka len than te han e Avraameja, e Isakoja hem e Jakoveja ko carstvo nebesno. 12 A okolenge so trebingja te del pe o carstvo ka oven frdime avrik ko najtemno than, kote so ka ovel rojba hem krckjiba dandencar."

13 Togaš o Isus phengja e kapetaneske: "Dža! Neka ovel agjar sar so verujngjan."

I ko adava momenti leskoro sluga saslilo.

14 Koga alo o Isus ko kher e Petareske, dikhla leskere sasa, sar pašlola ko kreveti hem sine la bari treska. 15 Ov astargja lakoro vas hem i treska mukhla la, i oj uštili hem počmingja te služinel len.

16 Koga rakjilo, ange ki leste bute manušen so sine opsednime taro demojna hem ov lafeja ikalela sine e duhon hem sasljargja sa e nasvalen. 17 Agjar pherdilo adava so sine phendo preku o prorok Isaija:

"Ov lela amare slabostija

hem phiragja amaro nasvalipe."✝

18 Koga o Isus dikhla i gužva uza peste, zapovedingja pe učenikonge te nakhen tari javer strana taro ezero.

19 Togaš alo ki leste jekh učiteli e Zakoneskoro hem phengja: "Učitele, ka avav pala tute, kaj i te dža."

20 I o Isus phengja leske: "E lisicen isi len pe thana kaj te soven hem e čiriklen gnezdija, ama o Čhavo Manušeskoro nane kaj te čhivel po šero."

21 A o javer učeniko vakergja leske: "Gospode ač te parunav prvo me dade."

22 Ama o Isus vakergja leske: "Ava pala mande hem mukh e mulen te parunen pe mulen."

23 Togaš o Isus khugja ko čamco, a pala leste khuge hem leskere učenikija. 24 I taro jekh puti ko ezero astargja len bari bura, adaleja so o čamco počmingja te phergjol pani taro talasija, a o Isus sovela sine.

25 O učenikija gele hem vazdinge le, vakerindor: "Gospode, spasin amen! Ka taslova!"

26 O Isus pučlja len: "Tikne verakere, soske doborom darana?" Togaš uštilo, zapovedingja e bavlalake hem e ezeroske te ačhon, i uli bari tišina.

27 A o manuša čudisalile hem pučle: "Koj akava so i bavlal da hem o talasija da šunena le?"

28 I koga resla ki javer strana taro ezero, ko thana tari Gadarinsko phuv, iklile anglo leste duj manuša so sine opsednime demonencar so avena sine taro grobija. Doborom sine zorale so nikoj našti sine te nakhel adale drumostar.

29 Taro jekh puti vikinge: "So mangeja amendar, Čhavo e Devleskoro? Akarik li alan te mučine amen angleder o vreme?"

30 A podur lendar sine jekh baro stado taro bale so hana sine.

31 A o demojna molinge e Isuse: "Ako ikaleja amen, bičhav amen ko okova stado taro bale."

32 Ov phengja lenge: "Džan!" Ola iklile e duje manušendar hem khuge ko bale. I sa o bale prastandile taro brego ko ezero hem mule ko pani.

33 A okola so arakhena sine e balen, našle hem gele ko gradi te vakeren sa so ulo, hem adava so ulo e manušencar so sine opsednime.

34 Togaš sa o manuša taro gradi ale te dikhen e Isuse. I koga dikhle le molinge le te džal peske taro lengoro than.