1 Koga o Isus iklilo taro Hrami te džal peske, leskere učenikija ale uza leste te sikaven leske kozom i šukar kerdo o Hrami.

2 A ov phengja lenge: "Dikhena li sa akava? Čače phenava tumenge, nijekh bar upro bar nane te ačhol akate. Sa ka ovel rušimo."

3 Dži kote bešela sine o Isus ki Maslinovo gora, o učenikija ale korkori uza leste hem pučle le: "Vaker amenge, koga ka ovel sa akava? Hem savo ka ovel o znako bašo to ajbe hem bašo krajo e svetoskoro?"

4 O Isus odgovoringja: "Pazinen, ma te hovavel tumen nekoj. 5 Soske but džene ka aven ko mo anav, hem ka vakeren: ‘Me sijum o Hristos’, hem ka hovaven buten. 6 Ka šunen deka isi vojne hem deka kerela pe lafi bašo maribe, ama ma daran. Soske sa adava mora te ovel, ama panda nane o krajo. 7 Ka ušten nacija protiv nacija, hem carstvo protiv carstvo. Ka oven zemijotresija ko razna thana, hem bokhalipe. 8 Sa akava tano samo o početok taro bijanibaskere dukha.

9 Togaš ka oven predajme, te oven mučime hem ka mudaren tumen. Hem sa o nacije ka mrzinen tumen baši mange. 10 Ko adava vreme, but džene ka peren tari vera, jekh jekhe ka predajnen hem ka mrzinen. 11 Ka pojavinen pe but hovavne prorokija hem buten ka hovaven. 12 Adaleske so ka ovel baro lošnipa hem butengoro mangipe ka šudrol. 13 Ama adava so ka ačhol verno dži ko krajo ka ovel spasimo. 14 I akava evangelije bašo carstvo nebesno ka ovel propovedimo ko celo sveto sar svedoštvo sa e narodonge, i togaš ka avel o krajo."

15 "Agjar koga ka dikhen ‘o gadno so uništinela sa’ sar tergjola ko Sveto Than e Hrameskoro, sar so phengja o prorok Daniel – koj čitinela neka svatinel – 16 togaš okola, soj tane ki Judeja, neka našen ko planine. 17 Koj tano ko krovi, ma te hulel tele hem te khuvel ko kher te lel nešto andral. 18 A koj tano ki niva ma te iranel pe khere te le pe šeja. 19 Hem but pharo ka ovel ko adala dive e khamne romnenge hem adalenge so dena thud! 20 Molinen tumaro našiba te na ovel ko jeven ili ki sabota. 21 Soske, togaš ka ovel but pharipe sar dži akana so na sine taro početok e svetoskoro hem nikat poviše nane te ovel isto.

22 Ako o Gospodari na čhinagja adala dive, nikoj našti sine te ovel spasimo. Ama, bašo okola soj birime, ka čhinavel adala dive.

23 Togaš te phengja tumenge nekoj: ‘Akje o Hristos akate tano!’ ili, ‘Akje okote tano!’, ma verujnen. 24 Soske ka pojavinen pe hovavne hristosija hem hovavne prorokija, so ka keren bare znakija hem čudija te šaj te probinen te hovaven adalen da soj birime. 25 Akje, vakergjum tumenge sa angleder.

26 Adaleske, te vakerge tumenge: ‘Akje tano ki pustina,’ ma džan; ili ‘Akje tano ko garavde thana’, ma verujnen. 27 Soske sar so o gromi so avela taro istok dikhola pe dži ko zapad, agjar ka ovel o ajbe taro o Čhavo Manušeskoro. 28 Adava ka ovel jasno agjar sar koga o orlija khedena pe te han adathe kote so isi mulo telo."

29 "A odma palo problemija ko adala dive,

‘O kham ka temningjovel

hem i mesečina nane te del pi svetlina;

o čerenja ka peren taro nebo

hem o nebesna sile ka oven potresime.’✝

30 Togaš ka pojavinel pe o znako ko nebo taro o Čhavo Manušeskoro. I ko adava vreme sa o plemija ki phuv, ka roven hem ka dikhen o Čhavo Manušeskoro, sar avela upro oblakija bare silaja hem slavaja. 31 Hem ka bičhavel pe angelen pe silno trubaja hem ola ka kheden leskere birimen taro štar strane e svetoskere, taro jekh krajo dži ko javer krajo e neboskoro."

32 "A tari smokva sikloven akava: Koga lakere granke ka oven kovle hem ka iklon listija, džanen o nilaj tano paše. 33 Hem agjar tumen, koga ka dikhen sa akala bukja, džanen o vreme i paše, anglo udar. 34 Čače vakerava tumenge: akaja generacija nane te nakhel dži kote sa akava na ovela. 35 O nebo hem i phuv ka nakhen, ama me lafija nikat nane te nakhen."

36 "Ama bašo adava dive hem sati nikoj na džanela, ni o angejla taro nebo, ni o Čhavo, samo o Dad. 37 Sar so sine ko vreme e Noeskoro, agjar ka ovel hem koga o Čhavo Manušeskoro ka avel. 38 Soske ko adala dive angleder te avel i poplava, o manuša hana sine hem pijena, lena pe sine maškar peste, sa dži ko adava dive koga o Noe khugja ko brodi; 39 a ola ništo na džange so ka ovel sa dži kote na ali i poplava hem legargja sarinen. Agjar ka ovel hem koga o Čhavo Manušeskoro ka avel. 40 Togaš duj manuša ka oven ki niva. Jekh ka ovel lelo, a o dujto ka ovel mukhlo. 41 Ako duj džuvla melinena giv, jekh ka ovel leli, a i dujto ka ovel mukhli.

42 Adaleske oven džangavde, soske na džanena ko kova dive ka avel tumaro Gospodari. 43 Ama džanen akava: te džanel sine o domakini e khereskoro ko kova sati tari rat ka avel o čor, ka ovel sine džangavdo hem nane sine te mukhel le te khuvel ko kher. 44 Agjar tumen da trebela te oven spremna, soske o Čhavo Manušeskoro ka avel togaš koga nane te adžikeren le."

45 "O verno hem o mudro sluga tano okova kas o gospodari čhiga le upreder e slugenge te šaj te del len hajbe ko vreme. 46 Blago adale slugaske, koga leskoro gospodari ka avel hem ka arakhel le sar kerela buti agjar. 47 Čače vakerava tumenge, ov ka čhivel le sar upravniko upro sa leskoro barvalipe. 48 Ama te adava sluga lošno hem phenela ki peste: ‘Nane te avel panda mo gospodari’, 49 i počminela te marel javeren slugjen hem te hal hem te pijel e pijanicencar, 50 o gospodari adale slugaskoro ka avel ko adava dive koga nane te adžikerel le hem ko adava sati savo ov nane te džanel. 51 Ka čhinel le ko kotora hem ka čhivel le maškar o dujmujale, kote so ka ovel rojba hem krckjiba dandencar."