1 Rano sabajleja, sa o prvosveštenikija hem o starešine e narodoskere dogovoringe pe sar te mudaren e Isuse. 2 Phandle le, legarge le hem denge le ko Pilat, o upravniko e Rimeskoro.

3 Koga o Juda so predajngja le, dikhla deka o Isus osudimo ko meriba, pelo pišmani hem irangja o trijanda srebrenikija e prvosveštenikonge hem e starešinenge, 4 vakerindor: "Grešingjum! Predajngjum e manuše so nane krivo."

A ola odgovoringe leske: "Adava na interesinela amen. Adavaj to problemi."

5 Togaš o Juda frdingja o srebrenikija ko Hrami, i gelo hem obesingja pe.

6 O prvosveštenikija khedinge o srebrenikija hem phenge: "Nane dozvolimo akala te čhiva len ki kasa e Hrameskiri, adaleske so lencar sine platimo bašo rat."

7 Adaleske ola dogovoringe pe maškar peste adalencar te kinen i niva e glinadžijaskiri, hem te ovel grobija kote so ka parunen e jabandžijen. 8 Adaleske, avdive da adaja niva vikinela pe "Ratvali niva." 9 Agjar pherdilo okova so sine phendo taro prorok Eremija:

"Lele o trijanda srebrenikija,

doborom ceninge le o Izraelcija,

10 hem kinge i niva e glinadžijaskiri,

sar so o Gospodari zapovedingja mange."✝

11 A o Isus terdilo anglo upravniko e Rimeskoro, kova so pučlja le: "Tu li sijan o caro e Evrejengoro?"

A o Isus odgovoringja leske: "Adava tu pheneja."

12 O prvosveštenikija hem o starešine kerena sine krivo e Isuse, ama ov ništo na odgovorinela sine.

13 Togaš o Pilat pučlja le: "Na šuneja li kozom kerena tut krivo?"

14 Ama o Isus na odgovoringja ni jekhe lafeske so sine phendo protiv leste, i o Pilat čudinela pe sine.

15 A o upravniko o Pilat ki sekoja Pasha sine le adeti te oslobodinel po jekh zatvoreniko, so o narodo ka roden lestar. 16 Ko adava vreme sine jekh prešundo zatvoreniko so vikinela pe sine Varava.

17 Koga o narodo khedisalilo, o Pilat pučlja len: "Kas mangena te oslobodinav tumenge: e Varava ili e Isuse, soj vikimo Hristos?"

18 Adaleske so ov džanela sine deka ola predajnge e Isuse tari ljubomora.

19 Dži kote o Pilat bešela sine ki stolica e sudoskiri, leskiri romni bičhalgja te vakeren leske: "Mukh adale manuše so nane krivo, soske avdive but cidingjum baši leske ko suno."

20 Ama o prvosveštenikija hem o starešine pherge e narodo te roden e Varava, a o Isus te ovel mudardo.

21 O upravniko pučlja len: "Kas taro akala duj mangena te oslobodinav tumenge?"

Ola odgovoringe: "E Varava!"

22 A o Pilat pučlja len: "So te kerav e Isuseja soj vikimo Hristos?"

Ola sarine odgovoringe: "Čhiv le ko krsto!"

23 I ov pučlja: "Soske? Savo lošnipe kergja?"

Ama ola panda poviše vikinge: "Čhiv le ko krsto!"

24 O Pilat koga dikhla deka o narodo vazdena bari buna hem deka našti iklola lencar ko krajo, lela pani hem thogja pe vasta anglo narodo, vakerindor: "Me na sijum krivo bašo o rat akale manušeskoro – adavaj tumari buti!"

25 A sa o narodo odgovoringja: "Leskoro rat neka perel upro amende hem upro amare čhave!"

26 Palo adava o Pilat mukhla lenge e Varava, a e Isuse dengja te kamšikujnen le hem te čhiven le ko krsto.

27 Togaš o vojnikija legarge e Isuse ki palata e Pilateskiri hem vikinge celo vojska te kheden pe uza leste. 28 Hulage lestar hem urage le carsko mantili. 29 I pletinge kruna taro kare hem čhige la leske ko šero, a ko desno vas denge le carsko kaš. Togaš pele ko kočaka angli leste hem khelge peske leja vakerindor: "Zdravo, Evrejsko care!" 30 I čhungarena le sine, hem lele lestar o kaš hem khuvena le sine ko šero.

31 A palo adava koga khelge peske leja, ikalge lestar o mantili, hem urage le leskere šeja hem legarge te čhiven le ko krsto.

32 Ko iklojbe, arakhle nesave manuše tari Kirineea, so leskoro anav sine Simon, hem čhige le te phiravel o krsto e Isuseskoro. 33 Koga resle ko adava than so vikinela pe Golgota – so značinela than e "Čerepeskoro." 34 Denge le mol te pijel so sine mešimi kjerke žolčkaja, ama koga probingja la, na mangla te pijel.

35 I koga čhige le ko krsto, delinge leskere šeja agjar so frdinge ždrepka te dikhen koj so ka lel. 36 I bešle adathe hem arakhena le sine.

37 Upreder o šero leskoro čhige pišimo natpis baši leskiri krivica:

"AKAVAJ O ISUS, O CARO E EVREJENGORO."

38 A leja čhige ko krsto duje buntovnikon, jekh tari desno strana, hem jekh tari levo strana.

39 A okola so nakhena sine, iranindor po šero uvredžinena le sine, 40 vakerindor: "Tu so peraveja o Hrami hem vazdeja le trine divenge, spasin tut! Huli tele taro krsto, ako sijan o Čhavo e Devleskoro!"

41 Isto agjar asana sine o prvosveštenikija hem o učitejla e Zakoneskere hem o starešine vakerindor: 42 "Javeren spasingja, a korkori pes našti te spasinel! Ov tano o caro e Izraeleskoro! Neka hulel akana taro krsto, i ka verujna ki leste. 43 Ov nadinela pe ko Devel! Neka spasinel le o Devel akana, ako čače mangela le. Soske vakerela sine: ‘Me sijum o Čhavo e Devleskoro.’"

44 Agjar uvredžinena le sine okola da so sine leja ko krsto.

45 A ko dešuduj o sati, temnisalilo ki celo phuv hem agjar sine trin satija. 46 Koga sine trin o sati paloručko, o Isus vikingja sa pe glasoja: "Eli, Eli, lema sabahtani?" (so značinela "Mo Devel, mo Devel, soske mukhlan man?")

47 Koga šunge adava nesave so tergjovena sine, vakerge: "Vikinela e Ilija."

48 Odma nekoj lendar prastandilo, hem topingja o sungjeri ko šut hem čhiga le ko kaš hem dengja e Isuse te pijel.

49 A javera vakerge: "Adžikeren te dikha dali o Ilija ka avel te spasinel le."

50 A o Isus palem vikingja sa pe glasoja, hem mukhla pi duša.

51 Ko adava momenti, i zavesa taro Hrami pharavdili ko ekvaš upral dži tele. I phuv silno tresisalili hem o karpe pharile. 52 O grobija phravdile hem uštile taro mule but manuša so sine sveta. 53 Palo e Isuseskoro uštiba taro mule ola iklile taro grobija hem gele ko sveto gradi Erusalim hem sikavge pe bute manušenge.

54 Koga o Rimsko kapetani hem okola da so arakhena sine e Isuse dikhle o zemjotres hem sa so ulo, but darandile hem phenge: "Čače, akava sine o Čhavo e Devleskoro!"

55 A adathe sine but džuvla so dikhena le sine duraldan. Ola panda tari Galileja džana sine palo Isus hem pomožinena le sine. 56 Maškar lende sine i Marija tari Magdala, hem Marija i daj e Jakoveskiri hem e Josifeskiri, hem i daj e Zavedejeskere čhavengiri.

57 Dži kote rakjola sine, alo jekh barvalo manuš tari Arimateja, so vikinela pe Josif, koj korkori ov sine učeniko e Isuseskoro.

58 Ov gelo ko Pilat hem rodingja o telo e Isuseskoro. I o Pilat naredingja te den le o telo e Isuseskoro. 59 O Josif lela o telo, pakjargja le ko nevo laneno čaršafi, 60 hem čhigja le ko po nevo grobo, so sine kerdi dupka ki karpa. Hem guringja baro bar ko udar taro grobo, i gelo peske. 61 A i Marija tari Magdala hem okoja Marija bešle adathe karši o grobo.

62 Tajsutno dive, ki sabota, o prvosveštenikija hem o fariseja gele ko Pilat 63 hem phenge leske: "Gospodare, setingjem amen ko okova o hovavno, dži kote sine dživdo phengja: ‘Palo trin dive ka uštav taro mule.’ 64 Adaleske, naredin o grobo te arakhen le trin dive, te na aven leskere učenikija hem te čoren o telo, i te phenen e narodoske: ‘Uštilo taro mule.’ I akava hovajbe ka ovel pološno taro prvo puti."

65 O Pilat odgovoringja lenge: "Isi tumen čuvajra! Džan hem obezbedinen o grobo sar so džanena!"

66 I gele hem obezbedinge o grobo agjar so čhige pečati ko bar hem čhige čuvajra.