1 Ko adava dive o Isus iklilo taro kher hem bešla uza ko ezero te sikavel. 2 Ov uklilo ko čamco hem adathe bešla adaleske so uza leste khedisalili bari gužva, a sa o manuša tergjona sine ko kopno. 3 I but bukja vakerela sine ko parabole. Jekh taro adala parabole sine akaja:

"Akje, iklilo jekh sejači te sejnel. 4 Dži kote sejnela sine o seme, nesavo seme pelo lestar ko drumo, i ale o čirikla hem sa hale o seme. 5 Javer pelo lestar ko than kote so sine hari phuv, a poviše bara, i odma počminge te iklon, soske na sine ki hor phuv. 6 Ama, koga iklilo o kham te tharel, ola thabile hem šukile, adaleske so na sine len korenja. 7 A javer seme pelo maškar o kare, i koga barile o kare zagušinge len. 8 A nesavo seme pelo ki šukar phuv, kote so dengja šukar plodija – šel puti, šovardeš puti ili trijanda puti poviše taro sejmo. 9 Kas isi kana, neka šunel."

10 E Isuseskere učenikija ale ki leste hem pučle le: "Soske vakereja e manušenge ko parabole?"

11 A ov odgovoringja lenge: "Adaleske so tumenge dendo te džanen o tajne taro carstvo nebesno, ama okolenge nane dendo. 12 Kas isi, ka del pe leske poviše, hem ka ovel le but. A kas nane, hem adava da so isi le ka lel pe lestar. 13 Adaleske vakerava lenge ko parabole, soske jakhencar dikhena, a na dikhena, kanencar šunena, a na svatinena.

14 Agjar upro lende pherdilo o proroštvo e Isaijaskoro:

‘Ka šunen, ama nikat nane te svatinen,

ka dikhen jakhencar, ama nikat nane te pendžaren.

15 Soske akale manušengoro vilo ulo baralo,

phareste šunena kanencar

hem phandle pumare jakha,

te na dikhen jakhencar

hem te na šunen kanencar,

a vileja te na svatinen.

Adaleske našti te iranen pe ki mande

te sasljarav len.’✝

16 Ama blagoslovime te jakha so dikhena hem te kana so šunena. 17 Čače vakerava tumenge: But prorokija hem pravednikija mangle te dikhen adava so tumen dikhena, ama na dikhle, hem te šunen adava so tumen šunena, ama na šunge."

18 "Šunen so značinela i parabola bašo sejači: 19 Koga nekoj ka šunel o lafi bašo carstvo nebesno hem na svatinela le, avela o Beng hem čorola adava soj sejmo ko leskoro srce. Adavaj o seme soj sejmo ko drumo. 20 A o seme soj sejmo ko poviše bara a pohari phuv, tano okova so šungja o lafi hem odma primingja le so radost. 21 Ama soske nane le koreno ki peste, na ačhola but. Koga avena o problemija ili o progoniba bašo lafi, ola odma perena tari vera. 22 O seme so sejmo maškar o kare tano okova so šungja o lafi, ama o sekiracije akale životoskere hem o hovavno barvalipe zagušinela o lafi, i našti anela plodija. 23 Ama o seme soj sejmo ki šukar phuv tano okova so šunela o lafi hem svatinela le. Ov tano okova so dela šukar plodija – šel puti, šovardeš puti ili trijanda puti poviše taro sejmo."

24 O Isus vakergja lenge javer parabola: "O carstvo nebesno tano sar jekh manuš so sadingja šukar seme ki pi niva. 25 Ama dži kote sarine sovena sine, alo leskoro dušmani hem ov da sadingja kakol maškar o giv hem gelo peske. 26 Koga o giv barilo hem angja plodija, togaš o kakol da iklilo.

27 O sluge ale ko po gazda hem vakerge leske: ‘Gospodare, na sadingjan li šukar seme ki ti niva? E kotar alo akava kakol?’

28 Ov phengja lenge: ‘Mo dušmani kergja adava.’

A o sluge pučle le: ‘Mangeja li te dža hem te ikala o kakol?’

29 Ov odgovoringja lenge: ‘Na, adaleske so tumen ko ikalibe adava šaj te ikalen o giv da. 30 Mukhen o solduj te bajron dži ki žetva. Togaš ka phenav okolenge so khedena: Prvo kheden o kakol hem phanden le ki kupa te šaj te tharel pe, a poslem kheden o giv hem legaren le ki mi štala.’ "

31 O Isus vakergja lenge javer parabola: "O carstvo nebesno tano sar o sinapovo zrno, so manuš lela le hem sadingja le ki pi niva. 32 Ov tano najtikno taro sa o semija, ama koga bajrola, ovela najbaro taro sa o rastenija ki bavča i ovela kaš, agjar so o čirikla avena hem kerena gnezdija upro leskere granke."

33 I phengja lenge javer parabola: "O carstvo nebesno tano sar o kvasaci, so jekh džuvli lela le hem mešingja le ko biš kile varo sa dži kote na ušlilo."

34 Sa akava o Isus vakergja e manušenge ko parabole. Ništo na vakergja lenge bizi parabola. 35 Agjar pherdilo adava so sine phendo preku o proroko:

"Ka phravav mo muj ko parabole,

ka phenav o tajne so sine garavde panda taro keriba e svetoskoro."✝

36 Togaš o Isus mukhla e manušen hem khugja ko jekh kher. Ale leskere učenikija ki leste hem phenge leske: "Vaker amenge so manglan te phene akale parabolaja bašo kakol ki niva."

37 A ov odgovoringja: "Adava so sadingja o šukar seme tano o Čhavo Manušeskoro, 38 a i niva tani o sveto. O šukar seme tane o čhave taro carstvo nebesno, a o kakol tane o čhave e Bengeskere. 39 A o dušmani so sadinela o kakol tano o Beng. I žetva tani o krajo e svetoskoro, a okola so khedena tane o angejla.

40 Sar so o kakol ikalela pe hem tharela pe ki jag, agjar ka ovel hem ko krajo e svetoskoro. 41 O Čhavo Manušeskoro ka bičhavel pe angelen, hem ola ka ikalen len taro carstvo sarinen so čhivena javeren te grešinen hem so kerena lošno 42 hem ka frden len ki thari pečka, kote so ka ovel rojba hem krckjiba dandencar. 43 Togaš o pravednikija ka svetinen sar o kham ko carstvo pumare Dadeskoro. Kas isi kana neka šunel."

44 "O carstvo nebesno tano sar o barvalipe soj garavdo ki niva. Koga jekh manuš ka arakhel le, palem garavela le hem so radost džala, bikinela sa so isi le hem kinela adaja niva."

45 "Palem, o carstvo nebesno tano sar jekh trgovco so rodela šuže bisejra. 46 Koga arakhela nesavo najskupo biseri, džala hem bikinela sa so isi le hem kinela le."

47 "Palem, o carstvo nebesno tano sar mreža so frdela pe ko ezero, so late astarela pe razna mačhe. 48 Koga phergjola, o ribajra ikalena la avrik. Poslem bešena hem khedena e šukar mačhen ko korpe, a e lošnon frdena. 49 Agjar ka ovel hem ko krajo e svetoskoro. O angejla ka aven hem ka odvinen e lošnon taro pravednikija 50 hem ka frden e lošnon ki thari pečka, kote so ka ovel rojba hem krckjiba dandencar.

51 I o Isus pučlja len: Svatingjen li sa akala bukja?"

Ola odgovoringe: "Oja."

52 A ov phengja lenge: "Adaleske, sekova učiteli e Zakoneskoro, soj sikavdo taro carstvo nebesno – ov tano sar domakini e khereskoro, so ikalela andral pestar o nevo hem o purano barvalipe."

53 Koga o Isus završingja akala parabole, gelo adathar. 54 A koga resla ko po than kaj so barilo, počmingja te sikavel len ko lengere sinagoge, hem ola but čudisalile, hem pučle: "Kotar leske akaja mudrost hem akala čudna sile? 55 Nane li akava o čhavo e stolareskoro? Nane li leskiri daj i Marija, hem leskere phrajla o Jakov, o Josif, o Simon hem o Juda? 56 Hem nane li sa akate leskere phenja amencar? Kotar leske sa akala bukja?"

57 Ola na mangle te prifatinen le.

Ama o Isus phengja lenge: "E proroko ko sa o thana poštojnena le samo ko than kote so barilo, maškar leskoro gradi hem leskoro kher na poštojnena le."

58 I na kergja but čudija adathe soske na sine len vera.