1 Ko adava vreme o Irod, o vladiteli e Galilejakoro šungja bašo Isus 2 hem phengja pe slugenge "Akavaj o Jovan Krstitel; uštilo taro mule hem adaleske šaj kerela asavke čudija."

3 Soske korkori o Irod angleder bičhalgja te astaren e Jovane hem te frden le ko zatvor. A adava kergja baši i Irodijada, i romni leskere phraleskiri e Filipeskiri, 4 soske o Jovan phenela sine e Irodeske: "Nane tuke dozvolimo te le romnake te phraleskere romna."

5 O Irod mangla te mudarel e Jovane, ama darandilo taro narodo, soske dikhena sine e Jovane sar proroko.

6 Ama koga sine o rodenden e Irodeskoro, e Irodijadakiri čhaj khelgja anglo gostija. A e Irodeske adava sine but šukar. 7 Hem ov hala lake sovli deka ka del la sa so ka rodel.

8 A oj sikavdi tari pi daj vakergja: "De man akate ko čaro o šero e Jovane Krstiteleskoro."

9 E Irodeske sine žal, ama baši i sovli so dengja la anglo gostija, naredingja te keren adava so rodingja, 10 hem naredingja te čhinen o šero e Jovane Krstiteleskoro ko zatvor. 11 I sine ando leskoro šero ko čaro hem denge le e čhajake, a oj dengja le pe dajake. 12 A o učenikija e Jovaneskere ale hem lele leskoro telo hem parunge le. A palo adava gele hem vakerge e Isuseske.

13 Koga šungja adava o Isus, gelo adathar e čamcoja ko jekh čučo than. Ama o narodo šunge adava hem gele peški pala leste taro sa o gradija. 14 Koga o Isus iklilo taro čamco, dikhla bute manušen, alo leske but pharo baši lenge hem sasljargja e nasvalen so sine maškar lende.

15 I koga sine kasno, ale o učenikija uza leste hem phenge leske: "Kasno i više, a ko akava than nane ništo. Mukh e manušen te džan ko gava te šaj kinena peske maro."

16 A o Isus vakergja lenge: "Na trebela te džan. Den len tumen nešto hajbaske."

17 Ola odgovoringe leske: "Akate isi amen samo pandž mare hem duj mačhe."

18 A ov phengja: "Anen len mange akate." 19 I naredingja e manušenge te bešen ki čar.

Togaš lela o pandž mare hem o duj mačhe dikhla upre ko nebo, blagodaringja hem phagla o mare. Palo adava dengja pe učenikonge, a o učenikija denge len e manušenge. 20 Sarinen hale hem čalile, a taro adava so ačhilo o učenikija khedinge dešuduj korpe hajbe. 21 A adala so hale sine paše pandž ilade murša, bizo te gejnen pe o romna hem o čhave.

22 Odma palo adava o Isus čhigja pe učenikon te uklen ko čamco hem angleder lestar te džan ki okoja strana taro ezero, dži kote ov bičhavela e manušen pe kherende. 23 Koga bičhalgja len, uklilo ki jekh planina korkori te molinel pe. I koga peli i rat, ov sine korkori adathe. 24 A o čamco više sine dur taro kopno, hem počmingja te khuven le o talasija, soske prema lende phudela sine i bavlal.

25 A maškar o trin dži ko šov o sati sabajle, o Isus alo ki lende phirindor upro pani. 26 Koga dikhle o učenikija sar phirela upro pani, but darandile hem počminge te vikinen tari dar: "Adavaj duho!"

27 Ama o Isus odma phengja lenge: "Oven silna! Ma daran! Me sijum."

28 A o Petar vakergja leske: "Gospode ako sijan tu, zapovedin mange te avav ki tute upro pani."

29 I o Isus phengja leske: "Ava."

Togaš o Petar iklilo taro čamco hem phirindor upro pani gelo ko Isus.

30 Ama koga dikhla i silno bavlal, darandilo hem počmingja te batinel ko pani i vikingja: "Gospode, spasin man!"

31 O Isus odma pružingja po vas hem astargja le, i phengja leske: "Tikne verakereja, soske sumningjan tut?"

32 I koga khuge ko čamco, i bavlal ačhili. 33 Togaš okola so sine ko čamco pele ko kočaka anglo Isus hem phenge leske: "Tu čače sijan o Čhavo e Devleskoro."

34 Koga o Isus nakhla pe učenikoncar ki okoja strana taro ezero, resle ki phuv Genisaretsko. 35 A koga o manuša taro adava than pendžarge e Isuse, gele te vakeren sarinenge deka alo o Isus, i ola ange anglo leste sa e nasvalen. 36 Hem molinena le sine samo te mukhel len te pipinen pe ko krajo taro leskere šeja, hem sarinen so pipinena pe sine leskere šejende, sasljona sine.