1 A palo šov dive o Isus lela peja e Petare e Jakove hem leskere phrale e Jovane hem gele ki uči gora, kote so ola sine korkori. 2 Adathe angli lende e Isuseskoro izgled promenisalilo. Leskoro muj svetinela sine sar o kham, a o šeja leskere ule parne sar i svetlina. 3 Togaš adathe pojavisalile angli lende o Mojsej hem o Ilija, so kerena sine lafi e Isuseja.

4 A o Petar phengja e Isuseske: "Gospode, šukar amenge te ova akate. Te mangeja, ka kera trin šatojra – jekh tuke, jekh e Mojsijaske, hem jekh e Ilijaske."

5 Dži kote o Petar kerela sine lafi, svetlinaja oblako učhargja len hem šundilo glaso taro oblako: "Akava tano mo manglo Čhavo, so leste tani mi vojla. Le šunen!"

6 Koga šunge adava o učenikija, but darandile hem pele mujeja dži ki phuv.

7 Ama o Isus alo uza lende, pipingja len, hem phengja lenge: "Ušten hem ma daran!"

8 Togaš vazdinge pumare šere hem na dikhle nikas osven e Isuse.

9 Koga hulena sine tari gora, o Isus zapovedingja lenge: "Ma vakeren nikaske so dikhlen, sa dži kote o Čhavo Manušeskoro na uštela taro mule."

10 A o učenikija pučle le: "Soske togaš o učitejla e Zakoneskere vakerena deka prvo mora te avel o Ilija?"

11 O Isus odgovoringja lenge: "Čače o Ilija ka avel prvo hem ka sredinel sa. 12 Ama vakerava tumenge: o Ilija više alo, hem na pendžarge le, nego kerge leske sa so mangle. Agjar hem o Čhavo Manušeskoro ka cidel taro lengere vasta."

13 Togaš o učenikija svatinge deka ov kerela lafi bašo Jovan Krstitel.

14 Koga ale ko narodo, alo jekh manuš ko Isus hem pelo ko kočaka angli leste. 15 Hem phengja: "Gospode, žalin me čhave. Le isi le napadija hem but cidela. Stalno perela ki jag ili ko pani. 16 Angjum le ko te učenikija, ama ola našti sine te sasljaren le."

17 A o Isus odgovoringja: "O, bez verno hem rumimi generacijo, dži koga ka ovav tumencar? Dži koga ka trpinav tumen? Anen e čhave ki mande!"

18 A o Isus naredingja e demoneske hem ov iklilo e čhavestar, hem ko adava momenti o čhavo saslilo.

19 Togaš o učenikija ale ko Isus korkori hem pučle le: "Soske amen našti sine te ikala le?"

20 Ov odgovoringja lenge: "Adaleske so isi tumen doborom tikni vera. Čače vakerava tumenge: ako isi tumen vera sar o sinapovo zrno, šaj te phenen akale planinake: ‘Pomestin tut akatar okorik’, hem oj ka pomestingjovel. Hem nane ništo so našti te keren. 21 [Asavko duho ništoja našti te ikalel pe, samo molitvaja hem posteja.]"

22 Koga khedisalile ki Galileja, o Isus phengja pe učenikonge: "O Čhavo Manušeskoro ka ovel predajmo ko vasta e manušenge. 23 Ka mudaren le hem ko trito dive ka uštel taro mule."

A o učenikija but razočaringe pe.

24 Koga o Isus hem leskere učenikija resle ko Kapernaum, ale ko Petar nesave manuša so khedena sine danok e hrameskoro so sine duj drahme, i pučle le: "Tumaro učiteli platinela li danok e Hrameske?"

25 O Petar odgovoringja: "Oja, platinela."

Koga o Petar khugja ko kher, o Isus angleder leste phengja hem pučlja le: "So mislineja, Simone, kastar o cajra e phuvijakere khedena carina hem danok? Taro pe čhave ili taro javera?"

26 O Petar odgovoringja: "Taro javera."

Togaš o Isus phengja: "Znači o čhave na trebela te platinen. 27 Ama, te na uvredžina len, dža ko ezero hem frde i jadica. O prvo mačho so ka astare, phrav o muj leskoro hem ka arakhe pare taro štar drahme. Le hem platin lenge baši mange hem tuke o danok."