1 Togaš o Isus phengja e narodoske hem pe učenikonge: 2 "O učitejla e Zakoneskere hem o fariseja bešena sine ko than e Mojsijaskoro te sikaven o Zakoni. 3 Adaleske mora te pazinen hem te keren sa so ka vakeren tumenge, ama ma keren adava so ola kerena. Soske ola na kerena adava so vakerena. 4 Ola phandena o pharipe soj pharo hem čhivena le javerenge ko pike, ama ola ni najeja na mangena te mrdinen te pomožinen.

5 Sa so kerena, kerena le bašo manuša te dikhen len. Buvlarena pumare kutije lafencar taro Sveto Lil hem phiravena len ko čekat ili ko vasta, hem kerena pumare resija* taro šeja po dugačka. 6 Mangena te bešen ko najšukar thana ko hajbe pijbe hem ko prvo thana ko sinagoge. 7 Ola mangena javera te poštojnen len ko pazajra hem te vikinen len ‘Učitele.’

8 Ama, tumen na trebela te vikinen tumen ‘Učitele’, adaleske so isi tumen samo jekh Učiteli, a tumen sarinen sijen phrajla. 9 Hem ma vikinen nikas ki phuv ‘dade’, soske isi tumen samo jekh Dad – a ov tano ko nebo. 10 Ma te vikinen tumen vodačija, soske isi samo jekh Vodači – o Hristos. 11 O najbaro maškar tumende neka ovel sluga tumaro. 12 Soske okola so vazdena pes ka oven ponižime, a okola soj ponižime ka oven vazdime."

13 "Pharo tumenge, e učitelenge e Zakoneskere hem e farisejenge, dujemujengere! Adaleske so e manušenge phandena o udar taro carstvo nebesno. Tumen korkori na khuvena ki leste, ni tu mukhena okolen so mangena te khuven.

14 [Pharo tumenge, e učitelenge e Zakoneskere hem e farisejenge, dujemujengere! So hana o barvalipe e udovicengoro hem kerena tumen devleskere adaleja so molinena tumen bare molitve. Adaleske ka oven but silno kaznime.]

15 Pharo tumenge, e učitelenge e Zakoneskere hem e farisejenge, dujemujengere! Adaleske so džana e moreja hem e phuvjaja te šaj te dobinen jekhe manušeskiri vera, a koga dobinena le, kerena le čhavo e pekoleskoro, duj puti pološno tumendar.

16 Pharo tumenge, so sijen korole vodačija so vakerena: ‘Ako nekoj hala sovli ko Hrami, adava nane ništo. Ama te hala sovli e Hrameskere zlatoja, adale sovlaja phandlo tano.’ 17 Glupavonalen, koroljalen! Soj pobaro: o zlato, ili o Hrami so kerela o zlato te ovel sveto? 18 Hem vakerena: ‘Ako nekoj hala sovli ko oltari, adava nane ništo. Ama te hala sovli ko poklon e oltareskoro, adale sovlaja phandlo tano.’ 19 Koroljalen! Soj pobaro: o poklon, ili o oltari so kerela o poklon te ovel sveto? 20 Adaleske, koj hala sovli ko oltari, hala sovli upro leste hem upro sa so isi ki leste. 21 Hem sekoj so hala sovli ko Hrami, hala sovli upro leste hem ko okova so bešela ki leste. 22 Hem koj hala sovli ko nebo, hala sovli e Devleske ko troni hem e Devleste so bešela ki leste.

23 Pharo tumenge, e učitelenge e Zakoneskere hem e farisejenge, dujemujengere! Adaleske so dena desetok taro tumare žačinja – nane, kopar hem kim, a mukhena o najvažna bukja taro Zakoni – pravda, milost hem vernost. Trebela te den o desetok, ama na trebela te bistren te keren adava soj najvažno. 24 Korole vodačija! Cedinena o pani taro komarco, ama e kamila gltinena.

25 Pharo tumenge, e učitelenge e Zakoneskere hem e farisejenge, dujemujengere! Kosena i čaša hem o čaro avrijaldan, a andral sijen pherde so alčnost hem mangena te keren šukar samo tumenge. 26 Korole fariseja! Prvo kos andraldan i čaša, a poslem avrijaldan da ka ovel čisto.

27 Pharo tumenge, e učitelenge e Zakoneskere hem e farisejenge, dujemujengere! Tumen sijen sar makhle grobija, so dikhona šuže avrijaldan, ama andraldan tane pherde mulengere kokala hem pherdo melalipe. 28 Agjar tumen avrijaldan dikhona sar pravednikija, ama andral sijen pherde dujmujalipe hem tumen phagena o Zakoni.

29 Pharo tumenge, e učitelenge e Zakoneskere hem e farisejenge, dujemujengere! So kerena grobija e prorokonge hem so ukrasinena o spomenikija e pravednikongere, 30 a tumen vakeren: ‘Te živina sine ko vreme amare parapaponge, nane sine te ova lencar ko čhoriba o rat e prorokongoro.’ 31 Agjar, tumen korkori dokažinena deka sijen o čhave okolengere so mudarge e prorokon. 32 Keren, dži ko krajo, adava so počminge le tumare parapapija!

33 Sapalen! Tumen e sapengere čhave! Sar ka našen adalestar, a te na oven osudime ko pekol? 34 Adaleske bičhavava prorokija, mudrecija hem učitejla. Nesave lendar ka mudaren hem ka čhiven len ko krsto, a javeren ka kamšikujnen ko sinagoge hem ka brkinen len taro gradi ko gradi. 35 Agjar upra tumende te šaj te perel sa o pravedno rat so thavdingja ki phuv, o rat e Aveleskoro so sine pravedno dži ko rat e Zaharijaskoro, o čhavo e Varahijaeskoro, kas so mudargjen maškar o Sveto Than e Hrameskoro hem o oltari. 36 Čače vakerava tumenge, sa akava rat ka perel sar kazna upri akaja generacija."

37 "Erusalime, Erusalime, tu so mudareja e prorokon hem frdeja bara upro okola soj tuke bičhavde! But puti manglum te khedav te čhaven, sar so i khani khedela pe piličken telo pe paka, ama tumen na manglen! 38 Akje, to kher tano napuštimo. 39 Soske vakerava tumenge nane poviše te dikhen man dži kote na phenena: ‘Blagoslovimo tano okova sa avela ko anav e Gospodareskoro!’ "