1 Ko adala dive alo o Jovan Krstitel, so propovedinela sine ki Judejsko pustina 2 vakerindor: "Pokajnen tumen! Adaleske so paše tano o nebesno carstvo." 3 Ov tano akava kastar o prorok Isaija vakergja:

"Ov tano o glaso so vikinela ki pustina:

‘Spreminen o drumo e Gospodareskoro.

Ramnonen o drumija leskere!’"✝

4 E Jovaneskere šeja sine taro bala e kamilakere, a ki kičma sine le kožno pojas, a leskoro hajbe sine skakulcija hem divo avgjin. 5 Togaš avena sine but manuša ki leste taro Erusalim hem tari celo Judeja hem taro sa o thana taro Jordan. 6 Priznajnena sine pumare grevija, hem ov krstinela len sine ki reka Jordan.

7 Koga o Jovan dikhla bute farisejen hem sadukejen sar avena adathe kote so krstinela sine, vakergja lenge: "Tumen e sapeskere čhave! Koj vakergja tumenge te našen tari e Devleskiri holi so avela?

8 Sikaven tumare životoja deka čače pokajngjen tumen, 9 hem ma mislinen deka i dovolno te phene ki tumende: ‘O Avraam tano amaro dad.’ Adaleske vakerava tumenge o Devel šaj akale barendar te vazdel čhave e Avraameske. 10 Akje o tover taro sudo e Devleskoro više tano ko koreno e kašteske, hem sekova kaš so na dela šukar plodi ka ovel čhindo hem frdimo ki jag.

11 Me krstinava tumen pajneja bašo pokajanie. Ama pala mande avela pobaro mandar, so na sijum dostojno te phravav leskere sandale. Ov ka krstinel tumen e Sveti Duhoja hem e jagaja. 12 Ko leskere vasta tani i lopata, hem ka odvinel o giv taro lušpe, ka khedel po giv ki štala, hem ka tharel o lušpe jagaja so na ačhola."

13 Togaš alo o Isus tari Galileja ki reka Jordan te ovel krstimo taro Jovan.

14 A o Jovan na mangla hem phengja leske: "Tu trebela man te krstine, a tu aveja ki mande?"

15 Ama o Isus odgovoringja leske: "Mukh akana adava. Amen trebela te kera agjar te šaj te phera celo pravda."

Togaš o Jovan složingja pe.

16 Samo so krstisalilo o Isus, iklilo taro pani. I taro jekh puti o nebo phravdilo hem dikhla e Devleskoro Duho sar gulubi hulela upro leste.

17 Hem šundilo glaso taro nebo so vakergja: "Akava tano mo manglo Čhavo, so leste tani mi vojla."