1 Koga o Isus završingja akale lafencar, gelo tari Galileja ko thana ki Judeja, tari javer strana tari reka Jordan. 2 A pala leste džana sine but manuša hem ov adathe sasljargja e nasvalen.

3 I ale ki leste nesave fariseja te iskušinen le, i pučle le: "Dozvolimo li o rom te mukhel pe romna bašo bilo so?"

4 Ov odgovoringja lenge: "Na čitingjen li deka ko početok o Stvoriteli ‘kergja len murš hem džuvli’? 5 Hem phengja: ‘Adaleske o manuš ka mukhel pe dade hem pe daja, hem ka ovel jekh pe romnaja, hem ola o duj ka oven jekh telo.’ 6 Agjar ola nane više duj, nego jekh telo. Adaleske, o Devel so phandla, o manuš ma te odvinel."

7 A ola pučle le: "Soske togaš o Mojsej naredingja e manušeske te del pe romnake razvodno lil hem te mukhel la?"

8 O Isus odgovoringja lenge: "O Mojsej dozvolingja tumenge te mukhen tumare romnen adaleske so sijen šerale, ama ko početok na sine agjar. 9 Ama vakerava tumenge deka sekoj so mukhela pe romna, osven ako izneveringja le, hem ka lel javera romnake, ov kerela preljuba."

10 Togaš leskere učenikija phenge: "Ako agjar i maškar o rom hem i romni, pošukar i te na len pe."

11 A o Isus odgovoringja: "Našti sarine te prifatinen akava lafi, nego samo okola kaske i dendo. 12 Adaleske isi manuša soj bijame manaja hem nesposobna. A isi hem nesave so o manuša kerge len te oven nesposobna. A isi nesave so korkori odlučinge te na ženinen pe bašo nebesno carstvo. Koj so šaj prifatinela akava, neka prifatinel le."

13 Togaš o manuša ange pe tikne čhaven anglo Isus te čhivel pe vasta upro lende hem te molinel pe lenge. Ama o učenikija zaptinge len.

14 A o Isus phengja lenge: "Mukhen e tikne čhaven te aven ki mande hem ma zaptinen len, soske asavkjenge pripadinela o nebesno carstvo."

15 Ov čhigja pe vasta upro lende hem palo adava gelo adathar.

16 Togaš alo jekh manuš ko Isus hem pučlja le: "Učitele, savi šukar buti trebela te kerav te šaj te dobinav o večno životo?"

17 A o Isus odgovoringja: "Soske pučeja man bašo adava soj šukar? Isi samo jekh soj šukar - o Devel. Ako mangeja te khuve ko večno životo, iker o zapovedija."

18 Ov pučlja: "Save?"

O Isus odgovoringja leske: "Akala: ‘ma mudar, ma ker preljuba, ma čor, ma svedočin hovajbe, 19 poštojn te dade hem te daja’ hem ‘mang te pašutne sar korkori tut.’"

20 A o terno manuš phengja leske: "Sa akava pazingjum le. So trebela panda te kerav?"

21 O Isus odgovoringja leske: "Te mangeja te ove sovršeno, dža, bikin sa so isi tut hem delin e čorolenge, i ka ovel tut barvalipe upre ko nebo. Togaš ava hem phir pala mande."

22 Koga šungja akava o terno manuš, razočaringja pe hem gelo peske, adaleske so na mangla te bikinel po baro barvalipe.

23 Togaš o Isus vakergja pe učenikonge: "Čače phenava tumenge, pharo i adaleske soj barvalo te khuvel ko nebesno carstvo. 24 I palem phenava tumenge, polokhe ka ovel e kamilake te nakhel maškar o kan e suvijakoro, nego e barvaleske te khuvel ko carstvo e Devleskoro."

25 Koga o učenikija šunge akava, sine but čudime hem pučle: "Togaš, koj šaj te ovel spasimo?"

26 O Isus dikhla len šukar hem phengja: "Akavaj nešto so o manuša našti te keren, ama o Devel šaj kerela sa."

27 Togaš o Petar odgovoringja leske: "Akje, amen mukhlem sa hem alem pala tute. So ka dobina adalestar?"

28 A o Isus phengja: "Čače phenava tumenge, ko nevo sveto, koga o Čhavo Manušeskoro ka bešel ko po slavno troni, hem tumen da so avena pala mande ka bešen ko dešuduj tronija hem ka sudinen e Izraeleskere dešuduje plemenge. 29 Hem sekoj jekh so mukhela po kher, ili pe phralen, ili pe phejnen, ili pe dade, ili pe daja, ili pe romna, ili pe čhaven, ili pe nive, baši mange, ka dobinel šel puti poviše hem ka nasledinel o večno životo. 30 Ama but džene soj prva ka oven posledna, a but džene soj posledna ka oven prva."