1 O Isus phengja: "Togaš o carstvo nebesno ka ovel sar deš čhaja so lele pumare lampe hem iklile te udžaren e džamutre. 2 Pandž lendar sine glupava, a pandž pametna. 3 O glupava lele peja pumare lampe, ama na lele peja ujle bašo pumare lampe, 4 a o pametna lele pumare lampe peja hem ujle da ki tegla. 5 Adaleske so o džamutro alo pokasno, ola sarine pašlile hem zasuke.

6 I ki ekvaš i rat šundilo vikiba: ‘Akje o džamutro! Ikloven te udžaren le!’

7 Togaš o deš čhaja uštile hem spreminge pumare lampe.

8 O glupava vakerge e pametnonge: ‘Den amen hari taro tumaro ujle, soske amare lampe ačhona.’

9 A o pametna odgovoringe lenge: ‘Našti! Soske nane te resel ni tumenge ni amenge. Ama pošukar te džan hem te kinen tumenge ujle okote kaj so bikinena.’

10 Ama dži kote džana sine te kinen, alo o džamutro, i okola čhaja so sine spremna khuge leja ko bijav, hem o udar phandlilo.

11 Palo adava ale okola čhaja hem vikinge: ‘Gospodare! Gospodare, phrav amenge o udar!’

12 Ov odgovoringja lenge: ‘Čače vakerava tumenge: Na pendžarava tumen.’

13 Adaleske, oven džangavde, soske na džanena ni o dive ni o sati koga ka avel o Čhavo Manušeskoro."

14 "Adaleske o carstvo nebesno ka ovel sar jekh manuš, so angleder te džal ko drumo, vikingja sa pe slugjen hem mukhla lenge po barvalipe. 15 Jekheske dengja pandž vreke zlato, e dujtoneske dengja duj, a e tritoske jekh – sekaske dengja spored leskiri sposobnost hem palo adava gelo ko drumo.

16 Okova so dobingja pandž vreke zlato, gelo odma te kerel lencar buti hem zarabotingja panda pandž vreke zlato. 17 Agjar kergja okova da e duje vrekencar hem zarabotingja panda duj vreke zlato. 18 Ama okova so dobingja jekh vreka gelo, randla dupka ki phuv hem garagja o zlato pe gospodareskere.

19 Palo but vreme, o gospodari irangja pe hem rodingja e slugendar te phenen leske so kerge adaleja so dengja len. 20 Okova kaske so dengja pandž vreke zlato, angja okola da pandž vreke hem vakergja: ‘Gospodare, dengjan man pandž vreke zlato, a akje, me zarabotingjum panda pandž.’

21 Leskoro gospodari odgovoringja: ‘But šukar! Tu sijan šukar hem verno sluga. Tu sijan verno ko hari, a me ka čhivav tut te vodine but bukja. Ava hem radujn tut te gospodareja.’

22 I alo okova da e duje vrekencar hem vakergja: ‘Gospodare, dengjan man duj vreke zlato, a akje, me zarabotingjum panda duj.’

23 Leskoro gospodari odgovoringja: ‘But šukar! Tu sijan šukar hem verno sluga. Tu sijan verno ko hari, a me ka čhivav tut te vodine but bukja. Ava hem radujn tut te gospodareja.’

24 Togaš alo okova da so dobingja jekh vreka zlato hem vakergja: ‘Gospodare, džanava deka sijan pharo manuš. Khedeja kote so na sejneja hem khedeja kote so na frdingja seme. 25 Adaleske darandilum hem gelum te garavav to zlato ki phuv. Akje, to zlato, le le.’

26 Leskoro gospodari odgovoringja: ‘Lošno hem mrzalo sluga! Tu džaneja deka me khedava kote so na sejngjum hem khedava kote so na frdingjum seme? 27 Adaleske trebela sine te de me pare ki banka hem koga ka iranav man, ka ovel man sine zarabotka.

28 Adaleske len lestar i vreka e zlatoja hem den la okoleske kas so isi deš vreke. 29 Soske, kas isi ka del pe leske poviše hem ka ovel le panda poviše taro adava, a kas nane, ka lel pe lestar adava da so isi le. 30 Hem frden akale nesposobno sluga avrijal ko najtemno than, kote so ka ovel rojba hem krckjiba dandencar.’"

31 "Koga o Čhavo Manušeskoro ka avel ki pi slava hem sa o angejla leja, ka bešel ko po slavno troni. 32 Togaš sa o narodija ka kheden pe angli leste, a ov ka delinel e manušen jekh javerendar sar o pastiri so delinela e bakhren taro buzna. 33 E bakhren ka čhivel len tari desno strana, a e buznen tari levo.

34 Togaš o Caro ka vakerel okolenge tari pi desno strana: ‘Aven, tumen so sijen blagoslovime taro mo Dad hem nasledinen o carstvo, soj spremno baši tumenge panda taro keriba e svetoskoro. 35 Soske sijum sine bokhalo hem dengjen man te hav, sijum sine žedno hem dengjen man te pijav, sijum sine jabandžija hem primingjen man tumende. 36 Koga trebingja mange šeja, uragjen man, sijum sine nasvalo hem arakhlen man, sijum sine ko zatvor hem alen te dikhen man.’

37 Togaš o pravednikija ka pučen le: ‘Gospode, koga dikhlem tut bokhalo hem dengjem tut te ha, ili žedno hem dengjem tu te pije? 38 Koga dikhlem tut sar jabandžija hem primingjem tut amende, ili koga trebela tut sine šeja uravgjem tut? 39 Koga dikhlem tut nasvalo ili ko zatvor, alem te dikha tut?’

40 A o Caro ka odgovorinel: ‘Čače vakerava tumenge, ako kergjen adava jekheske taro akala me najtikne phrajla, mange kergjen.’

41 Togaš ka vakerel okolenge tari levo strana: ‘Našen mandar tumen so sijen prokletime ki večno jag soj spremimi bašo Beng hem leskere angejla. 42 Soske koga sijum sine bokhalo na dengjem man te hav, hem sijum sine žedno na dengjem man te pijav. 43 Sijum sine jabandžija, a na primingjen man tumende, trebela man sine šeja, a na uragjen man. Sijum sine nasvalo hem ko zatvor hem na alen te dikhen man.’

44 Togaš ola ka odgovorinen leske: ‘Gospode, koga dikhlem tut bokhalo hem žedno ili jabandžija ili nango, nasvalo ili ko zatvor, a na pomožingjem tut?’

45 A ov ka odgovorinel: ‘Čače vakerava tumenge, ako na kergjen adava jekheske taro akala najtikne, na kergjen ni mange.’

46 Togaš ola ka džan ki večno kazna, ama o pravednikija ko večno životo."