1 "Ma sudinen! Hem nane te sudinel pe tumenge. 2 Soske, sar ka sudinen javeren, agjar ka oven sudime tumen, hem save merkaja ka merinen, asavke merkaja ka merinel pe tumenge.

3 Soske dikheja i delanka te phraleske ki jakh, a i greda ki ti jakh na dikheja? 4 Sar šaj te vakere te phraleske: ‘Ač te ikalav i delanka tari ti jakh,’ koga ki ti jakh isi greda? 5 Dujmujaleja! Prvo ikal i greda tari ti jakh, a poslem ka dikhe šukar sar te ikale i delanka tari jakh te phraleskiri.

6 Ma den e džukelenge adava soj sveto, hem ma frden tumare bisejra e balenge. Ako kergjen adava, o bale šaj te gazinen len, a o džukela te irange pe ka keren tumen ko kotora."

7 "Pučen hem ka del pe tumenge; roden hem ka arakhen; khuven hem ka phravel pe tumenge. 8 Soske sekoj so pučela, dobinela; hem koj rodela, arakhela; a koj khuvela, ka phravel pe leske.

9 Koj tumendar, ako rodingja leskoro čhavo maro, ka del le bar? 10 Ili ako rodingja mačho, ka del le sap? 11 Togaš, tumen so sijen lošna, džanena te den šukar poklojna tumare čhavenge, a kozom poviše tumaro Dad soj ko nebo ka del šuže poklojna okolenge so rodena lestar.

12 Hem agjar, ko sa, keren tumen adava so mangena te keren tumenge javera; soske akava pherela o Zakoni hem o lila e Prorokongere."

13 "Khuven taro tesno udar. Soske buvle tane o udara hem buvle tane o drumija so legarena ko propast, hem but džene khuvena lestar. 14 Ama but i tikne o udara hem tesna o drumija so legarena ko životo, a samo hari džene arakhena le."

15 "Arakhen tumen taro hovavne prorokija. Ola avena ki tumende ki bakhrani koza, ama andral tane diva ruva. 16 Taro lengere plodija ka pendžaren len. Dali šaj o manuša te kheden drakha taro kare, ili smokve taro bocke? 17 Agjar, sekova šukar kaš dela šukar plodija, a o lošno kaš dela lošna plodija. 18 O šukar kaš našti te del lošna plodija, ni o lošno kaš našti te del šukar plodija. 19 Sekova kaš so na dela šukar plodi činela pe hem frdela pe ki jag. 20 Agjar, taro lengere plodija ka pendžaren e hovavne prorokon."

21 "Na sekoj so ka vakerel: ‘Gospode, Gospode’, ka khuven ko nebesno carstvo, nego okova so kerela i vojla me Dadeskiri soj ko nebo. 22 But džene ka vakeren ko sudno dive: ‘Gospode, Gospode, na prorokujngjem li ko to anav? Hem na ikalgjem li demonen ko to anav? Hem na kergjem li but čudija ko to anav?’ 23 Hem togaš me ka phenav lenge: ‘Nikat na pendžargjum tumen. Našen mandar dur, tumen so phagena o Zakoni e Devleskoro!’"

24 "I sekoj so šunela me lafija hem so pherela len, ov tano sar pametno manuš, so kergja po kher ki karpa. 25 Hem dengja bršim, ale poplave hem phudingja bavlal ko adava kher, ama o kher na pelo, soske sine kerdo ki karpa. 26 Ama sekoj so šunela me lafija hem na pherela len, ov tano sar našavdo manuš, so kergja po kher ki pošik. 27 Hem dengja bršim, ale poplave hem phudingja bavlal ko adava kher hem celo kher rušisalilo!"

28 Koga o Isus završingja akale lafencar, o manuša sine čudime taro leskoro učibe, 29 soske ov sikavela len sine sar adava so isi le vlast, a na sar o učitejla e Zakoneskere.