1 Togaš taro Erusalim ale nesave fariseja hem učitejla e Zakoneskere ko Isus hem pučle le: 2 "Soske te učenikija phagena o adetija amare parapapongere? Ola na thovena pe vasta pred te han!"

3 O Isus odgovoringja lenge: "A soske tumen da phagena e Devleskiri zapoved e adetencar? 4 Soske o Devel phengja: ‘Poštojn te dade hem te daja’ hem, ‘Koj ka del armanja pe dade hem pe daja, te ovel kaznimo meribaja.’ 5 Ama tumen vakerena ako nekoj phengja pe dadeske ili pe dajake: ‘Sa soleja šaj sine te pomožinav tut ko životo, više halum sovli deka ka dav le e Devleske’ 6 adava manuš na trebela te poštojnel pe dade ili pe daja. Agjar tumen čhinavena o lafi e Devleskoro bašo tumaro adeti.

7 Dujmujale! Šukar prorokujngja o prorok Isaija baši tumenge:

8 ‘Akala manuša samo pe mujeja poštojnena man,

ama pe srceja dur tane mandar.

9 Džabe poštojnena man;

sikavindor manušikane adetija.’ "✝

10 O Isus vikingja sa e narodo ki peste hem vakergja lenge: "Šunen hem svatinen: 11 Adava so khuvela andre ko muj e manušeske na kerela le melalo. Ama okova so iklola andral taro muj e manušeskoro, adava kerela le melalo."

12 Togaš ale leskere učenikija ki leste hem phenge leske: "Džaneja li deka o fariseja navredisalile koga šunge akava?"

13 A ov vakergja lenge: "Sekova rastenije so na sadingja mo Dad soj ko nebo, ka ovel ikaldo korenoja. 14 Mukhen len; ola tane korole vodačija. Ako korolo phiragja e korole, o solduj ka peren ki dupka."

15 O Petar phengja leske: "Objasnin amenge akaja parabola."

16 I o Isus pučlja len: "Tumen panda li na svatingjen? 17 Na dikhena li deka sa so khuvela ko muj, džala ko vogi, hem palo adava iklola taro leskoro telo? 18 Ama, adava so iklola taro muj e manušeskoro avela taro srce, hem adava kerela le melalo. 19 Soske taro srce, iklona o lošna misle, o mudariba, i preljuba, o bludstvo, o čoriba, o hovavne svedoštvija, o huliba. 20 Akava sa mejlarela e manuše, ama o hajbe bi thovde vastencar na mejlarela le."

21 I togaš o Isus iklilo taro adava than, hem gelo ko thana taro Tir hem Sidon.

22 I jekh romni Hananejka, taro adava than, ali ki leste hem vikingja: "Žalin man, Gospode, Čhavo e Davideskoro! Mi čhaj opsednimi demoneja hem but mučinela pe."

23 Ama o Isus na phengja lake ništo. A leskere učenikija ale ki leste hem molinge le: "Vaker lake te džal peske, soske vikinela hem avela pala amende."

24 Ov odgovoringja: "Me sijum bičhavdo samo ko našavde bakhre e Izraeleskere."

25 I romni ali hem peli ko kočaka angli leste, hem phengja leske: "Gospode, pomožin man."

26 Ov odgovoringja: "Nane šukar te le pe taro čhave o maro hem te frdel pe e džukelenge."

27 A oj phengja leske: "Oja, Gospode, adaleske so o džukela da hana o troške telo astali so perena taro lengere gospodajra."

28 Togaš o Isus phengja lake: "Manušnije, tute isi bari vera! Neka ovel sar so mangeja."

I lakiri čhaj ko adava momenti saslili.

29 O Isus gelo adathar ko Galilejsko ezero. Togaš uklilo ki jekh planina hem adathe bešla te sikavel.

30 But manuša ale ki leste hem ange pumencar: sakaten, korolen, bangen, laloren hem panda buten. I sarinen sigjarena sine te čhiven len anglo leskere pre, hem ov sasljargja len.

31 A o manuša čudisalile koga dikhle sar o lalore kerena lafi, a o bange sasljarde, o sakatija phirena hem o korole dikhena. I ola slavinge e Izraeleskere Devle.

32 O Isus vikingja pe učenikon uza peste hem phengja lenge: "Pharo mange akale manušenge. Trin dive tane mancar a nane len so te han. Na mangava te mukhav len bokhale, te na peren ko drumo."

33 A leskere učenikija pučle le: "Kaj šaj arakhaja ko akava čučo than dovolno maro bašo sa akala manuša te čajloven?"

34 O Isus pučlja len: "Kozom mare isi tumen?"

Ola odgovoringe: "Efta mare hem nekozom tikne mačhe."

35 Togaš o Isus vakergja e manušenge te bešen tele ki phuv. 36 Lela o efta mare, hem o mačhe, blagodaringja lenge, phagla len hem dengja pe učenikonge, a ola delinge len e manušenge. 37 Sarinen hale hem čalile. A taro adava so ačhilo o učenikija khedinge efta pherde bare korpe. 38 Adala so hale sine štar ilade murša, bizo te gejnen pe o romna hem o čhave.

39 Palo adava o Isus bičhalgja len te džan peske, ov khugja ko čamco hem gelo ko thana taro Magadan.