1 O Isus koga završingja o učibe pe dešuduje učenikoncar, gelo adathar te sikavel hem te propovedinel ko gradija e Galilejakere.

2 Koga o Jovan Krstitel, so sine ko zatvor, šungja bašo dejla e Hristoskere, bičhalgja pe učenikon 3 te pučen e Isuse: "Tu li sijan adava so trebela te avel ili te adžikera javere?"

4 A o Isus odgovoringja lenge: "Džan hem vakeren e Jovaneske so šunena hem so dikhena: 5 o korole dikhena, o bange phirena, okolen so isi len lepra sasljona, o kašuke šunena, o mule uštena, hem o evangelije propovedinela pe e čorolenge. 6 Hem blagoslovimo tano sekoj so na otkažinela pe mandar."

7 A koga gele peske e Jovaneskere učenikija, o Isus počmingja te vakerel e manušenge bašo Jovan: "So iklilen te dikhen ki pustina? I trska li so phudela la i bavlal? 8 Ako na, so iklilen te dikhen? Manuš uravdo ko šuže šeja? Na, okola so phiravena šuže šeja tane ko carska palate. 9 Togaš so iklilen te dikhen? E proroko li? Oja, vakerava tumenge, ov tano poviše taro proroko. 10 Ov tano akava baši kaske sine pišimo:

‘Akje, me bičhavava me glasniko angla tute,

so ka spreminel to drumo angla tute.’✝

11 Čače vakerava tumenge, maškar sa o manuša soj bijame nijekh nane pobaro taro Jovan Krstitel, ama sekoj soj najtikno ko carstvo nebesno tano pobaro lestar. 12 Taro dive e Jovane Krstiteleskoro koga počmingja te propovedinel dži akana, o carstvo nebesno cidela muka, hem o siladžije lena le silaja. 13 Soske sa o prorokija hem o Zakoni prorokujnge dži ko Jovan. 14 Te manglen te prifatinen, ov tano o Ilija so trebela sine te avel. 15 Kas isi kana, neka šunel.

16 Soleja te sporedinav akaja generacija? Ola tane sar čhave so bešena ko pazajra hem vakerena javerenge:

17 ‘Bašalgjem tumenge ki flejta,

a na khelgjen.

Gilagjem tumenge tažna gijla,

a na rungjen.’

18 Soske koga alo o Jovan, ni hala ni pila sar javera, a ola vakerena: ‘Isi le demoni.’ 19 Alo o Čhavo Manušeskoro, hala hem pijela, a ola vakerena: ‘Akje o bokhalo hem o pijanica, amal e danočnikongoro hem javere grešnikongoro.’ Ama i mudrost dokažinela pe deloncar."

20 Togaš o Isus počmingja te ukorinel o gradija so ki lende kergja but čudija, soske ola na pokajnge pe.

21 "Pharo tuke, Horazin! Pharo tuke, Vitsaida! Soske, o čudija so ule tumende te oven sine kerde ko Tir hem Sidon, ola angleder ka pokajnen pe sine hem ka uraven pe ko vreke hem ka čhiven pravo upro pumare šere. 22 Ama me vakerava tumenge, e Tireske hem e Sidoneske ka ovel polokhe ko sudno dive nego tumenge. 23 A tu Kapernaume, ka ove li vazdimo dži ko nebo? Na, tu ka hule dži ko than e mulengoro. Soske, o čudija so ule tumende te oven sine kerde ko Sodom, ka pokajnen pe sine hem o Sodom ka ačhol sine dži avdive da. 24 Ama me vakerava tumenge, e Sodomeske ka ovel polokhe ko sudno dive nego tumenge."

25 Togaš o Isus phengja: "Slavinava tut, Dade, Gospode e neboskoro hem e phuvijakoro, soske garagjan akava taro mudra hem taro učime, hem sikavgjan le okolenge soj tane sar tikne čhave. 26 Oja, Dade, soske adava manglan te kere.

27 Sa i mange dendo taro mo Dad. Nikoj na džanela e Čhave, osven o Dad, hem nikoj na džanela e Dade, osven o Čhavo hem okolenge so o Čhavo birinela te sikavel le.

28 Aven ki mande sarine so sijen umorna hem so isi tumen pharipe, hem me ka lokjarav tumen. 29 Len mo jarem ki tumende hem sikloven mandar, soske me sijum krotko hem ponizno ko srce, hem ka arakhen odmor tumare dušake. 30 Soske mo jarem tano lokho hem mo pharipe nane pharo."