1 A koga bijandilo o Isus ko gav Vitleem ki Judeja, ko vreme dži kote carujnela sine o Irod, ale mudrecija taro istok ko Erusalim 2 hem pučle: "Kaj tano o nevo bijando caro e Evrejengoro? Dikhlem leskere čereni sar iklola ko istok hem alem te poklonina amen leske."

3 Koga šungja adava o car Irod, nerviringja pe, a leja hem o celo Erusalim. 4 Togaš vikingja sa e prvosveštenikon hem e učitelen e Zakoneskere hem pučlja len kaj trebela te bijangjovel o Hristos.

5 A ola vakerge leske: "Ko Vitleem ki Judeja, soske agjar pišingja o proroko:

6 ‘Tu Vitleeme, ki phuv e Judejakiri,

ko ništo na sijan potikno maškar o Judejska gava

soske tutar ka iklol vladiteli

kova sar pastiri ka legarel me narodo, e Izraele.’ ✝"

7 Togaš o Irod tajno vikingja e mudrecon hem doznangja lendar koga točno pojavingja pe i čereni. 8 I bičhalgja len ko Vitleem vakerindor: "Džan hem pučljaren tumen šukar e čhaveske. Koga ka arakhen le, aven hem javinen mange te šaj me da te džav te pokloninav man leske."

9 Ola šunge e caro hem gele. A i čereni so dikhle la sar iklola ko istok, džala sine angli lende sa dži kote na terdili upreder ko than kote so sine o čhavo. 10 Koga dikhle i čereni, but radujnge pe. 11 Hem koga khuge ko kher dikhle e čhave hem leskere daja, e Marija hem pele ko kočaka hem pokloninge pe leske. Palo adava ikalge pumare poklojna hem denge le zlato, temjan hem smirna. 12 Palo adava ko suno o Devel opomeningja len te na iranen pe ko Irod, hem irange pe ki pumari phuv taro javer drumo.

13 Koga gele peske o mudrecija, o angeli e Gospodareskoro alo ko suno e Josifeske hem phengja leske: "Ušti, le e čhave hem leskere daja hem našen ko Egipet. Ačhoven adathe sa dži kote na vakerava tumenge, soske o Irod ka rodel e čhave te mudarel le."

14 I o Josif uštilo, lela e čhave hem leskere daja hem ki adaja rat gelo ko Egipet. 15 A adathe ačhile sa dži kote o Irod na mulo. Hem agjar pherdilo adava so phengja o Gospodari preku o proroko:

"Taro Egipet vikingjum me čhave."✝

16 Koga o Irod svatingja deka o mudrecija hovavge le, but holangja hem naredingja e vojnikonge te džan ko Vitleem hem ko sa o pašutne thana hem te mudaren sa e tikne muršen dži ko duj berš. Sa adava kergja spored o vreme so doznangja taro mudrecija. 17 Togaš pherdilo adava so phengja sine o prorok Eremija:

18 "Ko gav Rama šundilo glaso

kukjiba hem baro rojba;

a i Rahila rovela pe čhavenge

hem na mangela te utešinel pe,

soske lakere čhave nane više dživde. "✝

19 A palo meribe e Irodeskoro, o angeli e Gospodareskoro alo ko suno e Josifeske ko Egipet 20 hem phengja leske: "Ušti, le e čhave hem leskere daja hem džan ki phuv Izraelsko, soske mule adala so mangle te mudaren e čhave."

21 Ov uštilo, lela e čhave hem leskere daja hem gelo ko Izrael. 22 Ama koga šungja deka e Irodeskoro čhavo, o Arhelaj lela o than pe dadeskoro hem ulo nevo caro ki Judeja, darandilo te džal adathe. Hem sine opomenimo ko suno te džal ki phuv Galilejsko. 23 I gele hem živinge ko Nazaret. Agjar pherdilo adava so o prorokija vakerge, deka ka vikinel pe Nazarejco.