1 Koga o Isus dikhla but narodo, uklilo upre ki gora hem adathe bešla te sikavel. A leskere učenikija ale ki leste.

2 Ov počmingja te sikavel len, vakerindor:

3 "Blagoslovime tane o čorole ko duho,

soske lengoro tano o carstvo nebesno.

4 Blagoslovime tane okola so tugujnena,

soske ola ka oven utešime.

5 Blagoslovime tane o krotka,

soske ola ka nasledinen i phuv.

6 Blagoslovime tane o bokhale hem o žedna baši pravda,

soske ola ka čajloven.

7 Blagoslovime tane o milostliva,

soske lenge ka sikavel pe milost.

8 Blagoslovime tane o čista ko srce,

soske ola ka dikhen e Devle.

9 Blagoslovime tane okola so anena mir,

soske ola ka vikinen pe čhave e Devleskere.

10 Blagoslovime tane okola soj progonime baši pravda,

soske lengoro tano o carstvo nebesno.

11 Blagoslovime sijen tumen koga o manuša uvredžinena hem progoninena tumen, vakerindor protiv tumende razno lošnipe hovajbe baši mange. 12 Radujnen tumen hem veselinen tumen! Adaleske so bari tani tumari nagrada ko nebo, soske agjar e prorokon da progoninge so sine angleder tumende."

13 "Tumen sijen o lon ki phuv. Ama ako o lon našagja po vkus, sar šaj palem te ovel londalo? Više ništoske nane šukar, osven te frdel pe hem te ovel gazimo prencar.

14 Tumen sijen i svetlina ko sveto. Našti te ovel garavdo o gradi soj upre ki planina. 15 Nikoj na tharela momoli te učharel la čareja, nego na čhivena la li ko lakoro than te svetinel sarinenge ko kher. 16 Agjar, neka svetinel tumari svetlina anglo sarine, te šaj te dikhen tumare šukar dejla hem te slavinen tumare Dade soj ko nebo."

17 "Ma mislinen deka me alum te čhinavav e Mojseskoro Zakoni ili o lila e Prorokongere. Na alum te čhinavav len, nego te pherav len. 18 Soske čače vakerava tumenge, sa dži kote postojnela o nebo hem phuv, nane nijekh tikni bukva te našavgjovel ili crtička taro Zakoni nane te meningjovel, sa dži kote na phergjola sa! 19 Adaleske, koj ka mukhel jekh taro akala najtikne zapovedija hem ka sikavel javeren te keren agjar, ka ovel najtikno ko carstvo nebesno. Ama koj ka ikerel hem ka sikavel sa akala zapovedija, ka ovel baro ko carstvo nebesno. 20 Soske vakerava tumenge deka ako tumari pravednost na nakhagja okoja e farisejengiri hem učitelengiri e Zakonestar, našti nisar te khuven ko carstvo nebesno."

21 "Šungjen so sine phendo ko Zakoni amare parapapongoro: ‘Ma mudar! A koj ka mudarela ka ovel osudimo anglo sudo.’ 22 Ama, me vakerava tumenge: Koj ka holanel pe phraleske ka ovel osudimo anglo sudo. A koj ka vikinel pe phrale ‘glupavo’ ka ovel osudimo anglo pobaro sudo. A te vikingja le ‘dilineja’ ka ovel osudimo bašo jagakoro pekol.

23 Adaleske, ako aneja žrtva anglo oltari hem adathe setineja tut deka isi le nešto te phrale protiv tute, 24 mukh ti žrtva anglo oltari, prvo dža hem smirin tut leja. Togaš ava hem de ti žrtva.

25 Posigate dža hem smirin tut te dušmaneja. Ker adava sa dži kote sijan ko drumo sar na gelo dži ko sudija te del tut, ili to dušmani ka del tut ko sudija, a o sudija ka del tut e čuvareske so ka čhivel tut ko zatvor. 26 Čače vakerava tuke, nane te iklove adathar sa dži kote na deja te posledna pare."

27 "Šungjen so sine phendo ko Zakoni: ‘Ma ker preljuba!’ 28 Ama, me vakerava tumenge: Sekoj so ka dikhel ki džuvli želbaja, više kergja preljuba laja ko po srce. 29 Ako ti desno jakh čhivela tut ko grevo, ikav la hem frde la tutar. Pošukar i te našave jekh delo taro to telo, nego celo telo te ovel frdimo ko pekol. 30 Ako to desno vas čhivela tut ko grevo, čhin le hem frde le tutar. Pošukar i te našave jekh delo taro to telo, nego celo telo te džal ko pekol."

31 "Isto agjar sine phendo: ‘Sekoj so ka mukhel pe romna, neka dela la razvodno lil.’ 32 Ama vakerava tumenge deka sekoj so mukhel pe romna, osven baši preljuba, ov agjar čhivela la te kerel preljuba. Hem koj ka lel mukhle romna taro rom, ov da kerela preljuba."

33 "Isto agjar šungjen so sine phendo ko Zakoni amare parapapongoro: ‘Ma ha sovli hovavni, nego ker i sovli so dengjan la anglo Gospodari.’ 34 Ama, me vakerava tumenge: Ma ha sovli nigde, ni ko nebo, soske adavaj e Devleskoro troni, 35 ni ki phuv, soske adathe tane leskere pre, ni ko Erusalim, soske adava tano o gradi e Devleskoro, e bare careskoro. 36 Ma ha sovli ni ko to šero, soske našti te keren nijekh bal parni ili kali. 37 Ama tumaro lafi neka ovel: ‘Oja’ ‘oja’ ili ‘Na’ ‘na’ a sa soj poviše adalestar i tano e lošnostar."

38 "Šungjen so sine phendo: ‘Jakh baši jakh, dand bašo dand!’ 39 Ama, me vakerava tumenge: Ma protivinen tumen e lošno manušeja. Ako nekoj khugja tut šamarka ki desno čham, iran leske okoja da čham. 40 Ako nekoj mangela te sudinel tut hem te lel to gad, de le hem o mantili. 41 Ako čhivena tut o Rimska vojnikija te legare lengere bukja jekh kilometar, tu legar duj. 42 De okole so rodela tutar, hem ma odbin okole so mangela te lel tutar zaem."

43 "Šungjen so sine phendo: ‘Mang te pašutne’, a ‘mrzin te dušmane.’ 44 Ama, me vakerava tumenge: Mangen tumare dušmanen hem molinen tumen okolenge so progoninena tumen, 45 te šaj ovena čhave tumare Dadeske soj ko nebo. Ov kerela leskoro kham te thablol e lošnonge da hem e šukarenge da, hem mukhela bršim upro pravednikija hem upro grešnikija. 46 Ako mangena samo okolen so mangena tumen, savi nagrada ka dobinen? Na kerena li adava o danočnikija? 47 Ako pozdravinena tumen samo tumare manušencar, so sijan pošukar javerendar? Na kerena li isto adava o manuša so na džanena e Devle? 48 Adaleske oven sovršena sar soj sovršeno tumaro Dad soj ko nebo."