1 Togaš ale ko o Isus o fariseja hem o sadukeja hem iskušinge le adaleja so rodinge lestar znako taro nebo.

2 A ov odgovoringja lenge: "Koga perel o kham, vakerena: ‘Ka ovel šužo vreme, soske o nebo tano lolo.’ 3 A sabajle vakerena: ‘Avdive nane te ovel šužo o vreme, soske o nebo tano lolo hem oblačno.’ O izgled e neboskoro džanena te pendžaren, a na džanena te pendžaren o znakija e divengere ko save živinena. 4 I lošno hem i neverno generacija rodela znako, ama nisavo znako nane te del pe, osven o znako so ulo e prorokoja e Jonaja."

I palo adava o Isus mukhla len hem gelo peske.

5 O učenikija nakhle tari javer strana taro ezero, ama bisterge te len peja o maro. 6 I o Isus phengja lenge: "Pazinen! Arakhen tumen taro kvasaci e farisejengoro hem e sadukejengoro."

7 A ola kerena sine lafi maškar peste: "Akava phengja amenge soske na lelem amencar maro."

8 O Isus džangja so kerena lafi hem pučlja len: "Tikne verakere, soske kerena lafi maškar tumende deka nane tumen maro? 9 Panda li na svatinena? Na setinena tumen li bašo pandž mare e pandže ilade manušenge hem kozom bare korpe khedingjen? 10 Ili o efta mare e štare ilade manušenge hem kozom bare korpe khedingjen? 11 Sar na svatinena deka na vakergjum tumenge bašo maro? Ama arakhen tumen taro kvasaci e farisejengoro hem e sadukejengoro."

12 Togaš svatinge deka na vakergja lenge te arakhen pe taro kvasaci e mareskoro, nego taro učibe e farisejengoro hem e sadukejengoro.

13 Koga o Isus alo ko thana taro e Filipeskiri Cezarija, pučlja pe učenikon: "So phenena o manuša, koj tano o Čhavo Manušeskoro?"

14 Ola odgovoringe leske: "Nekoj phenela o Jovan Krstitel, a javera phenena deka o prorok Ilija, a nesave javera phenena deka o Eremija ili jekh taro javera prorokija."

15 Togaš o Isus pučlja len: "A tumen? So phenena, koj sijum me?"

16 O Simon Petar odgovoringja leske: "Tu sijan o Hristos, o Čhavo e dživde Devleskoro."

17 A o Isus phengja leske: "Blagoslovimo sijan Simone, čhavo e Jonaskoro, soske akava na sine tuke phendo taro manuš, nego taro mo Dad soj ko nebo. 18 A me phenava tuke deka tu sijan o Petar, hem ki akaja karpa ka gradinav mi crkva, hem o udara taro than e mulengoro našti te pobedinen la. 19 Hem ka dav tut o klučija taro carstvo nebesno, i sa so ka phande ki phuv, ka ovel phandlo ko nebo, hem sa so ka phrave ki phuv ka ovel phravdo ko nebo."

20 Togaš zapovedingja pe učenikonge ma te vakeren nikaske deka ov tano o Hristos.

21 Od togaš o Isus počmingja te vakerel pe učenikonge deka mora te džal ko Erusalim hem but te cidel taro starešine, taro prvosveštenikija hem taro učitejla e Zakoneskere, hem deka mora te ovel mudardo hem o trito dive ka uštel taro mule.

22 I o Petar cidingja le ki jekh strana, hem zaptingja le vakerindor: "Nikat Gospode! Akava nikat nane te ovel tuke!"

23 A o Isus irangja pe ki leste hem phengja: "Naš mandar, Benga! Tergjoveja mange ko drumo, soske na mislineja adava soj Devleskoro, nego manušeskoro."

24 Togaš o Isus phengja pe učenikonge: "Koj mangela te ovel mo učeniko, mora te otkažinel pe pestar hem mora te lel po krsto hem mora te phirel pala mande. 25 Soske koj mangela te spasinel po životo, ka našavel le, a koj ka našavel po životo baši mange ka arakhel le. 26 So džabe celo sveto te le, ako ti duša našagjan? Ili soleja o manuš šaj zameninela pi duša? 27 Soske o Čhavo Manušeskoro ka avel ki slava pe Dadeskiri pe angelencar hem togaš ka nagradinel sarinen spored adava so kergja.

28 Čače vakerava tumenge, isi nesave akate maškar tumende so nane te meren, dži kote na dikhena o Čhavo Manušeskoro sar avela ko po carstvo."