Milagres de Jesus

Yesu akuvalamisa ngalola vavili

27 Yesu akawuka pandu penapo, na peavi mukuhamba, vangalola vavili vamlandili na kuywanga, "Mwana wa Daudi utihengela lipyana!"

28 Yesu peayingili munyumba, vangalola vala vamhambili namwene avakotili, "Wu, mwisadika kuvya nihotola kuvalamisa?"

Vene vakayangula, "Ena, Bambu."

29 Penapo Yesu akavapamisi mumihu gavi na kujova, "Ndi, gavyai mewa kwa nyenye ngati chemwisadika!" 30 Mihu gavi gadindwiki. Namwene Yesu akavabesa neju, "Mkoto kumjovela mundu yeyoha lijambu lila."

31 Nambu vene vawukili na kugadandaula malovi ga Yesu pamulima wula woha.

Yesu akuvalamisa vangalola vavili

29 Yesu na vawuliwa vaki pavawuyayi ku Yeliko msambi uvaha wa vandu vamlandili. 30 Ndi vangalola vavili vevatamili pamuhana ya njila, pevayuwini kuvya Yesu ibwela na njila yeniyo, vakajova kwa lwami luvaha, "Bambu, Mwana wa Daudi utihengela lipyana."

31 Msambi wa vandu wula wavahakalili na kuvajovela vagunai. Nambu vene vakayonjokesa kujova kwa lwami luvaha, "Bambu, Mwana wa Daudi utihengela lipyana!"

32 Yesu akayima akavakemela na kuvakota, "Wu, mwigana nivahengela kyani?"

33 Vakamyangula, "Bambu, tigana kulola."

34 Hinu Yesu avahengili lipyana, ndi akavapamisa mumihu gavi, ndi bahapo vakahotola kulola, vakamulanda.

Yesu akumlamisa mundu ngalola ku Betisaida.

22 Yesu ahikili ku Betisaida pamonga na vawuliwa vaki. Kwenuko vandu vakamletela ngalola, vakamuyupa ampamisa muni amlamisa. 23 Yesu amkamwili chiwoko ngalola yula, ampeliki kuvala ya chijiji. Akamhunyila mata mumihu, akampamisa mawoko, akamkota "Wu, wihotola kulola chindu?"

24 Ngalola yula akalola, akajova "Nikuvalola vandu vevilolekana ngati mikongo yeyigenda."

25 Kangi Yesu akampamisa kavili mawoko mumihu, mwene akamuhutusila mihu, uhotola waki wa kulola ukamuwuyila namwene akalola. 26 Yesu akamjovela awuya kunyumba yaki na kumlagiza "Ukotoka kuwuya ku Betisaida."

Yesu akumlamisa ngajova mweavi ngayuwa

31 Kangi Yesu akawuka kumuji wa Tilo, akapitila pagati ya ku Sidoni, akahamba mbaka kunyanja ya Galilaya kuvedukila pamulima wa Dekapoli mana yaki miji kumi. 32 Ndi vakamletela ngayuwa nambu mewawa avi ngajova kwa Yesu, vakamuyupa amvikilayi mawoko muni amlamisa. 33 Yesu akamvika pamuhana na msambi wa vandu mundu uyo. Akamsopa ngonji mumakutu. Kangi akahunya mata mulungoji lwaki na kumpamisa mululimi lwa mundu yula. 34 Kangi Yesu akalola kunani kwa Chapanga, akakeka kwa likakala, akamjovela, "Efata," Mana yaki "Dindukayi."

35 Lukumbi lulalula akatumbula kuyuwana bwina, mewawa lulimi lwaki lukajova bwina. 36 Yesu akavalagiza vakotoka kumjovela mundu lijambu lila. Nambu cheayonjokisi kuvabesa, ndi chevadandisi malovi gala. 37 Vandu vakangisi neju, vakajova, "Avakitili goha gabwina hati vangayuwa kuyuwana, na vangajova kujova!"

Yesu akumlamisa mundu mmonga ngalola mweikemiwa Batimayo

46 Vakahamba mbaka ku Yeliko. Yesu paawukayi pamuji wenuwo pamonga na vawuliwa vaki na msambi uvaha wa vandu. Ngalola mmonga mwana wa Timayo mweikemelewa Batimayo, atamili pamuhana ya njila, iyupa yala. 47 Peayuwini kuvya Yesu wa ku Nazaleti ipita pandu pala, akatumbula kukwesa lwami, "Yesu, Mwana wa Daudi, unihengela lipyana!"

48 Vandu vamahele vakamlakali kumgunisa, nambu mwene akayonjokesa kukwesa lwami, "Mwana wa Daudi, unihengela lipyana!"

49 Yesu akayima, akajova, "Mumkemela."

Hinu vakamkemela ngalola yula, vakamjovela, "Jipolesa mtima! Yima, akukemela."

50 Batimayo akataga likoti laki, akahumba kanyata na kumhambila Yesu.

51 Yesu akamkota, "Ugana nikukitila kyani?" Ngalola yula akamyangula, "Muwula, niyupa kulola."

52 Yesu akamjovela, "Hamba, sadika yaku yikulamisi."

Bahapo ngalola yula akahotola kulola, akalongosana na Yesu munjila.

Yesu akumlamisa ngalola myupaji

35 Lukumbi Yesu peahegalili ku Yeliko, kwavi na mundu mmonga ngalola atamili pamuhana ya njila ayupayi. 36 Peayuwini msambi wa vandu wipita akakota, "Chivii kyani?"

37 Vakamjovela, "Yesu wa Nazaleti ipita."

38 Akajova kwa lwami luvaha, "Yesu, wa chiveleku cha Daudi unihengela lipyana!"

39 Vandu vevalongolili vala vakamywangila aguna, nambu mwene akayonjokesa kujova kwa lwami luvaha, "Yesu wa chiveleku cha Daudi, unihengela lipyana!"

40 Yesu akayima, akalagiza vandu vamleta palongolo yaki. Ngalola yula peahikili papipi, Yesu akamkota, 41 "Wigana nikukitila kyani?"

Ngalola akayangula, "Bambu, nihotola kulola kavili."

42 Yesu akamjovela, "Lola! Kusadika kwaku kukulamisi."

43 Bahapo ngalola yula akalola, akamlanda Yesu kuni akumulumba Chapanga. Vandu voha pavagawene genago, vakamulumba Chapanga.

Yesu akumlamisa mundu mweavelekiwi ngalola

1 Yesu peavili mukuhamba ndi amuwene mundu mmonga mweavingalola kuhumila kuvelekewa. 2 Vawuliwa vaki vakamkota, "Muwula, yani mweambudili Chapanga, mundu uyu amala dadi na nyina vaki, hati avelekiwi ngalola?"

3 Yesu akavayangula, "Mwene amala dadi na nyina waki avi lepi mweambudili Chapanga. Avelikiwi ngalola, muni makakala ga Chapanga gawonekanayi gihenga lihengu muwumi waki. 4 Kwakona muhi yikutigana kuhenga lihengu laki yula mweanitumili. Muni kimihi yibwela mundu nakuhotola kuhenga lihengu. 5 Lukumbi penivii pamulima nene ndi lumuli lwa vandu va mulima."

6 Peamali kujova genago, Yesu akahunya mata pahi, akakandagana ludaka na kumnyala ngalola yula mumihu. 7 Akamjovela, "Hamba ukajisambisa kulitanda la Siloamu." Liina lenilo mana yaki ndi mweatumwili. Penapo, ngalola yula akahamba akajisambisa, akawuya kuni ilola.

2 Hinu abwelili mundu mmonga mweavi na mabudi, akamfugamila na kujova, "Bambu, ngati wigana, uhotola kuninyambisa!" 3 Yesu akatalambula chiwoko, akampamisa na kujova, "Nigana! Unyambasika!" Bahapo mundu yula akalama mabudi gaki. 4 Kangi Yesu akamjovela, "Yuwanila! Kotoka kumjovela mundu yeyoha yula, ndi uhamba ukajilangisa kwa mteta wa Chapanga na kumpela teta ngati chealagizi Musa ya kulangisa kuvya unyambiswi."

2 Penapo vandu vamletili mundu mmonga mweapoli higa, vamgonisi pa lusongwani. Yesu paavaweni chavisadika, akamjovela mundu mweapoli yula, "Jipolesa mtima mwana vangu! Kumbudila kwaku Chapanga ulekekiswi."

3 Vawula vangi va malagizu vakatumbula kuhololela, "Mundu uyu akumliga Chapanga!"

4 Yesu amanyili maholo gavi akajova, "Ndava kyani mhololela gahakau mumtima winu? 5 Chinonopa kiki kujova, ‘Ulekekiswi kumbudila Chapanga waku,’ Amala kujova, ‘Yima, ugenda?’ 6 Hinu, nigana mmanya kuvya Mwana wa Mundu anauhotola pamulima kuvalekekesa vandu gevambudili Chapanga." Penapo ndi akamjovela mundu mweapoli yula, "Yima ugega lusongwani lwaku amba kunyumba yaku!"

7 Na mundu mwenuyo akawuka na kuhamba kunyumba yaki.

10 Kwavi na mundu mmonga mweagogodili chiwoko. Hinu, vandu vamkotili Yesu, "Wu, Malagizu giyidakila kumlamisa mundu pa Ligono la Kupumulila?" Vamlingili ndava vapatayi njila ya kumtakila.

11 Nambu Yesu akavajovela, "Wu, yani pagati yinu mweavi na limbelele laki, ligwilili muligodi, wu, akulihumisa lepi Ligono la Kupumulila? 12 Mundu itopeswa neju kuliku limbelele! Hinu ndi yiyidakiliwa kuhenga matendu gabwina pa Ligono la Kupumulila." 13 Kangi Yesu akamjovela mundu yula, "Talambula chiwoko chaku."

Mwene akachitalambula, ndi chalamili ngati chiwoko chingi chila.

30 Mkohanu waki Simoni agonili palusongwani ndava alwalayi neju. Yesu pahikili pala ndi kanyata vakamjovela utamu wa mau yula. 31 Yesu akamhambila mau yula, akamkamula chiwoko akamuyinula. Ndi utamu ula ukamleka, akatumbula kuvatelekela.

Yesu akumlamisa mundu mweavi na mabudi

40 Ligono limonga mundu mmonga mweavi na mabudi, amhambalili Yesu, akafugama, akamuyupa, "Ngati wigana uhotola kuninyambisa."

41 Yesu akamhengela lipyana akatalambula chiwoko na kumpamisa, akamjovela, "Nigana, unyambasikayi!" 42 Bahapo mabudi gakamuwuka mundu yula akalama.

3 Lukumbi lwenulo vakabwela vandu mcheche vamletili mundu mweapolili kwa Yesu. 4 Nakuhotola kumuhikisa kwa Yesu ndava ya msambi wa vandu. Hinu vakapekenyula kuchituvilu pandu peavili Yesu. Pavamali kubowola pandu pala vakamuhelesa mundu yula kuni agonili pampasa. 5 Yesu peayiwene sadika yavi akamjovela mundu mweapoli yula, "Mwana vangu, ulekekiswi kumbudila Chapanga waku."

6 Vawula vangi va Malagizu ga Chapanga geampeli Musa vevatamili penapo vakaholalela mumitima yavi, 7 "Ihotola wuli kujova genaga? Akumliga Chapanga! Kawaka mundu mweihotola kulekekesa kubuda nambu ndi mmonga Chapanga ndu."

8 Bahapo Yesu agamanyili maholo gavi, akavajovela, "Ndava kyani mwiholalela mumitima yinu mambu ago? 9 Chindu choki changa hotoleka kumjovela mundu mweapolili, ‘Ulekekiswi kumbudila Chapanga,’ Amala ‘Yimuka, tola mpasa waku Uhambayi?’ 10 Nambu nigana mumanyayi kuvya Mwana wa Mundu ana uhotola pamulima wa kulekekesa vandu vevakumbudila Chapanga." Ndi amjovili mwaapoli yula, 11 "Nikukujovela, yimuka, tola mpasa waku uhamba kunyumba yaku!"

12 Na vandu voha pavamlolokesa mundu yula, balapala akayima na kutola mpasa waki akahamba. Vandu voha vakakangasa na vakamlumbalila Chapanga, vakajova, "Katu nakulilola lijambu ngati lenilo hati padebe!"

Yesu akumlamisa mundu mweagogodili chiwoko

1 Yesu akayingila kavili munyumba ya kukonganekela Vayawudi na mugati mula kwavili na mundu mweagogodili chiwoko. 2 Mugati mula kwavi na vandu vangi pagati yavi valindilayi kumlola Yesu, ngati akumlamisa mundu yula Ligono la Kupumulila, muni valonda chindu cha kumtakila. 3 Yesu akamjovela mundu yula mweagogodili chiwoko, "Bwela uyima palongolo ya vandu." 4 Kangi Yesu akavakota, "Malagizu gitu yijova wuli pa Ligono la Kupumulila? Chabwina kumtangatila mundu amala kumlemasa? Kusangula amala kukoma?"

Nambu vene vakaguna. 5 Yesu akavalolokesa voha cha ligoga, mtima ukamvina ndava ya kunonopa kwa mitima yavi. Kangi akamjovela mundu yula "Golosayi chiwoko chaku." Namwene akachigolosa ndi chikalama kavili.

Yesu amunyambisa mtamu wa mabudi

12 Ndi Yesu paavi kumuji umonga wa kwenuko, mgosi mmonga anamabudi higa yoha pamuweni Yesu, akamgwilila chakukupama mumagendelu gaki na akamjovela, "Bambu, ngati wigana uhotola kuninyambisa."

13 Yesu akatalambula chiwoko chaki na kumpamisa akamjovela, "Nigana unyambasikayi!" Bahapo akalama mabudi gala.

18 Ndi lukumbi lulalula, vakabwela vandu vevamugegesini mundu mgosi palusongwani, mwepolili higa agonili lusongwani, vakalinga kumyingisa mugati, vamuvikayi palongolo ya Yesu. 19 Nambu nakuhotola kuyingila nayu mugati ndava ya vandu vamahele. Ndi vakakwela panani ya nyumba vakabowola chipagalu, na vakamuhelesa mweapoli yula pamonga na lusongwani lwaki mbaka peavili Yesu. 20 Yesu peayiweni kusadika kwavi kula, akamjovela mwaalwala yula, "Nkozi wangu, ulekekiswi kumbudila Chapanga waku."

21 Vafalisayu na vawula va malagizu ga Chapanga geampeli Musa vakatumbula kukotana, "Mwenuyu mundu kiki mweakumliga Chapanga? Kawaka mundu mweihotola kulekekesa kubuda ndi nga Chapanga mwene!"

22 Nambu Yesu amanyili maholo gavi akavakota, "Ndava kyani mukujikota genago mumitima yinu? 23 Chinonopa kiki, kujova ‘ulekekiswi kumbudila Chapanga waku,’ Amala kujova ‘Yima ugendayi’ 24 Hinu, nigana mumanyayi, Mwana wa Mundu ana uhotola wa kuvalekekesa vandu pamulima vevakumbudila Chapanga." Ndi akamjovela mwaalwala yula, "Yima, tola lusongwani lwaku, uhamba kunyumba!"

25 Bahapo, mundu mweapoli yula akayima akatola, lusongwani lwaki lweagonili na akawuya kunyumba yaki kuni amulumbalila Chapanga.

Yesu akumlamisa mundu mweagogodili chiwoko

6 Ligono lingi la Kupumulila, Yesu akahamba munyumba ya kukonganekela Vayawudi kuwula. Kumbi mugati mula avili mundu mmonga mwaapopotwiki chiwoko chaki cha kulyelela. 7 Vawula va malagizu ga Chapanga geampeli Musa na Vafalisayu vamlolokisi takataka Yesu, valola ngati akumlamisa mundu Ligono la Kupumulila muni valonda linenu la kumtakila. 8 Nambu Yesu agamanyili goha gavaholalela na akamjovela mweagogodili chiwoko yula, "Yimuka, uyima palongolo yavi." Mundu yula akayima akahamba penapo. 9 Yesu akavajovela, "Nikuvakota nyenye, malagizu gitu gijova wuli kuyivala Ligono la Kupumulila? Wu, tihotola kukita lijambu labwina amala tihotola kukita lijambu lihakau? Wu, tihotola kusangula wumi wa mundu amala tihotola kukoma?" 10 Akavalolokesa vandu voha vevavili penapo, akamjovela mwaapopotwiki chiwoko yula, "Golosa chiwoko chaku." Mundu yula akagolosa, na akalama chiwoko chaki.

Yesu akumlamisa mtumisi wa mkulu mmonga wa vandu va ngondo va Loma

1 Yesu peamali kujova ago kwa vandu akahamba ku Kapelanaumu. 2 Kwenuko kwavili na mkulu mmonga wa vandu va ngondo va ku Loma, mwenuyo avi na mtumisi, mweamyidikili neju mwealwala mulung’olelu. 3 Mkulu yula wa Loma peayuwini mambu ga Yesu, akavatuma vagogo vangi va Vayawudi vakamuyupayi abwela kumulamisa mtumisi waki. 4 Pevahikili kwa Yesu, vakamjovela, "pepayi bambu, mundu mwenuyu, yitakiwa atangatiwayi. 5 Ndava mwenuyu akuvagana vandu vitu, kangi ndi mweatijengili nyumba ya kukonganekela Vayawudi."

6 Ndi Yesu akahamba nawu. Pavahegalili pa nyumba ya mkulu yula, ndi mkulu akavatuma vankozi vaki vakamjovelayi Yesu, "Bambu, kotoka kujing’aha. Muni nene nakujiwona ngati nabwina hati veve kuyingila mumyumba yangu, 7 Kangi, nikajiweni nabwina lepi, nene kubwela kwa veve. Nambu jovayi ngalinenu na mtumisi wangu yati ilama. 8 Ndava muni nene mewa, mundu mwenivikiwi pahi ya uhotola wa vakulu vangu nivi na manjolinjoli, nikamjovelayi mmonga, ‘Hambayi!’ Ihamba, nikamjovela yungi, ‘Bwelayi!’ Na mwene ibwela, Nikamjovelayi na mvanda wangu, ‘Kita naha!’ Namwene ikita."

9 Yesu akakangasa paayuwini genago, akaung’anamukila msambi wa vandu wewamlandali, akavajovela, "Niloli lepi sadika yivaha ngati iyi hati pagati ya vandu va Isilaeli!"

10 Ndi vandu vala pavawuyili kunyumba vakamkolela mtumisi yula alamili.

11 Pavi na mdala mmonga mweavi na mzuka, mwealwalayi lukumbi lwa miyaka kumi na nane, mdala mwenuyo avi na chipindi ndi nakuhotola kuyima. 12 Yesu peamuweni akamkemela na kumjovela, "Mau, ulekekiswi utamu waku!" 13 Yesu akamuvikila mawoko mdala yula na bahapo higa yaki yikagoloseka, na akatumbula akamlumbalila Chapanga.

Yesu amlamisa mundu mweavi na utamu wa kuhimba higa

1 Ligono Limonga la Kupumulila, Yesu ahambili kulya chakulya, kunyumba ya chilongosi mmonga wa Vafalisayu, na vandu vakavya kumlingulila. 2 Palongolo ya Yesu avi mundu mweavi na utamu wa kuhimba higa 3 Yesu akavakota vawula va malagizu ga Chapanga geampeli Musa na Vafalisayu, "Wu, mhilu wijova wuli, chabwina amala chabwina lepi, kumlamisa mundu Ligono la Kupumulila?"

4 Nambu vene vakaguna. Yesu akamtola mundu yula na kumlamisa, akamleka ahambayi.

Yesu akuvalamisa vanamabudi kumi

11 Yesu peavi mulugendu kuhamba ku Yelusalemu, akapitila mumbaka ya Samaliya na Galilaya. 12 Peayingili muchijiji chimonga vandu kumi vevavi na mabudi vakambwelela. Vakayima cha patali. 13 Vakajova kwa lwami luvaha, "Yesu! Bambu! Utihengela lipyana!"

14 Yesu peavaweni akavajovela, "Muhamba mukajilangisa kwa vakuteta va Chapanga." Ndi pevavi mukuhamba vakanyamba. 15 Mmonga wavi peajimanyi kuvya alamiswi, awuyili kuni akumlumbalila Chapanga kwa lwami luvaha. 16 Akamfugamila Yesu mumagendelu na kumsengusa. Mundu mwenuyo avi Msamaliya. 17 Nambu Yesu akakota, "Wu, vavi lepi vandu kumi vevanyambisiwi? Vangi tisa vala vavi koki? 18 Hinu kawaka vandu vangi vevawuyi kumsengusa Chapanga ndi ngayuyu myehe?" 19 Penapo akamjovela mundu mwenuyo, "Yima uhamba, kusadika kwaku kukulamisi."

Yesu akumlamisa mundu palitanda

1 Pegamaliki genago, Yesu ahambili ku Yelusalemu kumselebuko wungi wa Vayawudi. 2 Kula ku Yelusalemu, papipi na mlyangu uvaha wa mambelele, kwavi na litanda lelikemelewa kwa Chiebulania Betizata, lelavi na mabanji mhanu gajengiwi kulitindila. 3 Mu mabanji genago kwavi na vatamu vamahele vatamili, vangalola na vevagogodili higa na vevapoli higa. 4 Valindilayi manji gatimbuganayi, muni luvi lukumbi, mtumu wa kunani kwa Chapanga ihelela na kuyingila mulitanda na kugatimbugana manji. Mundu mweatumbwili kuyingila mumanji pegamali kutimbugana, ndi alamili utamu wowoha wula weavi nawu*. 5 Penapo pavi na mundu mmonga mweapoli higa kwa miyaka selasini na nane. 6 Yesu peamuwene mundu yula agonili na kuni imanya kuvya ilwala kwa magono gamahele, akamkota "Wu, ugana kulama?"

7 Mwene akamyangula, "Bambu, nene nangali mundu wa kuniyingisa mulitanda lukumbi manji pegitimbuliwa. Penilinga kuyingila ndi mundu yungi akunilongolela."

8 Yesu akamjovela, "Yimuka, tola lusongwani lwaku ugenda." 9 Bahapo mundu yula akalama, akatola mpasa waki na kugenda.

Lijambu lenili lakitiki pa Ligono la Kupumulila.

46 Kangi Yesu ahikili kavili ku Kana, kumuji wa Galilaya, pandu peang’anamwisi manji kuvya divayi. Kwenuko kwavi na chilongosi mmonga wa chinkosi mweavi na mwana waki mtamu ku Kapelanaumu. 47 Chilongosi yula peayuwini kuvya Yesu ahumili ku Yudea na kuhika ku Galilaya, akamhambila na kumuyupa ahamba akamlamisa mwana waki mweavi mulung’olelu. 48 Yesu akamjovela, "Nyenye changalola ulangisu na gachinamtiti katu mwisadika lepi!"

49 Yula chilongosi akamjovela, "Bambu, chondi tihamba kwakona mwana vangu kufwa."

50 Yesu akamjovela, "Uhambayi, mwana waku yati ilama."

Mundu yula akasadika malovi ga Yesu, akahamba. 51 Peavi akona munjila akakonganeka na vatumisi vaki, vakamjovela kuvya mwana waku alamili!

52 Mwene akavakota lukumbi msongolo pealamili, vene vakamyangula, "Golo saa saba ya muhi, utamu wamuhumili." 53 Dadi yula akamanya kuvya lwavi lukumbi lulolo, Yesu peamjovili "Mwana waku yati ilama." Penapo mwene pamonga na valongo vaki vakamsadika Yesu.

54 Wenuwu wavi ulangisu wa kukangasa weahengili Yesu peawukili ku Yudea kuhamba ku Galilaya.

20 Mau mmonga, avi na utamu wa kuhuma ngasi lukumbi lwa miyaka kumi na yivili, amlandili Yesu mumbele, na kupamisa lugunyilu lwa nyula yaki. 21 Akitili chenicho ndava ya aholalili mumtima waki kuvya, "Nakapamisa ndu nyula yaki, yati nilama."

22 Yesu ang’anamwiki na kumlola akamjovela, "Msikana wangu, kangamala mtima kusadika kwaku kukulamisi." Mau yula akalama lukumbi lulalula.

25 Pagati yavi kwavili na mdala mmonga, mwealwalayi utamu wa kuhuma ngasi mulukumbi lwa miyaka kumi na yivili. 26 Mdala mwenuyo amali kung’ahika neju na kumala mashonga gaki goha, kwa valamisa vamahele ndava ya kulonda kulama, nambu utamu waki wayonjokisiki neju. 27 Mau yula peayuwini kuvya Yesu akuvalamisa vandu ndi akaholota mumbela ya msambi wa vandu wula na kuhamba kupamisa nyula ya Yesu. 28 Akitili chenicho, muni aholalili kuvya, "Nakahotola kupamisa nyula ya Yesu yati nilama."

29 Peampamisi bahapo akamanya kuvya alamili, muni ngasi yeyahuma yila yikaleka.

43 Kwavi na mdala mmonga pagati ya msambi wula wa vandu, avi na utamu wa kuhuma ngasi miyaka kumi na yivili, amalili kuwusa vindu vyaki vyoha kuvapela valamisa, kawaka mweahotwili kumlamisa. 44 Mdala yula akamlanda Yesu mumbele akapamisa lugunyilu lwa pahi lwa nyula ya Yesu. Bahapo akalama. 45 Yesu akajova, "Yani mweanipamisi?"

Vandu vakajova, Kawaka mundu mwaakupamisi. Petili akajova, "Bambu msambi wa vandu vakutindili na kukuhinya!"

46 Nambu Yesu akajova, "Avili mundu mweanipamisi, muni nijiyuwini makakala ganihumili." 47 Mdala yula paajiloli nakuhotola kujifiha, akabwela kuni hivagaya akamfugamila Yesu mumagendelu. Akamjovela pavandu voha ndava ya kumpamisa Yesu na chaalami bahapo. 48 Yesu akamjovela, "Msikana wangu, kusadika kwaku kukulamisi, uhamba na uteke."

Msikana mweafwili na mau mmonga

18 Yesu peavi akona angamala kujova malovi ago, chilongosi mmonga Myawudi ambwelili, akamfugamila na kujova, "Msikana wangu afwili hinu. Nambu chondi tihamba ukamvikila mawoko gaku yati itama kangi."

19 Yesu akayima na kumlanda na vawuliwa vaki vakamlanda.

23 Yesu ayingili munyumba ya chilongosi yula na peavawene vabeta chitolilo na msambi wa vandu, vivembeneka na kugalawuka, 24 avajovili vandu vala "Muwuka pandu apa! Msikana akona mumi, agonili ndu." Vene vamkamheka. 25 Hinu msambi wa vandu pavawukili, Yesu akayingila mugati na kumkamula msikana yula chiwoko, na msikana yula akayima.

22 Akabwela chilongosi mmonga wa nyumba ya kukonganekela Vayawudi liina laki Yailusi, hinu paamuwene Yesu, akamfugamila pamagendelu gaki, 23 akamuyupa neju akamjovela, "Pepayi msikana wangu mdebe avi mulung’olelu. Chondi tihambi ukamuvikila mawoko gaku, muni ihotola kulama na kuvya mumi."

24 Yesu pamonga na mundu yula vakalongosana kuhamba. Msambi wa vandu ukamulanda na kumuhinya pandi zoha.

38 Pavahikili kunyumba ya Yailo, Yesu avayuwini vandu vivembeneka neju ndava ya malilu. 39 Akayingila mugati akavajovela, "Ndava kyani mwiywanga na kuvemba? Msikana uyu afwili lepi, pena agonili ndu."

40 Nambu vene vakamuheka. Akavahumisa kuvala vandu voha vevavi mugati mula, akavatola dadi na nyina wa msikana yula, pamonga na vawuliwa vaki vadatu, ndi vakayingila muchumba cheavili msikana yula. 41 Akamkamula chiwoko, akamjovela, "Talita, kumu," Mana yaki, "Wamsikana, nikujovela yimuka!"

42 Bahapo msikana yula akayimuka na kutumbula kugenda, vandu voha vakakangasa neju. Msikana mwenuyo avi na miyaka kumi na yivili.

31 Yesu akavajovela, "Chiveleku cha vandu ava kwali nivawanangisa na kyani? Vene vandu ava valingini na kiki? 32 Vavi ngati vana vevatamii pandu pakugulisila vindu vikemelana, chikundi chimonga na chiyaki, ‘Tivabetili chitolilo nambu nyenye mwanga kina! Tivayimbili nyimbu za malilu nambu muvembi lepi!’ 33 Yohani peabweli, ajihinisi chakulya wala kunywa divayi, mkamjova ‘Mwenuyu anamzuka!’ 34 Mwana wa Mundu abwelili, ilya na kunywa, nyenye mujova, ‘Mumlola muhutulu na chigaligali uyu, nkozi wa vatola kodi na vandu vevakumbudila Chapanga!’ 35 Nambu luhala lwa Chapanga lulangisa, yakuvya chakaka kwa voha vevakuluyidakila."

Yesu munyumba ya Simoni Mfalisayu

36 Mfalisayu mmonga amgongolili Yesu kulya panyumba yaki. Akayingila munyumba ya Mfalisayu yula na kutama kulya. 37 Ndi pamuji wenuwo avi mdala mmonga wumi waki atamayi kumbudila Chapanga. Akayuwana Yesu avili munyumba ya Mfalisayu uyu, ndi akatola chupa yeyahongoliwi kwa liganga la alabasta yeyavi na mahuta ga kunungalila bwina.

41 Penapo akabwela mundu mmonga liina laki Yailusi avi chilongosi wa nyumba ya kukonganekela akamfugamila Yesu mumagendelu, akamuyupa Yesu ahamba kunyumba yaki, 42 muni msikana waki ngayuyoyo mmonga, wa miiyaka kumi na yivili avi mtamu papipi kufwa.

Yesu avi mukuhamba, msambi wa vandu wavi kumuhinya kila upandi.

49 Yesu paavi akona ilongela, akabwela mundu kuhuma kunyumba ya Yailo, akamjovela Yailo, "Leka kumung’aha Muwula, mwana waku mwene afwili."

50 Yesu peayuwini genago, akamjovela Yailo, "Kotoka kuyogopa, sadika ndu, yati ilama."

51 Peahikili panyumba pala, akavatola Petili na Yohani na Yakobo pamonga na dadi na nyina wa msikana yula akayingila nawu mugati, vandu vangi avalekili kuvala. 52 Vandu voha vavembayi na malilu kwa lipyanda ndava ya mwana yula. Nambu Yesu akavajovela, "Mkotoka kuvemba, muni mwana uyu afwili lepi, agonili ndu."

53 Voha vakamuheka, muni vamanyili kuvya mwana yula afwili. 54 Kangi Yesu akamkamula chiwoko mwana yula na kumkemela, "Mwana yimuka!" 55 Mpungu waki ukamuwuyila, bahapo akayimuka. Yesu akavajovela mumpela chakulya. 56 Dadi na nyina wa mwana yula vakakangasa, Nambu Yesu akavajovela vakotoka kumjovela mundu yoyoha mambu gala gegahengiki.

Lifwa la Lazalu

1 Mundu mmonga liina laki Lazalu avi mtamu. Mundu mwenuyo avili mkolonjinji wa Betania, valumbu vaki Maliya na Malita vatamayi chijiji chila. 2 Maliya ndi yula mweamnyalili Bambu mahuta geginungalila bwina mumagendelu gaki na kumuungula na mayunju gaki. Lazalu mweavimtamu ndi mhaja wa Maliya. 3 Hinu, valumbu vala vatumili ujumbi kwa Yesu. "Bambu, nkozi waku mtamu!"

4 Yesu mwene peagayuwini genago, akajova, "Utamu wenuwu wileta lepi lifwa, uhumalili muni Chapanga apewa ukulu na Mwana wa Chapanga mewa apewa ukulu."

5 Yesu avaganili Malita na Maliya pamonga na mlongo wavi Lazalu. 6 Peayuwini kuvya Lazalu mtamu, Yesu akahamba kutama peavili magono gavili. 7 Kangi akavajovela vawuliwa vaki, "Tihamba kavili ku Yudea!"

8 Vawuliwa vala vakamjovela, "Muwula, lukumbi luhupi ndu lupitili Vayawudi vaganili kukukoma na maganga, hinu wigana kuhamba kwenuko kavili?"

9 Yesu akavayangula "Wu, kuvi lepi masaa kumi na gavili ga muhi? Hinu mundu akagendayi muhi nakuhotola kujikuvala ndava ihotola kulola lumuli lwa mulima. 10 Nambu mundu akagendayi kilu akujikuvala ndava muni kawaka lumuli." 11 Yesu peamali kujova malovi genago, akavajovela "Nkozi witu Lazalu agonili, nambu nene yati nihamba kumuyumusa."

12 Vawuliwa vaki vakamjovela, "Bambu yikavya agonili yati ilama."

13 Vene vaholalili kuvya ajovili kugona lugono, nambu Yesu ajovili kumvala lifwa la Lazalu. 14 Ndi Yesu akavajovela hotohoto kuvya "Lazalu afwili,

Yesu igunisa mpungu uvaha neju

23 Yesu akayingila muwatu na vawuliwa vaki vakahamba pamonga nayu. 24 Bahapo chimbungululu chivaha neju chikahumalila na manji gakatimbugana neju, hati gakatumbula kuugubika watu, nambu Yesu avi mulugono. 25 Vawuliwa vakamhambila na kumuyumusa peagonili vakamjovela, "Bambu!" "Utisangula tifwa!"

26 Yesu akavajovela, "Nyenye vandu mwemusadika padebe! Ndava kyani muyogopa?" Hinu akayima akahakalila mpungu na manji gakutimbugana neju na nyanja yikaguna kukavya nuu. 27 Vandu vakakangasa na kujova "Wu, mundu mwenuyu avi wuli? Hati mpungu na manji gakutimbugana neju vikumyidikila!"

15 Payavi kimihi, vawuliwa vaki vakamhambila vakamjovela Yesu, "Pandu apa ndi palugangatu, na lilanga limali kutipama. Hinu uvalaga vandu vahamba muvijiji vakajigulila vyakulya."

16 Nambu Yesu akavayangula "Viganikiwa lepi kuhamba, mvapela nyenye chakulya."

17 Nambu vene vakajova, "Tivii na mabumunda mhanu na somba zivili ndu."

18 Yesu akavajovela, "Muniletelai apa." 19 Ndi akavajovela vandu vatama mumanyai, na Yesu akatola mabumunda gala mhanu na somba zila zivili, akalolokesa kunani kwa Chapanga, akamsengusa Chapanga. Kangi akagametula mabumunda gala, na kuvapela vawuliwa vaki, navene vakavapela vandu. 20 Vandu voha vakalya na kuyukuta. Na vawuliwa vaki vakanonga hipandi yeyisigalili, na kumemesa madengu kumi na gavili. 21 Mvalangu wa vandu voha vevalili vavi vagosi elufu mhanu, changavalanga vadala na vana.

25 Hamba kucha payahegalili, Yesu avahambili vawuliwa vaki igenda kwa magendelu panani ya manji.

Yesu akuupela msambi wa vandu chakulya

32 Yesu avakemili vawuliwa vaki na kuvajovela, "Nikuvahengela lipyana vandu ava ndava vatamii pamonga na nene magono gadatu, nivii lepi na chindu chakulya. Nangagana vawuka na njala, muni vakotoka kuinduka munjila."

33 Vawuliwa vaki vakamjovela, "Penapa palukongolo tipata koki chakulya cha kuyukuta msambi woha wa vandu?"

34 Yesu akavakota, "Mabumunda gavi galinga?"

Vakamyangula "Saba na tusomba tudebe."

35 Yesu akalagiza vandu vatama pahi. 36 Akatola mabumunda gala saba na tusomba tudebe tula, akalolokesa kunani kwa Chapanga, akamsengusa Chapanga, akavimetula, akavapela vawuliwa vaki, navene vakavagavila vandu. 37 Voha vakalya na kuyukuta. Kangi vakayola masigalilu ga hipandi na kumemesa madengu saba. 38 Vandu vevalili vavi vagosi elufu mcheche changavalanga vadala na vana.

Kulipa kodi ya Nyumba ya Chapanga

24 Pevahikili ku Kapelanaumu vandu vevitola kodi ya Nyumba ya Chapanga vakamhambila Petili, vakamkota, "Wu, muwula winu, ilipa kodi ya Nyumba ya Chapanga?"

25 Petili akavayangula, "Ena, ilipa."

Hinu, petili peayingili munyumba kwakona angajova chindu, Yesu akamkota, "Simoni, veve wihololela wuli? Vankosi va pamulima vitola ushulu amala kodi kuhuma kwa yani? Kuhuma kwa vakolonjinji amala kwa vayehe?"

26 Petili akayangula "Kwa vayehe." Yesu akamjovela chakaka, "Vakolonjinji vilipa lepi. 27 Nambu tikotoka kuvayomesa vandu ava. Uhamba kunyanja ukataga luvecha, somba yeutumbwili kulova utola, udindula mlomo waki yati ukolela lishonga utola ulipa kodi ndava yaku na ndava yangu."

Yesu akuhupela likoto mkongo wa mtini

18 Chilau yaki lukela Yesu peavi mukuwuya kumuji wenuwo, njala yamvinili. 19 Auwene mkongo wa mtini mumuhana ya njila, ndi auhambalili, nambu akolili lepi chindu mumkongo wula nga mahamba gene, ndi aupeli likoto akaujovela gakotoka kupambika matunda kutumbula lelu hati magono goha! Bahapo mkongo wula wanyalili.

20 Vawuliwa pavauweni vakakangaswa na lijambu lenilo vakajova, "Ndava kyani mkongo wa mtini unyalili chighafula?"

21 Yesu akavayangula, "Nikuvajovela chakaka, ngati mwisadika changali mtahu, yati mwihotola lepi ndu kuhenga ago, nambu hati kuchijovela chitumbi, ‘Utupuka apa, na ukujitaga munyanja,’ Yati yivya mewa. 22 Na chochoha chemwiyupa kwa kumuyupa Chapanga, mwakasadika yati mwipata."

37 Pavakupukayi, mpungu uvaha ukahumila manji gakutimbungana na kuutova watu na manji gakatumbula kumema muwatu. 38 Penapo Yesu avi mumbele ya watu kuni agonili pamsagamilu. Ndi vawuliwa vaki vakamuyimusa vakamkota, "Muwula, wuli, tifwaa ukutilolokesa ndu!"

39 Hinu, akayimuka, akauhakalila mpungu na kuujovela luyuga lwa manji, "Guna!" Ndi penapo mpungu wula ukaleka kubuma na nyanja yikavya nuu. 40 Yesu akavajovela vawuliwa vaki, "Mwiyogopa kyani? Wu, mwakona kusadika?"

41 Ndi penapo vavi na wogohi neju, vakatumbula kukotana, "Mundu uyu yani? Mbaka mpungu na manji gakutimbungana vikumyuwana na kuguna!"

35 Lilanga palatipimi, ndi vawuliwa vaki vakahamba kumjovela Yesu, "Penapa palugangatu, lilanga litipama. 36 Mbanga uvalaga vandu vahamba mumigunda na muhijiji ya papipi, vakagula vyakulya."

37 Yesu akavajovela, "Muvapela nyenye chakulya."

Nambu vene vakamkota, "Tivapela kyani? Yati yikutigana tihenga lihengu kwa miyehi yamahele ndi tipatayi mashonga ga kuvagulila chakulya vandu voha ava?"

38 Yesu akavakota, "Mabumunda gavi galinga? Muhamba mukalola."

Pevamali kulola vakawuya kumjovela, "Yivii mhanu na somba zivili."

39 Yesu akavalagiza vawuliwa vaki vavatamika vandu voha chikundi chikundi pahi pamanyai. 40 Hinu vene vakatama chikundi chikundi, vingi vandu hamsini, na vingi vandu miya. 41 Kangi Yesu akagatola mabumunda mhanu na somba zila, akalola kunani kwa Chapanga, akamsengusa Chapanga. Ndi akagametula mabumunda gala pamonga na somba zila. Akavapela vawuliwa vaki muni vavagavanisila vandu. 42 Vandu voha vevavi penapo valili vakayukuta. 43 Hinu, vakanonga masigalilu ga mabumunda na somba vakamemesa madengu kumi na gavili. 44 Vevalili chakulya chila, vavi vagosi elufu mhanu.

48 Mwene avaweni vawuliwa chaving’ahika muwatu mula na mipundi muni mpungu wavi uvaha ukuvawuyisa mumbele. Hinu hambakucha, Yesu avahegalili kuni igenda mumanji akagana kuvapita. 49 Nambu pavamuweni igenda panani ya manji vayogwipi, vaholali kuvya lihoka, "Vakaywanga mulete." 50 Voha pavamuweni vayogwipi neju.

Bahapo Yesu akajova nawu, "Mjipolesa mtima. Ndi nene. Mkoto kuyogopa!" 51 Ndi, akayingila muwatu wevavili vawuliwa na mpungu wa luyuga lukaguna lukumbi lulalula. Vawuliwa vakakangasa neju,

Yesu ilisa vandu elufu mcheche

1 Lukumbi lwenulo, msambi uvaha wa vandu wakonganiki kavili hinu vavi lepi na chakulya, na Yesu avakemili vawuliwa vaki, akavajovela, 2 "Nikuvahengela lipyana vandu venava muni vatamii na nene mu ligono la datu, nambu vavi lepi na chakulya. 3 Ngati nikavajovela vawuya kunyumba na njala yati vihinduka munjila, muni vangi vahumili kutali."

4 Vawuliwa vaki vakamkota, "Penapa palugangatu yati tipata koki mabumunda ga kuvayukutisa vandu voha ava?" 5 Yesu akavakota, "Muvi na mabumunda galinga?" Vakamyangula.

"Gavii saba."

6 Hinu, akavalagiza vandu vatama pahi. Akagatola mabumunda gala saba, akamsengusa Chapanga, akayimetula, akavapela vawuliwa vaki vavagavanisilayi vandu, navene vakavagavila. 7 Vavi mewa na somba zidebedebe. Yesu akayimotisa, mewawa akalagazila vawuliwa vaki vavagavila vandu. 8 Vandu valili na kuyukuta. Kangi vawuliwa vakanonga masigalilu na kumemesa madengu saba. 9 Vandu vevalili vavi ngati elufu mcheche. Yesu peamali kuvalaga,

Yesu akuupela likoto mkongo wa mtini

12 Chilau yaki, pavahumili ku Betania, Yesu njala yamvinili. 13 Hinu auweni mkongo wa mtini chakutali wewavi na mahamba gamahele. Hinu akauhambila aganayi alolayi ngati upambiki matunda. Nambu peahikili, nakugakolela matunda ndi mahamba gene, muni yavi lepi lusenje lwa kupambika matunda. 14 Penapo akaujovela mkongo wula, "Kutumbula lelu na magono goha mundu yeyoha akotoka kulya matunda gaku!"

Na vawuliwa vaki vagayuwini malovi genago.

Liwulo ndava ya mkongo weunyalili

20 Lukela pavapitayi, vauweni mkongo wa mkuyu wula uyumili hotohoto, kuhuma mumikiga mbaka kunani. 21 Petili alikumbwiki lijambu lila, akamjovela Yesu, "Muwula, lolayi! Mkongo wa mtini wewaupelili likoto ula uyumili!"

22 Yesu akavajovela, "Mumsadika Chapanga. 23 Nikuvajovela chakaka, mundu akachijovela chitumbi, ‘Tupukayi ukajitaga munyanja,’ Changali kuvya na wogoyi mumtima waki, nambu ngati isadika mambu goha gihengeka yati ihengewa lijambu lenilo. 24 Ndava yeniyo nikuvajovela, pemukumuyupa Chapanga na kuyupa chindu, musadika kuvya mpokili, na nyenye yati mwipewa. 25 Pamwiyima kumuyupa Chapanga, mumlekekesa mundu yeyoha mweavakitili gahakau, ndi Dadi winu wa kunani avalekekesa nyenye mabudilu ginu.

Yesu akuvakemela vawuliwa va kutumbula

1 Ligono limonga, Yesu peayimili mumihana ya nyanja ya ku Genezaleti, msambi wa vandu vamhinyayi kumtindila, muni vayuwanila linenu la Chapanga. 2 Ndi aziweni watu zivili mumuhana ya nyanja, zavazilekili valova somba, muni vene vasanja ngwanda zavi. 3 Yesu akayingila muwatu wa mundu mmonga mwavamkemela Simoni, akamjovela Simoni wusayi watu pamuhana hegelesa mumanji palongolo padebe kuhuma pandumba. Yesu akatama muwatu na kutumbula kuwula msambi wa vandu.

4 Peamali kuwula, akamjovela Simoni, "Hegelesa watu waku mbaka pamanji gamahele, mukahelesa ngwanda zinu mlova somba."

5 Simoni akamyangula, "Bambu, tikangamili kulova somba kilu yoha kawaka chindu chetipati, nambu ndava ujovi veve yati tihamba kuhelesa ngwanda mumanji." 6 Ndi pavahelisi ngwanda zavi, vakapata somba zamahele mbaka ngwanda zikatumbula kudauka. 7 Vakavakemelela na vayavi vevavi muwatu wungi, vabwelayi kuvatangatila. Vakabwela, vakamemesa watu zoha zivili somba mbaka zikatumbula kudodomela. 8 Simoni Petili pealoli genago, akamfugamila Yesu akajova, "Bambu uwuka palongolo yangu, ndava nene mwenimbudila Chapanga!"

9 Ndava vapatili somba zamahele. Simoni pamonga na vayaki voha vakakangasa, 10 Mewawa Yakobo na Yohani vana va Zebedayo vevavili valova somba vayavi, pamonga na Simoni na vene vakakangasa. Yesu akamjovela Simoni, "Kotoka kuyogopa, kutumbula hinu wivya lepi mlova somba nambu yati wivya mlova wa vandu ndi kuvaleta vandu kwa Bambu."

11 Ndi, pavamali kuzivika watu zila mumhana ya nyanja, vakagaleka goha na kumlanda Yesu.

Yesu igunisa chimbungululu na luyuga lwa manji

22 Na kavili ligono limonga Yesu peakweli muwatu pamonga na vawuliwa vaki, akavajovela, "Tikupuka kumwambu ya nyanja." Vakatumbula kukupuka. 23 Pavahambayi muwatu wula, Yesu agonili lugono. Ndi chimbungululu chikatumbula kutova munyanja mula na manji gakatumbula kuyingila muwatu wavi mkulemala neju.

24 Vawuliwa vaki vamhambali vakamuyumusa na vakamjovela, "Bambu, Bambu Tifwa!" Yesu akayumuka, akachilakalila chimbungululu chila na luyuga lwa manji ndi vikaguna na kukavya teke. 25 Kangi akavajovela vawuliwa vaki, "Kusadika kwinu kuvi koki?"

Vene vakakangasa na kuyogopa kuni vijovelana, "Mundu uyu wa namuna yoki? Hati ihotola kugunisa chimbungululu na luyuga na vyene vimyidikila!"

Yesu igunisa chimbungululu na luyuga lwa manji

22 Na kavili ligono limonga Yesu peakweli muwatu pamonga na vawuliwa vaki, akavajovela, "Tikupuka kumwambu ya nyanja." Vakatumbula kukupuka. 23 Pavahambayi muwatu wula, Yesu agonili lugono. Ndi chimbungululu chikatumbula kutova munyanja mula na manji gakatumbula kuyingila muwatu wavi mkulemala neju.

24 Vawuliwa vaki vamhambali vakamuyumusa na vakamjovela, "Bambu, Bambu Tifwa!" Yesu akayumuka, akachilakalila chimbungululu chila na luyuga lwa manji ndi vikaguna na kukavya teke. 25 Kangi akavajovela vawuliwa vaki, "Kusadika kwinu kuvi koki?"

Vene vakakangasa na kuyogopa kuni vijovelana, "Mundu uyu wa namuna yoki? Hati ihotola kugunisa chimbungululu na luyuga na vyene vimyidikila!"

Yesu akumlamisa mgosi ana mizuka wa ku Gelasi

26 Vakakupuka na kuhika kumbwani ya kumuji wa mulima wa Vagelasi wewalolasini na Galilaya kumwambu ya nyanja.

12 Lilanga palatumbula kutipama, vawuliwa kumi na vavili vala vakamjovela, "Valagayi vandu vahamba muhijiji na mumigunda ya papipi vakajilondela vyakulya na pandu pa kugona muni petivii palugangatu."

13 Nambu Yesu akavajovela, "Muvapelayi nyenye chindu chakulya." Vakamyangula.

"Tete tivii na mabumunda mhanu na somba zivili ndu. Manya tihamba tikavagulila vyakulya msambi uwu woha." 14 Muni vavi vagosi, ngati elufu mhanu.

Yesu akavajovela vawuliwa vaki, "Muvajovela vandu vatamayi hikundi ya vandu ngati hamsini hamsini."

15 Vawuliwa vakakita ngati cha avajovili, vakavatamisa voha. 16 Yesu akatola mabumunda mhanu na somba zivili zila, akalola kunani, akayimotisa, akayinukula akavapela vawuliwa vaki vavagavanisila vandu. 17 Vandu voha valili na kuyukuta. Ndi vakanonga na kumemesa madengu kumi na gavili ga hipandi yeyisigalili.

Mselebuko wa ndowa kumuji wa Kana

1 Ligono la datu kwavi na mselebuko kumuji wa Kana, mulima wa Galilaya, na nyina waki Yesu avili. 2 Yesu mewa agongoliwi kumselebuko pamonga na vawuliwa vaki. 3 Lukumbi divayi payamaliki, nyina waki akamjovela Yesu, "Divayi yimaliki!"

4 Yesu akamyangula, "Ukotoka kunijovela cha kuhenga. Lukumbi lwangu lwakona kuhika."

5 Kangi, nyina wa Yesu akavajovela vanalihengu, "Chochoha cheakuvajovela, muhengayi."

6 Penapo kwavili na vihulu sita ya kuvikila manji kwenuko, kila umonga weuhotola kumema madebe gavili amala gadatu ga manji. Yeyavikiwi penapo ndava ya mvelu wa Vayawudi kujinyambisa ndava ya kumuyupa Chapanga. 7 Yesu akavajovela, "Mumemesa manji muvihulu vyenivyo." Vakagamemesa mbaka panani. 8 Kangi akavajovela, "Hinu mnegayi mumpelayi myimilila mselebuko, navene vakampelekela." 9 Myimilila mselebuko peagawonjili manji gala akalola gang’amwiki kuvya divayi. Mwene nakumanya kweyahumili, nambu vala vatumisi vevanegili vamanyili. Myimilila mselebuko amkemili mkolo ndowa, 10 akamjovela, "Vandu voha vitendelekela hoti divayi yabwina na vandu vakanywayi neju, ndi vitendelekela yangali makakala yila, hinu veve uyivikili divayi ya bwina mbaka pamwishu!"