Milagres de Jesus

Ayesu bhaalamia bhangalola bhabhele

27 Ayesu paakabhoka penapo, na pabhatendita kujenda, bhangalola bhabhele bhakaakagula kongo bhabhi kupotanga nyenye, "Mwana jwa Adaudi, ntukolee kia!"

28 Ayesu paakajingila mu nyuumba, bhangalola bhabhele bhakaajendelela Ayesu na bhakaakonya, "Bholi, mwahobhalelanga kubhehe nenga ndenda kombola kunnamianga?"

Na bhenaangota bhakaajangula, "Eloo, Hangwana."

29 Penapo Ayesu akakwaanga miho gabhenji, akalobhola, "Na hibhee kwaachinunji handa chinhobhalilinge." 30 Miho gabhenji ngagakajogoka kulola. Na jonojwe Ayesu akaakanikia muno, "Nkotokwaalobholela mundu joajola chilebhe chenjeni." 31 Nambo bhenaangota bhakabhokanga, bhakajaula kutandahaa ngani ya Ayesu mu chilambo chela choa.

Ayesu atendakwaalamia bhangalola bhabhele

29 Ayesu paakabhoka kuchilambo cha ku Yeliko na bhabhaajigana bhabhe, bhandu bhajingi bhakaakagula. 30 Bahi, pakibha na bhangalola bhabhele bhatamitinge nngulugulu ja ndela, na bhenaangota pabhakajoha Ayesu bhatenda kupeta, bhakaajaomboa lilobhe, bhabhi kulobholanga, "Hangwana, Mwana jwa Adaudi, ntukolele kiha!"

31 Lyenilyela lilubhalo lya bhandu likaakalipila na kwaalobholelanga bhakotokange. Nambo bhenangota bhakapundanga kujomboa lilobhe, "Hangwana, Mwana jwa Adaudi, ntukolele kiha!"

32 Ayesu akajema na akaakemanga na kwaakonyanga, "Mpalanga nintendelange niki?"

33 Bhakaajangula, "Hangwana, tupala tulole."

34 Bahi, Ayesu akaabhonela kiha, akaakwanga miho gabhenji, na popopo bhakakombolanga kulola.

Ayesu bhaalamia mundu jwangalola konokwe ku Betisaida

22 Ayesu na bhanapunji bhabhe bhakahikanga ku Betisaida. Konokwe bhandu bhakannetela amundu bhangalola, bhakaapembelela bhaakwae ili bhaalamie. 23 Ayesu bhakaakamula bhenabho bhangalola lubhoko, bhakaapeleka panja ja chilambo. Akaahunila mata mmio gabhe, akaabhekela mabhoko, akaakonya, "Bholi, mkombola kulola chilebhe?"

24 Bhenabo amundu bhangalola bhakalola, akalobhola, "Ndenda kwabhonanga bhandu handa mikongo jitenda kujenda."

25 Ngapena Ayesu bhakaabhekela kabhele mabhoko mmiho, ngapena miho gabhe gakajogolekwa, bhakakombola kulola kabhele, bhakalola kila chilebhe maha. 26 Ayesu bhakaalagikia bhajaule kwaachabhe, bhakaalobholela, "Nkotokujingila mu chilambo."

Ayesu bhaalamia bubu na bhankomela

31 Ngapena Ayesu bhakabhoka chilambo cha ku Tilo, bhakapetela ku Sidoni, bhakahika litanda lya ku Galilaya na kuhika mahali pa Dekapoli maana gakwe hilambo komi. 32 Konokwe, bhandu bhakannetela Ayesu amundu bhamo bubu yakubhee kabhele bhakibha na chimamata, bhakaapembelela bhaajopele na bhaabhekele mabhoko ili kwaalamia. 33 Ayesu bhakaabheka nnyeenje na lilubhalo lya bhandu, bhakaabhekela ngoonji mmachikilo, bhakaunila mata na kwakwaa lulimi. 34 Ngapena bhakalola kunani kulihunde, bhakatulua mboomo kwakolela kiha, bhakaalobholela, "Epata," maana gakwe, "Nnyoanikie." 35 Popopo machikilo gakwe gakajogoka na lulimi lwake lukalegeleka, bhakajemeka kulongela maha. 36 Ayesu bhakaakanikianga bhakotokunnobholelanga mundu joa jola nnani ja chikubho chenecho. Nambo chibhakapunda kwaakelebhuanga, ngapena bhakapundanga kujeneanga ngani yeneyo. 37 Bhandu bhakakangachanga muno, bhakalobholanga, "Bhateendite goa maha, bhatekwaatenda bhankomela kujoanikia, na bubu kulongela!"

Ayesu bhaalamia bhangalola Abatimayo

46 Bahi, bhakahikanga mu chilambo cha ku Yeliko, Ayesu na bhanapunji bhabhe pamo na nkutuli nkolongwa gwa bhandu pabhakibha bhatendakubhoka mu chenichela chilambo, bhakakongana na bhangalola bhamo, bhakemitwa Abatimayo, mwana jwa Atimayo, bhakibha bhatamite ngulugulu mwa ndela bhabhikujopa bhandu bhaajangatile hilebhe. 47 Pabhakajoa kubhehe nga Ayesu bha ku Nazaleti bhatendita kupeta, bhakajemeka kupalia lilobhe bhabhikulobhola, "Mwenga Ayesu, Mwana jwa Adaudi, ngoleekiha!"

48 Bhandu bhajingi akaakalipila ili akotoke, nambo bhena akapunda kukweha lilobhe, "Mwenga, Ayesu Mwana jwa Adaudi ngoleekiha!"

49 Ayesu bhakajema na kulongela, "Munkemange bhahike."

Henela bhakaakemanga bhenibhala amundu bhangalola na kwaalobholela, "Nchipee ntima!" bhakaalobholela, "Nyimuke, bhatendakunkema."

50 Na bhena bhakajijea jenijela ngobho jabhe, bhakahomba nnani, na kwaajendelela Ayesu.

51 Ayesu akaakonya, "Mpala nintedelee chiniki?"

Bhena bhangalola bhakajaangula, "Bhannyigana, ndendakunnyopa ngombole kulola."

52 Ayesu akaalobholela, "Nnyaule, kuhobhalela kwinu kutekunnamia."

Popopo bhenibhala bhangalola bhakajemeka kulola, bhakaakagula Ayesu nndela.

Ayesu bhaalamia bhangalola

35 Ayesu pabhatendita kubhandikila ku Yeliko, bhangalola bhamo bakibha batamite nngulugulu ja ndela bhabhikujopa kwaajangatila. 36 Jwangalola hojwe pakajoha nkutuli gwa bhandu gutendakupeta, bhakakonya, "Chibhile chiniki?" 37 Bhakalobholela, "Ayesu bha ku Nazaleti bhatendakupeta." 38 Ngapena bhangalola bhenabho bhakakwea lilobhe, bhakalobhola, "Ayesu, Amwana bha Adaudi, nngolehe kiha!" 39 Bhenibhala bhabhalongolile nnongi bhakaakalipila ili bhakotoke! Nambo bhenabho bhangalola bhakapunda bhakakwea libhole, bhabhikulobhola, "Amwana bha Adaudi ngolee kiha!"

40 Ayesu bhakajema, bhakakulumikia bhenabho amundu bhalete kwachabhe. Pabhakabhandikila, Ayesu bhakaakonya, 41 "Mpala niki nintendele?" Bhakajangula, "Hangwana, mbala kulola."

42 Ayesu bhakaalobholela, "Nnole kuhobhalela kwinu kutekunnamia."

43 Popopo bhangalola bhenabho bhakakoombola kulola na bhakaakagula Ayesu, kongo bhabhikwalumbalila Annoongo. Bhandu bhoha pabhakabhonanga lyenelyo, na bhenaangota bhakaalumbalila Annoongo.

Ayesu annamia mundu jwaabhelikwe ngalola

1 Lichobha limo Ayesu pabhatendita kupeta, akammona mundu jwangalola kubhokela chibhelekwa. 2 Bhabhachigana bhabhe bhakaakonya, "Bhannyigana, nga ganiki jwatendite mabohu mpaka hojo mundu kubhelekwa ngalola, bholi jwatendite mabohu nga hojo mundu au akaabhelei bhabhe?" 3 Ayesu akajangula, "Ngabha jonjoni wala akaabhelei bhabhe bhabhatenditinge mabohu. Akabhelekwa henela ili ukolo gwa Annoongo gabhonekane mu umomi gwabhe. 4 Tupalikwa kutendeka mahengo gakwe jonojwe jwandumite kukibha tangu muhi. Lubhendu lutendakuika na jwakwa mundu jwaapakombola kutenda lihengo. 5 Mmi tangu pachilambo, nenga nga nhana gwa bhandu bha pachilambo."

6 Ayesu pabhakajomola kulongela genago, akauna mata pahi, akaalakia mandope kwa mata genigala na kwantyeka jwangalola jonijola mmiho. 7 Ngapena akalobholela, "Nnyaule nkakuhe mu litanda lya Siloamu." Siloamu maana gakwe nga jonijola jwatumitwe. Ngapena jonijola jwangalola akajaula, kuha machi, na akabhuja abhikulola.

2 Bahi, akahika mundu jumo atamwa mambujupuju, akaatindibhalila majugwa na kwaalobholela, "Hangwana, handa mpalite, nkombola kulamia nenga!"

3 Ayesu akanyulula lubhoko lwabhe na kunkwaa na kulobhola, "Ndenda kupala! Nname." palapala jono mundu akalama mambujupuju gabhe. 4 Ngapena Ayesu akaalobholela, "Nnole nkoto kunnobholela mundu joajola, nambo nnyaule kwa akaakung’i na kubhoa ngwahupa jijikahukumulikwa na Amusa ili kwaalangia yakubhee ntekulama."

2 Ngapena bhandu bhajingi ngabhanneta mundu jwaapolite mmele goa, bhabhagonikwe nnani ja njeega. Ayesu pabhakabhona kuhobhalela kwabhenji, nga akaalobholela jonijola mundu jwaapolite, "Mwanangu nchipee ntima! Mabohu ginu gatekulekelelwa."

3 Bhandu bhangi bha bhenibhala bhabhamanyanga Malagilo ga Amusa bhakajemekanga konyananga akaachinabhene, "Hojo mundu atekwaaponja Annoongo!"

4 Ayesu akagamanya chibhatenda kuganikia, akaakonyanga, "Kwaniki ntendanga kuganikia mabohu mu mitima jinunji? 5 Bholi, nga niki chichibhile changalimba, kulobhola, ‘Ntekulekelelwa mabohu ginu’ au kulobhola, ‘Nnyeme nnyaule?’" 6 Nambo, mbala muimanyange yakubhehe mwana jwa mundu akombola kwaalekelela bhandu mabohu gabhe pamba pachilambo. Penapo akaalobholela jonojwe mundu jwapolite mmele, "Nnyimuke ntole njeega chinu, nnyaule kwaachinu."

7 Jonojwe mundu jwaapolite mmele bhakajimuka, na bhakajaula kwaachabhe.

10 Monomwe akibha mundu jumo jwapolite lubhoko. Bahi bhandu bhakaakonya Ayesu, "Bholi, hipalikwa kunlamia mundu Lichobha lya Kupomolela?" Bhakaakonya henela kwaapala atangile bhapatange ndela ja kwaahukumula.

11 Nambo Ayesu akaalobholela, "Tulobhole abhi mundu nkati jinu jwabhile na ngondolo jwabhe atekujingila mu liembo, bholi, ngaakamula na kummoa kwa kubhee nga Lichobha lya Kupomolela? 12 Nambo mundu nga bhammbone kupunda ngondolo! Bahi, hipalikwa kutenda gammbone mu Lichobha lya Kupomolela." 13 Ngapena Ayesu akaalobholela bheni bhala mundu, "Nnyulule lubhoko lwinu."

Nga bhakagunyulula, lubhoko gukalama gukabhee gumomi handa gonigola gongi.

30 Bahi, haikege bhamo, haki bhabhe Asimoni, bhakibha pachindanda bhatendakulwala chitamwa, na bhenaangota bhakannobholela Ayesu ngani yabhe. 31 Ayesu akaajendela jono mwikege, akaakamula lubhoko, akannyimua. Na chenichela chitamwa akalama, akajemeka kwaatumikilanga.

Ayesu bhaalamiya amundu bha mambujupuju

40 Amundu bhamo bhabhabhile na mambujupuju bhakaajendela Ayesu, bhakaatindibhalila majugwa, bhakaajopa, "Handa mpalite, mpakombola kunyelejea!" 41 Ayesu akaakole kiha, bhakanyulula lubhoko lwabhe, bhakaakwaa na kwaalobholela, "Ndendakupala! Nnyelejeike!" 42 Popopo amundu bhenabho akalama mambujupuju gabhe, bhakajelejeka.

3 Ngapena bhandu teno bhakahikanga na kwaaletela Ayesu amundu jwaapolite mmele, abhi atekupetulikwa na bhandu ncheche. 4 Henela, bhangakombolanga kwaapeleka kubhandikila na Ayesu ligongo lya nkutuli gwa bhandu bhajingi. Bhakakwelanga nnani ja chipagala bhakapobholananga mahali pabhakibha Ayesu. Pabhakapatanga upenyo, bhakantulua jono mundu abhi agolikwe pachindanda. 5 Ayesu pabhakabhona bhatenda kunhobhalela, akaalobholela bhena amundu jwaapolite mmele, "Aganja bhangu ndekunlekelela mabhou ginu."

6 Bhabhajigananga Malagilo ga Amusa bhangi. Bhabhakibhanga bhatamitinge penapo bhakaganikianga mu mitima yabhenji, 7 "Bhakombola bholi kulongela henela? Habhabha atendakwaaponja Annoongo! Nga ganiki jwaakombola kulekelea ubhou ila nga Annoongo jika jabhe?"

8 Popopo Ayesu akamanya kuganikila kwabhenji, akaakonyanga, "Mboni ng’anikianga henela mu mitima yinunji? 9 Nga chikubho niki chichibhile cha kupepeka muno, kwaalobholela habha amundu bhabhapolite mmele, ‘Ntekulekelelwa gabhou ginu,’ au kwaalobholela, ‘Nyimuke! Mpetule chindanda chinu nnyabhule?’ 10 Bahi, mbala muimanye kubhehe Mwana jwa amundu atekola mamulaka ga kwaalekelea bhandu mabhou gabhenji pachilambo." Ngapena Ayesu akannobholela amundu bhenibhala bhabhapolite mmele, 11 "Ndendakunnobholela nnyeme, ntole chindanda chinu nnyabhule kaja!"

12 Popopo mundu jonojwe jwaapolite mmele akajema, na akatola chindanda chabhe, akajenda nnongi ja bhandu bhoa. Bhandu bhoa bhakakangachanga na kwaalumbalila Annoongo na kulongela, "Twangabhona hopo chilebhe handa chenjeni."

Ayesu annamia mundu mu Lichobha lya Kupomolela

1 Lichobha lyengi lya Kupomolela Ayesu bhakajingila kabhele Mu nyuumba ja konganilana Bhayahudi na monimola nkati mwakibha na mundu jwaapolite lubhoko. 2 Mu nyuumba jenejo, Mafalisayo teno bhatendita kulendela bhaalamie amundu bhenabho Lichobha lya Kupomolela ili bhapatange kwaachitaki. 3 Ayesu akaalobholela bhena amundu bhabhapolite lubhoko, "Nnyeme nhike pambani pakati." 4 Penapo, bhakaakonyanga, "Bholi, hipaalikwa Lichobha lya Kupomolela kutenda chikubho chammbone au kutenda chikubho changalimmbone, kukoomboa umomi au kugukoma?" Nambo bhenaangota bhangalongelanga lilobhe. 5 Penapo Ayesu akaalolanga bhoa kwa lilaka, bhakabhona kiha mu ntima gwabhe ligongo lya kulepela kuhobhalela kwabhenji. Kabhele akaalobholela bhenibhala amundu, "Nnyulule lubhoko lwinu!" Nabhena akalunyulula lubhoko lwabhe, gukabhehe nkoto.

Ayesu bhaalamia atamwa mambujupuju

12 Wakati Ayesu pabhakibha mu chimo cha chilambo cha konokwe, konokwe mundu jumo jwakibha na mambujupuju mmele goha, na bhena pabhakaabhona Ayesu bhakagwee manguku na kwaajopa na kulobhola, "Hangwana, hanampalite, mpakombola kunnamiha ili ngombole kwakotimila Annoongo." 13 Ayesu bhakagunyulula lubhoko lwabhe, kwakwaha bhenibhala mundu na kulobhola, "Ndendakupala, nnyelejeike!" Mala mundu jonojwe mambujupuju gakalama na kondekwa kwaachalila Annoongo.

18 Pena bhandu teno bhakahikanga bhabhi bhaapetwile mundu jumo jwaapolite mmele kongo bhabhi bhanng’onike pachindanda, bhakalenganga kwaajingia nkati, bhaabheke nnongi ja Ayesu. 19 Nambo pabhakalepelanga kujingila nkati, ligongo lya kujimbika bhandu. Bahi bhakakwelanga nnani ja litatali lya nyuumba na bhakapobholanga mahali penipala pabhakibha Ayesu na kwaatulua jono ntamwa pamo na chindandaa chabhe, na bhakammeka nnoongi ja Ayesu. 20 Nabhena Ayesu pabhakabhona kuhobhalela kwaabhenji, bhakaalobholela bhena amundu, "Aganja ntekulekelelwa mabhou ginu." 21 Bhabhajigana malagilo ga Amusa na Mafalisayo bhakajemekanga kuchikonyanga, "Nga aganiki abhabha bhabhaaponja Annoongo? Jwakwa mundu jwakombola kulekelea mabhou ila nga Annoongo jika jabhe!" 22 Ayesu bhakahimanya kuganikiha kwaabhenji, bhakakonyanga, "Kwa niki ntenda kuganikihanga genago mu mumitima jinunji? 23 Nga chiniki chichibhi cha kupepeka muno, kulobhola, ‘Ntekulekelelwa mabhou ginu,’ au kulobhola, ‘Nnyeme nnyeende?’ 24 Bahi, mbala muhimanye kubhehe Mwana jwa Mundu bhatekola mamulaka gakulekelea bhandu mabhou gabhenji pachilambo." Penapo bhakaalobholela bhenibhala amundu jwapoolite mmele, "Nnyeme, ntole chindanda chinu, nnyabhule kwaachinu." 25 Pena, jono mundu jwaapolite mmele bhakajema nnoongi jabhenji, bhakatola chindanda chabhe chibhatendita kugolokela bhakajaula kwachakwe kongo bhabhi kwalumbalila Annoongo.

Ayesu bhaalamia amundu jwaapolite lubhoko

6 Mu Lichobha lyengi lya kupomolela, Ayesu bhakajingila mu Nyuumba ja konganilananga Bhayahudi, bhakajigana bhandu. Monimola nkati pakibha na amundu bhabhapolite lubhoko lwabhe lwa kunnelo. 7 Bhabhajigana malagilo ga Amusa na Mafalisayo bhakalolea pabhalemwite ili bhakombolange kwahukumula Ayesu na henela bhatendita kulendelanga bhabhone handa bhakaalamia amundu Lichobha lya Kupomolela. 8 Nambo Ayesu bhakaimanya kuganikia kwabhenji, bhakaalobholela bhenibhala bhabhapolite lubhoko, "Nnyinuke, nnyeme nnongi ja bhandu bhoha." Bhenibhala amundu bhakajaula na kujema nnongi ja bhandu. 9 Ngapena Ayesu bhakaalobholela, Ndenda kukonyaanga, "Bholi, nga yammbone kutenda chilebhe chibhou au chilebhe chammbone mu lichobha lya kupomolela? Kuguokoa umomi gwa mundu au kugutiniha?" 10 Ayesu bhakabhalola bhandu bhoha upande goha, ngapena bhakaalobholela bheni amundu bhabhapolite bhandu, "Na bhenabho bhakalunyulula lubhoko lwabhe na lubhoko lukabhehe na machili."

Kuhobhelela kwa akolo bha linyemba lya ku Loma

1 Ayesu pabhakajomola kolongela genago goha nnogni ja bhandu, bhakajaula ku Kapelenaumu. 2 Konokwe kukibha na akolo bha lilubhalo lya manyemba makomi komi yakubhe bhakibha ntumichi jwabhe jwabhampalite muno. Jonojwe ntumichi hakibha ntamwa kubhandikila na kuwehe. 3 Bhenibhala akolo bha manyemba makomi komi pabhakajoa ngani ja Ayesu, bhakaatumanga hakanaota bhangi bha bhayaudi bhajaulange kwaajopa bhaike kunnamia ntumichi jwabhe. 4 Pabhakaika kwa Ayesu, bhakaajopa muno, bhakalobholanga, "Hojo mundu hipaalikwa bhajangatilwe, 5 Kwa maana bhatenda kwaapala bhandu bhitu, na bhena bhatekuchengela Nyuumba ja konganilanga."

6 Bahi, Ayesu bhakajaula pamo nabho. Pabhakabhandikila kuhika pa nyuumba ja bhenibhala akolo, bhenibha akolo bha lilubhalo bhakaatumanga akaaganja bhabhe kwalobholela Ayesu, "Hangwana, nkotokuchiabhua muno, maana mwenga mpaalikwahopo nnyingile mu nnyumba jangu. 7 Kwakubhe nangachibhona nenga namwene mbaalikwahopo hata kuhika kwaachinu. Nambo nnobhole tu lilobhe, na antumichi bhangu bhapakulama. 8 Kwakubhehe nenga kabhele nga mundu ndekubhe pahi ja mamulaka, na ndekola manyemba bhabhilinge pahi jangu bhabhajeketelanga chinaakongolelanga. Handa naalobholile bhamo, ‘Nnyabhule!’ nabhena bhatendakujaula, ndenda kwalobholela bhangi, ‘Nhike!’ nabhena bhatenda kuika, hata habhanda bhangu handa naalobholile, ‘Ntende henela!’ nabhena bhapakutenda."

9 Ayesu pabhakajoha malobhe genago, bhakakangacha, na bhena akalitendebhukila lyenilyela lilubhalo lya bhangu bhabhatendita kunkagula, na bhakaalobholelanga, "Na nangaabhona amundu bhabhabhile na imani ngolongwa handa jenjeni hata mu bhandu bha ku Isilaeli"

10 Bhenibhala bhandu bhabhakatumwanga kwa Ayesu pabhabhujanga pakaja pa bhenibhala akolo bhakaakolela bhenibhala antumichi bhalamite.

11 Mu Nyuumba jenejo kukibha na mwikege jumo bhabhakatamikwa na mahoka kwa yaaka komi na nane, ng’ongo gwabhe kugapenda na bhakalepela kujema gwema. 12 Ayesu pabhakaabhona, bhaakakema, na kwaalobholela, "Mwikege nnamite chitamwa chinu," 13 Ayesu bhakabheka mabhoko nnani jabhe, mala bhakajema gwema bhakajemeka kwalumbalila Annoongo.

Ayesu bhaalaamiya amundu bhabhabhile na chitamwa cha chakutupa mmele

1 Lichobha limo lya kupomolela Ayesu pabhakalalikwa kulyehe chakulya kaja kwa bhamo bha akaakolo bha makaafalisayo na bhandu bhabhakibhanga penapo bhatendita kwaalolekea muno. 2 Popopo nnongi jabhe Ayesu pakibha na amundu bhamo bhabhakibha na chitamwa cha kutupa mmele goha. 3 Bahi, Ayesu akaakonyanga Mapalichayo na bhabhajiganga malagilo ga Amusa, "Bholi, malagilo gapala kunnamia mundu lichobha lya kupomolela au ngabha?" 4 Nambo bhakatamanga jiii. Nambo Ayesu bhakankamula bhena atamwa na kwalamia, gubhannekitaje ajabhule.

Ayesu bhatenda kwaalamia akaatamwa mambujupuju komi

11 Ayesu pabhatendita kujaula Kuyelusalemu, bhakapeta kunpaka gwa ku Samalia na ku Galilaya. 12 Pabhakibha bhatenda kujingila mu chijiji chimo, bhakakongana na bhandu komi bhabhakibhanga na itamwa ya mambujupuju. Na bhenaangota bhakajemanga kutali, 13 bhakakwe lilobhe, bhakaalobholela, "Ayesu, Hangwana, ntukolee kiha!" 14 Pabhakabhonanga bhakaalobholelanga, "Nnyaulange nkachilangiange kwa akaakung’i." Nabhena pabhakibhanga nndela bhabhi kujaula, bhakalamanga itamwa yabhenji na kondekwa handa chiiyobhalilike kwa kujopa. 15 Jumo jwabhenji pakabhona kubhee bhalamite, bhakabhuja kongo bhabhikwaalumbalila Annoongo, kwa lilobhe likolongwa. 16 Bhakachijeha pa makongono ga Ayesu na kwaachukulu. Amundu bhenabho bhakibha Amsamalia. 17 Henela Ayesu bhakaakonya, "Bholi, nangaalamianga bhandu komi na bhenaangota bhakakondekwa handa chiiyobhalilike ja kwaajopa? Bholi bhabhilinge koji bhenibhala tisa? 18 Bhakwa hata bhamo bhabhabhonikine bhabhikubhuja kwaatopea Annoongo nga habha ageni tu?" 19 Ngapena Ayesu bhakaalobholela, "Nnyimuke nnyaule kwaachinu, kuhobhalela kwinu kutekunnamia."

Ayesu atendakunnamia nangwabha Lichobha lya Kupomolela

1 Pagakapeta genago, kukibha na lichobha likolongwa lya Bhayahudi, na bhena Ayesu akakwea kujaula ku Yelusalemu. 2 Konokwe ku Yelusalemu, kubhandikila na nlyango gugukemwa Nlyango gwa Ngondolo, pakibha na litamanda lilikemwa kwa Chiebulania Betizata, litamanda helyo lilikatindilwa na hibhanja nhano. 3 Monomwe mu lubhanja mukibha na akaatamwa bhajingi bhabhagonikwe, bhangalola, akanangwabha na bhabhapolite mmele, bhenabho bhabhikulendela machi gatitimbulikwe, 4 kwakubhee muuda teno atumichi bha kunani kwa Annoongo bhatendita kutuluka mmachi na kugatitimbua. Atamwa jwaakajemeka kujingila mmachi gagatitimbulikwe, atenda kulama chitamwa choachela chibhakibha nacho. 5 Bahi, penapo pakibha na mundu jumo jwakibha atamwa kwa yaaka chelachini na nane. 6 Ayesu pabhakaabhona mundu jonojwe agolwike penapo kongo abhikumanya kubhee akibha atamwa kwa machobha gajingi, penapo akaakonya, "Bholi, mpala kulama?"

7 Ntamwa jonijola akannyangula, "Mwe Akolo, nenga nangali mundu bha kundumbukia mmachi gagatimbulilwe. Na nenga handa mbalite kutumbukila mu litamanda, mundu jongi kunongolela."

8 Ayesu akaannobholela, "Nnyeme, ntole likai linu nnyende." 9 Popopo mundu jonojwe akalama, akatola likai lyabhe, akajemeka kujenda.

Chikubho chenecho chikateendeka mu Lichobha lya Kupomolela.

46 Henela Ayesu akahika kabhele konokwe ku chilambo cha Kana, chilambo cha ku Galilaya, kwakola kubhakagalambua machi kubhee divai. Penapo pakibha na akolo jumo kwaajibha na kakombo jwaakibha na ntamwa konokwe ku Kapelenaumu. 47 Akolo bhenabho pabhakajoa kubhee Ayesu abhokite ku chilambo cha Yudea na kuhika chilambo cha Galilaya, akaajendelela na kwaajopa ajaule kunnamia mwana jwabhe jwaakibha ntamwa kubhandikila na kujomoka. 48 Ayesu akaalobholela, "Mwenga handa ngabhonanga hilolelo na yakangachika ng’o ngakombola kuhobhalela."

49 Anachilongola jonojwe akaalobholela, "Mwe mwakolo, choonde tujende tangu kakombo jwangu jwangajomoka."

50 Ayesu akaalobholela, "Nnyaule tu, mwana jwinu atekulama."

Mundu jonojwe akahobhalela malobhe gabhakalobholelwa na Ayesu, akabhoka akajaula. 51 Pabhakibha tangu nndela, akakongana na bhatumichi bhabhe bhakaalobholela kubhee, "Kakombo jwinu alamite!"

52 Bhakaakonyanga muda niki kakombo jwabhe pabhakalama, na bhenaangota bhakannobholela, "Licho muda gwa saa saba muhi, chitamwa chikaaleka." 53 Ngapena atati jwa jono kakombo akakombokela kubhee gukibha muda gogogo nga pabhakalobholelwa na Ayesu kubhee, "Kakombo jwinu alamite." Henela akaahobhalela Ayesu bhenabho pamo na bhandu bhoa bha kwaachabhe.

54 Heche nga chikibha chilolelo cha bhele chibhakatenda Ayesu pabhatendita kubhoka ku chilambo cha Yudea na kujala Galilaya.

20 Na pabhatendita kujaula haikege jumo, atamwa ncholocholo kwa yaaka komi na jibhele, akaakagula Ayesu kuyeto, akaakwaa mbendo ja ngobho jabhe. 21 Kwakubhee akachilobholela muntima gwabhe, "Handa ngamwile tu ngobho jabhe, mbakulama."

22 Ngapena Ayesu akatendebhuka akaabhona haikege, akaalobholela, "Amwali, nchipekee ntima! Kuhobhalela kwinu kutekunlamia." Haikege jonojwe akalama popopo.

25 Pakati jabhenji pakibha na haikege bhamo bhabhalwala chitamwa cha ncholocholo kwa yaaka komi na hibhele. 26 Haikege bhenabho bhakalaga muno na kwaajendela akaaganga bhajingi. Na bhakatumia mbiya yabhe yoha, nambo bhangapata mbaya na penapo hali jabhe jikapunda kubhee jangalimmbone. 27 Pabhakahijoa ngani ya Ayesu, na henela bhakachipekenya pa lilubhalo bhakaajendela Ayesu kwa kuyeto kwaakwaa ngobho jabhe. 28 Bhakatenda henela, ligongo bhakachilobholela mwena muntima gwabhe, "Handa ngwaite ngobho jabhe tu, mbakulama."

29 Popopo miyahi jabhe jikakotoka kuolola, nabhena bhakachijohanikiha kubhehe mmele gwabhe jojolo gulamite.

43 Bahi, kukibha na mwikege jumo pakati ja lyenilela libhoga lya bhandu, yakubhe bhakibha atamwa jwa kubhoka mihai kwa yaka komi na hibhele, kabhele bhakibha bhajomwile hilebhe yabhe kwa akaaganga ili bhapate kulama, nambo jwakwa jwakakombola kunlamiha. 44 Bhenabho haikege bhakaakagula Ayesu kuyeto, bhakaakwaha palupindo lwa ngobho jabhe. Palapala bhakalama chitamwa chabhe cha kubhokwa na mihai. 45 Ayesu bhakakonya, "Bholi, nga aganiki bhabhatekwaha?"

Bhoha bhakalobhola jwaakwa amundu bhabhankwaite. Na bhenabho Apetulo bhakalobhola, "Hangwana, lilubhalo lya bhandu bhajingi litekuntindila na kuminyana!" 46 Nambo Ayesu bhakalobhola, "Habhile mundu atekungwaha, niimanyi kwa kubhehe machili gatekumoka." 47 Jonijo mwikege pakalola yakubhe bhakombola hopo kuchihia, bhakachipia bhabhi kulendemela, bhakachigwia manguku nnoongi ja Ayesu, penapo bhakakongolela nnongi ja bhandu bhoha kwa niki bhakakwaha na namuna chibhakalamiwa gunakamo. 48 Ayesu bhakaalobholela, "Mwali, kuhobhalela kwinu kutekunnamia. Nnyabhule kwa amani."

Amwali bha akolo na mwikege jwalamite

18 Ayesu paatendita kulobhola genago, akolo jumo Annyahudi akahika, akaatindibhalila majugwa na kulobhola, "Amwali jwangu bhatekujomoka nangocheni. Nambo nhike nkaabhekele lubhoko lwinu na jonojwe apakulama."

19 Ayesu akajimuka na kujaula pamo na bhabhachijigana bhabhe bhakaakagula.

23 Ngapena Ayesu paakahika kwaachakwe jonijola akolo. Na akaabhona bhandu bhagomba hipenga ya nguto na kuguta muno, 24 akaalobholela, "Mmokange pamba! Amwali hojo jwangawee, atekugoloka tu." Nambo bhandu bhakaaheka. 25 Bahi, lilubhalo lya bhandu pabhakaabhoanga panja, Ayesu akajingila nkati, bhakaakamula lubhoko bhena amwali, na bhenabho bhakajema.

22 Penapo bhakahika jumo jwa akaakolo bha Nyuumba ja konganilana Bhayahudi bhakemitwa Ayailo. Pabhakammona Ayesu, bhakatindibhala majugwa na kotima nnoongi ja makongono ga Ayesu, 23 bhakaajopa bhabhikulongela, "Mwali jwangu nga ntamwa tweja tweja atendakubhandikila kuwee. Choonde tujende, nkaabhekela mabhoko ginu, bhapate kulama na kubhee bhamomi."

24 Bahi, Ayesu bhakajaula pamo na bhenabho. Bhandu bhajingi muno bhakaakagula, bhakibhanga bhajingi bhakaatindila na kwaaminya minya.

38 Bhakahikanga kaja kwa Ayailo na bhena Ayesu bhakajoa nyenye, nguto na minyembo ja kumalilo. 39 Pabhakajingila nkati, akaalobholelanga, "Mboni mpotanga nyenye na kuguta? Mwali jwangajomoka, bhatekugoloka tu." 40 Nambo bhenibhala bhandu bhakaaheka kwa kwaabhelua, bahi, akaabhoanga bhoa panja, na akaapetulanga atati bhabhe na anyongo bhabhe jono mwali na bhenibhala bhanapunji bhabhe bhenibhala bhabhakibha nabho, bhakajingilanga mu chumba chibhakang’oneka jono mwali. 41 Ngapena bhakaakamula lubhoko, bhakaalobholela, "Talita, kumi," maana gakwe, "Mwali, ndendakunnobholela nnyimuke!" 42 Popopo amwali bhakajema, bhakajemeka kujenda. Amwali jonojwe bhakibha na yaaka komi na hibhele. Bhandu bhabhakibhanga bhabhakangachanga muno.

31 Ayesu bhaheendelea kulobhola, "Bholi, mbakwalandanakia na chiniki bhandu bha chibhelei heche? Bhalandaana na chiniki? 32 Bhenaangota nga handa bhana bhabhatamite mahali pa kuhuchianga hilebhe na kemana lilubhalo kwa lilubhalo, gwendu bhakabhee bhatekutama pamakonganilo ga bhandu na kulobholelana, libhoga limo na lyengi,

‘tumpotilinge lipyombyo, nambo mwangaina!

twakanyeembelelanga nnyeembo ya kumalilo nambo mwangaguta!’

33 Kwa maana Ayohana ambatichaji bhakahika, na bhenabho bhakibha bhatenda kutama pangali kulyehe, na mwangota nkalobholanga, ‘Bhatekupoganikwa na mahoka!’ 34 Nabhena amwana bha Amundu bhatekuhika, bhatenda kulyehe na kung’wee, na mwangota nkalobholanga, ‘Mwalole habha mundu bhakulyehe muno na bhakolelwa, aganja bha bhatochanga kodi na bhabhilinge na mabhou!’ 35 Nambo luunda lwa Annoongo jitendakulangia yakubhehe nga jammbone kwa bhenibhala bhoha bhabhajikonda."

Haikege bhabhabhile na mabhou bhatenda kwapakaa mahuta Ayesu

36 Lichobha limo Amfalisayo bhamo bhakaalalika Ayesu kujaula kulyee chakulya cha kimuho kwaachakwe. Bhakajiingila nkati mwa jonojwe Mafalisayo bhakataama palikai na kulye chaakulya. 37 Bahi, mu chilambo chenichela pakibha na haikege bhamo bhabhabhile na mabhou. Pabhakajoa yakubhehe Ayesu bhatendakulyee mu nyuumba na bhenibhala Amafalisayo bhakapetula ntuumba gwa mahuta ga kunuungila muno.

41 Penapo bhakaika amundu bhamo bhakemitwa Ayailo, bhabhakibha akolo bha nyuumba ja konganilanga Bhayahudi, bhakahika bhakachigwia mumakongono ga Ayesu, bhakaajopa bhajaule kwaachabhe, 42 kwa kubhehe mwali jwabhe jwa jika, jwabhile na yaaka komi na hibhele, jwakibha bhatenda kulwala kubhandikila Kujomoka.

Ayesu pabhakibha bhatenda kujaula, lilubhalo lya bhandu likaaminya muno.

49 Ayesu pabhakibha tangu bhaendelea bhalongela, bhakahika amundu kubhoka ku nyuumba ja Ayailo, bhenibhala akolo jwa Nyuumba ja konganila Bhayahudi, kwaalobholela, "Amwali bhinu bhatekujomoka nkotokwaabhua bhabhajigana?" 50 Nambo Ayesu pabhakajoha genago bhakaalobholela Ayailo, "Nkotokujogopa, nhobhalele tu, na bhenabho bhapakulama." 51 Ayesu pabhakaika mu nyuumba ja Ayailo bhakaahibhilila bhandu kujingila bhakoto nkati, ila Apetulo, na Ayakobo, na Ayohana, atati na anyongo mundu mwikege jola. 52 Nambo bhandu bhoha bhatendita kugutanga na kuombolechanga ligongo lya bhenibhala mwali. Nambo Ayesu bhakaalobholelanga, "Nkoto kugutanga, kwa kubhehe mwana jwangawee, atekugoloka tu!" 53 Bhenaangota bhakaaheka kwa kwaabhelua, ligongo bhakaimanya yakubhehe bhenibhala mwali bhatekujomoka. 54 Nambo Ayesu bhakankamula lubhoko bheni bhala amwali na kwaakema, "Mwali, nnyimuke!" 55 Bhenibhala mwali bhakibha bhammomi, na bhakajema. Ngapena Ayesu bhakaakulumikia akaabhelehi bhabhe bhaapekee chakulya. 56 Akaabhelei bhabhe bhakakangachanga muno, nambo Ayesu bhakaakanikiha bhakoto kwalobholela mundu joha jola genago gagatendikwe.

Kujomoka kwa Alazalo

1 Pakibha na mundu jumo jwa ku Betania jwakemitwa Alazalo akibha ntamwa. Akaalombo bhahe bhakibhanga bhakemitwa Amalia na Amalata. 2 Amalia hojo, nga jonijola jwakaapakala Hangwana mahuta gakunungila na kwaahunguta Alazalo makongono kwa majunju gakwe. 3 Henela akaalombo bhabhe Alazalo bhakaatumila Ayesu ngani kwaalobholela, "Mwe Hangwana, aganja bhinu jwamumpala nga ntamwa."

4 Ayesu pabhakajoha genago, akalobhola, "Alazalo ngajomoka kwa chitamwa heche, ila gupakulangia ng’anyimo gwa Annoongo, ili Mwana jwa Annoongo akombole kutopelwa kupetela heche chitamwa."

5 Ayesu na Amalata na Amalia na Alazalo bhakibhanga na uganja nkolongwa muno. 6 Ayesu pabhakajoa kubhee Alazalo atendakulwala, akajonjokea kutama mahali penapo kwa machobha gabhele. 7 Bahi, pagakapeta machobha genago Ayesu akaalobholelanga bhabhachijigana bhabhe, "Nangocheni tubhujange kabhele ku Yudea."

8 Bhabhachijigana bhabhe bhakaalobholela, "Bhannyigana, akachilongola bha Bhayahudi bhapalita kunkoma kwa kumpota maganga, kwa niki mpala kubhuja kabhele konokwe?"

9 Ayesu akaajangulanga, "Bholi, muhi gwangali masaa komi na gabhele? Bahi, bhandu handa ajendite muhi ngakombola kobhanduka kwakubhee atendakugubhona nhana gwa heche chilambo. 10 Nambo bhandu handa bhajendite kilo bhapakubhanduka ligongo bhangali nhana gwakwatenda kulola" 11 Ayesu pabhakajomola kulongela genago, akaalobholelanga, "Aganja bhitu Alazalo agolwike, nambo nenga mbakujaula kwaajimua."

12 Bhabhachijigana bhabhe bhakaalobholela, "Mwe Hangwana, handa agolwike lugono, apakujimuka tu."

13 Ayesu atendita kulongela ngani ja kujomoka kwa Alazalo, nambo bhenaangota bhakaganikianga kubhee atendita kulongela ngani ja lugono. 14 Ngapena Ayesu akaalobholelanga pangali kuhiya, "Alazalo ajomwike,

Ayesu ajikotoa mboongo jikotoke

23 Ayesu akakwela mu meeli, na bhabhachijigana bhabhe bhakaakagula. 24 Mala mboongo ngolongwa jikabhokela mulitanda, na mawimbi gakajemeka kujipukunyapukunya meeli. Na muda gonogwe Ayesu abhi tangu agolwike lugono. 25 Bhabhachijigana bhakaajendelela na kwaajimua, bhabhi kulobhola, "Hangwana ntuchobhole." "Tutendakujomoka!"

26 Ayesu akaajangulanga, "Mwe mwangota mmilinge na kuhobhalela kuchoko!" "Mboni ntenda kujogopanga?" Bahi, akajinuka na akajikalipila mboongo na mawimbi, na mboongo jikakotoka.

27 Bhandu bhoa bhakakangachanga, bhabhi kulobhola, "Nga mundu jwa namuna niki hojojo?" "Hata mawimbi na mboongo jitendakwaajohanikia!"

15 Pajikahika kimuho, bhabhachijigana bhabhe bhakaajendelela na kwaalobholela, "Pamba palulemba, na lyobha litekutipika, mwalekange bhandu bhajaulange mu hilambo yabhenji bhakaemelange chakulya bhalyangange."

16 Ayesu bhakaalobholelanga, "Ngabha mpaka bhajaulange, mwangota mwapekee chakulya."

17 Nambo bhenaangota bhakaalobholela, "Tukweti mikate nhano na homba bhabhele."

18 Ayesu akaalobholelanga, "Nnetelange pambani." 19 Bhakaalobholela bhandu bhatamange mu manyai. Ngapena Ayesu akajitola jela mikate nhano na bhenibhala homba bhabhele, bhakalola kunani kwa Annoongo, bhakaajopa Annoongo. Penapo bhakahimetula jenijela mikate bhakaapekea bhabhaajigana ili na bhenaangota bhabhapekee bhandu. 20 Bhandu bhoa bhakalyee na kujukuta. Kubhoka penapo bhabhachijigana nga bhakalokota mbakatika hihikagalila, bhakatweelela hikapo komi na jibhele.

21 Bhandu bhabhakalyee bhakibha akanalome elupu nhano, pangali kubhalangala haikege na bhaana.

25 Kilo, kubhandikila na kuchee, Ayesu akaajendelela bhabhaajigana bhabhi kujenda panani ja machi.

Ayesu bhaapekea chakulya bhandu elupu ncheche

32 Ayesu akaakemanga bhabhaajigana bhabhe, bhakaalobholela, "Ndendakwaakolekea kiha bhandu habha kwa kubhee bhatamitinge na nanenga kwa machobha gatatu, nangocheni bhanga chakulya chichiigalile. Nanenga ngapala kwaalekanga bhajaulange kwaachabhe pangali kulyee, bhakoto kuindukanga nndela."

33 Bhabhaajigana bhabhe bhakaalobholela, "Pamba tubhile palulemba, tupakupata koji chakulya cha kwaaliyanga habha bhandu bhajingi henela?"

34 Ayesu bhakaakonya, "Mmilinge na mikate jilengwa?"

Bhakaajangula, "Chaba na matobhi kachoko."

35 Bahi, Ayesu akaakulumikia bhandu bhatamange pahi. 36 Ngapena bhakatola jenijela mikate chaba na yeniyela homba hibhele, na bhenabho bhakaachukulu Annoongo, bhakahimetula na kwaapekea bhabhaajigana bhabhe, na bhenaangota bhakaapekea bhenibhala bhandu. 37 Bhandu bhoa bhakalyee na kujukuta. Ngapena bhabhaajigana bhakalokota mbakatika hiikahigalila, bhakatwelelanga hijaluba saba. 38 Bhenabho bhabhakalyee bhakibha akanalome elupu ncheche, pangali kubhalangana akaahikege na bhaana.

Kubhoa kodi ja Nyuumba ja Annoongo

24 Pabhakahikanga kuchilambo cha ku Kafalanaumu bhandu bhabhakumbanga kodi ja Nyuumba ja Annoongo bhakaajendelela Apetulo, bhakaakonya, "Bholi, bhabhajigana bhinu bhalepa kodi?"

25 Apetulo bhakaajangula, "Elo, bhatendakulepa."

Apetulo pabhakabhuja kwaachabhe kabula ja kulobhola lilobhe, Ayesu akaakonya, "Mwe Asimoni nnola bholi? Akaakolongwa bha chilambo bhakumbanga kodi kwa bheneki? Kubhoka kwa akaakola chilambo au kubhoka kwa akaageni?"

26 Apetulo bhakajangula, "Kubhoka kwa akaageni."

Ayesu akaalobholela, "Henela, bahi, akaakola chilambo ngapalikwa kulepa. 27 Nambo kwa kupala tukotokwaachimwa, nnyende kulitanda, nkalopoe, ntole homba hipakujemeka kutangila, nhunukule nkang’wa jabhe, na mpakugukolela ulohi nkati. Ntole gono ulohi nkalepe kodi ligongo lya nenga na ligongo linu mwenga."

Ayesu atendakugulaani nkojo

18 Ayesu akobhoka kundabhi tuputupu mu chilambo cha ku Betania kubhuja ku chilambo ku Yelusalemu, akajoa njala. 19 Akagubhona nkojo gumo nngulugulu ja ndela, akagujaulila, nambo akagukolela gwanga choachela nambo mahamba jika. Bahi, akagulobholela, "Nkotokuogola matunda ng’o!" Popopo kongo gwa nkojo gukajoma.

20 Bhabhachijigana bhabhe pabhakagulola bhakahechukanga, bhabhikulobhola, "Kwaniki gongo ntini gutekunyalila chindema?"

21 Ayesu akaajangulanga, "kweli ndendakunnobholelanga, handa nkahobhalilinge pangali kubhee na lipamba, ngabha kubhee mpakombolanga kutenda tu genigala gagatendikike kwa gongo ntini, nambo hata nkalilobholela litombi, ‘Nchitupule nkachijee mu bahali,’ na lyene lipakutendeka. 22 Na handa nkahobhalelanga, choachela chimpakujopanga kwa Annoongo, mpakupatanga."

37 Pakabhokela na chimboonga chikolongwa, mawimbi ga machi gakapota gonigola ntumbwi pamwakibha Ayesu na penapo gonigo ntumbwi kugajemeka kutwelela machi. 38 Ayesu bhakibha kuyetu ja ntumbwi, bhagolwike nnaji ja nhegamo. Bahi, bhanapunji bhenabho bhakannyimua na kwaalobholela, "Bholi, bhannyigana, mmonahopo handa twenga tutendakutibhila?"

39 Ayesu bhakajimuka, bhakachikopokea chenichee chimboonga, bhakagahukumula genigala mawimbi, "Mme jii! Nkotoke!" Cheni chela chimboonga chikakotoka, na chikabhee jii. 40 Ngapena Ayesu bhakaakonyanga bhanapunji bhabhe, "Kwaniki ntenda kujogopanga? Bholi, tangu mwangaobhalelanga?"

41 Na bhanapunji bhabhe bhakajogopa muno, bhakibha bhatendakonyananga, "Habha nga aganiki bahi, hata chimboonga na mawimbi gatendakunyoonikia?"

35 Kimuho pajikahika, bhanapunji bhakaajendela Ayesu, bhakannobholelanga, "Pambani nga pamanyai, na nangocheni lihobha litendakutipika. 36 Mbaya mwapwilinganie bhandu bhajaulange mu hilambo na mu hijiji hiibhandikile, bhakachihemelele chakulya."

37 Nambo Ayesu bhakaalobholelanga, "Mwapengange mwaangota chakulya."

Bhenaangota bhakankonya, "Bholi, tujabhule kuhemela mikate kwa mbiya dinali mia jibhele, na kwaapanganga chaakulya?"*

38 Henela Ayesu bhakaakonyanga, "Mmilinge na mikate jilengwa? Nnyendange nkalolange."

Pabhakalolanga, bhakaalobholela, "Jibhii mikate nhano na homba hibhele."

39 Bahi, Ayesu bhakaakulumikianga bhanapunji bhabhe bhaalobholelange bhandu bhatamange malubhalo malubhalo pa manyahi. 40 Bhenaangota bhakatamanga bhangi bhakatamanga malubhalo ga bhandu makomi nhano na bhangi bhakatamanga malubhalo ga bhandu makomi komi. 41 Ngapena Ayesu bhakaitola yeniyela mikate nhano na yeniyela homba hibhele, bhakalola kunani kumahunde, bhakaachukulu Annoongo, akaimetula mikate, bhakaapekeanga bhanapunji bhabhe bhaabhaganikie bhandu, na yeniyee homba hibhele bhakaabhaganikia bhoa. 42 Bhandu bhoa bhakalyenganga, na bhakajukutanga. 43 Ngapena bhanapunji bhabhe bhakalokotanga himbolopolo hiikahigalilana ya mikate na homba, bhakatweleanga hikapu komi na hibhele. 44 Bhandu bhabhakalyenganga akanalome jikajabhenji bhakibhanga handa elupu nhano.

48 Bhakaabhonanga bhanapunji bhabhe bhabhikulaganga kwa kupota mbundi ngolongwa ya ntumbwi kwa machili, kwakubhee mboongo jitendita kwaahibhilanga. Kubhandikila na kuchee, Ayesu bhakaajendelanga bhanapunji bhabhi kujenda nnani ja machi, bhakapala kwapetanga. 49 Pabhakammonanga bhabhikujenda nnani ja machi, bhakaganikianga nga lihimwi, "Bhakapotanga nyenye," 50 kwakubhee bhoa pabhakammonanga bhakajogopanga, kachoko Ayesu bhakaalobholelanga nabho, "Nkotokange, nkotokujogopanga nga nenga!" 51 Ngapena bhakakwela mu ntumbwi gwabhenji, na jenijela mboongo jikakotoka. Bhakakangachanga muno,

Ayesu atendakwaapekeanga chaakulya bhandu handa elupu ncheche

1 Machobha genago, lilubhalo likolongwa lya bhandu likakondekana kabhele, na bhakibhangahopo na chaakulya. Bahi, Ayesu akaakemanga bhakanapunji bhabhe, akaalobholelanga, 2 "Ndendakwaakolela kiha habha bhandu ligongo bhabhilinge na nenga kwa machobha gatatu, na bhabhilingehopo na chakulya. 3 Handa naalekitinge bhajaulange kwaachabhenji kongo bhabhii na njala bhapakuhindukanga nndela, ligongo pakati jabhenji bhabhilinge bhandu bhabhabhokitinge kutali." 4 Bhanapunji bhabhe bhakaakonya, "Pambani palulemba chipakupatikana koo chaakulya cha kwaajukutianga bhandu habha bhoa?"

5 Ayesu bhakaakonyanga, "Mmilinge na mikate jilengwa?"

Bhakannyangula, "Tubhii na mikate saba."

6 Bahi, akaalobholelanga bhandu bhatamange pahi. Bhakaitola jenijela mikate saba, akachukulu Annoongo, akajimetula, bhakaapekeanga akanapunji bhabhe bhabhametulile bhandu, na bhenaangota bhakaametulila. 7 Kabhele pakibha na homba hichoko kachoko. Ayesu akaachukulu Annoongo, akaalobholelanga bhanapunji bhabhe bhaabhaganakie bhandu. 8 Bhandu bhakalyenganga, bhakajukutanga. Bhanapunji bhabhe bhakajolanga upolo ya mikate na bhakatweleanga hikapo saba. 9 Bhandu bhabhakalyenganga bhakibhanga bhandu handa elupu nchenche. Ayesu bhakaatabhukanga bhandu bhajaulange kwaachabhenji,

Ayesu bhatendakugujopela gangali mmbone nkongo gwa ntini

12 Malabhi jakwe pabhakibhanga bhatendakubhoka ku Betania kujaula ku Yelusalemu, Ayesu bhakibha na njala. 13 Bahi, bhakabhona kwa kutali nkongo gwa ntini gubhii na mahamba gajingi. Akaujeendela ili bhalole handa gubhii na libibo lyohalela. Pabhakaguhikila, bhakakolela gubhii na mahamba jika, kwakubhehe gukibha ngabha muuda gwa kuhogola mabibo. 14 Ayesu bhakagulobholela gonigola nkongo gwa ntini, "Kubhokela leleni na hata machobha goha gongo ntini ngaogola kabhele mabibo."

Bhanapunji bhabhe bhakaajoa bhabhikulongela genago.

Majigano gatupatite kubhoka kwa ntini gugujomite

20 Kundabhi tuputupu, pabhakibha bhatendakupeta, bhakagubhona gonigola nkongo gwa ntini gujomite gwoa, kubhokela kumikega mpaka nnani kumahamba. 21 Apetulo bhakagukombokela, bhakaalobholela Ayesu, "Bhannyigana, nnole! Gonigola ntini guntekugulaani, gujomite!"

22 Ayesu bhakaalobholelanga, "Munhobhalelange Annoongo. 23 Ndendakunnobholelanga kweli, amundu handa bhalilobholile litombi hele, ‘Nnyikuke nkachijee mu bahali,’ pangali kubhehe na bhoga muntima gwabhe, ila handa bhahobhalile hikubho yoha kubhee gabhalongile gatendakuteendeka, bhapakuteendelwa chikubho chenecho. 24 Ligongo lya henela ndendakunnobholelanga, goha pannyopanga na kuchali na kwaajopa Annoongo choachela nhobhalelange kubhehe nchipokilinge na chene chipakubhee chinunji. 25 Kila pannyopanga, munnekelele kila amundu bhabhannemwitinge, nabhena Atati bhinunji bha kunani kulihunde bhapakunnekelelanga mwangota kulemwa kwinunji."

Ayesu bhakaagula bhanapunji bha kwanja

1 Lichobha limo, Ayesu bhakibha bhatekujema nngulugulu ja litanda lya Genesaleti, na nkutuli nkolongwa gwa bhandu bhajingi bhakibha bhatekwaatindila bhabhi kuminyana, bhabhi kujohanikihanga lilobhe lya Annoongo. 2 Bhakabhona mitumbwi jibhele nngulugulu mwa litanda. Na bhakoka homba bhene bhabhi bhabhokitinge, bhabhi kuhatambula na kuhalakiha mapelele gabhenji. 3 Baada ja Ayesu kujingila mu ntumbwi gumo gugukabhehe gwa Asimoni, bhakaajopa Achimoni bhagupeleke mu mmachi pakujendea muno kubhoka nngulugulu mwa litanda. Bhakajigananga lilubhalo lya bhandu bhabhi bhatamite mu goni gola ntumbwi 4 Pabhakajomola kujigana, bhakaalobholela Asimoni, "Nangocheni npeleke ntumbwi mpaka pamachi gakujendea ngapena nkatuluange mapelele ginunji nkakokange homba." 5 Asimoni bhakaajangula, "Mwe mwa Hangwana, tutekuchimilaa kukoka homba kilo choha pangali kupata chilebhe, nambo kwakubhehe nnongile, tupakujaula kutulua mapelele gitu mmachi." 6 Pabhakajeha mapelele gabhenji mmachi, na pabhakatendanga henela bhakakokanga homba hijingi, na mapelele gabhenji gakajemeka kupapuka. 7 Bhakapotanga himbwele kwaakemanga akaajabhe bhabhakibha mu ntumbwi gongi bhahikange kwajangatilanga. Na bhena bhakahikanga na bhakahitwelehanga mitumbwi yoha hibhele homba, na mitumbwi jabhenji hikabhandikila kutibhila. 8 Asimoni Apetulo chibhakabhona genago, bhakatindibhala majugwa nnoongi ja Ayesu bhakalobhola, "Hangwana mmoke nnongi jangu, nenga nga mundu bha chaambi!" 9 Kwa kubhehe bhenabho na ajabhe bhakibha bhatekangachanga muno kwa kukoka homba hijingi. 10 Hiyoyo Ayakobo na Ayohana, bhana bha Azebedayo, yakubhehe nga bhakoka homba ajabhe Asimoni na bhenabho bhakakangachanga. Penapo Ayesu bhakaalobholela Asimoni, "Nkotokujogopa kwa kubhehe kujemeka nangocheni mpakubhehe hopo bhakoka homba nambo mpakubhehe amundu bha kwaaletanga bhandu kwa Annoongo." 11 Bahi, baada ja kuhiletanga mitumbwi nngulugulu ja litanda, bhakalekanga kila chilebhe na kwaakagula Ayesu luhaju kwa luhaju.

Ayesu bhatenda kuchihukumula chimbonga chikotoke

22 Lichobha limo Ayesu bhakaalobholelanga bhanapunji bhabhe, "Tujoomboke tujabhule mpaka kuntundu ja lilibha." Ngapena bhakakwelanga mu ntumbwi nkolongwa na kujemeka kujomboka. 23 Pabhakibhanga mu ulendo na ntumbwi, Ayesu bhakahikilwa na lugono, bhakagoloka, Bahi, Chimbonga chikolongwa chikajemeka kujojela, gakaleta mawimbi, na machi gakajemeka kujingila mu ntumbwi, na bhakibha mu hali ja kujogoha kutibhila. 24 Bhenibhala bhanapunji bhabhe bhakajendelela Ayesu, bhakajimuha penapo bhabhi kwalobholela, "Hangwana, Hangwana nnnyimuke! Tutenda kujaula kutibhila!"

Ayesu bhakajimuka, bhakajikalipila jenijela mboongo ngolongwa na mawimbi, na jenijela mboongo ngolongwa jikakotoka, ku lilibha kukabhehe na amani. 25 Ngapena Ayesu bhakakonyanga bhanapunji bhabhe, "Imani jinunji jibhi kooji?"

Nambo bhanapunji bhakakangachanga na kujogopanga kongo bhabhikulobholelana, "Habha nga aganiki, bhajikalipila hata mboongo na mawimbi na gatenda kwajohakikiha?"

Ayesu bhatenda kuchihukumula chimbonga chikotoke

22 Lichobha limo Ayesu bhakaalobholelanga bhanapunji bhabhe, "Tujoomboke tujabhule mpaka kuntundu ja lilibha." Ngapena bhakakwelanga mu ntumbwi nkolongwa na kujemeka kujomboka. 23 Pabhakibhanga mu ulendo na ntumbwi, Ayesu bhakahikilwa na lugono, bhakagoloka, Bahi, Chimbonga chikolongwa chikajemeka kujojela, gakaleta mawimbi, na machi gakajemeka kujingila mu ntumbwi, na bhakibha mu hali ja kujogoha kutibhila. 24 Bhenibhala bhanapunji bhabhe bhakajendelela Ayesu, bhakajimuha penapo bhabhi kwalobholela, "Hangwana, Hangwana nnnyimuke! Tutenda kujaula kutibhila!"

Ayesu bhakajimuka, bhakajikalipila jenijela mboongo ngolongwa na mawimbi, na jenijela mboongo ngolongwa jikakotoka, ku lilibha kukabhehe na amani. 25 Ngapena Ayesu bhakakonyanga bhanapunji bhabhe, "Imani jinunji jibhi kooji?"