Milagres de Jesus
Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.
Curas de cegos e surdos
Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.
ಯೇಸುನೆ ಬೇ ಜ಼ಣ ಕಾಣಾನ ಅಛ್ಛು಼ ಕರ್ಯೊತೆ
ಯೇಸು ಹಿಜ್ಜಾ಼ಥೊ ಜಾ಼ವಾನಿ ವಖ್ಹತ್ಮ, ಬೇ ಜ಼ಣು ಕಾಣು, "ದಾವೀದ್ನ ಛಿಯ್ಯಾ, ಹಮಾರಪರ್ ಗೋರ್ ಕರ್!" ಕರಿ ಜೋ಼ರೇಖ್ಹು ಚಿಕರ್ತು ಹುಯಿನ್, ಇನ ಪೀಠೆ ಗಯ.
ಯೇಸು ಘರ್ನ ಮಹಿ ಜಾ಼ವಾದಿನ್, ಯೋ ಭೇ ಕಾಣು ಇನಾಕನ ಆಯು, ಇನೆ ಇವ್ಣುನ, "ಮೇ ತುಮೂನ ಅಛ್ಛು಼ ಕರೆಜಾ಼ಯ್ ಕರಿ ತುಮೆ ನಂಬೋಸ್ಕಿ ಶು?" ಕರಿ ಪುಛಾ಼ಯೊ. ಇವ್ಣೆ, "ಓಹೋಲಾ, ಪ್ರಭು!" ಕರಿ ಜವಾಬ್ ದಿದು. ತದೆ ಯೇಸುನೆ ಇವ್ಣ ಡೋಳಾ ಛೀಮಿನ್, "ತುಮೆ ವಿಶ್ವಾಸ್ ಕರ್ಯಾತೆ ಇಮ್ಮಸ್, ತುಮೂನ ಹುವಾದೆ!" ಕರಿ ಬೋಲ್ಯೊ. ತದೆ ಇವ್ಣ ಡೋಳಾ ದೆಖಾವಲಗ್ಯ. ಅಜು಼ ಯೇಸುನೆ ಇವ್ಣುನ, "ಆ ಬಾರೇಮ ಕಿನಾಬಿ ನಾ ಬೋಲ್ನು!" ಕರಿ ಇವ್ಣುನ ಝೇತಾಯೊ.
ಕತೋಬಿ ಇವ್ಣೆ ಹಿಜ್ಜಾ಼ಥು ಚ಼ಲ್ಯೂಜೈ಼ನ್, ಯೇಸುನಿ ಬಾರೇನಿ ಖಬರ್ನ ಯೋ ದೇಖ್ಹ್ ಅಖ್ಖು ಫೈಲೈದಿದು.
ಯೇಸುನೆ ಬೇ ಜ಼ಣ ಕಾಣಾನ ಅಛ್ಛು಼ ಕರ್ಯೋತೊ
ಯೇಸು ಅಜು಼ ಇನ ಶಿಷ್ಯರ್ ಯೆರಿಕೋಥು ಚ಼ಲ್ಯಾಜ಼ವ್ಕರ್ತಥಾತೆ ವಖ್ಹತ್ಮ, ಅದ್ಮಿನಿ ಮೋಟಿ ಭೀಡ್ ಇನ ಪೀಠೆ ಗಯು. ತದೆ ಮಾರಗ್ನ ಶೇಡೆ ಬೆಠಾಥಾತೆ ಬೇ ಜ಼ಣ ಕಾಣಾನ ಯೇಸು ಹಜ್ಜಾ಼ಸ್ಕರಿ ವಳ್ಯೊಜಾ಼ಸ್ ಕರಿ ಖ್ಹಮ್ಜಿನ್, "ಪ್ರಭು, ದಾವೀದ್ನ ಛಿಯ್ಯಾ! ಹಮಾರಪರ್ ಗೋರ್ಕರ್" ಕರಿ ಚಿಕ್ರಾಲಗ್ಯಾ.
ಯೋ ಭೀಡ್ಮ ಥೂತೆ ಅದ್ಮಿಖ್ಹಾರು ಇವ್ಣುನ ಗುರ್ಕೈನ್, "ಖ್ಹೊಪೇಥಿರ್ಹವೊ" ಕರಿ ಬೋಲ್ಯು. ತೋಬಿ ಭೇ ಕಾಣಾವ್ನೆ ಬಿಜೂ಼ಬಿ ಜೋ಼ರೇಖ್ಹು ಚಿಕ್ರಿನ್, "ಪ್ರಭು, ದಾವೀದ್ನ ಛಿಯ್ಯಾ! ಹಮಾರಪರ್ ಗೋರ್ ಕರ್" ಕರಿ ಬೋಲ್ಯ.
ತದೆ ಯೇಸುನೆ ಭೀರಿನ್, ಇವ್ಣುನ ಬುಲೈನ್, "ಮೇ ತುಮೂನ ಶಾತ್ ಕರ್ನು?" ಕರಿ ಇವ್ಣುನ ಪುಛಾ಼ಯೊ.
ಇವ್ಣೆ, "ಪ್ರಭು, ಹಮಾರ ಡೋಳಾ ದೆಖಾವಾನಿಘೋಣಿ ಕರ್ಲಾ!" ಕರಿ ಬೋಲ್ಯು.
ತದೆ ಯೇಸುನೆ ಇವ್ಣಾಪರ್ ಗೋರ್ಖೈನ್, ಇವ್ಣ ಡೋಳಾನ ಛೀಮ್ಯೊ. ತದ್ನು ತದ್ದೇಸ್ ಇವ್ಣ ಡೋಳಾ ಐಗಯ, ಅಜು಼ ಇವ್ಣೆ ಇನ ಪೀಠೆ ಗಯ.
ಯೇಸುನೆ ಬೆತ್ಸಾಯಿದಾಮ ಕಾಣಾನ ಡೋಳೊ ದಿದೋತೆ
ಬಾದ್ಮ ಯೇಸುಬಿ ಇನು ಶಿಷ್ಯರ್ ಬೆತ್ಸಾಯಿದ ಗಾಮ್ನ ಆಯು. ಹಿಜ್ಜಾ಼ ಥೋಡು ಅದ್ಮಿ ಏಕ್ ಕಾಣಾನ ಯೇಸುಕನ ಬುಲೈಲಾಯಿನ್, "ಆ ಕಾಣಾನ ಛೀಮ್" ಕರಿ ಇನ ಗಿಂಗೈಲಿದು. ಯೇಸುನೆ ಯೋ ಕಾಣಾನ ಹಾತ್ ಧರೀನ್ ಗಾಮ್ನ ಭಾರ್ ಬುಲೈಲೀಜೈ಼ನ್, ಇನ ಡೋಳಾಪರ್ ಥೂಕಿನ್, ಇನಾಪರ್ ಹಾತ್ ಮ್ಹೇಲೀನ್, "ತುನ ಶಾತ್ತೋಬಿ ದೆಖಾವಸ್ಕಿ ಶು?" ಕರಿ ಇನ ಪುಛಾ಼ಯೊ.
ಇನೆ ಮುಡ್ಕ್ಯು ಪಾಡಿ ದೇಖಿನ್, "ಮನ ಅದ್ಮಿಖ್ಹಾರು ದೆಖಾವಸ್, ಕತೋಬಿ ಇವ್ಣೆ ಝಾ಼ಡಾವ್ನಿಮತ್ ದೆಖಾವಸ್ತೋಬಿ ಹೈಕಡ್ ಹೀಕಡ್ ಫರುಕರಾಸ್" ಕರಿ ಬೋಲ್ಯು.
ತದೆ ಯೇಸುನೆ ಇನ ಡೋಳಾಪರ್ ಫಾಛೊ಼ ಇನೊ ಹಾತ್ ಮ್ಹೇಲ್ಯೊ. ಯೋ ಡೋಳ ಮ್ಹೇಲಿ ದೇಖಾಖ್ಹತರ್ ಇನ ಡೋಳ ಐಗಾಥ, ಅಜು಼ ಇನಅಖ್ಖು ಬರೋಬರ್ಥಿ ದೆಖಾಯು. ಬಾದ್ಮ ಯೇಸುನೆ ಇನ, "ಗಾಮ್ನ ಮಹಿ ನಕೊ ಜಾ಼" ಕರಿ ಬೋಲಿನ್ ಇನ ಘರೆ ಮೋಕ್ಲಿದಿದೊ.
ಯೇಸುನೆ ಭೈರೂಬಿ ತೊತ್ಳ್ಯು ಹುಯಿರ್ಹುಥೂತೆ ಏಕ್ ಅದ್ಮಿನ ಗುಣ್ಕರ್ಯೋತೆ
ಬಾದ್ಮ ಯೇಸು ಯೋ ತೂರ್ನ ಖನ್ನೇನು ತಬರ್ಖಾನ ಮ್ಹೇಲಿನ್ ಸೀದೋನ್ನ ವಾಟೆಕರಿ ದೆಕಪೊಲಿ ತಬರ್ಖಾಮಾಕರಿ ಹುಯಿನ್ ಗಲಿಲಾಯ ದರ್ಯಾವ್ಕನ ಆಯೊ. ತದೆ ಥೋಡು ಅದ್ಮಿನೆ ಭೈರೂಬಿ ತೊತ್ಳ್ಯು ಹುಯಿರ್ಹುಥೂತೆ ಏಕ್ ಜ಼ಣಾನ ಯೇಸುಕನ ಬುಲೈಲಾಯಿನ್, "ಅನ ಉಪ್ಪರ್ ತಾರೊ ಹಾತ್ ಮ್ಹೇಲ್" ಕರಿ ಇನ ಗಿಂಗೈಲಿದು. ತದೆ ಯೇಸುನೆ ಇನ, ಅದ್ಮಿನಿ ಭೀಡ್ಮಾಥು ಏಕ್ ಬಾಜು಼ಮ ಬುಲೈಲಿಜೈ಼ನ್, ಯೇಸುನೆ ಇನಿ ಅಂಗ್ಳಿನ ಯೋ ಅದ್ಮಿನ ಕಾನ್ಮ ಘಾಲಿನ್, ಥೂಕಿನ್, ಇನಿ ಜೀಬ್ನ ಲಗಾಡಿನ್ ಉಪ್ಪರ್ ಆಕಾಶ್ಭಣಿ ದೇಖಿನ್, ಜೋ಼ರೇಥಿ ದಮ್ ಲೀಮ್ಹೇಲಿನ್, ಇನ ‘ಎಪ್ಫಥಾ’ ಕರಿ ಬೋಲ್ಯೊ, ಅಮ್ಕತೊ "ಉಖ್ಡೈ ಜಾ಼!" ಕರಿ.
ಅಮ್ ಬೋಲ್ತಾಸ್ನ ಇನೊ ಕಾನ್ ಖ್ಹಮಜ಼್ ಪಡಾಲಗ್ಯು, ಅಜು಼ ಇನಿ ಜೀಬ್ನಿ ಭಂದಣ್ ಛು಼ಟಿಗಿ, ಯೋ ಬರೋಬರ್ಥಿ ವಾತ್ ಬೋಲಾಲಗ್ಯೊ. ತದೆ ಯೇಸುನೆ ಇವ್ಣುನ, "ಹಾ ಚಾ಼ಲ್ಯುತೆ ಬಾರೇಮ ಕಿನಾಬಿ ನಾ ಬೋಲ್ನು" ಕರಿ ಝೇತೈನ್ ಬೋಲ್ಯೊ; ತೋಬಿ ಇನೆ ಎತ್ರೆ ಝೇತೈನ್ ಬೋಲ್ಯೊತೋಬಿ, ಇನೇಥಿಬಿ ಜಾ಼ಖ್ಹತ್ ಇವ್ಣೆ ಫೈಲೈದಿದು. ಅಜು಼ ಖ್ಹಮ್ಜಾ಼ವಾಳು ಖ್ಹಾರು ಘಣು ಅಶ್ಚರ್ಯ ಹುಯಿಜೈ಼ನ್, "ಯೇಸು ಖ್ಹಾರು ಅಛ್ಛು಼ಸ್ ಕರಾಸ್! ಭೈರು ಖ್ಹಾರಾನ ಕಾನ್ ಖ್ಹಮ್ಜಾ಼ವಾನಿಘೋಣಿ ಅಜು಼ ಮುಕ್ಕಾವ್ನ ಖ್ಹಾರು ವಾತೆ ಬೋಲಾನಿ ಘೋಣಿ ಕರಾಸ್!" ಕರಿ ಬೋಲಿಲಿದು.
ಯೇಸುನೆ ಬಾರ್ತಿಮಾಯ ಕರಿ ಏಕ್ ಕಾಣಾನ ಡೋಳ ದಿದೋತೆ
ಬಾದ್ಮ ಇವ್ಣೆ ಯೆರಿಕೋನ ಆಯು. ತದೆ ಯೇಸು ಇನ ಶಿಷ್ಯರ್ನ ಜೋ಼ಡೆ ಹಿಜ್ಜಾ಼ಥೊ ನಿಕ್ಳಿನ್ ವಳ್ಯೊಜಾ಼ತೋಥೊ, ಅಜು಼ ಇನಜೋ಼ಡೆ ಅದ್ಮಿನಿ ಮೋಟಿ ಝೂ಼ಂಡ್ ಥಿ, ತದೆ ತಿಮಾಯನೊ ಛಿಯ್ಯೊ ಬಾರ್ತಿಮಾಯ ಕರಿ ಏಕ್ ಕಾಣೊ ಧರಮ್ ಮಾಂಗವಾಳೊ ಮಾರಗ್ನ ಶೇಡೆ ಬೆಠೋಥೊ. ಆ ವಾಟೆ ವಳ್ಯೊಜಾ಼ಸ್ತೆ ನಜ಼ರೇತ್ನೊ ಯೇಸು ಕರಿ ಇನೆ ಖ್ಹಮ್ಜಿನ್, "ದಾವೀದ್ನ ಛಿಯ್ಯಾ, ಮಾರಪರ್ ಗೋರ್ಕರ್!" ಕರಿ ಜೋ಼ರೇಖ್ಹು ಚಿಕ್ರಾಲಗ್ಯೊ.
ಕೈಯೆಕ್ಕಿ ಅದ್ಮಿ, "ಖ್ಹೊಪೇಥಿ ರ್ಹೇ!" ಕರಿ ಇನ ಗುರ್ಕಾಯು. ತೋಬಿ ಯೋ, "ದಾವೀದ್ನ ಛಿಯ್ಯಾ, ಮಾರಪರ್ ಗೋರ್ಕರ್!" ಕರಿ ಬಿಜೂ಼ಬಿ ಜಾ಼ಖ್ಹತ್ ಚಿಕ್ರಿಲಿದೊ.
ತದೆ ಯೇಸುನೆ ಭೀರಿನ್, "ಇನ ಬುಲಾವೊ" ಕರಿ ಬೋಲ್ಯೊ.
ಅಮ್ ಬೋಲ್ತಾನ ಇವ್ಣೆ ಯೋ ಕಾಣಾನ ಬುಲೈನ್, "ಭಾಲಿಥಿರ್ಹೇ, ಉಟ್, ಯೇಸು ತುನ ಬುಲಾವ್ಕರಾಸ್" ಕರಿ ಬೋಲ್ಯು.
ತದೆ ಯೋ ಇನ ಝ಼ಗ್ಗಾನ ಕಾಡಿ ಫೇಕಿನ್, ಭಶ್ಡಕ್ ಕರಿ ಉಠೀನ್, ಯೇಸುಕನ ಆಯೊ.
ಯೇಸುನೆ ಇನ, "ಮೇ ತುನ ಶಾತ್ ಕರ್ನು?" ಕರಿ ಪುಛಾ಼ಯೊ.
ತದೆ ಯೋ ಕಾಣಾನ, "ಗುರು, ಮನ ಡೋಳ ದೆಖಾವಾನಿ ಘೋಣಿ ಕರ್ಲಾ" ಕರಿ ಬೋಲ್ಯೊ.
ಯೇಸುನೆ ಇನ, "ಜಾ಼, ತಾರಿ ವಿಶ್ವಾಸ್ಥೀಸ್ ತುನ ಅಛ್ಛು಼ ಹುಯಿಗಯು" ಕರಿ ಬೋಲ್ಯೊ.
ಅಮ್ ಬೋಲ್ತಾಸ್ನ ಇನ ದೆಖಾವಲಗ್ಯು ಅಜು಼ ಯೋ ಮಾರಗ್ವಾಟೆ ಕರಿ ಯೇಸುನ ಪೀಠೆ ಗಯೊ.
ಯೇಸುನೆ ಧರಮ್ ಮಾಂಗವಾಳ ಕಾಣಾನ ಗುಣ್ಕರ್ಯೋತೆ
ಯೇಸು ಯೆರಿಕೋನ ಖನ್ನೆ ಆವ್ಕರಾನಿ ವಖ್ಹತ್ಮ, ಹಿಜ್ಗಾ಼ ಮಾರಗ್ನ ಶೇಡೆ ಬೇಶಿನ್, ಏಕ್ ಕಾಣು ಧರಮ್ ಮಾಂಗುಕರ್ತುಥು. ಅದ್ಮಿನಿ ಭೀಡ್ ವಳಿಜಾ಼ತಿಥೀತೆ ಖ್ಹಮ್ಜಿನ್, ಇನೆ, "ಆ ಶಾತ್ ಚಾ಼ಲುಕರಾಸ್ತೆ?" ಕರಿ ಪುಛಾ಼ಯೊ.
ಇವ್ಣೆ ಇನ, "ನಜ಼ರೇತ್ನೊ ಯೇಸು, ಆ ವಾಟೆ ಕರಿ ವಳೇಜಾ಼ಸ್" ಕರಿ ಬೋಲ್ಯು.
ತದೆ ಯೋ ಕಾಣು ಜೋ಼ರೆಥಿ ಚಿಕ್ರಿನ್, "ಯೇಸು! ದಾವೀದ್ನ ಛಿಯ್ಯಾ! ಮಾರಪರ್ ಗೋರ್ಕರ್" ಕರಿ ಬೋಲ್ಯೊ.
ಖ್ಹಾಮ್ಣೆ ವಳ್ಯುಜಾ಼ತುಥೂತೆ ಅದ್ಮಿ ಇನ, "ಖ್ಹೊಪ್ ರ್ಹೆ" ಕರಿ ಬೋಲಿನ್ ಗುರ್ಕಾಯು. ಕತೋಬಿ ಯೋ ಬಿಜೂ಼ಬಿ ಜೋ಼ರೇಥಿ ಚಿಕ್ರಿನ್, "ದಾವೀದ್ನ ಛಿಯ್ಯಾ! ಮಾರಪರ್ ಗೋರ್ ಕರ್" ಕರಿ ಬೋಲ್ಯೊ.
ತದೆ ಯೇಸುನೆ ಭೀರಿನ್, ಯೋ ಕಾಣಾನ ಇನಾಕನ ಬುಲಾವೊ ಕರಿ ಹುಕುಮ್ ದಿದೊ. ಯೋ ಕಾಣು ಖನ್ನೆ ಆವಾದಿನ್, ಯೇಸುನೆ ಇನ, "ಮೇ ತುನ ಶಾತ್ ಕರ್ನು ಕರಿ ತಾರಿ ಆಖ್ಹ್?" ಕರಿ ಪುಛಾ಼ಯೊ.
ತದೆ ಇನೆ, "ಮನ ಪಾಛು಼ ದೆಖಾವಾನಿ ಘೋಣಿ ಕರ್ಲಾ ಪ್ರಭು" ಕರಿ ಬೋಲ್ಯೊ.
ಯೇಸುನೆ ಇನ, "ತುನ ದೆಖಾವಾದೆ, ತಾರಿ ವಿಶ್ವಾಸ್ಥೀಸ್ ತುನ ಅಛ್ಛು಼ಹುಯು" ಕರಿ ಬೋಲ್ಯೊ.
ತದ್ನು-ತದ್ದೇಸ್ ಇನ ದೆಖಾಯು. ಯೋ ದೇವ್ನಿ ಸ್ತುತಿ ಕರ್ತೊಹುಯಿನ್, ಯೇಸುನ ಪೀಠೆ ಗಯೊ. ಅದ್ಮಿಖ್ಹಾರು ಚಾ಼ಲ್ಯುತೆ ಇನ ದೇಖಿನ್, ದೇವ್ನಿ ಸ್ತುತಿಕರ್ಯು.
ಯೇಸುನೆ ಪೈದಾಖ್ಹ್ಥು ಕಾಣು ಥೂತೆ ಅದ್ಮಿನ ಅಛ್ಛು಼ ಕರ್ಯೊತೆ
ಯೇಸು ಚಾ಼ಲ್ತೊ ಜಾ಼ವಾನಿ ವಖ್ಹತ್ಮ, ಪೈದಾಖ್ಹ್ಥೂಸ್ ಕಾಣು ಥೂತೆ ಏಕ್ ಅದ್ಮಿನ ದೇಖ್ಯೊ. ಯೇಸುನ ಶಿಷ್ಯರ್ನೆ ಇನ, "ಗುರು, ಆ ಅದ್ಮಿ ಕಾಣುಹುಯಿನ್, ಪೈದಾ ಹುಯೂತೆ ಕಿನ ಪಾಪ್ಥಿ? ಅನು ಪಾಪ್ಥೀಕಿ? ಅನ ಆಯ-ಬಾನ ಪಾಪ್ಥಿ?" ಕರಿ ಪುಛಾ಼ಯ.
ಯೇಸುನೆ, "ಅನೇಬಿ ಪಾಪ್ ಕೋ ಕರ್ಯೋನಿ, ಅನ ಆಯಾ-ಬಾನ ಪಾಪ್ನಟೇಕೆ ಕಾಹೆ. ದೇವ್ನು ಕಾಮ್ ಅನಾಮ ಹುವಾನಟೇಕೆಸ್ ಅನ ಅಮ್ ಹುಯೂತೆ. ಮನ ಮೋಕ್ಲ್ಯೊತೆ ಇನು ಕಾಮ್ನ ಅಪ್ಣೆ ದನ್ನಿ ವಖ್ಹತ್ಮಾಸ್ ಕರ್ನು, ರಾತ್ ಆವ್ಶೆ ತದೆ ಕಿನೇಥೀಬಿ ಕಾಮ್ ಕರಾನ ಕೋ ಉಶೇನಿ. ಮೇ ಆ ಜಗತ್ಮ ರ್ಹವಾನಿ ವಖ್ಹತ್ಮ, ಮೇಸ್ ಆ ಜಗತ್ನ ಉಜಾ಼ಳು ಹುಯಿರ್ಹೋಸ್" ಕರಿ ಬೋಲ್ಯೊ.
ಅನ ಬೋಲಾನ ಬಾದ್ಮ, ಯೇಸುನೆ ಜ಼ಮೀನ್ಪರ್ ಥೂಕಿನ್, ಇನೇಥಿ ಚಿಕ್ಕಡ್ ಬಣೈನ್, ಯೋ ಅದ್ಮಿನ ಡೋಳಾನ ಲಗಾಡ್ಯೊ. ಅಜು಼ ಯೋ ಅದ್ಮಿನ ಬೋಲ್ಯೋಕಿ, "ಜೈ಼ನ್, ಸಿಲೋವ ಕೋಳಮ್ಮ ಧೊಯಿಲೆ" ಸಿಲೋವ ಕತೊ, ‘ಮೋಕ್ಲ್ಯೊಹುಯೊ’ ಕರಿ ಮತ್ಲಬ್. ಇಮ್ಮಸ್ ಯೋ ಅದ್ಮಿನೆ ಜೈ಼ನ್, ಧೊಯಿಲಿನ್ ಪಾಛೊ಼ಫರಾನಿ ವಖ್ಹತ್, ಅಜು಼ ಇನ ಡೋಳಾ ದೆಖಾವಲಗ್ಯ.
Curas de paralíticos e enfermos
Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.
ತದೆ ಖೋಡ್ ಲಗ್ಯೋಹುಯೊ ಏಕ್ ಜ಼ಣೊ ಯೇಸುಕನ ಐನ್, ಇನ ಖ್ಹಾಮ್ಣೆ ಢುಕ್ಣ್ಯ ಟೇಕಿನ್, "ಪ್ರಭು, ತೂ ಮನ್ ಕರ್ಯೋತೊ, ಮನ ಶುದ್ದಿ ಕರೆಜಾ಼ಯ್" ಕರಿ ಬೋಲ್ಯೊ.
ಯೇಸುನೆ ಹಾತ್ ಖ್ಹಾಮ್ಣೆ ಕರೀನ್, ಇನ ಛೀಮಿನ್, "ಮನ ಮನ್ ಛಾ಼, ಶುದ್ದಿ ಹೂ" ಕರಿ ಬೋಲ್ಯೊ. ತದ್ನು-ತದ್ದೇಸ್ ಯೋ ಅದ್ಮಿನ ಖೋಡ್ ಅಛ್ಛು಼ ಹುಯಿಗಯು. ತದೆ ಯೇಸುನೆ ಇನ, "ಖ್ಹಮಜ಼್! ಕಿನಾಬಿ ನಕೊ ಬೋಲೀಶ್; ಕತೋಬಿ ಯಾಜಕಕನ ಜೈ಼ನ್ ತಾರು ಆಂಗ್ತನ್ ವತಾಳಿನ್ ಮೋಶೇನೆ ನೇಮ್ಶಾಯೋತೆ ಕಾಣ್ಕೆನ ದೇ; ಅನೇಥಿ ಅದ್ಮಿಖ್ಹಾರಾಮ ತುನ ಅಛ್ಛು಼ ಹುಯಿಗಯು ಕರಿ ಸಬೂತ್ ರ್ಹಿಶೆ" ಕರಿ ಬೋಲ್ಯೊ.
ಹಿಜ್ಜಾ಼ ಥೋಡ ಜ಼ಣಾನೆ ಬಿಛಾ಼ವ್ಣಿಪರ್ ಪಡ್ಯುಥೂತೆ ಏಕ್ಜ಼ಣೊ ಲಕ್ವೊ ಮಾರ್ಯುಹುಯಾನ, ಯೇಸುಕನ ಪಳ್ಳಿನ್ ಆಯು. ಇನೆ ಇವ್ಣಿ ವಿಶ್ವಾಸ್ನ ದೇಖಿನ್, ಯೋ ಲಕ್ವೊ ಮಾರ್ಯಹುಯಾನ, "ಮಾರ ಛಿಯ್ಯಾ, ಹಿಮ್ಮತ್ ರಾಕ್! ತಾರು ಪಾಪ್ಖ್ಹಾರು ಮಾಪ್ ಹುಯಿಗಯು" ಕರಿ ಬೋಲ್ಯೊ.
ಹಿಜ್ಜಾ಼ ಥೂತೆ ಮೋಶೇನು ವಚನ್ ಶಿಕಾಡವಾಳು ಶಾಸ್ತ್ರೀಮ ಥೋಡಜ಼ಣಾನೆ, "ಆ ಅದ್ಮಿ ದೇವ್ನಿ ವಿರೋದ್ ಬೋಲಾಸ್ನಿ!" ಕರಿ ಇವ್ಣ-ಇವ್ಣ ಮಹಿ ಬೋಲಿಲಿದು.
ಇವ್ಣೆ ಇಮ್ ಸೋಚುಕರಾತೆ ಯೇಸುನೆ ಮಾಲುಮ್ ಕರೀಲಿನ್, ಇವ್ಣುನ, "ಶನ ತುಮೆ ತುಮಾರ ಮನ್ಮ ಅಮ್ ಖರಾಬ್ ಸೋಚೋ಼ಸ್ತೆ? ಕೆಹು ಶುಲ್ಬ? ‘ತಾರು ಪಾಪ್ಖ್ಹಾರು ಮಾಪ್ ಹುಯಿಗಯು’ ಕರಿ ಬೋಲಾನುಕಿ, ‘ಉಠೀನ್, ಚಾ಼ಲ್’ ಕರಿ ಬೋಲಾನು? ಕತೋಬಿ ಅದ್ಮಿನೊ ಛಿಯ್ಯಾನ ಪಾಪ್ಖ್ಹಾರು ಮಾಪ್ ಕರಾನ ಧರ್ತಿಪರ್ ಹಕ್ ಛಾ಼ ಕರಿ ಮೇ ತುಮೂನ ವತಾಳುಸ್" ಕರಿ ಬೋಲಿನ್,ಯೋ ಲಕ್ವೊ ಮಾರಿರಾಖವಾಳನ, "ಉಪ್ಪರ್ ಉಟ್, ತಾರಿ ಬಿಛಾ಼ವ್ಣಿನ ಪಳ್ಳಿನ್, ಘರೆ ಜಾ಼!" ಕರಿ ಬೋಲ್ಯೊ.
ತದೆ ಯೋ ಅದ್ಮಿ ಉಪ್ಪರ್ ಉಠೀನ್, ಘರೆ ಗಯೊ.
ಹಿಜ್ಜಾ಼ ಹಾತ್ ಝೂ಼ಟೊ ಪಡಿಹುಯು ಏಕ್ ಅದ್ಮಿಥು. ತದೆ ಥೋಡು ಜ಼ಣು ಯೇಸುಪರ್ ಗಲ್ತಿ ಲಗಾಡ್ಣು ಕರಿ, ಇವ್ಣೆ ಇನ, "ಸಬ್ಬತ್ ದನ್ಮ ಅಛ್ಛು಼ ಕರಾನು ಅಪ್ಣ ಧರ್ಮಶಾಸ್ತ್ರಮ ಬರೋಬರ್ಕಿ ಶು?" ಕರಿ ಪುಛಾ಼ಯು.
ಯೇಸುನೆ, "ತುಮಾರಮ ಕಿನಾಕನಾತೋಬಿ ಎಕ್ಕಸ್ ಮೇಂಢು ರ್ಹೀನ್, ಸಬ್ಬತ್ ದನ್ಮ ಯೋ ಮೇಂಢು ಖಾಡ್ಮ ಪಡಿಗಯೂತೊ ಯೋ ಇನ ಧರೀನ್, ಉಪ್ಪರ್ ಪಾಡ್ಶೆಕೊಯ್ನಿಕಿ ಶು? ಮೇಂಢಥೀಬಿ ಅದ್ಮಿ ಕೈಯೆಕ್ಕಿ ಮಹಾನ್ ಹುಯಿರ್ಹುಸ್! ಇನಖ್ಹಾಜೇಸ್ ಸಬ್ಬತ್ ದನ್ಮ ಅಛ್ಛು಼ಕಾಮ್ ಕರಾನು ಅಪ್ಣಿ ಧರ್ಮಶಾಸ್ತ್ರಮ ಬರೋಬರಸ್ ಹುಯಿರ್ಹುಸ್" ಕರಿ ಜವಾಬ್ ದಿದೊ. ಅನಕೇಡೆಥು ಯೇಸುನೆ ಯೋ ಹಾತ್ ಝೂ಼ಟೊ ಪಡಿಹುಯು ಅದ್ಮಿನ, "ತಾರೊ ಹಾತ್ ಖ್ಹಾಮ್ಣೆ ಕರ್" ಕರಿ ಬೋಲ್ಯೊ; ಇನೆ ಖ್ಹಾಮ್ಣೆ ಕರ್ಯೊ.
ತದೆ ಇನೊ ಹಾತ್ ಅಛ್ಛು಼ ಹುಯಿನ್, ಬಿಜ್ಜೇಕ್ ಹಾತ್ನಿ ಘೋಣಿ ಹುಯಿಗಯು.
ಹಿಜ್ಜಾ಼ ಸೀಮೋನನಿ ಖ್ಹಾಖ್ಹು ತಾವ್ ಐನ್ ಖ್ಹುತೀಥಿ, ಒಗ್ಗಿಸ್ಮ ಇವ್ಣೆ ಇನಿ ಬಾರೇಮ ಯೇಸುನ ಬೋಲ್ಯು. ಯೇಸು ಸೀಮೋನನಿ ಖ್ಹಾಖ್ಹುನ ಖನ್ನೆ ಜೈ಼ನ್, ಇನೊ ಹಾತ್ ಧರೀನ್ ಉಠಾಡ್ತಾಖ್ಹತರ್, ಇನೊ ತಾವ್ ಉತ್ರಿಗಯೊ. ತದೆ ಯೋ ಉಠೀನ್ ಇವ್ಣಿ ಸೇವಾ-ಚಾ಼ಕ್ರಿ ಕರಿ.
ಯೇಸುನೆ ಏಕ್ ಅದ್ಮಿನ ಅಛ್ಛು಼ ಕರ್ಯೊತೆ
ಖೋಡ್ ಲಾಗಿಹುಯು ಏಕ್ ಜ಼ಣೊ ಯೇಸುಕನ ಐನ್, ಇನ ಖ್ಹಾಮ್ಣೆ ಢುಕ್ಣ್ಯ ಟೇಕಿನ್, "ಮನ ಅಛ್ಛು಼ ಕರಾನ ತಾರೇಥಿ ಹುವಾಸ್, ತುನ ಮನ್ ಉಶೇತೊ ಮನ ಶುದ್ದಿ ಕರೆಜಾ಼ಯ್" ಕರಿ ಗಿಂಗೈಲಿದೊ.
ತದೆ ಯೇಸುನೆ ಇನಾಪರ್ ಘಣು ಗೋರ್ಖೈನ್, ಇನ ಹಾತೇಖ್ಹು ಛೀಮಿನ್, "ಮನ ಮನ್ ಛಾ಼; ಶುದ್ದಿ ಹೂ" ಕರಿ ಬೋಲ್ಯೊ. ಅಮ್ ಬೋಲ್ತಾಸ್ನ ಇನು ಖೋಡ್ಖ್ಹಾರು ನಿಕ್ಳಿಜೈ಼ನ್, ಯೋ ಪಾಕ್ ಹುಯಿಗೊ.
ತದೆ ಚಾರ್ ಅದ್ಮಿನೆ, ಏಕ್ಜ಼ಣೊ ಲಕ್ವೊ ಮಾರ್ಯುಹುಯಾನ ಹಿಜ್ಜಾ಼ ಪಳ್ಳಿನ್ ಆಯು. ಹಿಜ್ಜಾ಼ ಅದ್ಮಿನಿ ಭೀಡ್ ಭರೈರ್ಹಿಥೀತೆ ಇನಾಖ್ಹಾಜೆ, ಮಹಿ ಯೇಸುಕನ ಇನಲೀನ್ ಆವಾನ ಕೋ ಹುಯೂನಿ. ಇನಾಖ್ಹಾಜೆ ಇವ್ಣೆ ಯೋ ಘರ್ನ ಛ಼ತ್ಪರ್ ಚ಼ಢೀನ್, ಯೇಸುನಿ ನೇರ್ ಉಪ್ಪರ್ ಛ಼ತ್ನ ಥೋಡು ಕಾಡಿನಾಖಿದೀನ್, ಮೋಟಿ ಖೀಂಡ್ ಬಣೈನ್ ಇನಾಮಾಕರಿ ಯೋ ಲಕ್ವೊ ಮಾರಿರಾಖವಾಳನ ಖ್ಹುಡೈರಾಖ್ಯುಥೂತೆ ಬಿಛಾ಼ವ್ಣಿ ಖ್ಹಮೇದ್ ಇಮ್ಮಸ್ ಹೇಟ್ ಉತಾರ್ಯು. ಯೇಸುನೆ, ಇವ್ಣೆ ಎತ್ರೇ ಇನಾಪರ್ ವಿಶ್ವಾಸ್ ಕರ್ಯುತೆ ದೇಖಿನ್, ಯೋ ಲಕ್ವೊ ಮಾರಿರಾಖವಾಳನ, "ಛಿಯ್ಯಾ, ತಾರು ಪಾಪ್ಖ್ಹಾರು ಮಾಪ್ ಹುಯಿಗಯು" ಕರಿ ಬೋಲ್ಯೊ.
ಹಿಜ್ಜಾ಼ ಮೋಶೇನು ವಚನ್ ಶಿಕಾಡವಾಳು ಶಾಸ್ತ್ರೀಮ ಥೋಡು ಜ಼ಣು ಬೆಠೂಥು. ಇವ್ಣೆ, "ಆ ಅಮ್ ಶನ ಬೋಲಾಸ್ತೆ? ಆ ದೇವ್ನ ಚಿಂಘಾವ್ಣಿ ಕರಾನಿ ವಾತೆ, ದೇವ್ನ ಮ್ಹೇಲಿನ್ ಬಿಜು಼ ಕಿನೇಥಿ ಪಾಪ್ಖ್ಹಾರು ಮಾಪ್ ಕರಾನ ಹುವಾನು? ಕರಿ ಇವ್ಣ-ಇವ್ಣ ದಿಲ್ಮ ಸೋಚಾಲಗ್ಯು.
ಯೇಸುನೆ ತದ್ನು-ತದೇಸ್ ಇವ್ಣೆ ಮನ್ಮ ಇಮ್ ಸೋಚುಕರಾತೆ ಮಾಲುಮ್ ಕರಿಲೀನ್, "ತುಮೆ ತುಮಾರ ದಿಲ್ಮ ಶನ ಅಮ್ ಸೋಚುಕರಾಸ್ತೆ? ಕೆಹು ಶುಲ್ಬ? ಆ ಲಕ್ವೊ ಮಾರಿರಾಖವಾಳನ, ‘ತಾರು ಪಾಪ್ಖ್ಹಾರು ಮಾಪ್ ಹುಯಿಗಯು’ ಕರಿ ಬೋಲಾನುಕಿ, ನಾತೊ ‘ಉಠೀನ್ ತಾರಿ ಬಿಛಾ಼ವ್ಣಿ ಪಳ್ಳಿನ್ ಚಾ಼ಲ್’ ಕರಿ ಬೋಲಾನು? ಕತೋಬಿ ಮೇ ತುಮೂನ ಅದ್ಮಿನೊ ಛಿಯ್ಯಾನ ಜ಼ಮೀನ್ಪರ್ ಪಾಪ್ಖ್ಹಾರು ಮಾಪ್ಕರಾನ ಹಕ್ ಛಾ಼, ಕರಿ ವತಾಳುಸ್" ಅಮ್ ಬೋಲಿನ್ ಯೋ ಲಕ್ವೊ ಮಾರಿರಾಖವಾಳ ಭಣಿ ದೇಖಿನ್, "ಉಟ್, ತಾರಿ ಬಿಛಾ಼ವ್ಣಿ ಪಳ್ಳಿನ್, ಘರೆ ಜಾ಼! ಕರಿ ಮೇ ತುನ ಬೋಲುಸ್" ಕರಿ ಬೋಲ್ಯೊ.
ಅಮ್ ಬೋಲ್ತಾಸ್ನ ಇನೆ ಉಠೀನ್, ಇನಿ ಬಿಛಾ಼ವ್ಣಿನ ಪಳ್ಳಿನ್, ಅಖ್ಖಾನ ದೇಕ್ತಾಡೋಳೆ ಭಾದರ್ ಚ಼ಲೆಗಯೊ. ಅನ ದೇಖಿನ್ ಖ್ಹಾರುಜ಼ಣು ಘಣು ಅಶ್ಚರ್ಯಹುಯಿನ್, "ಹಮೆ ಹಂಕೆತೋಡಿ ಕದೇಬಿ ಅಮ್ನು ದೇಖೀಸ್ರಾಖ್ಯಕೊಯ್ನಿ" ಕರಿ ದೇವ್ನ ಸ್ತುತಿ ಕರ್ತುಹುಯಿನ್ ಬೋಲ್ಯು.
ಯೇಸುನೆ ಹಾತ್ ಝೂ಼ಟೊ ಪಡ್ಯೋಹುಯೊ ಏಕ್ ಅದ್ಮಿನ ಅಛ್ಛು಼ ಕರ್ಯೊತೆ
ಬಿಜೇಕ್ ದನ್ನೆ ಯೇಸು ಸಬೆ ಭರಾವನು ಮಂದಿರ್ಮ ಗಯೊ. ಹಿಜ್ಜಾ಼ ಹಾತ್ ಝೂ಼ಟೊ ಪಡಿಹುಯು ಏಕ್ ಅದ್ಮಿಥು. ಹಿಜ್ಜಾ಼ ಥೋಡು ಅದ್ಮಿ ಯೇಸುಪರ್ ಗಲ್ತಿ ಲಗಾಡನಖ್ಹಾಜೆ, ಸಬ್ಬತ್ ದನ್ಮ ಯೋ ಹಾತ್ ಝೂ಼ಟೊ ಪಡಿಹುಯು ಅದ್ಮಿನ ಅಛ್ಛು಼ ಕರಾಸ್ಕಿ ಶುಕಿ, ಕರಿ ಜ಼ಪೀನ್ ದೇಖುಕರ್ತುಥು. ಯೇಸುನೆ ಯೋ ಹಾತ್ ಝೂ಼ಟೊ ಪಡ್ಯೊಹುಯೊ ಅದ್ಮಿನ, "ಉಠೀನ್ ಖ್ಹಾರಾನ ಇಚ಼್ಮ ಐನ್ ಭೀರೆ" ಕರಿ ಬೋಲ್ಯೊ. ತದೆ ಯೇಸುನೆ ಇವ್ಣುನ, "ಸಬ್ಬತ್ ದನ್ಮ ಧರ್ಮಶಾಸ್ತ್ರನಿ ನಿಯಮ್ನು ಕಾಮ್ಕರಾನು ಖೆವು? ಅಛ಼್ಛುಕರಾನುಕಿ ಖರಾಬ್ಕರಾನು? ಜಾನ್ ಬಚಾ಼ಡಾನುಕಿ, ಕಾಡಾನು?" ಕರಿ ಬೋಲಾಖ್ಹತರ್ ಇವ್ಣೆ ಖ್ಹೊಪ್ ಥು.
ತದೆ ಯೇಸು ಖೀಜ಼್ಥಿ ಚಾರ್ಹೆ ಬಾಜು಼ ದೇಖಿನ್, ಇವ್ಣೊ ದಿಲ್ ಬಂಡಾನಿ ಘೋಣಿ ಹುಯಿರ್ಹೋತೆ ಇನಾಖ್ಹಾಜೆ ಇನ ಘಣು ದುಖ್ ಹುಯು. ತದೆ ಯೋ ಹಾತ್ ಝೂ಼ಟೊ ಪಡ್ಯೊಹುಯೊ ಅದ್ಮಿನ, "ತಾರೊ ಹಾತ್ ಖ್ಹಾಮ್ಣೆ ಕರ್" ಕರಿ ಬೋಲ್ಯೊ. ಯೋ ಖ್ಹಾಮ್ಣೆ ಹಾತ್ ಕಾಡ್ತಾ, ಇನೊ ಹಾತ್ ಅಛ್ಛೊ಼ ಹುಯಿಗಯೊ.
ಯೇಸುನೆ ಏಕ್ ಅದ್ಮಿನ ಅಛ್ಛು಼ ಕರ್ಯೊತೆ
ಏಕ್ ದನ್ನೆ ಯೇಸು ಏಕ್ ಗಾಮ್ಮ ಥೊ. ಹಿಜ್ಜಾ಼ಸ್ ಆಂಗ್ತನ್ ಅಖ್ಖುಸ್ ಖೋಡ್ ಲಾಗಿಹುಯು ಏಕ್ ಅದ್ಮಿ ಥೂ. ಯೋ ಯೇಸುನ ದೇಖಿನ್, ಇನಖ್ಹಾಮ್ಣೆ ಆಡು ಪಡೀನ್, "ಪ್ರಭು, ತೂ ಮನ್ ಕರ್ಯೋತೊ ಮನ ಶುದ್ದಿ ಕರೆಜಾ಼ಯ್! ಕರಿ ಗಿಂಗೈಲಿದೊ.
ಯೇಸುನೆ ಇನೊ ಹಾತ್ನ ಭಡೈನ್, ಇನ ಛೀಮಿನ್, "ಮನ ಮನ್ ಛಾ಼, ಶುದ್ದಿ ಹೂ" ಕರಿ ಬೋಲ್ಯೊ. ತದ್ನು ತದ್ದೇಸ್ ಯೋ ಅದ್ಮಿನೊ ಖೋಡ್ ಖ್ಹಾರು ನಿಕ್ಳಿಗಯು.
ತದೆ ಥೋಡ ಪರ್ಖ್ಹಾವ್ನೆ ಏಕ್ಜ಼ಣೊ ಲಕ್ವೊ ಮಾರ್ಯುಹುಯಾನ ಬಿಛಾ಼ವ್ಣಿಪರ್ ಪಾಡಿಲಿನ್ ಆಯು. ಕತೋಬಿ ಇನಮಹಿ ಲೀಜೈ಼ನ್, ಯೇಸುನ ಖ್ಹಾಮ್ಣೆ ಮ್ಹೇಲ್ನುಕರಿ ಕರ್ಯುತೋಬಿ, ಅದ್ಮಿನಿ ಭೀಡ್ ಥೀತೆ ಇನಾಖ್ಹಾಜೆ, ಇನಮಹಿ ಲೀಜಾ಼ವಾನ ವಾಟ್ಕೊಂತೆ ದೇಖಿನ್, ಇನ ಪಾಡಿಲಿನ್ ಛ಼ತ್ನ ಉಪ್ಪರ್ ಜೈ಼ನ್, ಛ಼ತ್ನ ಕಾಡಿನ್, ಇನ ಬಿಛಾ಼ವ್ಣಿ ಖ್ಹಮೇದ್ ಯೇಸುನ ಖ್ಹಾಮ್ಣೆ ಉತಾರ್ಯು. ಯೇಸುನೆ ಇವ್ಣಿ ವಿಶ್ವಾಸ್ನ ದೇಖಿನ್, ಯೋ ಲಕ್ವೊ ಮಾರಿರಾಖವಾಳನ, "ದೇಕ್ಲಾ ದೋಸ್, ತಾರು ಪಾಪ್ಖ್ಹಾರು ಮಾಪ್ ಹುಯಿಗಯು" ಕರಿ ಬೋಲ್ಯೊ.
ತದೆ ಮೋಶೇನು ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್ ಖ್ಹಾರು ಇವ್ಣ-ಇವ್ಣಾಮಸ್, "ಆ ಅದ್ಮಿ ಕೋಣ್ ಉಶೆ, ದೇವ್ನ ವಿರೋದ್ ವಾತೆ ಬೋಲಾಸ್ತೆ? ದೇವ್ನ ಮ್ಹೇಲಿನ್ ಬಿಜು಼ ಕಿನೇಥಿ ಪಾಪ್ಖ್ಹಾರು ಮಾಪ್ ಕರಾನ ಹುವಾನು? ಕರಿ ಸೋಚಾಲಗ್ಯು.
ಕತೋಬಿ ಯೇಸುನೆ ಇವ್ಣೆ ಇಮ್ ಸೋಚುಕರಾತೆ ಮಾಲುಮ್ ಕರೀಲಿನ್ ಇವ್ಣುನ, "ತುಮೆ ತುಮಾರ ಮನ್ಮ ಅಮ್ ಶನ ಸೋಚೋ಼ಸ್ತೆ? ಕೆಹು ಶುಲ್ಬ? ತಾರು ಪಾಪ್ಖ್ಹಾರು ಮಾಪ್ ಹುಯಿಗು ಕರಿ ಬೋಲಾನುಕಿ? ಉಠಿ ಚಾ಼ಲ್ ಕರಿ ಬೋಲಾನು? ಕತೋಬಿ ಜ಼ಮೀನ್ಪರ್ ಪಾಪ್ಖ್ಹಾರು ಮಾಪ್ ಕರಾನ ಅದ್ಮಿನೊ ಛಿಯ್ಯಾನ ಅದಿಕಾರ್ ಛಾ಼ ಕರಿ ಬೋಲಾನು ತುಮೂನ ಮಾಲುಮ್ ಪಡ್ಣು, ಕರಿ ಬೋಲಿನ್ ಯೋ ಲಕ್ವೊ ಮಾರಿರಾಖವಾಳ ಭಣಿ ದೇಖಿನ್, ‘ಉಟ್ ತಾರಿ ಬಿಛಾ಼ವ್ಣಿನ ಪಳ್ಳಿನ್ ಘರೆ ಜಾ಼ ಕರಿ ತುನ ಬೋಲುಸ್" ಕರಿ ಬೋಲ್ಯೊ.
ಇಮ್ ಬೋಲ್ತಾಸ್ನ ಯೋ ಇವ್ಣ ಖ್ಹಾಮ್ಣೆಸ್ ಉಠೀನ್, ಯೋ ಖ್ಹುತೊಥೋತೆ ಬಿಛಾ಼ವ್ಣಿನ ಪಳ್ಳಿನ್, ದೇವ್ನ ಖ್ಹರಾವ್ತೊ ಹುಯಿನ್, ಘರೆ ಗಯೊ.
ಯೇಸುನೆ ಹಾತ್ ಝೂ಼ಟೊ ಪಡ್ಯುಹುಯು ಏಕ್ ಅದ್ಮಿನ ಅಛ್ಛು಼ ಕರ್ಯೊತೆ
ಬಿಜೇಕ್ ಸಬ್ಬತ್ ದನ್ನೆ ಯೇಸು ಸಬೆ ಭರಾವಾನು ಮಂದಿರ್ಮ ಜೈ಼ನ್, ವಚನ್ ಬೋಲಿ ದೆವ್ಕರ್ತೋಥೊ. ಖಾವೊ ಹಾತ್ ಝೂ಼ಟೊ ಪಡೆಹುಯೊ ಏಕ್ ಜ಼ಣೊ ಹಿಜ್ಜಾ಼ ಥೊ. ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್ವಾಳು ಯೇಸುಪರ್ ಗಲ್ತಿ ಲಗಾಡನಖ್ಹಾಜೆ ಶಾತ್ತೋಬಿ ಮಳಾದೆ ಕರಿ, ಯೇಸು ಸಬ್ಬತ್ ದನ್ಮ ಅಛ್ಛು಼ ಕರಾಸ್ಕಿ ಶುಕಿ ಕರಿ ಜ಼ಪೀನ್ ದೇಖುಕರ್ತುಥು. ಕತೋಬಿ ಯೇಸುನೆ ಇವ್ಣಿ ಸೋಚ್ನ ಮಾಲುಮ್ ಕರಿಲೀನ್, ಹಾತ್ ಝೂ಼ಟೊ ಪಡ್ಯೊಹುಯೊ ಯೋ ಅದ್ಮಿನ, "ಉಠೀನ್, ಇಚ಼್ಮ ಐನ್ ಭೀರೆ" ಕರಿ ಬೋಲ್ಯೊ. ಯೋ ಅದ್ಮಿ ಉಠೀನ್ ಹಿಜ್ಜಾ಼ ಭೀರಿಗಯು. ತದೆ ಯೇಸುನೆ ಇವ್ಣುನ, "ತುಮುನ ಏಕ್ ವಾತ್ ಪುಛಾ಼ವ್ಸ್: ಸಬ್ಬತ್ ದನ್ಮ ಖೆವು ಕರ್ನುಕರಿ ಅಪ್ಣಿ ಖಾನುಲ್ಮ ಛಾ಼? ಅಛ್ಛು಼ಕರಾನುಕಿ ಖರಾಬ್ಕರಾನು? ಜಾನ್ ಬಚಾ಼ಡಾನುಕಿ, ಜಾನ್ ಕಾಡಾನು? ಅಜು಼ ಯೇಸುನೆ ಅಶ್ಪಿಶ್ ಥೂತೆ ಖ್ಹಾರಾವ್ನ ದೇಖಿನ್ ಯೋ ಅದ್ಮಿನ, "ತಾರೊ ಹಾತ್ ಖ್ಹಾಮ್ಣೆ ಕರ್" ಕರಿ ಬೋಲ್ಯೊ. ಇನೆ ಇಮ್ಮಸ್ ಕರ್ಯೊ, ತದೆ ಇನೊ ಹಾತ್ ಅಛ್ಛು಼ಹುಯಿಗಯು.
ಯೇಸುನೆ ಖ್ಹೋ ಶಿಪಾಯಿನೊ ಮೋಟಾನೊ ಏಕ್ ಆಳ್ನ ಅಛ್ಛು಼ ಕರ್ಯೊತೆ
ಯೇಸುನೆ ಅದ್ಮಿನ ಆ ಖ್ಹಾರಿ ವಾತೆನ ಬೋಲಿನ್ ಖ್ಹಮ್ಜಾ಼ಡನ ಬಾದ್ಮ, ಯೇಸು ಕಪೆರ್ನೌಮ್ನ ಗಯೊ. ಹಿಜ್ಜಾ಼ ಖ್ಹೋಶಿಪಾಯಿನೊ ಮೋಟಾನೊ, ಪ್ಯಾರ್ನೊ ಆಳ್ ಏಕ್ ಜ಼ಣೊ, ರೋಗ್ ಆಯಿನ್ ಮರಾನಿ ಹಾಲ್ಮ ಥೊ. ಯೋ ಖ್ಹೊ ಶಿಪಾಯಿನೊ ಮೋಟಾನೆ, ಯೇಸುನಿ ಬಾರೇಮ ಖ್ಹಮ್ಜಿನ್, ಯೆಹೂದ್ಯರ್ನ ಶಾಣವ್ಮ ಥೋಡ ಜ಼ಣಾನ ಇನಾಕನ ಮೋಕ್ಲಿನ್, ಇನ ಆಳ್ನ ಅಛ್ಛು಼ ಕರ್ನು ಕರಿ ಬೋಲಿಲಿದೊ. ಇವ್ಣೆ ಯೇಸುಕನ ಆಯಿನ್, "ತಾರೇಥಿ ಮದತ್ ಕರೈಲ್ಯವಾನ ಯೋ ಅದ್ಮಿ ಲ್ಹಾಯಕ್ ಹುಯಿರ್ಹುಸ್. ಯೋ ಅಪ್ಣ ಅದ್ಮಿನ ಪ್ಯಾರ್ ಕರಾವಾಳೊ ಹುಯಿರ್ಹೋಸ್ ಅಜು಼ ಇನೇಸ್ ಅಪ್ಣಖ್ಹಾಜೆ ಸಬೆ ಭರಾವನು ಮಂದಿರ್ನ ಭಂದೈದಿದೊತೆ" ಕರಿ ಬೋಲಿನ್ ಯೇಸುನ ಗಿಂಗಾವಲಗಾಖ್ಹತರ್,
ಯೇಸು ಇವ್ಣ ಜೋ಼ಡೆ ಗಯೊ. ಯೇಸು ಘರ್ಕನ ಆಯಿನ್ ಪೋಚಾ಼ನ ಜ಼ರ ದೂರ್ ಥೋತೆ ತದ್ದೇಸ್, ಯೋ ಖ್ಹೋಶಿಪಾಯಿನೊ ಮೋಟಾನೆ ಇನ ದೋಸ್ತ್ ಖ್ಹಾರಾವ್ನ ಯೇಸುಕನ ಬೋಲಿ ಮೋಕ್ಲಿನ್, "ಪ್ರಭು, ತೂ ಖ್ಹತ್ನಕೊ, ತೂ ಮಾರ ಘರ್ಕನ ಆವಾಯೆತ್ರೆ ಲ್ಹಾಯೇಕ್ ಮಾರಮ ಕೊಯ್ನಿ. ಅತ್ರೇಸ್ ಕಾಹೆತೆ ತಾರಕನ ಆವಾನಾಬಿ ಮೇ ಲ್ಹಾಯೇಕ್ನೊ ಕಾಹೆ. ಕತೋಬಿ ತೂ ಖಲಿ ಏಕ್ ವಾತೆ ಬೋಲ್ಯೋತೊ ಬಶ್ ಮಾರ ಸೇವಕ್ನ ಅಛ್ಛು಼ ಉಶೆ. ಮೇಬಿ ಬೀಜಾ಼ನ ಹಾತ್ಹೇಟ್ ಕಾಮ್ ಕರಾವಾಳೊ ಹುಯಿರ್ಹೋಸ್. ಮಾರ ಹಾತ್ಹೇಟ್ ಸಿಪಾಯಿಖ್ಹಾರು ಛಾ಼. ಮೇ ಇವ್ಣಾಮ ಏಕ್ ಜ಼ಣಾನ ಜಾ಼ ಕರಿ ಬೋಲ್ಯೊತೊ ಯೋ ಜಾ಼ಸ್, ಬಿಜ್ಜೇಕ್ ಜ಼ಣಾನ ಆವ್ಣುಕರಿ ಬೋಲ್ಯೋತೊ ಆವಸ್. ಮಾರ ಆಳ್ನ ಅಮ್ನು-ಅಮ್ನು ಕಾಮ್ ಕರ್ ಕರಿ ಬೋಲ್ಯೋತೊ ಯೋ ಕರಸ್" ಕರಿ ಬೋಲ್ಯೊ.
ಆ ವಾತೆನ ಖ್ಹಮ್ಜಿನ್ ಯೇಸುನೆ ಇನಿ ಬಾರೇಮ ಆಶ್ಚರ್ಯಖೈನ್, ಇನ ಪೀಠೆ ವಳ್ಯಾವ್ತುಥೂತೆ ಝೂ಼ಂಡ್ಣ ಫರಿ ದೇಖಿನ್, "ಮೇ ತುಮೂನ ಬೋಲುಸ್ಕಿ, ಮೇ ಅತ್ರೆ ಮೋಟಿ ವಿಶ್ವಾಸ್ನ ಇಸ್ರಾಯೇಲ್ ಆದ್ಮಿಮಾಬಿ ಕೋ ದೇಖ್ಯೋನಿ" ಕರಿ ಬೋಲ್ಯೊ.
ಅನ ಬಾದ್ಮ ಯೋ ಟಪಾಲ್ ದ್ಯವಾಳು ಪಾಛು಼ ಫರಿ ಯೋ ಅದಿಕಾರಿನ ಘರ್ಕನ ಜೈ಼ನ್, ಯೋ ಆಳ್ನ ಅಛ್ಛು಼ ಹುಯಿರ್ಹುಥೂತೆ ದೇಖ್ಯು.
ಹಿಜ್ಜಾ಼ ಅಠಾರ ವರಖ್ಹ್ಥು ಭೂತ್ ಧರೀನ್, ಆಂಗ್ತನ್ಮ ರೋಗ್ ಥೂತೆ ಏಕ್ ತಯೇಡ ಥಿ. ಇನು ಢೋಪ್ರು ಝು಼ಕಿರ್ಹೂಥು ಅಜು಼ ಇನ ಜ಼ರಾಬಿ ಮುಡ್ಕ್ಯು ಉಪ್ಪರ್ ಪಾಡೀನ್, ಉಭು ಭೀರ್ಯಾವನ ಕೋ ಹೋತುಥೂನಿ. ಯೇಸುನೆ ಇನ ದೇಖಿನ್, ಖನ್ನೆ ಬುಲೈನ್ ಇನ, "ಬಾಯಿ, ತಾರ ರೋಗ್ಥಿ ತೂ ಛು಼ಟಿಗಿ!" ಕರಿ ಬೋಲಿನ್, ಇನಾಪರ್ ಇನೊ ಹಾತ್ ಮ್ಹೇಲ್ಯೊ, ಮ್ಹೇಲ್ತಾಸ್ನ ಯೋ ಉಭು ಭೀರಿಗೈ ಅಜು಼ ಇನೆ ದೇವ್ನ ಸ್ತುತಿ ಕರಿ.
ಯೇಸುನೆ ಜಾನ್ನ ಅರಾಮ್ಕೊಂತೆ ಏಕ್ ಜ಼ಣಾನ ಅಛ್ಛು಼ ಕರ್ಯೊತೆ
ಏಕ್ಹಲ್ಲ ಸಬ್ಬತ್ ದನ್ನೆ ಯೇಸು ಫರಿಸಾಯರ್ನು ಮೋಟಾವ್ಮ ಏಕ್ ಜ಼ಣಾನ ಘರೆ ಖಾಣನ ಗಯೊ. ಹಿಜ್ಜಾ಼ನು ಅದ್ಮಿಖ್ಹಾರು ಯೇಸುನ ನಿಘಾ ಲಗಾಡಿನ್ ದೇಖುಕರ್ತುಥು. ಹಿಜ್ಜಾ಼ ಯೇಸುನ ಖ್ಹಾಮೆ ಪೆಶರ್ ರೋಗ್ ಥೋತೆ ಏಕ್ ಜ಼ಣೊ ಥೊ. ತದೆ ಯೇಸುನೆ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್ನ, "ಅಪ್ಣಿ ಖಾನುಲ್ಮ ಸಬ್ಬತ್ ದನ್ಮ ಅಛ್ಛು಼ ಕರಾನು ಬರಾಬರ್ಕಿ ಕೊಯ್ನಿ"? ಕರಿ ಪುಛಾ಼ಯೊ.
ಕತೋಬಿ ಇವ್ಣೆ ಶಾತ್ಬಿ ಫರೈನ್ ಬೋಲ್ಯು ಕೊಯ್ನಿ. ತದೆ ಯೇಸುನೆ ಯೋ ಅದ್ಮಿನು ಹಾತ್ ಧರೀನ್, ಇನ ಅಛ್ಛು಼ ಕರೀನ್ ಬೋಲಿಮೋಕ್ಲಿದಿದೊ.
ಯೇಸುನೆ ಖೋಡ್ ಲಾಗಿಹುಯು ದಖ್ಹ್ ಅದ್ಮಿನ ಗುಣ್ಕರ್ಯೋತೆ
ಯೇಸು ಯೆರೂಸಲೇಮ್ ಭಣಿ ಒಳೆಜಾ಼ತೊಥೋತೆ ತದೆ, ಗಲಿಲಾಯ ಅಜು಼ ಸಮಾರ್ಯ ತಬರ್ಖಾನು ಇಚ಼್ಮಾನಿ ವಾಟೆಕರಿ ಗಯೊ. ಏಕ್ ಗಾಮ್ಮ ಆವಾದಿನ್, ಹಿಜ್ಜಾ಼ ಖೋಡ್ ಲಾಗಿರ್ಹೂಥೂತೆ ದಖ್ಹ್ ಜ಼ಣು ಇನಖ್ಹಾಮ್ಣೆ ಆಯಿನ್, ದೂರ್ ಭೀರಿನ್, "ಯೇಸು, ಗುರೂ, ಹಮಾರಪರ್ ಗೋರ್ಕರ್!" ಕರಿ ಚಿಕ್ರಿನ್ ಬೋಲ್ಯು.
ಯೇಸುನೆ ಇವ್ಣುನ ದೇಖಿನ್, "ತುಮೆ ಜೈ಼ನ್, ಯಾಜಕವ್ನ ತುಮಾರು ಆಂಗ್ತನ್ ವತಾಳೊ" ಕರಿ ಬೋಲ್ಯೊ. ಇವ್ಣೆ ಜಾ಼ವನಿ ವಖ್ಹತ್ಮಸ್, ಇವ್ಣೆ ಪಾಕ್ ಹುಯಿಗಯು. ಇವ್ಣಾಮ ಏಕ್ ಜ಼ಣು ಇನ ಅಛ್ಛು಼ ಹುಯೂತೆ ದೇಖಿನ್, ಚೋ಼ರ್ ಆವಾಜ಼್ಥಿ, ದೇವ್ನಿ ಖ್ಹರಾವ್ಣಿ ಕರ್ತುಹುಯಿನ್, ಪಾಛು಼ಫರಿ ಆಯು. ಯೋ ಯೇಸುನ ಗೋಡಾಪರ್ ಪಡೀನ್, ಇನ ಧನ್ಯವಾದ್ ಕರ್ಯು. ಯೋ ಸಮಾರ್ಯವಾಳೊ ಹುಯಿರ್ಹೋಥೊ. ತದೆ ಯೇಸುನೆ ಇನ, "ದಖ್ಹ್ ಜ಼ಣಾನ ಅಛ್ಛು಼ ಹುಯೂನಿ? ಬಿಜು಼ ನೌ ಜ಼ಣ ಕ್ಯಾ?" ಕರಿ ಪುಛಾ಼ಯೊ. ದೇವ್ನಿ ಸ್ತುತಿ ಕರಾನಖ್ಹಾಜೆ, ಆ ಪರೈ ದೇಖ್ಹ್ವಾಳಾನ ಮ್ಹೆಂದಿನ್, ಬಿಜು಼ ಕೋಣ್ಬಿ ಪಾಛು಼ಫರಿ ಆಯು ಕೊಯ್ನಿ ಶು? ಕರಿ ಬೋಲ್ಯೊ. ಅಜು಼ ಯೇಸುನೆ ಇನ, "ಉಪ್ಪರ್ ಉಠೀನ್, ಜಾ಼; ತಾರಿ ವಿಶ್ವಾಸ್ಥೀಸ್ ತುನ ಅಛ್ಛು಼ಕರ್ಯು" ಕರಿ ಬೋಲ್ಯೊ.
ಪಾಣಿನ ಕೋಳಮ್ಕನ ಅಛ್ಛು಼ ಕರ್ಯೊತೆ
ಅನ ಬಾದ್ಮ, ಯೇಸು ಯೆಹೂದ್ಯರ್ನ ಪೂಜಾ಼ ಥೂತೆ ಇನಖ್ಹಾಜೆ, ಯೇಸು ಯೆರೂಸಲೇಮ್ನ ಗಯೊ. ಯೆರೂಸಲೇಮ್ಮ ಮೇಂಢಾನು ಬಾಕಲ್ನಖನ್ನೆ ಏಕ್ ಕೋಳಮ್ ಥು, ಇಬ್ರಿಯ ವಾತೇಮ ಇನ "ಬೇತ್ಸಥಾ" ಕರಿ ನಾಮ್, ಹಿಜ್ಜಾ಼ ಪಾಚ಼್ ಛ಼ತ್ ಥು ಯೋ ಛ಼ತ್ಕನ ರೋಗ್ರಾಯೊ ರ್ಹವಾಳು ಘಣು ಅದ್ಮಿ ಪಡ್ಯುರ್ಹೇತೂಥು. ಇವ್ಣಾಮ ಕಾಣು, ಲಂಗ್ಡು, ಅಜು಼ ಲಕ್ವೊ ಮಾರ್ಯುಹುಯು ಥೂ.ಇವ್ಣೆ ಪಾಣಿ ಕದೆ ಹಲ್ಶೇಸ್ಕರಿ ಟಿವಯ್ ರ್ಹೇತುಥು. ಶನಕತೊ ಹರೇಕ್ ಬಾರ್ ಥೋಡು ವಖ್ಹತ್ನ ಬಾದ್ಮ ಪ್ರಭುನೊ ದೂತ ಉತ್ರಿ ಐನ್ ಕೋಳಮ್ನ ಪಾಣಿನ ಹಲಾವ್ತೊಥೊ ರೋಗ್ವಾಳು ಕೆಹೂಬಿ ಅದ್ಮಿ ಪಾಣಿ ಹಲಾದಿನ್ ಪಹಿಲೆ ಜಾ಼ತುಥೂಕಿ ಯೊ ಅಛ್ಛು಼ ಹುಯಿಜಾ಼ತುಥು. ಆಟ್ಉಪ್ಪರ್ ಡೋಡಿಖ್ಹ್ ವರಖ್ಹ್ಥೊ ರೋಗ್ಮ ಪಡ್ಯೊಥೋತೆ ಏಕ್ ಅದ್ಮಿ ಹಿಜ್ಜಾ಼ಥೊ. ಯೋ ಹಿಜ್ಜಾ಼ ಪಡ್ಯೋತೆ ಯೇಸುನೆ ದೇಖ್ಯೊ, ಯೋ ಘಣ ವರಖ್ಹ್ಥು ರೋಗ್ಮ ಥೋತೆ ಯೇಸುನ ಮಾಲುಮ್ ಥೂ. ಇನಖ್ಹಾಜೆ ಯೇಸುನೆ ಇನ, "ತುನ ಅಛ್ಛು಼ ಹೋಣು ಕರಿ ದಿಲ್ ಛಾ಼ ಕಿಶು?" ಕರಿ ಪುಛಾ಼ಯೊ.
ಯೋ ರೋಗಿನೆ, "ಗುರು, ಪಾಣಿ ಹಲಾನಿ ವಖ್ಹತ್ಮ ಕೋಳಮ್ಮ ಮನ ಉತ್ರಾವವಾಳು ಕೋಣ್ಬಿ ಕೊಯ್ನಿ; ಮೇ ಉತರ್ನು ಕರಿ ಜಾ಼ವಾನ ಪಹಿಲೆಸ್, ಮಾರೇಥಿಬಿ ಅಗಾಡಿ ಬಿಜು಼ ಉತ್ರಿಜಾ಼ಸ್" ಕರಿ ಬೋಲ್ಯೊ.
ಯೇಸು ಇನ, "ಉಪ್ಪರ್ ಉಟ್, ತಾರಿ ಬಿಛಾ಼ವ್ಣಿನ ಪಳ್ಳಿನ್, ಚಾ಼ಲ್" ಕರಿ ಬೋಲ್ಯೊ. ತದ್ನು-ತದೇಸ್ ಯೋ ಅದ್ಮಿನ ಅಛ್ಛು಼ ಹುಯಿಗಯು; ಇನೆ ಇನಿ ಬಿಛಾ಼ವ್ಣಿನ ಪಳ್ಳಿನ್ ಚಾ಼ಲ್ಯೊ.
ತದೆ ಸಬ್ಬತ್ ದನ್ ಹುಯಿರುಥು.
ಯೇಸು ಪಾಛೊ಼ ಗಲಿಲಾಯನು ಕಾನಾ ಗಾಮ್ನ ಗಯೊ ಯೊ ಹಿಜ್ಜಾ಼ಸ್ ಇನೆ ಪಾಣಿನ ದ್ರಾಕ್ಷಿನು ರಖ್ಹ್ ಬಣಾಯೊಥೊತೆ. ಹಿಜ್ಜಾ಼ ಖ್ಹರ್ಕಾರ್ನೊ ಏಕ್ ಶೌಕಾರ್ ಅದಿಕಾರಿ ಥೊ. ಇನ ಛಿಯ್ಯಾನ ಕಪೆರ್ನೌಮ್ಮ ಜಾನ್ನ ಅಛ್ಛು಼ ಕೋ ಥೂನಿ. ಯೇಸು ಯೂದಾಯಥು ಗಲಿಲಾಯನ ಆಯೋತೆ ಖಬರ್ ಖ್ಹಮ್ಜ್ಯೊ ಶನಕತೊ ಇನೊ ಛಿಯ್ಯೊ ಮರಾನಲಾಗ್ಯೊ ಥೊ, ತದೆ ಯೊ ಯೇಸುಕನ ಜೈ಼ನ್, ಇನ ಛಿಯ್ಯಾನ ಅಛ್ಛು಼ ಕರ್ನು ಕರಿ ಗಿಂಗಾಯೊ. ಯೇಸುನೆ ಇನ, "ತುಮೆ ಖ್ಹಣೇದ್ನು ಕಾಮ್ನ ಅಜು಼ ಅದ್ಭುತ್ಕಾಮ್ನ ದೇಖ್ಯುನಾತೊ ನಂಬಾಸಸ್ ಕೊಯ್ನಿ" ಕರಿ ಬೋಲ್ಯೊ.
ಯೋ ಅದಿಕಾರಿನೆ, "ಗುರು, ಮಾರೊ ಛಿಯ್ಯೊ ಮರ್ವಾನ ಅಗಾಡಿ ತೂ ಮಾರ ಕೇಡೆ ಆವ್" ಕರಿ ಬೋಲಿಲಿದೊ.
ಯೇಸುನೆ ಇನ, "ಜಾ಼, ತಾರೊ ಛಿಯ್ಯೊ ಜಿವ್ಶೆ" ಕರಿ ಬೋಲ್ಯೊ. ಯೋ ಅದ್ಮಿ ಯೇಸುನೆ ಇನ ಬೋಲ್ಯೊತೆ ವಾತೆನ ನಂಬಿನ್, ಚ಼ಲೆಗಯೊ. ಯೋ ಘರೆ ಜಾ಼ವಾನಿ ವಖ್ಹತ್ಮ, ಇನೊ ಆಳ್ ಐನ್, "ತಾರೊ ಛಿಯ್ಯೊ ಜಿವ್ತೊ ಹುಯಿಗಯೊ" ಕರಿ ಬೋಲ್ಯೊ.
ತದೆ ಇನೆ, "ಕೆತ್ರ ಘಂಟಾನ ಮಾರ ಛಿಯ್ಯಾನ ಅಛ್ಛು಼ ಹುಯೂತೆ?" ಕರಿ ಇನ ಪುಛಾ಼ವಖ್ಹತರ್, ಇವ್ಣೆ, "ಕಾಲೆ ಧೋಪಾರ್ನು ಏಕ್ ಘಂಟಾನ ಇನು ತಾವ್ ಉತ್ರಿಗು" ಕರಿ ಬೋಲ್ಯು.
"ತಾರೊ ಛಿಯ್ಯೊ ಜಿವ್ಶೆ" ಕರಿ ಯೇಸುನೆ ಇನ ಬೋಲ್ಯೊತೆ ವಖ್ಹತ್ಮಾಸ್ ಅಛ಼್ಛುಹುಯು ಕರಿ ಬಾನೆ ಮಾಲುಮ್ ಕರಿಲಿದೊ, ಅಜು಼ ಯೋಬಿ, ಇನ ಘರ್ವಾಳು ಖ್ಹಾರು ಯೇಸುನ ನಂಬ್ಯು.
ಯೇಸು ಯೂದಾಯಥು ಗಲಿಲಾಯ ಆವಾನ ಬಾದ್ಮ, ಕರ್ಯೊತೆ ಬೇನು ಅದ್ಭುತ್ ಕಾಮ್ ಆ.
A mulher com fluxo de sangue
Uma mulher que sofria há doze anos tocou a orla do manto de Jesus e foi curada instantaneamente pela sua fé.
ಭಾರ ವರಖ್ಹ್ಥು ಮುಟ್ನು ರೋಗ್ಥೀತೆ ಏಕ್ ತಯೇಡ ಥಿ ಯೋ ಯೇಸುನ ಪೀಠೇಥಿ ಆಯಿನ್, ಇನ ಝ಼ಗ್ಗಾನು ಕನಾರಿನ ಛೀಮಿ. ಯೋ ತಯೇಡ, "ಮೇ ಇನ ಲುಂಗ್ಡಾನ ಛೀಮೀತೊ ಬಶ್, ಮನ ಅಛ್ಛು಼ ಹುಯಿಜಾ಼ಶೆ" ಕರಿ ಇನು ಯೋಸ್ ಬೋಲಿಲಿದಿ.
ತದೆ ಯೇಸುನೆ ಫರೀನ್, ಇನಾಭಣಿ ದೇಖಿನ್, "ಛೋ಼ರಿ ಧಿಲ್ಪತ್ಥಿ ರ್ಹೇ! ತಾರಿ ವಿಶ್ವಾಸ್ಥೀಸ್ ತುನ ಅಛ಼್ಛುಹುಯು" ಕರಿ ಬೋಲ್ಯೊ. ಯೋಸ್ ವಖ್ಹತ್ಮ ಯೋ ತಯೇಡಾನ ಗುಣ್ಹುಯು.
ಹಿಜ್ಜಾ಼ ಭಾರ ವರಖ್ಹ್ಥು ಮುಟ್ನು ರೋಗ್ಥೀತೆ ಏಕ್ ತಯೇಡ ಥಿ. ಯೋ ಕೈಯೆಕ್ಕಿ ವೈದ್ಯಕನ ದೆಖಾಡಿತೋಬಿ ಘಣು ಲತಾಡ ಪಡಿರ್ಹೀಥಿ. ಥೂತೆ ಖ್ಹಾರು ಇನೆ ಖರ್ಚಿ ಕರಿತೋಬಿ ರೋಗ್ ಜಾ಼ಖ್ಹತ್ ಹುಯು ಪಣ್ಕಿ ಶಾತ್ಬಿ ಫಾಯಿದೊ ಕೋ ಹುಯುಥೂನಿ. ಯೋ ತಯೇಡ ಯೇಸುನಿ ಬಾರೇಮ ಖ್ಹಮ್ಜಿನ್, "ಮೇ ಯೇಸುನ ಲುಂಗ್ಡಾನ ಛೀಮೀತೊ ಬಶ್, ಮನ ಅಛ್ಛು಼ ಹುಯಿಜಾ಼ಶೆ" ಕರಿ ಸೋಚಿನ್, ಝೂ಼ಂಡ್ಮ ಪೀಠೇಥು ಐನ್ ಇನ ಲುಂಗ್ಡಾನ ಛೀಮಿ.
ಛೀಮ್ತಾಸ್ ಇನ ಲ್ಹೊಯಿ ಝ಼ರಾನು ಭೀರಿಗಯು; ತದೆ ಇನೆ, ಇನ ಖ್ಹತವ್ಕರ್ತುಥೂತೆ ರೋಗ್ ನಿಕ್ಳಿಜೈ಼ನ್ ಅಛ್ಛು಼ ಹುಯಿಗಯು, ಕರಿ ಇನು ಯೋಸ್ ಮಾಲುಮ್ ಕರೀಲಿದಿ.
ಯೋ ಭೀಡ್ಮ ಭಾರ ವರಖ್ಹ್ಥು, ಮುಟ್ನು ರೋಗ್ಥೀತೆ ಏಕ್ ತಯೇಡ ಥಿ. ಯೋ ಇನಾಕನ ಥೂತೆಖ್ಹಾರುಸ್ ಖರ್ಚಿ ಕರಿತೋಬಿ, ಕೋಣ್ಬಿ ಇನ ಅಛ್ಛು಼ ಕೊಕರ್ಯುನಿ. ತದೆ ಯೋ ತಯೇಡ ಝೂ಼ಂಡ್ಮ ಯೇಸುನ ಪೀಠೇಥು ಐನ್, ಇನ ಲುಂಗ್ಡಾನ ಕನಾರೀನ ಛೀಮಿ. ಛೀಮ್ತಾಸ್ನ ಇನ ಲ್ಹೋಯಿ ಝ಼ರಾನು ಭೀರಿಗಯು. ತದೆ ಯೇಸುನೆ, "ಮನ ಛೀಮ್ಯೂತೆ ಕೋಣ್?" ಕರಿ ಪುಛಾ಼ಯೊ.
ತಮಾಮ್ ಅದ್ಮಿನೆ ‘ಮೇ ಕಾಹೆ, ಮೇ ಕಾಹೆ’ ಕರಿ ಬೋಲ್ತಾನ, ಪೇತ್ರನೆ ಯೇಸುನ, "ಗುರು, ಅದ್ಮಿನಿ ಭೀಡ್ ತಾರ ಅಶ್ಪಿಶ್ ಭರೈನ್, ತಾರಪರ್ ಪಡುಕರಾಸ್ನಿ" ಕರಿ ಬೋಲ್ಯೊ
ತೋಬಿ ಯೇಸುನೆ, "ಕೋಣ್ಕಿ ಏಕ್ ಜ಼ಣು ಮನ ಛೀಮ್ಯು. ಮಾರೇಥಿ ಶಕತ್ ಗೈತೆ ಮನ ಮಾಲುಮ್ಪಡ್ಯು" ಕರಿ ಬೋಲಾಖ್ಹತರ್, ಯೋ ತಯೇಡ ಅಜು಼ ಮೇ ಲಪಿರ್ಹಾವಾನ ಉಶೆಕೊಯ್ನಿ ಕರಿ ಮಾಲುಮ್ ಕರಿಲೀನ್, ಕಾಪ್ತಿಹುಯಿನ್ ಐನ್ ಯೇಸುನ ಗೋಡಾಪರ್ ಪಡೀನ್, ಇನೆ ಶನಖ್ಹಾಜೆ ಛೀಮೀತೆ ಕರಿ ಅಖ್ಖಾನ ಖ್ಹಾಮೆ ಬೋಲಿ. ಎತ್ರೇಸ್ ಕಾಹೆತೆ ಛೀಮ್ತಾಸ್ನ ಇನ ಅಛ್ಛು಼ ಹುಯಿಗಯು ಕರಿ ಬೋಲಿ. ತದೆ ಯೇಸುನೆ ಇನ, "ಛೋ಼ರಿ, ತಾರಿ ವಿಶ್ವಾಸ್ಥೀಸ್ ತುನ ಅಛ್ಛು಼ಹುಯು. ಶಾಂತಿಥಿ ಜಾ಼" ಕರಿ ಬೋಲ್ಯೊ.
Ressurreições
Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.
ಅದಿಕಾರಿನಿ ಛೋ಼ರಿ ಅಜು಼ ಯೇಸುನು ಲುಂಗ್ಡು ಛೀಮೀತೆ ತಯೇಡಾನಿ ಬಾರೇಮ
ಯೇಸು ಇವ್ಣಿ ಜೋ಼ಡೆ ಆ ವಾತೆ ಬೋಲುಕರಾನಿ ವಖ್ಹತ್ಮ, ಯೆಹೂದ್ಯರ್ನೊ ಏಕ್ ಅದಿಕಾರಿ ಇನಾಕನ ಆಯಿನ್, ಇನಖ್ಹಾಮ್ಣೆ ಢುಕ್ಣ್ಯಟೇಕಿನ್, "ಮಾರಿ ಛೋ಼ರಿ ಹಂಕೇಸ್ ಮರಿಗೈ; ತೋಬಿ ತೂ ಐನ್ ಇನಾಪರ್ ಹಾತ್ ಮ್ಹೇಲ್ಯೋತೊ ಯೋ ಜಿವ್ತಿ ಉಶೆ" ಕರಿ ಗಿಂಗೈಲಿದೊ.
ತದೆ ಯೇಸು ಉಠೀನ್, ಇನ ಕೇಡೆ ಗಯೊ, ಅಜು಼ ಇನ ಶಿಷ್ಯರ್ ಇನ ಪೀಠೆ ಗಯ.
ಅನಕೇಡೆಥು ಯೇಸು ಯೋ ಅದಿಕಾರಿನ ಘರೆ ಆಯೊತದೆ, ಹಿಜ್ಜಾ಼ ವಾಖ್ಹ್ಳಿ ವಜಾ಼ಡವಾಳನ ಅಜು಼ ಗಲಾಟ್ ಕರುಕರ್ತುಥೂತೆ ಅದ್ಮಿಖ್ಹಾರಾನ ದೇಖಿನ್, "ಭಾರ್ ಜಾ಼ವೊ, ಛೋ಼ಕ್ರಿ ಮರಿಕೊಯ್ನಿ, ಖ್ಹುತೀಸ್!" ಕರಿ ಬೋಲ್ತಾನ, ಇವ್ಣೆ ಖ್ಹಾರು ಯೇಸುನ ದೇಖಿನ್ ನಕ್ಲೆಕಾಡಿ ಹಾಶ್ಯು. ಅದ್ಮಿಖ್ಹಾರಾನ ಭಾರ್ ಮೋಕ್ಲಾನ ಬಾದ್ಮ, ಯೇಸು ಮಹಿ ಜೈ಼ನ್, ಯೋ ಛೋ಼ಕ್ರಿನೊ ಹಾತ್ ಧರ್ತಾನ, ಯೋ ಉಠಿ ಭೀರಿಗೈ.
ತದೆ ಸಬಾಮಂದಿರ್ನೊ ಅದಿಕಾರಿ ಏಕ್ ಜ಼ಣೊ ಹಿಜ್ಜಾ಼ ಆಯೊ. ಇನು ನಾಮ್ ಯಾಯಿರ ಕರಿ. ಯೋ ಯೇಸುನ ದೇಖಿನ್, ಇನ ಗೋಡಾಪರ್ ಪಡಿನ್, "ಮಾರಿ ಅಡ್ಡಾಣಿ ಛೋ಼ಕ್ರಿ ಮರ್ವಾನ ಆಯಿ; ಯೊ ಅಛ್ಛಿಹುಯಿನ್ ಬಚಾ಼ನಖ್ಹಾಜೆ ದಯಕರಿನ್ ತೂ ಐನ್ ಇನಾಪರ್ ಹಾತ್ ಮ್ಹೇಲ್, ಕರಿ ಯೇಸುನ ಘಣು ಗಿಂಗೈಲಿದೊ.
ತದೆ ಯೇಸು ಇನಜೋ಼ಡೆ ಗಯೊ, ಬಿಜು಼ ಅದ್ಮಿನಿ ಭೀಡ್ ಇನ ಅಶ್ಪಿಶ್ ಭರೈನ್ ಧಕೇಲ್ತುಹುಯಿನ್ ಇನ ಪೀಠೆ ಗಯು.
ಇವ್ಣೆ ಅದಿಕಾರಿನ ಘರೆ ಆಯತದೆ, ಹಿಜ್ಜಾ಼ ಅದ್ಮಿಖ್ಹಾರು ಚಿಕ್ರಾಣ್ ಮ್ಹೇಲುಕರಾತೆ ಬಿಜು಼ ಥೋಡು ಅದ್ಮಿ ರೊವಣ್ಝೋ಼ವಣ್ ಕರುಕರಾತೆ ಯೇಸುನೆ ದೇಖ್ಯೊ. ಯೇಸು ಮಹಿ ಜೈ಼ನ್, "ಶನ ತುಮೆ ಚಿಕ್ರಾಣ್ ಮ್ಹೇಲುಕರಾಸ್ತೆ, ರೋವ್ಕರಾಸ್ತೆ? ಛೋ಼ಕ್ರಿ ಮರಿಕೊಯ್ನಿ, ಖ್ಹುತೀಸ್!" ಕರಿ ಬೋಲ್ಯೊ.
ಇವ್ಣೆ ಯೇಸುನ ದೇಖಿನ್ ನಕ್ಲೆ ಕರ್ಯು, ಇನಾಖ್ಹಾಜೆ ಯೇಸುನೆ ಖ್ಹಾರಾನ ಭಾರ್ ಮೋಕ್ಲೀನ್, ಯೋ ಛೋ಼ಕ್ರಿನ ಆಯ-ಬಾನ ಬಿಜು಼ ಇನ ತೀನ್ ಜ಼ಣ ಶಿಷ್ಯರ್ನ ಬುಲೈಲಿನ್ ಛೋ಼ಕ್ರಿ ಥೀತೆ ಹಿಜ್ಜಾ಼ಗಯೊ. ಯೇಸುನೆ ಯೋ ಛೋ಼ಕ್ರಿನೊ ಹಾತ್ ಧರೀನ್, "ತಲಿಥಾಕೂಮ್" ಕರಿ ಬೋಲ್ಯೊ. ಇಮ್ ಕತೊ "ಅಡ್ಡಾಣಿ ಛೋ಼ಕ್ರಿ, ಮೇ ತುನ ಬೋಲುಕರುಸ್ ಉಪ್ಪರ್ ಉಟ್" ಕರಿ.
ತದ್ನು ತದೇಸ್ ಯೋ ಛೋ಼ಕ್ರಿ ಉಠೀನ್ ಹೈಕಡ್ ಹೀಕಡ್ ಚಾ಼ಲಾಲಗಿ. ಯೋ ಭಾರ ವರಖ್ಹ್ನಿ ಹುಯಿರ್ಹೀಥಿ. ಅಮ್ ಹುವಾನು ದೇಖಿನ್ ಇವ್ಣೆ ಘಣು ಆಶ್ಚರ್ಯಖಾದು.
ಅಜು಼ ಯೇಸುನೆ ಅಮ್ ರ್ಹವಾಪರ್, "ಆ ಹಗಾಮ್ನ ಅದ್ಮಿನ ಖಿವಿ ಪರಕ್ಮ ಬೋಲು? ಇವ್ಣೆ ಕಿಮ್ಕಿ ಘೋಣಿ ಛಾ಼? ಬಜಾ಼ರ್ಮ ಬೇಶಿನ್, ಹಮೆ ತುಮಾರಖ್ಹಾಜೆ ವಾಖ್ಹ್ಳಿ ವಜಾ಼ಡ್ಯ, ತುಮೆ ಖೇಲ್ಯಕೊಯ್ನಿ; ಹಮೆ ಅಂದ್ರೋಖ್ಹ್ನು ಗೀದ್ ಬೋಲ್ಯ, ಕತೋಬಿ ತುಮೇತೊ ರೋಯಾ ಕೊಯ್ನಿ" ಕರಿ ಬೋಲಾತೆ ಲಡ್ಕಾನಿಘೊಣಿ ಛಾ಼. ಕಿಮ್ಕತೊ, ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ ಆಯೊ, ಯೋ ರೋಟೊ ಖಾತೋಥೊಕೊಯ್ನಿ ಅಜು಼ ದ್ರಾಕ್ಷಿನು ರಖ್ಹ್ ಪೀತೋಥೊಕೊಯ್ನಿ, ತುಮೆ ಇನ ಭೂತ್ ಧರಿರಾಖ್ಯುಸ್ ಕರಿ ಬೋಲೋಸ್. ಅದ್ಮಿನೊ ಛಿಯ್ಯೊ ಆಯೊ, ಯೋ ಖಾಣುಪಾಣಿ ಲ್ಯವಾಳೊ ಹುಯಿರೋಸ್. ‘ತುಮೆ ಬೋಲೊಸ್ಕಿ, ದೇಖೋಲೊ, ಆ ಅದ್ಮಿ ಖಾಣನು ಮರ್ತೇಲ್ ಅಜು಼ ಪೀಕುಡ್ಕ, ಪಾಪಿಬಿ ಖರಾಬ್ ಅದ್ಮಿನೊ ದೋಸ್ತಿ" ಕರಿ. ಕತೋಬಿ ದೇವ್ನಿ ಗ್ಯಾನ್ತೊ ಖ್ಹಾಚಸ್ಕರಿ, ಇನ ಮಾನಿಲ್ಯಾವಾಳಥೀಸ್ ಮಾಲುಮ್ಪಡಸ್" ಕರಿ ಬೋಲ್ಯೊ.
ಪರಿಸಾಯವಾಳೊ ಸಿಮೋನನ ಘರ್ಮ ಯೇಸು
ಫರಿಸಾಯರ್ಮ ಏಕ್ ಜ಼ಣಾನೆ, ಯೇಸುನ ಖಾಣನ ಆವ್ಣುಕರಿ ಬೋಲಿಲಿದೊ. ಇನಾಖ್ಹಾಜೆ ಯೇಸು ಇನ ಘರೆ ಜೈ಼ನ್ ಖಾಣು ಖಾವಾನ ಬೇಶಿಗಯೊ. ಯೋ ಗಾಮ್ಮ ಏಕ್ ಪಾಪೇಲಿ ತಯೇಡ ಥೀ. ಇನೆ ಯೇಸು ಯೋ ಫರಿಸಾಯರ್ನ ಘರ್ಮ ಛಾ಼ ಕರಿ ಮಾಲುಮ್ ಕರಿಲೀನ್, ಏಕ್ ಬಂಡಾನಿ ಶೀಶಿಮ ವಾನು ತೇಲ್ನ ಲೀನ್ ಹಿಜ್ಜಾ಼ ಆಯಿ.
ತದೆ ಸಬಾಮಂದಿರ್ನೊ ಅದಿಕಾರಿ ಹುಯಿರ್ಹೊಥೋತೆ ಯಾಯಿರ ಕರಿ ನಾಮ್ನೊ ಏಕ್ ಜ಼ಣಾನೆ ಹಿಜ್ಜಾ಼ ಆಯಿನ್, ಯೇಸುನ ಗೋಡಾಪರ್ ಪಡೀನ್, ಇನ ಘರೆ ಆವ್ಣುಕರಿ ಯೇಸುನ ಗಿಂಗೈಲಿದೊ. ಶನಕತೊ, ಭಾರ ವರಖ್ಹ್ನಿ ಹುಯಿರ್ಹಿಥೀತೆ, ಇನಿ ಏಕ್ನಿ-ಏಕ್ ಛೋ಼ರಿ, ಮರಾನಿ ಹಾಲ್ಮ ಥಿ.
ಯೇಸು ಯಾಯಿರನ ಘರೆ ವಳ್ಯೊಜಾ಼ತೊಥೋತೆ ತದೆ, ಅದ್ಮಿನಿ ಭೀಡ್ ಇನ ಅಶ್ಪಿಶ್ ಭರೈನ್ ಆಯು.
ಯೇಸು ಆ ವಾತೆ ಬೋಲುಕರಾನಿ ವಖ್ಹತ್ಮ, ಸಬೆ ಭರಾವಾನು ಮಂದಿರ್ನು ಅದಿಕಾರಿ ಭಣಿವಾಳು ಏಕ್ ಜ಼ಣು ಐನ್ ಯಾಯಿರನ, "ತಾರಿ ಛೋ಼ರಿ ಮರಿಗೈ, ಅಜು಼ ಗುರುನ ಖ್ಹತಾವ್ ನಕೊ" ಕರಿ ಬೋಲ್ಯು.
ಕತೋಬಿ ಯೇಸುನೆ ಅನ ಖ್ಹಮ್ಜಿನ್, ಯಾಯಿರನ, "ಡರ್ನಕೊ, ಖಲಿ ವಿಶ್ವಾಸ್ ರ್ಹವಾದೆ, ಇನ ಅಛ್ಛು಼ ಉಶೆ" ಕರಿ ಬೋಲ್ಯೊ.
ಯೇಸು ಯೋ ಘರ್ಕನ ಆವಾದಿನ್ ಪೇತ್ರ, ಯೋಹಾನ, ಯಾಕೋಬ್ ಅಜು಼ ಯೋ ಛೋ಼ಕ್ರಿನ ಆಯ-ಬಾ ಇವ್ಣುನ ಮ್ಹೆಂದಿನ್, ಕಿನಾಬಿ ಇನಾಕೇಡೆ ಮಹಿ ಕೊ ಆವಾದಿದೋನಿ. ಹಿಜ್ಜಾ಼ ಥೂತೆ ತಮಾಮ್ ಅದ್ಮಿ ಯೋ ಛೋ಼ಕ್ರಿನಖ್ಹಾಜೆ ರೊವ್ತುಹುಯಿನ್, ಛಾ಼ತಿ ಕೂಟುಕರ್ತೂಥೂ. ಅನ ದೇಖಿನ್ ಯೇಸುನೆ, "ನಕೊ ರೋವೊ, ಛೋ಼ಕ್ರಿ ಮರಿಕೊಯ್ನಿ, ಖ್ಹುತೀಸ್!" ಕರಿ ಬೋಲ್ಯೊ.
ಛೋ಼ಕ್ರಿ ಮರಿಗೈ ಕರಿ ಇವ್ಣುನ ಮಾಲುಮ್ಥೂತೆ ಇನಖ್ಹಾಜೆ, ಇವ್ಣೆ ಖ್ಹಾರೂಸ್ ಯೇಸುನ ದೇಖಿನ್ ಹಾಶ್ಯು. ಕತೋಬಿ ಯೇಸುನೆ ಯೋ ಛೋ಼ಕ್ರಿನೊ ಹಾತ್ ಧರೀನ್, "ಪಪ್ಪಾ, ಉಪ್ಪರ್ ಉಟ್!" ಕರಿ ಬೋಲ್ಯೊ. ತದ್ನು-ತದ್ದೇಸ್ ಇನ ಜಾನ್ಆಯು. ಯೋ ಉಠೀನ್ ಭೀರಿಗೈ. ತದೆ ಯೇಸುನೆ ಇವ್ಣುನ, "ಅನ ಖಾವಾನ ಶಾತ್ತೋಬಿ ದೆವೊ" ಕರಿ ಬೋಲ್ಯೊ. ಯೋ ಛೋ಼ಕ್ರಿನ ಆಯ-ಬಾನೆ ಆಶ್ಚರ್ಯಖಾದು, ಕತೋಬಿ ಯೇಸುನೆ ಅನಿ ಬಾರೇಮ ಕಿನಾಬಿ ನಾ ಬೋಲ್ನು ಕರಿ ಇವ್ಣುನ ಹುಕುಮ್ ದಿದೊ
ಲಾಜ಼ರ್ನಿ ಮರಣ್
ಬೇಥಾನ್ಯಮ ಲಾಜ಼ರ್ ಕರಿ ಏಕ್ ಜ಼ಣೊ ಥೊ, ಇನ ಜಾನ್ನ ಅಛ್ಛು಼ ಕೋ ಥೂನಿ. ಮರಿಯ ಅಜು಼ ಇನಿ ಭೇನ್ ಮಾರ್ಥ ಆಸ್ ಗಾಮ್ಮ ರ್ಹೇತಿಥಿ. ಆ ಮರಿಯ ಕೋಣ್ಕತೊ, ಯೇಸು ಪ್ರಭು ಗೋಡಾನ ವಾನುತೇಲ್ನ ಲಗಾಡಿನ್, ಇನ ಕೇಖ್ಹ್ಥಿ ಗೋಡ ನೂಛಿತೆ ಆಸ್. ಜಾನ್ನ ಅಛ್ಛು಼ ಕೋಹುವಾಂತೆ ಲಾಜ಼ರ್ ಅನೋಸ್ ಭೈ. ಇನಖ್ಹಾಜೆ, ಇನಿ ಭೇನೇನೆ, "ಪ್ರಭು, ತಾರೊ ಪ್ಯಾರ್ನೊ ದೋಸ್ತಿನ ಜಾನ್ನ ಅಛ್ಛು಼ ಕೊಯ್ನಿ" ಕರಿ ಬೋಲಾನಿ ಖಬರ್ನ ಯೇಸುಕನ ಮೋಕ್ಲಿಯೆ಼.
ಯೇಸುನೆ ಅನ ಖ್ಹಮ್ಜಿನ್ ಬೋಲ್ಯೊ, "ಲಾಜ಼ರ್ನ ರೋಗ್ ಐರ್ಹೂಸ್ತೆ ಮರಣ್ಣಖ್ಹಾಜೆ ಕಾಹೆ, ಅನೇಥಿ ದೇವ್ನ ಅಜು಼ ದೇವ್ನೊ ಛಿಯ್ಯಾನ ಮಹಿಮೆ ಮಳಾದೆ ಕರಿ ಆ ಐರ್ಹೂಸ್ತೆ" ಕರಿ ಬೋಲ್ಯೊ.
ಯೇಸುನ ಮಾರ್ಥಪರ್, ಇನಿ ಭೇನ್ಪರ್ ಅಜು಼ ಲಾಜ಼ರ್ಪರ್ ಪ್ಯಾರ್ ಥೂ. ತೋಬಿ ಲಾಜ಼ರ್ನ ಜಾನ್ನ ಅಛ್ಛು಼ ಕೊಯ್ನಿ ಕರಿ ಖಬರ್ನ ಖ್ಹಮ್ಜಿನ್ಬಿ, ಯೋ ಥೋತೆ ಹಿಜ್ಜಾ಼ಸ್ ಬಿಜೂ಼ಬಿ ಬೇ ದನ್ ರ್ಹಿಯೊ. ಅನ ಬಾದ್ಮ ಯೇಸುನೆ ಇನ ಶಿಷ್ಯರ್ನ, "ಅಪ್ಣೆ ಯೂದಾಯಾನ ಪಾಛು಼ ಫರಿ ಜ಼ಯ್ಯೆ಼" ಕರಿ ಬೋಲ್ಯೊ.
ತದೆ ಶಿಷ್ಯರ್ನೆ, "ಗುರು, ಥೋಡ ದನ್ನ ಅಗಾಡಿಸ್ ಯೆಹೂದ್ಯರ್ ತುನ ಬಂಡಾ ಫೇಕಿನ್ ಮಾರ್ನು ಕರಿ ಆಯುಥು. ಹಮ್ಕೆ ತೂ ಪಾಛು಼ ಹಿಜ್ಜಾ಼ ಜಾ಼ಸ್ಕಿ ಶು?" ಕರಿ ಬೋಲ್ಯ.
ಯೇಸುನೆ, "ದನ್ನು ಭಾರ ಘಂಟಾ ಛಾ಼, ಕಾಹೆಕಿ ಶು? ದನ್ನಿ ವಖ್ಹತ್ಮ ಚಾ಼ಲವಾಳು ಠೋಕರ್ಖೈನ್ ರಡ್ಕಕೊಯ್ನಿ, ಶನಕತೊ ಆ ಜಗತ್ನು ಉಜಾ಼ಳು ಇವ್ಣುನ ದೆಖಾವಸ್. ಕತೋಬಿ ರಾತ್ನಿ ವಖ್ಹತ್ಮ ಚಾ಼ಲವಾಳು ಠೋಕರ್ ಖಾಸ್, ಶನಕತೊ ತದೆ ಕೆಹು ಉಜಾ಼ಳುಬಿ ಕೋ ರ್ಹೇಯ್ನಿತೆ ಇನಖ್ಹಾಜೆ" ಕರಿ ಬೋಲ್ಯೊ. ಯೇಸುನೆ ಆ ವಾತೇನ ಬೋಲಿನ್, "ಅಪ್ಣೊ ದೋಸ್ತಿ ಲಾಜ಼ರ್ ಖ್ಹುತೋಸ್, ಇನ ಉಠಾಡಾನಟೇಕೆ ಮೇ ಹಿಜ್ಜಾ಼ ವಳ್ಯೊಜ಼ವುಸ್" ಕರಿ ಇವ್ಣುನ ಬೋಲ್ಯೊ.
ಶಿಷ್ಯರ್ನೆ, "ಪ್ರಭು, ಯೋ ಖ್ಹುತೊ ಉಶೇತೊ, ಇನ ಅಛ್ಛು಼ ಉಶೆ" ಕರಿ ಜ಼ವಾಬ್ ದಿದು.
ಯೇಸುನೆ ಲಾಜ಼ರ್ ಮರಿಗಯೋತೆ ಬಾರೇಮ ಬೋಲ್ಯೋತೆ, ಕತೋಬಿ ಶಿಷ್ಯರ್ನೆ ಲಾಜ಼ರ್ ಖ್ಹುಯಿನ್ ಅರಾಮ್ ಕರುಕರಸ್ ಕರಿ ಇನೆ ಬೋಲ್ಯೋತೆ ವಾತೆನಿ ಮತ್ಲಬ್ ಕರಿ ಸೋಚ್ಯು. ಇನಖ್ಹಾಜೆ ಯೇಸುನೆ ನೇರ್ವಳಿಥಿ ಇವ್ಣುನ, "ಲಾಜ಼ರ್ ಮರಿಗಯೊ" ಕರಿ.
Domínio sobre a natureza
Jesus acalmou a tempestade, andou sobre as águas e multiplicou pães. A natureza obedece à voz do seu Criador.
ಯೇಸುನೆ ತೋಫಾನ್ ಭೀರಾಖ್ಯೋತೆ
ಯೇಸು ಡೋಣ್ಪರ್ ಚ಼ಢ್ಯೊ, ಅಜು಼ ಇನ ಶಿಷ್ಯರ್ಬಿ ಇನಜೋ಼ಡೆ ಗಯ. ಎಕ್ಕಸ್ದಮ್, ಮೋಟೊ ವಹಿರೊ ದರ್ಯಾವ್ಮ ಹುವಾಲಗ್ಯೊ, ಅಜು಼ ಝೋ಼ಕಾಳ್ಯೊ ಆಯಿನ್ ಡೋಣ್ಣಾ ಢಾಪಿನಾಖನಿತರ ಹುಯು. ಕತೋಬಿ ಯೇಸು ಖ್ಹುತೋಥೊ. ಶಿಷ್ಯರ್ ಯೇಸುಕನ ಜೈ಼ನ್, ಇನ ಉಠಾಡಿನ್, "ಪ್ರಭು, ಹಮೂನ ಬಚಾ಼ಡ್! ಹಮೆ ಮರ್ವಾನ ಆಯಾನಿ!" ಕರಿ ಬೋಲ್ಯ.
ಯೇಸುನೆ, "ತುಮೆ ಶನ ಡರೋಸ್ತೆ? ತುಮೂನ ಕಮ್ವಿಶ್ವಾಸ್ ಛಾ಼!" ಕರಿ ಬೋಲಿನ್, ಉಠೀನ್ ವಹಿರನಾಬಿ, ದರ್ಯಾವ್ನ ಗುರ್ಕಾಯೊ, ತದೆ ಖ್ಹಾರೂಸ್ ಖ್ಹೊಪೊ ಪಡಿಗಯು.
ಹರೇಕ್ ಜ಼ಣು ಅಶ್ಚರ್ಯ ಖೈನ್, "ಆ ಕಿಮ್ನೊ ಉಶೆ? ವಹಿರೋಬಿ, ದರ್ಯಾವ್ಬಿ ಜಿನು ಆ ಬೋಲಾತೆ ಇಮ್ ಖ್ಹಮ್ಜಾ಼ಸ್ನಿ?" ಕರಿ ಬೋಲ್ಯು.
ಖ್ಹಾಂಜ಼್ ಹುವ್ವಾದೀನ್, ಇನ ಶಿಷ್ಯರ್ ಇನಾಕನ ಐನ್, "ಆ ಉಜ್ಜಾ಼ಡಿ ಝ಼ಗೊ, ಅಜು಼ ವಖ್ಹತ್ಬಿ ಘಣಿ ಹುಯಿಗೈ. ಆ ಅದ್ಮಿಖ್ಹಾರು ಇವ್ಣಖ್ಹಾಜೆ ಖಾಣನು ರಾಛು಼ ಲ್ಯವಾನಟೇಕೆ, ಇವ್ಣುನ ಗಾಮೆ ಬೋಲಿಮೋಕಲ್" ಕರಿ ಬೋಲ್ಯ.
ಯೇಸುನೆ ಇವ್ಣುನ, "ಅದ್ಮಿಖ್ಹಾರು ಜಾ಼ವಾನು ನಕೊ, ತುಮೇಸ್ ಇವ್ಣುನ ಖಾವಾನ ಶಾತ್ತೋಬಿ ದೆವೊ!" ಕರಿ ಬೋಲ್ಯೊ.
ತದೆ ಶಿಷ್ಯರ್ನೆ, "ಹಜ್ಜಾ಼ ಹಮಾರಕನ ಪಾಚ಼್ ರೋಟಾ ಅಜು಼ ಬೇ ಮಾಛ಼್ಲಾ ಎತ್ರುಸ್ ಛಾ಼ತೆ" ಕರಿ ಜವಾಬ್ ದಿದಾ.
ತದೆ ಯೇಸುನೆ, "ಇನ ಹಜ್ಜಾ಼ ಮಾರಕನ ಲೀನ್, ಆವೊ" ಕರಿ ಬೋಲ್ಯೊ. ಅಜು಼ ಅದ್ಮಿ ಖ್ಹಾರಾನ ಘಾಖ್ಹ್ಪರ್ ಬೇಖ್ಹೊ ಕರಿ ಬೋಲಿನ್, ಯೋ ಪಾಚ಼್ ರೋಟಾ ಅಜು಼ ಬೇ ಮಾಛ಼್ಲಾನ ಪಾಡಿಲೀನ್, ಆಬ್ಭಣಿ ದೇಖಿನ್, ದೇವ್ನ ಧನ್ಯವಾದ್ ಕರೀನ್, ಯೋ ರೋಟಾವ್ನ ತೋಡಿನ್, ಶಿಷ್ಯರ್ನ ಹಾತ್ಮ ದಿದೊ. ಶಿಷ್ಯರ್ನೆ ಅದ್ಮಿನಿ ಝೂ಼ಂಡ್ನ ದಿದಾ. ತಮಾಮ್ ಅದ್ಮಿ ಖೈನ್ ಬಶ್ಹುಯು. ಉಬ್ರ್ಯುತೆ ಟುಕ್ಡಾವ್ನ ಜ಼ಮಾಕರ್ತಖ್ಹತರ್ ಭಾರ ಟೋಕ್ರಾ ಭರಾಯು. ಖಾಣು ಖಾದೂತೆ ಇವ್ಣಾಮ ತಯೇಡ ಅಜು಼ ಲಡ್ಕಾವ್ನ ಮ್ಹೆಂದಿನ್, ಪರ್ಖ್ಹಾ ಅದ್ಮಿಸ್ ಕಮ್ಶಿಕಮ್ ಪಾಚ಼್ ಹಜಾ಼ರ್ಜ಼ಣು ಥೂ.
ವ್ಹಾಣ್ಖ್ಹತ್ರೆ ಚಾರ್ ಘಂಟಾ ಹುಯಿರ್ಹುಥು, ತದೆ ಯೇಸು ದರ್ಯಾವ್ಪರ್ ಚಾ಼ಲ್ತೊಹುಯಿನ್ ಶಿಷ್ಯರ್ ಭಣಿ ಆಯೊ.
ಯೇಸುನೆ ಚಾರ್ ಹಜಾ಼ರ್ ಅದ್ಮಿನ ಖಡಾಯೋತೆ
ಯೇಸುನೆ ಇನ ಶಿಷ್ಯರ್ನ ಖನ್ನೆ ಬುಲೈನ್, ಇವ್ಣುನ, "ಆ ಖ್ಹಾರ ಅದ್ಮಿನ ದೇಖಿನ್, ಮನ ಗೋರ್ಲಾಗಸ್, ಅವ್ಣೆ ಮಾರಕನ ಆಯಿನ್, ತೀನ್ ದನ್ ಹುಯಿಗಾ; ಇವ್ಣುನ ಖಾಣನ ಶಾತ್ಬಿ ಕೊಯ್ನಿ; ಅವ್ಣುನ ಭುಕ್ಯುಸ್ ಮೋಕ್ಲಾನ ಮನ ಮನ್ಕೊಯ್ನಿ; ಜಾ಼ವಾನಿ ವಖ್ಹತ್ಮ ಅವ್ಣೆ ಥಕಿಜಾ಼ಶೆ" ಕರಿ ಬೋಲ್ಯೊ.
ಶಿಷ್ಯರ್ನೆ ಯೇಸುನ, "ಅತ್ರಾಅದ್ಮಿನ ಬಶ್ ಹುವ್ವಾಎತ್ರು ಖಾಣು ಆ ಉಜ್ಜಾ಼ಡಿ ಝ಼ಗೋಮ ಹಮೂನ ಕಿಜ್ಗಾ಼ಥು ಮಳ್ಶೆ?" ಕರಿ ಬೋಲ್ಯ.
ಯೇಸುನೆ, "ತುಮಾರಕನ ಕೆತ್ರ ರೋಟಾ ಛಾ಼?" ಕರಿ ಪುಛಾ಼ಯೊ. ಶಿಷ್ಯರ್ನೆ, "ಹಮಾರಕನ ಖ್ಹಾತ್ ರೋಟಾ ಅಜು಼ ಥೋಡು ನ್ಹಾನಿಮಾಛ್ಲಿಯೆ ಛಾ಼" ಕರಿ ಬೋಲ್ಯು.
ತದೆ ಯೇಸುನೆ ಅದ್ಮಿನಿ ಝೂ಼ಂಡ್ನ ಜ಼ಮೀನ್ಪರ್ ಬೇಖ್ಹೊ ಕರಿ ಹುಕುಮ್ದಿದೊ. ಯೋ ಖ್ಹಾತ್ ರೋಟಾ ಅಜು಼ ಯೋ ಮಾಛ಼್ಲಾವ್ನ ಪಾಡಿನ್, ದೇವ್ನ ಧನ್ಯವಾದ್ ಕರೀನ್, ಇನ ತೋಡಿನ್, ಶಿಷ್ಯರ್ನ ಹಾತ್ಮ ದಿದೊ. ಶಿಷ್ಯರ್ನೆ ಅದ್ಮಿನಿ ಝೂ಼ಂಡ್ನ ವಾಟಪಾಡಿ ದಿದಾ. ಅದ್ಮಿಖ್ಹಾರು ಖೈನ್, ಹಕ್ಲಾಲ್ಹುಯು. ಉಭ್ರ್ಯುತೆ ಟುಕ್ಡಾವ್ನ ಜ಼ಮಾಕರ್ತಖ್ಹತರ್ ಖ್ಹಾತ್ ಟೋಕ್ರಾ ಭರಾಯು. ಖಾಣು ಖಾದೂತೆ ಇವ್ಣಾಮ ತಯೇಡ ಅಜು಼ ಲಡ್ಕಾವ್ನ ಮ್ಹೆಂದಿನ್, ಪರ್ಖ್ಹಾ ಅದ್ಮಿಸ್ ಚಾರ್ ಹಜಾ಼ರ್ ಜ಼ಣು ಥೂ.
ಮಂದಿರ್ನ ಶುಂಕ ಭಾಂದಾನಿ ಬಾರೇಮ
ಯೇಸು ಅಜು಼ ಇನ ಶಿಷ್ಯರ್ ಕಪೆರ್ನೌಮ್ ಆವಾದಿನ್, ಮಂದಿರ್ನಖ್ಹಾಜೆ ಶುಂಕ ಮಾಂಗವಾಳು ಪೇತ್ರಕನ ಆಯಿನ್, "ತುಮಾರೊ ಗುರು ಮಂದಿರ್ನ ದೇವ್ಣುತೆ ಶುಂಕಾನ ಭಾಂದಾ ಕೊಯ್ನಿಕಿ ಶು?" ಕರಿ ಪುಛಾ಼ಯು.
ತದೆ ಪೇತ್ರನೆ, "ಒಹೊ, ಭಾಂದ್ಶೆ" ಕರಿ ಬೋಲ್ಯೊ.
ಪೇತ್ರ ಘರ್ಮ ಆವಾದಿನ್, ಯೇಸುನೆ ಇನೇಥಿ ಪಹಿಲೇಸ್, "ಸೀಮೋನ, ತುನ ಕಿಮ್ ದೆಖಾವಸ್? ಆ ಧರ್ತಿಪರ್ಲ್ಯ ರಾಜ಼ಖ್ಹಾರು ಕಿನಾಕಂಥು ಶುಂಕ ಮಾಂಗಾಸ್? ಶೊಂತ್ ದೇಖ್ಹ್ನ ಅದ್ಮಿಥೀಕಿ ನತರ್ಕಿ ಪರೈದೇಖ್ಹ್ವಾಳ ಅದ್ಮಿಕಂಥು ಮಾಂಗಾಸ್?" ಕರಿ ಬೋಲ್ಯೊ.
ಪೇತ್ರನೆ, "ಪರೈ ದೇಖ್ಹ್ವಾಳಕಂಥು" ಕರಿ ಜವಾಬ್ ದಿದೊ.
ತದೆ ಯೇಸುನೆ ಪೇತ್ರನ, "ಇಮ್ಕತೊ, ಶೊಂತ್ ದೇಖ್ಹ್ವಾಳು ಶುಂಕ ಭಾಂದಾನು ಕೊಯ್ನಿ ಕರಿ ಬೋಲ್ಯೊ. ತೋಬಿ ಶುಂಕ ಮಾಂಗವಾಳು ಅಪ್ಣಿ ಬಾರೇಮ ಖಟು ಕರಾನು ನಕೊ. ಇನಖ್ಹಾಜೆ ತೂ ದರ್ಯಾವ್ನ ಜೈ಼ನ್, ಗಳ್ ನಾಖಿನ್, ಪಹಿಲೆ ಮಳಾಸ್ತೆ ಮಾಛ಼್ಲಾನ ಮ್ಹೋಡಾನ ಕಾಡಿ ದೇಕ್, ಇನಾಮ ಶುಂಕ ಭಾಂದಾನ ಹೋಣುತೆ ಏಕ್ ಪೈಶಾನು ಬಿಲ್ಲು ಮಳ್ಶೆ. ಇನ ಲಯಿನ್, ಅಪ್ಣ ಭೇ ಜ಼ಣಾನು ಕರಿ ಬೋಲಿನ್ ದೇ" ಕರಿ ಬೋಲ್ಯೊ.
ಯೇಸುನೆ ಅಂಜೀರ್ನ ಝಾ಼ಡಾನ ಶಾಪ್ ದಿದೋತೆ
ತಿನವ್ಹಾಣೆ ಯೇಸು ಪಾಛೊ಼ಫರಿ ಯೆರೂಸಲೇಮ್ ಖ್ಹಯೇರ್ನ ಜಾ಼ವಾನಿ ವಖ್ಹತ್ಮ, ಯೇಸುನ ಭುಕ್ಲಾಗ್ಯು. ಇನೆ ವಾಟ್ನ ಶೇಡೆಏಕ್ ಅಂಜೀರ್ನ ಝಾ಼ಡಾನ ದೇಖಿನ್, ಇನಖನ್ನೆ ಜೈ಼ನ್, ಇನಾಮ ಖಲಿ ಪಾಂದ್ಡುಸ್ ಪಣ್ಕಿ, ಬಿಜು಼ ಶಾತ್ಬಿ ಕೋಥುಂತೆ ದೇಖಿನ್, "ಅನಾಪರ್ಥು ತೂ ಬಿಜು಼ ಕದೆಕದೇಬಿ ಪಂಡು ನಾ ಮ್ಹೇಲ್ನೂತೆ ಇಮ್ ಹುವಾದೆ!" ಕರಿ ಬೋಲ್ಯೊ. ತದ್ನು-ತದ್ದೇಸ್ ಯೋ ಅಂಜೀರ್ನು ಝಾ಼ಡು ಖ್ಹುಕೈಗಯು.
ಶಿಷ್ಯರ್ನೆ ಅನ ದೇಖಿನ್, ಆಶ್ಚರ್ಯಖೈನ್, "ಅಂಜೀರ್ನು ಝಾ಼ಡ್ ಎಕ್ಕಸ್ ಘಡೀಮ ಖ್ಹುಕೈಗಯೂತೆ ಕಿಮ್?" ಕರಿ ಪುಛಾ಼ಯ.
ಯೇಸುನೆ, "ತುಮುನ ಖ್ಹಾಚ ಬೋಲುಸ್, ತುಮೆ ಗುಮಾನಿ ಕರಾಕೊಂತೆ ಇಮ್ ವಿಶ್ವಾಸ್ ಕರ್ಯಾತೊ, ಮೇ ಆ ಅಂಜೀರ್ನ ಝಾ಼ಡಾನ ಕರ್ಯೊತೆ, ಇಮ್ಮಸ್, ತುಮೇಬಿ ಕರ್ಶು. ಅಜು಼ ಎತ್ರೆಸ್ ಕಾಹೆತೆ,ಆ ಪಹಾಡ್ನ, ‘ತೂ ಉಖ್ಡೈ ಜೈ಼ನ್, ದರ್ಯಾವ್ಮ ಪಡ್’ ಕರಿ ಬೋಲ್ಯಾತೋಬಿ ಯೋ ಉಶೆ. ತುಮೆ ನಂಬಿನ್, ಪ್ರಾರ್ಥನೆಮ ಶಾತ್ ಮಾಂಗೋಸ್ಕಿ ಯೋ ತುಮೂನ ಮಳ್ಶೆ" ಕರಿ ಬೋಲ್ಯೊ.
ಜಾ಼ತಿವಖ್ಹತ್ಮ ಏಕ್ದಮ್ ಮೋಟೊ ವಹಿರೊ ವಾಗಿನ್, ಮೋಟೊ ಝೋ಼ಕಾಳ್ಯೊ ಉಠೀನ್ ಯೋ ಡೋಣ್ಣಾ ಮಾರ್ ಪಡ್ತಾಖ್ಹತರ್, ಯೋ ಡೋಣ್ಮ ಪಾಣಿ ಭರಾವಲಗ್ಯೂಥು. ಯೇಸು ಡೋಣ್ಣಾ ಪಾಛ಼್ಲಿ ಬಾಜು಼ಮ ಶಿರಾಣು ಟೇಕಿನ್ ಖ್ಹುತೋಥೊ. ತದೆ ಶಿಷ್ಯರ್ನೆ ಇನ ಉಠಾಡಿನ್, "ಗುರು, ಹಮೆ ಮರ್ವಾನ ಆಯಾನಿ ತುನ ಜ಼ರಾಬಿ ಫಿಕರ್ಕೊಯ್ನಿಕಿ ಶು? ಕರಿ ಬೋಲ್ಯ.
ತದೆ ಯೇಸುನೆ ಉಠೀನ್ ಯೋ ವಹಿರಾನ, "ಖ್ಹೊಪ್ ರ್ಹೆ!" ಅಜು಼ ದರ್ಯಾವ್ನ "ಶೊಪೊ ಹುಯಿಜಾ಼!" ಕರಿ ಹುಕುಮ್ದಿದೊ. ಅಮ್ ಬೋಲ್ತಾಸ್ನ ವಹಿರೊ ಖ್ಹೊಪೊ ಪಡಿಗಯು, ಅಜು಼ ಖ್ಹಾರು ಖ್ಹೊಪೊ ಪಡಿಗಯು. ಬಾದ್ಮ ಯೇಸುನೆ ಇನ ಶಿಷ್ಯರ್ನ, "ತುಮೆ ಶನ ಡರೋಸ್ತೆ? ಅಜೂ಼ಬಿ ತುಮೂನ ವಿಶ್ವಾಸ್ ಕೊಯ್ನಿಕಿ ಶು?" ಕರಿ ಬೋಲ್ಯೊ.
ಕತೋಬಿ ಇವ್ಣೆ ಘಣು ಡರಿಜೈನ್, "ಆ ಅದ್ಮಿ ಕೋಣ್ ಉಶೆ? ವಹಿರೋಬಿ, ದರ್ಯಾವ್ಬಿ ಜಿನು ಆ ಬೋಲಾತೆ ಇಮ್ ಖ್ಹಮ್ಜಾ಼ಸ್ನಿ!" ಕರಿ ಏಕ್ಥಿ ಏಕ್ ಬೋಲಿಲಿದು.
ಎತ್ರಾಸ್ಮ ಖ್ಹಾಂಜ಼್ ಹುಯಿಗುಥು. ಇನಟೇಕೆ ಯೇಸುನ ಶಿಷ್ಯರ್ ಇನಾಕನ ಐನ್, "ಆ ಉಜ್ಜಾ಼ಡಿ ಝ಼ಗೊ ಬಿಜು಼ ಖ್ಹಾಂಜ಼್ಬಿ ಹುಯಿಗಯು. ಅವ್ಣೆ ಖ್ಹಾರು ಅಶ್ಪಿಶ್ ಛಾ಼ತೆ ಗಾಮ್ಮ ಅಜು಼ ಖೇತರ್ಮ ಜೈ಼ನ್, ಇವ್ಣುನ ಖಾವನ ಶಾತ್ ಹೋಣುಕಿ ಯೋ ಲ್ಯವಾನಟೇಕೆ ಅವ್ಣುನ ಬೋಲಿಮೋಕಲ್" ಕರಿ ಬೋಲ್ಯ.
ಇಮ್ ಬೋಲಾಖ್ಹತರ್ ಯೇಸುನೆ ಇವ್ಣುನ, "ತುಮೇಸ್ ಇವ್ಣುನ ಖಾವಾನ ಶಾತ್ತೋಬಿ ದೆವೊ" ಕರಿ ಬೋಲ್ಯೊ.
ತದೆ ಇವ್ಣೆ, "ಹಮೆ ಜೈ಼ನ್, ಬೇಖ್ಹೊ ರೂಪಾನ ಕಾಖ್ಹ್ನು ರೋಟಾ ಲೀನ್, ಅವ್ಣುನ ಖಾವಾನ ದೇಣೂಕಿ ಶು?" ಕರಿ ಯೇಸುನ ಫುಛಾ಼ಯು.
ತದೆ ಯೇಸುನೆ ಇವ್ಣುನ, "ತುಮಾರಕನ ಕೆತ್ರ ರೋಟಾ ಛಾ಼? ಕರಿ ಜೈ಼ನ್ ದೇಖೊ" ಕರಿ ಬೋಲ್ಯೊ.
ಇವ್ಣೆ ಜೈ಼ನ್ ಮಾಲುಮ್ ಕರಿಲಿನ್, ಯೇಸುಕನ ಐನ್, "ಪಾಚ಼್ ರೋಟಾ ಅಜು಼ ಬೇ ಮಾಛ಼್ಲಾ ಛಾ಼" ಕರಿ ಬೋಲ್ಯು.
ತದೆ ಯೇಸುನೆ ಇನ ಶಿಷ್ಯರ್ನ, "ತಮಾಮ್ ಅದ್ಮಿನ ಹರ್ಯಾ ಘಾಖ್ಹ್ಪರ್ ಝೂ಼ಂಡೆ-ಝೂ಼ಂಡೆ ಕರಿ ಬೆಖ್ಹಾಡೊ" ಕರಿ ಬೋಲ್ಯೊ. ತದೆ ಅದ್ಮಿಖ್ಹಾರು ಏಕ್-ಏಕ್ ಝೂ಼ಂಡ್ಮ ಖ್ಹೋ-ಖ್ಹೋ, ಅಡೈವಿಖ್ಹ್-ಅಡೈವಿಖ್ಹ್ ಜ಼ಣು ಶಾಲ್ ಹುಯಿನ್ ಬೇಶಿಗಯು. ಬಾದ್ಮ ಯೇಸುನೆ ಯೋ ಪಾಚ಼್ ರೋಟ ಬೇ ಮಾಛ಼್ಲಾನ ಪಾಡಿಲೀನ್, ಆಕಾಶ್ಭಣಿ ದೇಖಿನ್, ದೇವ್ನ ಧನ್ಯವಾದ್ ಕರಿನ್, ರೋಟಾವ್ನ ತೋಡಿನ್ ಅದ್ಮಿನ ವಾಟಪಾಡಿನ್ ದೆವೊ ಕರಿ ಇನ ಶಿಷ್ಯರ್ನ ದಿದೊ. ಬಿಜು಼ ಯೋ ಬೇ ಮಾಛ್ಲಾ಼ನಾಬಿ ಅಖ್ಖಾ ಅದ್ಮಿನ ವಾಟಪಡಾಯೊ. ಇವ್ಣೆ ಖ್ಹಾರೂಸ್ ಪೇಟ್ಭರಿ ಖೈನ್ ಬಶ್ಹುಯು. ತದೆ ಶಿಷ್ಯರ್ನೆ ಉಭ್ರ್ಯುತೆ ರೋಟಾನ ಅಜು಼ ಮಾಛ಼್ಲಾನ ಟುಕ್ಡಾವ್ನ ಜ಼ಮಾಕರ್ತಖ್ಹತರ್ ಭಾರ ಟೋಕ್ರಾ ಭರಾಯು. ಖಾಣು ಖಾದುತೆ ಇನಾಮ ಪರ್ಖ್ಹಾ ಅದ್ಮಿಸ್ ಪಾಚ಼್ ಹಜಾ಼ರ್ಜ಼ಣು ಥೂ.
ಖ್ಹಾಮ್ಣೆನೊ ವಹಿರೊ ಜೋ಼ರೇಖ್ಹು ವಾಗುಕರ್ತೊಥೋತೆ ಇನಾಖ್ಹಾಜೆ, ಶಿಷ್ಯರ್ ಖ್ಹಾರು ಡೋಣ್ಣಾ ಖ್ಹಾಮ್ಣೆ ಲೀಜಾ಼ವಾನ ಕೋ ಹುವ್ವಾನಿತೆ ತರಪ್ಡುಕರ್ತುಥೂತೆ ಯೇಸುನೆ ದೇಖ್ಯೊ. ತದೆ ಕಮ್ಶಿಕಮ್ ವ್ಹಾಣ್ಖ್ಹತ್ರೆ ಚಾರ್ ಘಂಟಾ ಹುಯಿರ್ಹುಥು. ತದೆ ಯೇಸು ದರ್ಯಾವ್ಪರ್ ಚಾ಼ಲ್ತೊಹುಯಿನ್ ಇವ್ಣಭಣಿ ಐನ್, ಇವ್ಣುನ ಮ್ಹೆಂದಿನ್ ಖ್ಹಾಮ್ಣೆ ಜಾ಼ವ್ಣುಕರಿ ಥೊ. ಕತೋಬಿ ದರ್ಯಾವ್ಪರ್ ಚಾ಼ಲ್ತೊವಳ್ಯಾವಾತೆ ಯೇಸುನ ಇವ್ಣೆ ದೇಖಿನ್, ಭೂತ್ಕರಿ ಸೋಚಿನ್ ಜೋ಼ರೇಥಿ ಚಿಕ್ರಾಲಗ್ಯು. ಶನಕತೊ ಇವ್ಣೆ ಖ್ಹಾರು ಇನ ದೇಖಿನ್ ಘಬ್ರೈ ಗಯುಥು.
ತದೆ ಒಗ್ಗಿಸ್ಮ ಯೇಸುನೆ ಇವ್ಣ ಜೋ಼ಡೆ ವಾತೆ ಬೋಲಿನ್ ಇವ್ಣುನ, "ಹಿಮ್ಮತ್ಥಿರ್ಹೆವೊ ಮೇಸ್, ಡರೊನಕೊ!" ಕರಿ ಬೋಲ್ಯೊ. ಬಾದ್ಮ ಯೇಸು ಡೋಣ್ ಚ಼ಢೀನ್ ಇವ್ಣಾಕನ ಆಯೊ, ತದೆ ವಹಿರೊ ವಾಗಾನು ಭೀರಿಗಯು. ತದೆ ಶಿಷ್ಯರ್ ಖ್ಹಾರು ಘಣು ಆಶ್ಚರ್ಯಖಾದು.
ಯೇಸುನೆ ಚಾರ್ ಹಜಾ಼ರ್ ಅದ್ಮಿನ ಖಡಾಯೋತೆ
ಯೋ ದನೂಮ ಪಾಛು಼ ಅದ್ಮಿನಿ ಭೀಡ್ ಭರೈನ್ ಆಯು, ಇವ್ಣುನ ಖಾಣನ ಶಾತ್ಬಿಕೊಂತೆ ದೇಖಿನ್, ಯೇಸುನೆ ಇನ ಶಿಷ್ಯರ್ನ ಖನ್ನೆ ಬುಲೈನ್, "ಆ ಖ್ಹಾರ ಅದ್ಮಿನ ದೇಖಿನ್ ಮನ ಗೋರ್ಲಾಗಸ್, ಅವ್ಣೆ ಮಾರಕನ ಐನ್ ತೀನ್ ರೋಜ಼್ ಹುಯಿಗಾ; ಅವ್ಣುನ ಖಾಣನ ಶಾತ್ಬಿ ಕೊಯ್ನಿ. ಅವ್ಣುನ ಅಮ್ಮಸ್ ಭುಕ್ಯು ಘರೆ ಮೋಕ್ಲಿದಿದೊತೊ, ವಾಟ್ಪರ್ ಭವ್ಳ್ಯಾಮಾರಿನ್ ರಡ್ಕಿಜಾ಼ಶೆ, ಶನಕತೊ ಅವ್ಣಾಮ ಥೋಡು ಜ಼ಣು ದೂರ್ಥು ಐರ್ಹೂಸ್ನಿ" ಕರಿ ಬೋಲ್ಯೊ.
ಅನ ಖ್ಹಮ್ಜಿನ್ ಇನ ಶಿಷ್ಯರ್ನೆ, "ಆ ಉಜ್ಜಾ಼ಡಿ ಝ಼ಗೋಮ ಅತ್ರಾಅದ್ಮಿನ ಬಶ್ ಹುವ್ವಾಯೆತ್ರು ಖಾಣು ಕಿಜ಼್ಜಾಥು ಲ್ಯಾವಾನ ಉಶೆ?" ಕರಿ ಬೋಲ್ಯು.
ಯೇಸುನೆ ಇವ್ಣುನ, "ತುಮಾರಕನ ಕೆತ್ರ ರೋಟಾ ಛಾ಼?" ಕರಿ ಫುಛಾ಼ಯೊ.
ಇನ ಇವ್ಣೆ, "ಖ್ಹಾತ್ ರೋಟಾ ಛಾ಼" ಕರಿ ಬೋಲ್ಯು.
ತದೆ ಯೇಸುನೆ ಅದ್ಮಿನಿ ಝೂ಼ಂಡ್ನ ಜ಼ಮೀನ್ಪರ್ ಬೇಖ್ಹೊ ಕರಿ ಹುಕುಮ್ದಿದೊ. ಬಾದ್ಮ ಯೋ ಖ್ಹಾತ್ ರೋಟಾನ ಪಾಡಿಲೀನ್, ದೇವ್ನ ಧನ್ಯವಾದ್ ಕರೀನ್, ಯೋ ರೋಟಾನ ಖ್ಹಾರು ತೋಡಿನ್, "ಅಖ್ಖಾನ ವಾಟಪಾಡಿ ದೆವೊ" ಕರಿ ಇನ ಶಿಷ್ಯರ್ನ ದಿದೊ; ಶಿಷ್ಯರ್ನೆ ಇಮ್ಮಸ್ ಕರ್ಯು. ಎತ್ರೇಸ್ ಕಾಹೆತೆ ಇವ್ಣಾಕನ ಥೋಡು ನ್ಹಾನಿಮಾಛ್ಲಿಬಿ ಥು. ಯೇಸುನೆ ಇನಾಬಿ ಪಾಡಿಲೀನ್ ದೇವ್ನ ಧನ್ಯವಾದ್ ಕರೀನ್, "ಅನಾಬಿ ವಾಟಪಾಡಿ ದೆವೊ" ಕರಿ ಶಿಷ್ಯರ್ನ ಬೋಲ್ಯೊ. ಅದ್ಮಿಖ್ಹಾರು ಪೇಟ್ಭರೀನ್ ಖಾದು. ಬಾದ್ಮ ಶಿಷ್ಯರ್ನೆ ಉಭ್ರ್ಯುತೆ ಟುಕ್ಡಾವ್ನ ಜ಼ಮಾಕರ್ತಖ್ಹತರ್ ಖ್ಹಾತ್ ಟೋಕ್ರಾ ಭರಾಯ. ಹಿಜ್ಜಾ಼ ಕಮ್ಶಿಕಮ್ ಚಾರ್ ಹಜಾ಼ರ್ ಅದ್ಮಿಥು. ಬಾದ್ಮ ಯೇಸುನೆ ಯೋ ಖ್ಹಾರ ಅದ್ಮಿನ ಮೋಕ್ಲಿದೀನ್,
ಯೇಸುನೆ ಮೋಟ ಅಂಜೀರ್ನ ಝಾ಼ಡ್ಣ ಶಾಪ್ ದಿದೋತೆ
ತಿನವ್ಹಾಣೆ ಇವ್ಣೆ ಬೇಥಾನ್ಯಥು ಪಾಛು಼ ಆವಾನಿ ವಖ್ಹತ್ಮ, ಯೇಸುನ ಭುಕ್ಲಾಗ್ಯು. ತದೆ ಪಾಂದ್ಡು ಮ್ಹೇಲೈರ್ಹುಥೂತೆ ಏಕ್ ಅಂಜೀರ್ನ ಝಾ಼ಡಾನ ಯೇಸುನೆ ದೂರ್ಥೊ ದೇಖಿನ್, ಇನಾಮ ಎಖಾದು ಪಂಡು ಮಳ್ಶೆ ಕರಿ ಹಿಜ್ಜಾ಼ ಗಯೊ. ಕತೋಬಿ ಹಿಜ್ಜಾ಼ ಜಾ಼ವಾದಿನ್ ಖಲಿ ಪಾಂದ್ಡುಸ್ ಪಣ್ಕಿ, ಬಿಜು಼ ಶಾತ್ಬಿ ಕೋ ಥೂನಿ, ಶನಕತೊ ಯೋ ಅಂಜೀರ್ನ ಪಂಡಾ ಮ್ಹೇಲಾನ ದನ್ಕಾಹೆ. ತದೆ ಯೇಸುನೆ ಯೋ ಝಾ಼ಡಾನ, "ಹಂಕೇಥು ಕೋಣ್ಬಿ ತಾರಾಮ ಕದೇಬಿ ಪಂಡು ನಾ ಖಾಣುತೆ ಇಮ್ ಹುವಾದೆ!" ಕರಿ ಬೋಲ್ಯೊ.
ಅಜು಼ ಇನ ಶಿಷ್ಯರ್ನೆ ಆ ವಾತೆನ ಖ್ಹಮ್ಜ್ಯು.
ಅಂಜೀರ್ನ ಝಾ಼ಡ್ಥಿ ಶಿಕಾನು
ತಿನವ್ಹಾಣೆ ಇವ್ಣೆ ಮಾರಗ್ ಧರಿನ್ ಆವಾನಿ ವಖ್ಹತ್ಮ, ಯೋ ಅಂಜೀರ್ನು ಝಾ಼ಡ್ಣ ಇವ್ಣೆ ದೇಖ್ಯ. ಯೋ ಜ಼ಡ್ ಖ್ಹಮೇದ್ಥೂಸ್ ಖ್ಹುಕೈಗಯೂಥು. ತದೆ ಪೇತ್ರನೆ ಗಯೋತೆ ದನ್ನೆ ಚಾ಼ಲ್ಯುಥೂತೆ ಇನ ಯಾದ್ಕರಿನ್ ಯೇಸುನ, "ಗುರು ಹಂದೇಕ್, ತುನೆ ಶಾಪ ದಿದೊಥೋತೆ ಅಂಜೀರ್ನು ಝಾ಼ಡ್ ಖ್ಹುಕೈಗಯು!" ಕರಿ ಬೋಲ್ಯೊ,
ತದೆ ಯೇಸುನೆ ಇವ್ಣುನ ಫರೈನ್ ಬೋಲ್ಯೋಕಿ, "ದೇವ್ಪರ್ ವಿಶ್ವಾಸ್ ರ್ಹವಾದೆ. ಮೇ ತುಮುನ ಖ್ಹಾಚ ಬೋಲುಸ್, ಕೋಣ್ತೋಬಿ ಆ ಪಹಾಡ್ನ, ‘ತೂ ಉಖ್ಡೈ ಜೈ಼ನ್, ದರ್ಯಾವ್ಮ ಪಡ್’ ಕರಿ ಬೋಲಿನ್ ಇನ ದಿಲ್ಮ ಗುಮಾನಿ ಕರ್ಯೊಕೊಂತೆ, ಯೋ ಬೋಲ್ಯೊತೆ ಇಮ್ಮಸ್ ಉಷೆಕರಿ ನಂಬ್ಯೋತೊ, ಯೋ ಬೋಲ್ಯೊತೆ ಇಮ್ಮಸ್ ಇನ ಉಶೆ. ಇನಾಖ್ಹಾಜೆಸ್ ಮೇ ತುಮೂನ ಬೋಲುಸ್ಕಿ: ತುಮೆ ಪ್ರಾರ್ಥನೆ ಕರಿನ್ ಶಾತ್ ಮಾಂಗೋಸ್ಕಿ ಯೋ ತುಮೂನ ಮಳೀರ್ಹುಸ್ ಕರಿ ನಂಬೊ, ತದೆ ತುಮೆ ಶಶ್ಶಾತ್ ಮಾಂಗಿಲಿದಾಕಿ ಯೋ ತುಮುನ ಮಳ್ಶೆ. ಎತ್ರೇಸ್ ಕಾಹೆತೆ ತುಮೆ ಭೀರಿನ್ ಪ್ರಾರ್ಥನೆ ಕರಾನಿ ವಖ್ಹತ್ಮ, ತುಮೂನ ಕಿನಾಪರ್ಬಿ ಶಾತ್ತೋಬಿ ದಾವೊ ರ್ಹಯೂತೊ ಇನ ಮಾಪ್ ಕರೊ, ತದೆ ಪರಲೋಕ್ಮ ಛಾ಼ತೆ ತುಮಾರೊ ಬಾಬಿ ಜಿನು ತುಮೆ ಕರ್ಯಾತೆ ಗಲ್ತಿನ ಮಾಪ್ ಕರಿನಾಕ್ಶೆ" ಕರಿ ಬೋಲ್ಯೊ.
ಯೇಸುನೆ ಪಹಿಲ ಶಿಷ್ಯರ್ನ ಬುಲಾಯೋತೆ
ಏಕ್ ದನ್ನೆ ಯೇಸು ಗೆನೆಸರೇತ್ ದರ್ಯಾವ್ನ ಕನಾರಿಕನ ಭೀಯೋಥೊ. ತದೆ ಅದ್ಮಿಖ್ಹಾರು ದೇವ್ನಿ ವಚನ್ ಖ್ಹಮ್ಜಾ಼ನಖ್ಹಾಜೆ ಧಕೇಲ-ಧಕೇಲಿ ಹೋತುಹುಯಿನ್, ಇನ ಅಶ್ಪಿಶ್ ಆಯಿನ್ ಭರಾಯು ತದೆ ದರ್ಯಾವ್ನಿ ಕನಾರಿಕನ ಭೀರಿಥೀತೆ ಬೇ ಡೋಣ್ಣಾ ಯೇಸುನೆ ದೇಖ್ಯೊ. ಮಾಛ್ಲು಼ ಖ್ಹಾವಾಳು ಖ್ಹಾರು ಡೋಣ್ಮಾಥು ಭಾರ್ ಆಯಿನ್, ಇವ್ಣು-ಇವ್ಣು ಜಾ಼ಳು ಧೊವ್ಕರ್ತೂಥು. ಯೋ ಡೋಣೆಮಾಥು ಸೀಮೋನ್ನಿ ಏಕ್ ಡೋಣ್ಮ ಯೇಸು ಚ಼ಢೀನ್, ಕನಾರೆಕಂಥು ಜ಼ರದೂರ್ ಡೋಣ್ಣಾ ಧಕೇಲ್ ಕರಿ ಇನ ಬೋಲಿಲಿದೊ. ಬಾದ್ಮ ಡೋಣ್ಮ ಬೇಶಿನ್, ಯೋ ಅದ್ಮಿನಿ ಭೀಡ್ಣ ವಚನ್ನ ಬೋಲಿದಿದೊ.
ವಚನ್ ಬೋಲಿದ್ಯವಾನ ಬಾದ್ಮ ಯೇಸುನೆ ಸೀಮೋನ್ನ, "ಗಧಾರ್ ಪಾಣಿನಿ ಝ಼ಗೋಮ ಡೋಣ್ಣಾ ಚ಼ಲೈನ್, ಮಾಛ್ಲು಼ ಧರಾನ ಖ್ಹಾಜೆ ತುಮಾರು ಜಾ಼ಳು ನಾಖೊ" ಕರಿ ಬೋಲ್ಯೊ.
ತದೆ ಸೀಮೋನ್ನೆ, "ಗುರು, ಹಮೆ ರಾತ್ ಅಖ್ಖು ಮ್ಹಿನತ್ ಕರ್ಯಾತೋಬಿ, ಏಕ್ ಮಾಛ್ಲು಼ಬಿ ಕೋಮಳ್ಯುನಿ, ಕತೋಬಿ ತಾರಿ ವಾತ್ಪರ್, ಮೇ ಜಾ಼ಳು ನಾಖುಸ್" ಕರಿ ಬೋಲ್ಯೊ. ತದೆ ಇವ್ಣೆ ಜಾ಼ಳಾವ್ನ ನಾಖ್ಯು. ತದೆ ಮಾಛ಼್ಲಾನಿ ಗುಡ್ಡಾರಾಶೆ ಜಾ಼ಳಾವ್ಮ ಖ್ಹಪ್ಡ್ಯು. ಅನೇಥಿ ಇವ್ಣು ಜಾ಼ಳು ಫಾಟಾನ ಐಲಾಗ್ಯೂಥು. ತದೆ ಇವ್ಣೆ ಬಿಜಿ ಡೋಣ್ಮ ಥೂತೆ ಇವ್ಣು ಜೋ಼ಡೆವಾಳನ ಹಾತ್ನೊ ಝಾ಼ಲೊ ಕರೀನ್, ಮದತ್ನಖ್ಹಾಜೆ ಬುಲಾಯು. ಇವ್ಣೆ ಆಯಿನ್ ಭೇ ಡೋಣ್ಮ ಮಾಛ್ಲು಼ ಭರಾಖ್ಹತರ್, ಯೋ ಡೋಣೆ ಡುಬಾನಿಘೋಣಿ ಹುವ್ವಾಲಗ್ಯೂಥು. ಅನ ದೇಖಿನ್ ಸೀಮೋನ್ ಪೇತ್ರನೆ ಯೇಸುನ ಗುಡ್ಘ್ಯಪರ್ ಪಡೀನ್, "ಪ್ರಭು ಮನ ಮ್ಹೆಂದಿನ್ ಜಾ಼! ಮೇ ಪಾಪಿ ಅದ್ಮಿ ಹುಯಿರ್ಹೋಸ್!" ಕರಿ ಬೋಲ್ಯೊ.
ಸೀಮೋನ್ನಾಬಿ ಇನ ಜೋ಼ಡ್ಮ ಥೂತೆ ಬಿಜ಼ ಖ್ಹಾರಾನಾಬಿ, ಇವ್ಣೆ ಧರ್ಯೂತೆ ಮಾಛ಼್ಲಾವ್ನ ದೇಖಿನ್ ಆಶ್ಚರ್ಯ ಹುಯು. ಸೀಮೋನ್ನ ಜೋ಼ಡ್ವಾಳ ಹುಯಿರ್ಹಾಥಾತೆ ಜೆಬೆದಾಯನ ಛಿಯ್ಯಾ ಯಾಕೋಬ ಅಜು಼ ಯೋಹಾನನೆಬಿ ಇಮ್ಮಸ್ ಆಶ್ಚರ್ಯಖಾದು. ತದೆ ಯೇಸುನೆ ಸೀಮೋನ್ನ, "ಡರ್ನಕೊ, ಆಜ಼್ಥು ತೂ ಅದ್ಮಿನ ಖ್ಹಾವಾನು ಕಾಮ್ ಕರೀಶ್!" ಕರಿ ಬೋಲ್ಯೊ.
ಇವ್ಣೆ ಇವ್ಣು ಡೋಣೇನ ಕನಾರಿಕನ ಲಯಿನ್, ತಮಾಮ್ ರಾಛಾ಼ನ ಮ್ಹೆಂದಿನ್, ಯೇಸುನ ಕೇಡೆ ಗಯ.
ಯೇಸುನೆ ದರ್ಯಾವ್ನ ಖ್ಹೊಪ್ ಕರ್ಯೊತೆ
ಏಕ್ ದನ್ನೆ ಯೇಸು ಇನ ಶಿಷ್ಯರ್ನ ಜೋ಼ಡೆ, ಏಕ್ ಡೋಣ್ಮ ಚ಼ಢೀನ್ ಬೇಶಿಗಯೊ, ಅಜು಼ ಇವ್ಣುನ, "ಚಾ಼ಲೊ, ಅಪ್ಣೆ ದರ್ಯಾವ್ನಿ ಪಾರ್ಲಿ ಬಾಜೂ಼ನ ಜೈ಼ಯೆ" ಕರಿ ಬೋಲ್ಯೊ. ತದೆ ಇವ್ಣೆ ಡೋಣ್ಣಾ ಪಾಣಿಮ ಧಕೇಲಿನ್ ನಿಕ್ಳ್ಯು. ಇವ್ಣೆ ಜ಼ವ್ಕರ್ತುಥೂತೆ ತದೆ ಯೇಸುನ ನಿಂದರ್ ಆಯಿನ್ ಖ್ಹುಯಿಗಯೊ. ಏಕ್ದಮ್ ಮೋಟೊ ವಹಿರೊ ವಾಗಿನ್, ಡೋಣ್ಮ ಪಾಣಿ ಭರಾವಲಗ್ಯೂಥು. ಅನೇಥಿ ಇವ್ಣೆ ಘಣಿ ಮುಶ್ಕಿಲ್ಮ ಪಡಿಗಯ. ತದೆ ಶಿಷ್ಯರ್ ಖ್ಹಾರು ಯೇಸುಕನ ಐನ್, "ಗುರು, ಗುರು, ಹಮೆ ಮರ್ವಾನ ಆಯಾನಿ!" ಕರಿ ಬೋಲ್ಯ.
ತದೆ ಯೇಸುನೆ ಉಠೀನ್ ವಹಿರನಾಬಿ, ಪಾಣಿನು ಝೋ಼ಕಾಳ್ಯನಾಬಿ ಗುರ್ಕಾಯೊ. ಗುರ್ಕಾವಖ್ಹತರ್ ಯೋ ಭೀರಿಗಯು ಅಜು಼ ಖ್ಹೊಪೊ ಹುಯಿಗಯು. ಬಾದ್ಮ ಯೇಸುನೆ ಇನ ಶಿಷ್ಯರ್ನ, "ತುಮಾರಿ ವಿಶ್ವಾಸ್ ಕಿಜ಼್ಜಾ ಗೈ?" ಕರಿ ಪುಛಾ಼ಯೊ.
ಕತೋಬಿ ಇವ್ಣೆ ಆಶ್ಚರ್ಯಖಾದು ಅಜು಼ ಡರಿಗಯು, ಅಜು಼ ಬೋಲ್ಯೂಕಿ, "ಆ ಅದ್ಮಿ ಕೋಣ್ ಉಶೆ? ವಹಿರನಾಬಿ, ಝೋ಼ಕಾಳ್ಯನಾಬಿ ಹುಕುಮ್ ದೇಸ್ನಿ; ಯೋಅಖ್ಖುಬಿ ಆ ಬೋಲಾತೆ ಇಮ್ ಖ್ಹಮ್ಜಾ಼ಸ್ನಿ!" ಕರಿ ಏಕ್ಥಿ-ಏಕ್ ಬೋಲಿಲಿದು
ಯೇಸುನೆ ದರ್ಯಾವ್ನ ಖ್ಹೊಪ್ ಕರ್ಯೊತೆ
ಏಕ್ ದನ್ನೆ ಯೇಸು ಇನ ಶಿಷ್ಯರ್ನ ಜೋ಼ಡೆ, ಏಕ್ ಡೋಣ್ಮ ಚ಼ಢೀನ್ ಬೇಶಿಗಯೊ, ಅಜು಼ ಇವ್ಣುನ, "ಚಾ಼ಲೊ, ಅಪ್ಣೆ ದರ್ಯಾವ್ನಿ ಪಾರ್ಲಿ ಬಾಜೂ಼ನ ಜೈ಼ಯೆ" ಕರಿ ಬೋಲ್ಯೊ. ತದೆ ಇವ್ಣೆ ಡೋಣ್ಣಾ ಪಾಣಿಮ ಧಕೇಲಿನ್ ನಿಕ್ಳ್ಯು. ಇವ್ಣೆ ಜ಼ವ್ಕರ್ತುಥೂತೆ ತದೆ ಯೇಸುನ ನಿಂದರ್ ಆಯಿನ್ ಖ್ಹುಯಿಗಯೊ. ಏಕ್ದಮ್ ಮೋಟೊ ವಹಿರೊ ವಾಗಿನ್, ಡೋಣ್ಮ ಪಾಣಿ ಭರಾವಲಗ್ಯೂಥು. ಅನೇಥಿ ಇವ್ಣೆ ಘಣಿ ಮುಶ್ಕಿಲ್ಮ ಪಡಿಗಯ. ತದೆ ಶಿಷ್ಯರ್ ಖ್ಹಾರು ಯೇಸುಕನ ಐನ್, "ಗುರು, ಗುರು, ಹಮೆ ಮರ್ವಾನ ಆಯಾನಿ!" ಕರಿ ಬೋಲ್ಯ.
ತದೆ ಯೇಸುನೆ ಉಠೀನ್ ವಹಿರನಾಬಿ, ಪಾಣಿನು ಝೋ಼ಕಾಳ್ಯನಾಬಿ ಗುರ್ಕಾಯೊ. ಗುರ್ಕಾವಖ್ಹತರ್ ಯೋ ಭೀರಿಗಯು ಅಜು಼ ಖ್ಹೊಪೊ ಹುಯಿಗಯು. ಬಾದ್ಮ ಯೇಸುನೆ ಇನ ಶಿಷ್ಯರ್ನ, "ತುಮಾರಿ ವಿಶ್ವಾಸ್ ಕಿಜ಼್ಜಾ ಗೈ?" ಕರಿ ಪುಛಾ಼ಯೊ.
ಕತೋಬಿ ಇವ್ಣೆ ಆಶ್ಚರ್ಯಖಾದು ಅಜು಼ ಡರಿಗಯು, ಅಜು಼ ಬೋಲ್ಯೂಕಿ, "ಆ ಅದ್ಮಿ ಕೋಣ್ ಉಶೆ? ವಹಿರನಾಬಿ, ಝೋ಼ಕಾಳ್ಯನಾಬಿ ಹುಕುಮ್ ದೇಸ್ನಿ; ಯೋಅಖ್ಖುಬಿ ಆ ಬೋಲಾತೆ ಇಮ್ ಖ್ಹಮ್ಜಾ಼ಸ್ನಿ!" ಕರಿ ಏಕ್ಥಿ-ಏಕ್ ಬೋಲಿಲಿದು
ಯೇಸುನೆ ಭೂತ್ಖ್ಹಾರು ಧರಿರಾಖ್ಯುಥೂತೆ ಏಕ್ ಅದ್ಮಿನ ಅಛ್ಛು಼ ಕರ್ಯೊತೆ
ಯೇಸು ಅಜು಼ ಇನು ಶಿಷ್ಯರ್ ಗಲಿಲಾಯಥು ಗೆರಸೇನವಾಳನು ತಬರ್ಖಾನ ಆಯಿನ್ ಪೋಚ್ಯಾ.
ದನ್ ಡುಬಾಲಗ್ಯೋಥೊ, ತದೆ ಯೋ ಭಾರ ಜ಼ಣ ಶಿಷ್ಯರ್ ಯೇಸುಕನ ಐನ್, "ಆ ಅದ್ಮಿನಿ ಝೂ಼ಂಡ್ನ ಮೋಕ್ಲಿದೆ, ಅವ್ಣೆ ಅಶ್ಪಿಶ್ ಛಾ಼ತೆ ಖ್ಹಾರ ಗಾಂಬ್ಡಿಮ ಜೈ಼ನ್, ಖಾವಾನ ಖಾಣು, ಖ್ಹುವ್ವಾನ ಝ಼ಗೋನ ಢೂಂಡಿಲ್ಯವಾದೆ. ಶನಕತೊ ಆ ಉಜ್ಜಾ಼ಡಿ ಝ಼ಗೊ" ಕರಿ ಬೋಲ್ಯ.
ತದೆ ಯೇಸುನೆ, "ತುಮೇಸ್ ಅವ್ಣುನ ಖಾಣು ದೆವೊ" ಕರಿ ಇವ್ಣುನ ಬೋಲ್ಯೊ.
ತದೆ ಇವ್ಣೆ, "ಹಮಾರಕನ ಪಾಚ಼್ ರೋಟಾ ಅಜು಼ ಬೇ ಮಾಛ಼್ಲಾ ಮ್ಹೆಂದಿನ್, ಶಾತ್ಬಿ ಕೊಯ್ನಿ. ಹಮೆ ಜೈ಼ನ್ ಆ ಖ್ಹಾರ ಅದ್ಮಿನಖ್ಹಾಜೆ ಖಾಣು ಮೋಲ್ಲೀನ್ ಆವ್ಣುಕಿ ಶು?" ಕರಿ ಪುಛಾ಼ಯ. ಹಿಜ್ಜಾ಼ ಪರ್ಖ್ಹಾ ಅದ್ಮಿಸ್ ಪಾಚ಼್ ಹಜಾ಼ರ್ಜ಼ಣು ಥೂ.
ತದೆ ಯೇಸುನೆ ಇನ ಶಿಷ್ಯರ್ನ, "ಅದ್ಮಿನ ಖ್ಹಾರು ಏಕೇಕ್ ಶಾಲ್ಮ ಅಡೈವಿಖ್ಹ್-ಅಡೈವಿಖ್ಹ್ ಅದ್ಮಿ ಕರೀನ್ ಹೇಟ್ ಬೆಖ್ಹಾಡೊ" ಕರಿ ಬೋಲ್ತಾನ, ಇವ್ಣೆ ಇಮ್ಮಸ್ ಬೆಖ್ಹಾಡ್ಯ. ಬಾದ್ಮ ಯೇಸುನೆ ಯೋ ಪಾಚ಼್ ರೋಟಾ ಅಜು಼ ಬೇ ಮಾಛ಼್ಲಾನ ಪಾಡಿಲೀನ್, ಪರಲೋಕ್ ಭಣಿ ದೇಖಿನ್, ಯೋ ರೋಟಾ ಅಜು಼ ಮಾಛ್ಲಾ಼ವ್ನಟೇಕೆ ದೇವ್ನ ಧನ್ಯವಾದ್ ಕರೀನ್, ಇನ ತೋಡಿನ್, ಅದ್ಮಿ ಖ್ಹಾರಾವ್ನ ವಾಟ ಪಡಾನಟೇಕೆ ಶಿಷ್ಯರ್ನ ಹಾತ್ಮ ದಿದೊ. ಅದ್ಮಿಖ್ಹಾರು ಪೇಟ್ಭರಿ ಖೈನ್, ಬಶ್ಹುಯು ಅಜು಼ ಶಿಷ್ಯರ್ನೆ ಉಭ್ರ್ಯುತೆ ಟುಕ್ಡಾವ್ನ ಜ಼ಮಾಕರ್ತಖ್ಹತರ್ ಭಾರ ಟೋಕ್ರಾ ಭರಾಯ.
ಕಾನಾ ಗಾಮ್ನು ವ್ಯಹಾ
ತೀನ್ನೆ ದನ್ಮ ಗಲಿಲಾಯನು ಕಾನಾಕರಿ ಗಾಮ್ಮ ಏಕ್ ವ್ಯಹಾ ಥೂ. ಯೇಸುನಿ ಆಯ ಹಿಜ್ಜಾ಼ ಥಿ. ಯೇಸುನ ಅಜು಼ ಇನ ಶಿಷ್ಯರ್ನಾಬಿ ವ್ಯಹಾನ ಬುಲೈರಾಖ್ಯುಥು. ದ್ರಾಕ್ಷಿನು ರಖ್ಹ್ ಪುರ್ಯೂಕೊಂತೆ ಇನಖ್ಹಾಜೆ, ಯೇಸುನಿ ಆಯಾ ಇನ ದ್ರಾಕ್ಷಿನು ರಖ್ಹ್ ಕೊಯ್ನಿ" ಕರಿ ಬೋಲಿ.
ಯೇಸುನೆ ಇನ, "ಆಯಾ, ಮನ ಆ ಅಖ್ಖು ಶನ ಬೋಲಸ್? ಮಾರಿ ವಖ್ಹತ್ ಬಿಜೂ಼ಬಿ ಕೋ ಐರ್ಹೀನಿ" ಕರಿ ಬೋಲ್ಯೊ.
ತದೆ ಯೇಸುನಿ ಆಯಾನೆ ಆಳ್ನ ಖ್ಹಾರು, "ಯೋ ತುಮೂನ ಶಾತ್ ಬೋಲಸ್ಕಿ, ಯೋ ಕರೊ" ಕರಿ ಬೋಲಿ.
ಬಂಡಾಥಿ ಬಣೈಹುಯು ಛೊ಼ ಟೊಟ್ಟಿ ಮ್ಹೇಲಿರಾಖ್ಯುಥು, ಯೆಹೂದ್ಯರ್ನಿ ಪದತ್ತಿಮ ಶುದ್ದಿ ಕರಾನಟೇಕೆ, ಅನ ರಾಕ್ತುಥು. ಹರೇಕ್ ಟೊಟ್ಟಿಬಿ ಖ್ಹುಮಾರ್ ಚಾರಿಖ್ಹ್ ಥಿ ಏಕ್ ಖ್ಹೋ ವೀಖ್ಹ್ ಲೀಟರ್ ಪಾಣಿಭರಾವ ಎವ್ಡು ಮೋಟು ಥೂ. ಯೇಸು ಯೋ ಆಳ್ ಖ್ಹಾರಾನ, "ಹೈರಾತೆ ಟೊಟ್ಟಿಮ ಪಾಣಿ ಭರೊ" ಕರಿ ಬೋಲ್ಯೊ. ಇಮ್ಮಸ್ ಇವ್ಣೆ ಯೋ ಟೊಟ್ಟಿಮ ಪಾಣಿ ಬಮ್ಭರ್ಯು. ತದೆ ಯೇಸುನೆ ಇವ್ಣುನ, "ಹಮ್ಕೆ ಅನಾಮಾನು ಥೋಡು ಪಾಣಿನ ಕಾಡಿಲಿಜೈ಼ನ್, ಖಾಣು-ಪಾಣಿನಿ ಬಾರೇಮ ದೇಖಿಲೇವ್ಕರಾಸ್ತೆ ಮೋಟಾನ ದೆವೊ" ಕರಿ ಬೋಲ್ಯೊ. ಇವ್ಣೆ ಲೀಜೈ಼ನ್ ದಿದು, ತದೆ ಇನೆ ದ್ರಾಕ್ಷಿನು ರಖ್ಹ್ ಬಣಿರ್ಹುಥೂತೆ ಪಾಣಿನ ಚಾ಼ಖಿ ದೇಖ್ಯೊ. ಯೋ ದ್ರಾಕ್ಷಿನು ರಖ್ಹ್ ಕಿಜ್ಗಾ಼ಥು ಆಯು ಕರಿ ಇನ ಮಾಲುಮ್ ಕೋ ಥೂನಿ, ಕತೋಬಿ ಪಾಣಿ ಕಾಡ್ಯುತೆ ಯೋ ಆಳ್ ಖ್ಹಾರಾನ ಆ ಮಾಲುಮ್ ಥು. ತದೆ ಇನೆ ಯೋ ವ್ಯಹಾನೊ ವ್ಹೆತುಲ್ಡಾನ ಬುಲಾಯು. ಅಖ್ಖುಜ಼ಣು ಅಛ್ಛು಼ ದ್ರಾಕ್ಷಿನು ರಖ್ಹ್ನ ಪಹಿಲೆ ದೀನ್ ನಿಷಾಛ಼ಡಿಗತೊ ತದೆ ಮಾಮುಲಿನ ರಖ್ಹ್ನ ದೇಸ್. ತೂತೊ ಅಛ಼್ಛ ದ್ರಾಕ್ಷಿನ ರಖ್ಹ್ನ ಹಮ್ಕೆಲಗು ದೀರಾಖ್ಯೊಸ್ ಕರಿ ಬೋಲ್ಯೊ.
ಯೇಸುನೆ ಆ ಪಹಿಲು ಖ್ಹಣೇದ್ನ ಕಾಮ್ನ ಗಲಿಲಾಯನು ಕಾನಾ ಕರಿ ಗಾಮ್ಮಕರ್ಯೊ. ಹಿಜ಼್ಜ ಯೇಸು ಇನ ಮಹಿಮೆನ ವತಾಳ್ಯೊ, ಅಜು಼ ಇನ ಶಿಷ್ಯರ್ನೆ ಇನಾಪರ್ ವಿಶ್ವಾಸ್ ಕರ್ಯಾ.
ಫಿಲಿಪ್ಪನ ಪರ್ಖಾನಖ್ಹಾಜೆ ಯೇಸುನೆ ಅಮ್ ಪುಛಾ಼ಯೋತೆ; ಖ್ಹಾಚಿ ಶಾತ್ ಕತೊ, ಯೋ ಶಾತ್ ಕರ್ನು ಕರಿ ಇನ ಅಗಾಡಿಸ್ ಮಾಲುಮ್ ಥೂ.
ತದೆ ಫಿಲಿಪ್ಪನೆ, "ಹಜ಼್ಜ ಛಾ಼ತೆ ಹರೇಕ್ ಅದ್ಮಿನ ಏಕೇಕ್ ಟುಕ್ಡೊ ರೋಟೊ ದೇಣುಕತೋಬಿ, ಬೇಖ್ಹೊ ರೂಪಾನ ಪಾವ್ಲೆಥೀಬಿ ಜಾ಼ಖ್ಹತ್ ಹೋಣು" ಕರಿ ಬೋಲ್ಯೊ.
ತದೆ ಯೇಸುನೊ ಬಿಜೇಕ್ ಜ಼ಣೊ ಶಿಷ್ಯ ಹುಯಿರ್ಹೊಥೋತೆ, ಸೀಮೋನ್ ಪೇತ್ರನೊ ಭೈ ಅಂದ್ರೆಯನೆ, ಯೇಸುನ, "ಹಜ್ಜಾ಼ ಛಾ಼ತೆ ಏಕ್ ಛೋ಼ಕ್ರಕನ ಪಾಚ಼್ ಘೌನ ರೋಟಾ ಅಜು಼ ಬೇ ಮಾಛ಼್ಲಾ ಛಾ಼, ಕತೋಬಿ ಅತ್ರಾಖ್ಹಾರ ಅದ್ಮಿನ ಯೋ ಪೂರ್ಶೆಕೊಯ್ನಿ" ಕರಿ ಬೋಲ್ಯೊ.
ಯೇಸುನೆ ಇವ್ಣುನ, "ಅದ್ಮಿನ ಖ್ಹಾರು ಬೇಖ್ಹೊ ಕರಿ ಬೋಲ್" ಕರಿ ಬೋಲ್ಯೊ. ಯೋ ಝ಼ಗೋಪರ್ ಘಣು ಘಾಖ್ಹ್ ಫುಟಿರ್ಹೂಥು. ಅದ್ಮಿಖ್ಹಾರು ಘಾಖ್ಹ್ಪರ್ ಬೇಶಿಗಯು. ಇವ್ಣಾಮ ಪರ್ಖ್ಹಾ ಅದ್ಮಿಸ್ ಕಮ್ಶಿಕಮ್ ಪಾಚ಼್ ಹಜಾ಼ರ್ಜ಼ಣು ಥೂ. ಯೇಸುನೆ ಯೋ ರೋಟಾನ ಪಾಡೀನ್, ದೇವ್ನ ಧನ್ಯವಾದ್ ಕರೀನ್, ಹಿಜ್ಜಾ಼ ಬೆಠುಥೂತೆ ಅದ್ಮಿನ ವಾಟಪಾಡಿ ದಿದೊ. ಮಾಛ್ಲಾ಼ನಾಬಿ ಇಮ್ಮಸ್ ವಾಟಪಾಡಿ ದಿದೊ, ತಮಾಮ್ ಅದ್ಮಿ ಇವ್ಣುನ ಕೆತ್ರು ಹೋಣುಕಿ ಎತ್ರು ಖಾದು. ಇವ್ಣೆ ಖ್ಹಾರು ಖೈನ್, ಪೇಟ್ ಭರೈಜಾ಼ವಾನಿ ಬಾದ್ಮ ಯೇಸುನೆ ಇನ ಶಿಷ್ಯರ್ನ, "ಉಭ್ರ್ಯುತೆ ಟುಕ್ಡಾವ್ನ ಎಕ್ಟು ಕರೊ, ಕೆಹೂಬಿ ಖರಾಬ್ ನಾಹೊಣು" ಕರಿ ಬೋಲ್ಯೊ. ತದೆ ಇವ್ಣೆ ಯೊ ಪಾಚ಼್ ಘೌನ ರೋಟಾನ ಟುಕ್ಡಾವ್ನ ಎಕ್ಟು ಕರಾಖ್ಹತರ್, ಭಾರ ಟೋಕ್ರಾ ಭರಾಯು.
ಇವ್ಣೆ ಡೋಣ್ಣಾ ಹುಟ್ ಘಾಲಿನ್ ಚ಼ಲಾವ್ತಹುಯಿನ್, ತೀನ್ಕಿ-ಚಾರ್ ಮೈಲ್ ಜೈ಼ನ್ ಪೋಚಾ಼ನ ಬಾದ್ಮ ಯೇಸು ಪಾಣಿಪರ್ ಚಾ಼ಲ್ತೊಹುಯಿನ್ ಡೋಣ್ಣಾ ಖನ್ನೆ ವಳ್ಯಾವಾತೆ ದೇಖಿನ್, ಇವ್ಣೆ ಡರಿಗಯಾ. ಯೇಸುನೆ ಇವ್ಣುನ, "ಡರೊ ನಕೊ, ಯೊ ಮೇಸ್"! ಕರಿ ಬೋಲ್ಯೊ. ತದೆ ಇವ್ಣೆ ಇನ ಡೋಣ್ಮ ಬುಲೈಲ್ಯವಾನ ಕರ್ಯಾ, ತದ್ನು-ತದ್ದೇಸ್ ಇವ್ಣೆ ಜಾ಼ವ್ಣುಥೂತೆ ಝ಼ಗೋಕನ ಡೋಣ್ ಜೈ಼ನ್ ಪೋಚಿಗಯ್.
ಯೇಸು ಖ್ಹಾತ್ ಶಿಷ್ಯರ್ನ ದೆಖಾಯೊತೆ
ಅನ ಬಾದ್ಮ, ಯೇಸು ತಿಬೇರಿಯ ದರ್ಯಾವ್ಕನ ಇನ ಶಿಷ್ಯರ್ನ ದೆಖಾಯೊ. ಯೋ ಅಮ್ ಚಾ಼ಲ್ಯುತೆ. ಸೀಮೋನ್ ಪೇತ್ರಬಿ, ದಿದುಮಕರಿ ತೋಮಾಬಿ, ನತಾನಿಯೇಲ್ ಆ ಗಲಿಲಾಯನು ಕಾನಾ ಕರಿ ಗಾಮ್ವಾಳೊ, ಜೆಬೆದಾಯನ ಛಿಯ್ಯಾ, ಅಜು಼ ಯೇಸುನ ಬಿಜ಼ ಬೇ ಶಿಷ್ಯರ್ ಥಾ. ಸೀಮೋನ್ ಪೇತ್ರನೆ ಇವ್ಣುನ, "ಮೇ ಮಾಛ಼್ಲಾ ಖ್ಹಾವಾನ ವಳ್ಯೊಜ಼ವುಸ್" ಕರಿ ಬೋಲ್ಯೊ.
ತದೆ ಇವ್ಣೆ, "ಹಮೇಬಿ ತಾರ ಜೋ಼ಡೆ ಐಯೇಸ್" ಕರಿ ಇನ ಬೋಲ್ಯ. ಇವ್ಣೆ ಜೈ಼ನ್, ಡೋಣ್ ಚ಼ಢ್ಯಾ, ಕತೋಬಿ ಯೋ ರಾತ್ ಅಖ್ಖು ಏಕ್ ಮಾಛ್ಲು಼ಬಿ ಮಳ್ಯುಕೊಯ್ನಿ. ವ್ಹಾಣು ಹುವ್ವಾದೀನ್, ಯೇಸು ಕನಾರೆಕನ ಭಿಯೋಥೊ; ತೋಬಿ ಶಿಷ್ಯರ್ನ ಯೋ ಯೇಸು ಕರಿ ಮಾಲುಮ್ ಕೋ ಪಡ್ಯುನಿ. ತದೆ ಯೇಸುನೆ ಇವ್ಣುನ, "ದೋಸ್ತಿವೊ ತುಮೂನ ಮಾಛ್ಲು಼ ಮಳ್ಯುಕಿ ಶು?" ಕರಿ ಪುಛಾ಼ಯೊ.
ಇವ್ಣೆ, "ಕೊಯ್ನಿ" ಕರಿ ಜವಾಬ್ ದಿದಾ.
ಯೇಸುನೆ ಇವ್ಣುನ, "ಡೋಣ್ನಿ ಖಾವಿ ಬಾಜು಼ಮ ಜಾ಼ಳು ನಾಖ್ಯಾತೊ, ತುಮೂನ ಥೋಡು ಮಾಛ಼್ಲಾ ಮಳ್ಶೆ" ಕರಿ ಬೋಲ್ಯೊ. ಇವ್ಣೆ ಇಮ್ಮಸ್ ಜಾ಼ಳು ನಾಕ್ತಾನ ಘಣು ಮಾಛ಼್ಲಾ ಮಳ್ಯುತೆ ಇನಖ್ಹಾಜೆ, ಜಾ಼ಳಾನ ಪಾಛು಼ ಮಹಿ ಖೇಚಾ಼ನ ಕೋ ಹುಯೂನಿ.
ಯೇಸುನೊ ಪ್ಯಾರ್ನೊ ಶಿಷ್ಯನೆ ಪೇತ್ರನ, "ಯೋ ಪ್ರಭುಲಾ!" ಕರಿ ಬೋಲ್ಯೊ. ಸೀಮೋನ್ ಪೇತ್ರನೆ ಇನ ಖ್ಹಮ್ಜಿನ್, ಮಾಛ್ಲು಼ ಖ್ಹಾವಾನಖ್ಹಾಜೆ ಪೇತ್ರನೆ ಝೋ಼ಳ್ನಾನ ಕಾಡಿ ಮ್ಹೇಲಿರಾಖ್ಯೊಥೊ ಯೊ ಪಾಛು಼ ಉಪ್ಪರ್ಲ್ಯು ಝ಼ಗ್ಗಾನ ಪೇರ್ಹಿಲೀನ್ ದರ್ಯಾವ್ಮ ಕೂದಿ ಗಯೊ. ದರ್ಯಾವ್ನಿ ಕನಾರಿ ದೂರ್ ಶಾತ್ಬಿ ಕೋ ಥೂನಿ, ಖಲಿ ಖ್ಹೋ ಮೀಟರ್ ದೂರ್ ಥೂತೆ ಇನಖ್ಹಾಜೆ, ಬಿಜ಼ ಶಿಷ್ಯರ್ ಮಾಛ಼್ಲು ಭರೈರ್ಹುಥೂತೆ ಯೋ ಜಾ಼ಳಾನ ಖೇಚ಼್ತು ಹುಯಿನ್, ಡೋಣ್ಮಾಸ್ ಆಯು. ಇವ್ಣೆ ಡೋಣ್ಮಾಥು ಉತ್ರಿನ್, ಕನಾರೆ ಆವಾದಿನ್, ಕೋಲ್ಖ್ಹಾನಿ ಆಗ್ ಅಜು಼ ಇನಾಪರ್ ಮ್ಹೇಲಿರಾಖ್ಯುಥೂತೆ ಮಾಛ಼್ಲಾ ಅಜು಼ ಥೋಡು ರೋಟಾನಾಬಿ ದೇಖ್ಯು. ಯೇಸುನೆ ಇವ್ಣುನ, "ತುಮೆ ಹಮ್ಕೆ ಧರ್ಯಾತೆ ಮಾಛ್ಲಾ಼ವ್ಮ ಥೋಡು ಲ್ಯಾವೊ" ಕರಿ ಬೋಲ್ಯು.
ಸೀಮೋನ್ ಪೇತ್ರನೆ ಡೋಣ್ಣಾ ಮಹಿ ಜೈ಼ನ್, ಜಾ಼ಳಾನ ಕನಾರಿಕನ ಖೇಚಿ ಲಾಯೊ. ಯೋ ಏಕ್ಖ್ಹೊ ತೀನ್ಉಪ್ಪರ್ ಅಡೈವಿಖ್ಹ್ ಮೋಟಾ ಮಾಛ್ಲಾ಼ಥಿ ಭರೈರ್ಹೂಥು, ಎತ್ರುಬಲ್ಲ ಮಾಛ಼್ಲು ರ್ಹಯುತೋಬಿ ಜಾ಼ಳು ಫಾಟ್ಯುಕೊಯ್ನಿ.
Libertações
Jesus expulsou demônios com autoridade. Os espíritos impuros não resistiam à sua palavra e saíam imediatamente.
ಖ್ಹೋ ಶಿಪಾಯಿನೊ ಮೋಟಾನ ಆಳ್ನ ಯೇಸುನೆ ಅಛ್ಛು಼ ಕರ್ಯೊತೆ
ಯೇಸು ಕಪೆರ್ನೌಮ್ನ ಆವಾದಿನ್, ಖ್ಹೋಶಿಪಾಯಿನೊ ಮೋಟಾನೆ ಇನಾಕನ ಗಿಂಗೈನ್, "ಪ್ರಭು, ಮಾರೊ ಸೇವಕ್ ಲಖ್ವೊ ಮಾರಿನ್, ಘರ್ಮ ಛಾ಼ದ್ರಿಪರ್ ಪಡ್ಯೋಸ್ ಅಜು಼ ಅಜಾ಼ಥಿ ಘಣು ತರಪ್ಡುಕರಾಸ್" ಕರಿ ಬೋಲಿಲಿದೊ.
ಯೇಸುನೆ, "ಮೇ ಆಯಿನ್, ಇನ ಅಛ್ಛು಼ ಕರುಸ್" ಕರಿ ಬೋಲ್ಯೊ.
ತದೆ ಯೋ ಖ್ಹೋಶಿಪಾಯಿನೊ ಮೋಟಾನೆ, "ಪ್ರಭು, ತೂ ಮಾರ ಘರ್ಕನ ಆವಾಯೆತ್ರೆ ಮೇ ಲ್ಹಾಯೇಕ್ನೊ ಕಾಹೆ. ತೂ ಖಲಿ ಏಕ್ ವಾತೆ ಬೋಲ್ಯೋತೊ ಬಶ್, ಮಾರ ಸೇವಕ್ನ ಅಛ್ಛು಼ ಉಶೆ. ಮೇಬಿ ಬಿಜೇಕ್ ಅದಿಕಾರ್ನ ಹಾತ್ಹೇಟ್ ರ್ಹವಾಳೊ, ಮಾರ ಅದೀನ್ಮಾಬಿ ಸಿಪಾಯಿಖ್ಹಾರು ಛಾ಼. ಮೇ ಇವ್ಣಾಮ ಏಕ್ ಜ಼ಣಾನ ‘ಜಾ಼’ ಕರಿ ಬೋಲ್ಯೊತೊ ಜಾ಼ಸ್; ಬಿಜ್ಜೇಕ್ ಜ಼ಣಾನ, ‘ಆವ್’ ಕರಿ ಬೋಲ್ಯೋತೊ, ಆವಸ್; ಮಾರ ಆಳ್ನ, ‘ಅಮ್ನು-ಅಮ್ನು ಕರ್’ ಕರಿ ಬೋಲ್ಯೋತೊ, ಯೋ ಕರಸ್" ಕರಿ ಬೋಲ್ಯೊ.
ಯೇಸುನೆ ಅನಖ್ಹಮ್ಜಿನ್, ಆಶ್ಚರ್ಯಖೈನ್, ಇನ ಪೀಠೆ ವಳ್ಯಾವ್ತುಥೂತೆ ಇವ್ಣುನ, "ಮೇ ಅವ್ಡಿ ಮೋಟಿ ವಿಶ್ವಾಸ್ನ ಇಸ್ರಾಯೇಲ್ ಅದ್ಮಿಮಾಬಿ ಕೋ ದೇಖ್ಯೋನಿ ಕರಿ ತುಮೂನ ಖ್ಹಾಚಮಾಬಿ ಬೋಲುಸ್. ಅತ್ರೇಸ್ ಕಾಹೆತೆ, ಮೇ ತುಮೂನ ಬೋಲುಸ್ಕಿ, "ಪೂರಬ್ ಪಶ್ಚಿಮ್ ದಿಕ್ ಭಣೀಥು ಅದ್ಮಿ ಐನ್, ಸೊರ್ಗನು ರಾಜ್ಯಮ ಅಬ್ರಹಾಮ್, ಇಸಾಕ್ ಅಜು಼ ಯಾಕೋಬನ ಜೋ಼ಡೆ ಖಾಣನ ಬೇಖ್ಹ್ಶೆ; ಕತೋಬಿ ಕೋಣ್ ಆ ರಾಜ್ಯಮ ಮಳವಾಳೊಕಿ ಇವ್ಣೆ ಭಾರ್ ಅಂಧಾರಾಮ ಫೆಕೈಜಾ಼ಶೆ; ಹಿಜ್ಜಾ಼ ಇವ್ಣೆ ರೊವ್ಶೆ ಅಜು಼ ಕರ್-ಕರ್ ದಾತ್ ಚಾ಼ವಾನು ಉಶೆ" ಕರಿ ಬೋಲ್ಯೊ. ಅಜು಼ ಯೇಸುನೆ ಯೋ ಖ್ಹೋಶಿಪಾಯಿನೊ ಮೋಟಾನ, "ತೂ ವಿಶ್ವಾಸ್ ಕರ್ಯೊತೆ ಇಮ್ಮಸ್ ತುನ ಹುವಾದೆ, ಘರೆ ಜಾ಼" ಕರಿ ಬೋಲ್ಯೊ.
ಯೋಸ್ ವಖ್ಹತ್ಮ ಇನ ಸೇವಕ್ನ ಅಛ್ಛು಼ ಹುಯಿಗಯು.
ಯೇಸುನೆ ಭೂತ್ ಧರಿರಾಖ್ಯುಥೂತೆ ಬೇ ಜ಼ಣಾನ ಅಛ್ಛು಼ ಕರ್ಯೊತೆ
ಅನಬಾದ್ಮ ಯೇಸು ದರ್ಯಾವ್ನಿ ಪಾರ್ಲಿ ಬಾಜೂ಼ಮ ಥೂತೆ ಗದರೇನ್ ಕರಿ ತಬರ್ಖಾನ ಆವಾದಿನ್, ಭೂತ್ ಧರಿರಾಖ್ಯುಥೂತೆ ಬೇ ಜ಼ಣು ಮಖ್ಹಾಣ್ಯನಿ ಘವಿಮಾಥೊ ನಿಕ್ಳಿನ್, ಇನಖ್ಹಾಮ್ಣೆ ಆಯು. ಇವ್ಣೆ ಘಣು ಚ಼ಂಢಾಳಿ ಹುಯಿರ್ಹುಥೂತೆ ಇನಖ್ಹಾಜೆ ಯೋ ವಾಟೆ ಕೋಣ್ಬಿ ಕೋ ಫರ್ತುಥೂನಿ. ತದೇಸ್ ಇವ್ಣೆ, "ದೇವ್ನ ಛಿಯ್ಯಾ, ಹಮಾರೇಥಿ ತುನ ಶಾತ್ ಛಾ಼? ವಖ್ಹತ್ ಆವಾನ ಆಗಾಡಿಸ್ ಹಮೂನ ನಿಶತ್ ದ್ಯಾವಾನ ಐರ್ಹೋಸ್ಕಿ ಶು?" ಕರಿ ಚಿಕ್ರಿನ್ ಬೋಲ್ಯೊ.
ದರ್ರಾಶಿ ದೂರ್ ಪಾರಸ್ ಡೂಕರ್ನಿ ಏಕ್ ಮೋಟಿ ಝೂ಼ಂಡ್ ಚ಼ರೂಕರ್ತೂಥು. ಯೋ ಭೂತ್ಖ್ಹಾರು, "ತೂ ಹಮೂನ ಅವ್ಣ ಮಹಿಥು ನಖ್ಹಾಡ್ತೊ ಉಶೇತೊ, ಯೋ ಡೂಕರ್ನಿ ಝೂ಼ಂಡ್ನ ಮಹಿ ಮೋಕಲ್" ಕರಿ ಗಿಂಗೈಲಿದು.
ಯೇಸುನೆ ಇವ್ಣುನ, "ಜಾ಼ವೊ" ಕರಿ ಬೋಲ್ಯೊ. ತದೆ ಯೋ ಭೂತ್ಖ್ಹಾರು ಇವ್ಣ ಭೇ ಜ಼ಣಾನ ಮ್ಹೆಂದಿನ್, ಡೂಕರ್ನ ಮಹಿ ಪೆಶಿಗಯು. ತದ್ನು-ತದ್ದೇಸ್ ಡೂಕರ್ಖ್ಹಾರು ನಾಶಿನ್, ಪಹಡ್ನಿ ಕಥಾರ್ಪರ್ಥು ದರ್ಯಾವ್ಮ ಪಡೀನ್, ಡುಬಿನ್ ಮರಿಗಯು.
ತದೆ ಡೂಕರ್ ಚ಼ರಾವವಾಳು ಇವ್ಣೆ ಗಾಮ್ನ ಮಹಿ ನಾಶಿ ಜೈ಼ನ್, ಭೂತ್ ಧರಿರಾಖ್ಯುಥೂತೆ ಇವ್ಣುನ ಚಾ಼ಲ್ಯುತೆ ಖ್ಹಾರಿಸ್ ಬಾರೇಮ ಬೋಲ್ಯು. ತದೆ ಯೋ ತಬರ್ಖಾನು ಖ್ಹಾರುಸ್ ಅದ್ಮಿ ಯೇಸುನ ಮಳಾನಖ್ಹಾಜೆ ಆಯು; ಅಜು಼ ಇವ್ಣ ತಬರ್ಖಾನ ಮ್ಹೆಂದಿನ್ ಜಾ಼ ಕರಿ ಇನ ಗಿಂಗೈಲಿದು.
ಯೇಸುನೆ ಏಕ್ ಮುಕ್ಕಾನ ಅಛ್ಛು಼ ಕರ್ಯೊತೆ
ಇವ್ಣೆ ಭೇ ಜ಼ಣು ಹಿಜ್ಜಾ಼ಥು ಜಾ಼ವಾನಿ ವಖ್ಹತ್ಮ, ಥೋಡು ಅದ್ಮಿನೆ ಭೂತ್ ಧರಿರಾಖ್ಯುಥೂತೆ ಏಕ್ ಮುಕ್ಕಾನ ಯೇಸುಕನ ಲಾಯು. ಯೇಸುನೆ ಯೋ ಭೂತ್ನ ನಖ್ಹಾಡಾನ ಬಾದ್ಮ, ಯೋ ಮುಕ್ಕೊ ವಾತೆ ಬೋಲಾಲಗ್ಯೊ. ತದೆ ಯೋ ಅದ್ಮಿಖ್ಹಾರು, "ಇಸ್ರಾಯೇಲ್ಮ ಅಮ್ನು ಕಾಮ್ನ ಹಮೆ ಕದೇಸ್ ಕೋ ದೇಖಿರಾಖ್ಯಾನಿ!" ಕರಿ ಆಶ್ಚರ್ಯಖಾದು.
ಯೇಸು ಅಜು಼ ಬೆಲ್ಜಬೂಲ್
ಭೂತ್ ಧರಿರಾಖ್ಯುಥೂತೆ ಇನಖ್ಹಾಜೇಥಿ ಕಾಣು ಅಜು಼ ಮುಕ್ಕು ಹುಯಿರ್ಹುಥೂತೆ ಏಕ್ ಜ಼ಣಾನ ಯೇಸುಕನ ಲಾಯು. ಇನೆ ಇನ ಅಛ್ಛು಼ ಕರ್ತಾನ, ಇನ ಡೋಳಾ ಅಜು಼ ವಾತೆ ಆಯು.
ಏಕ್ ತಯೇಡಾನಿ ವಿಶ್ವಾಸ್ನಿ ಬಾರೇಮ
ಯೇಸು ಯೋ ಝ಼ಗೋನ ಮ್ಹೆಂದಿನ್, ತೂರ್ ಅಜು಼ ಸೀದೋನ್ ಖ್ಹಯೇರ್ನ ಖನ್ನೇನು ತಬರ್ಖಾನ ಚ಼ಲೆಗಯೊ. ಯೋ ಮುಲಕ್ಮ ರ್ಹೇತಿಥೀತೆ ಕಾನಾನ್ವಾಳಿ ಏಕ್ ತಯೇಡ ಇನಾಕನ ಆಯಿನ್, "ದಾವೀದ್ನ ಛಿಯ್ಯಾ! ಪ್ರಭು, ಮಾರಪರ್ ಗೋರ್ ಕರ್! ಮಾರಿ ಛೋ಼ರಿಮ ಭೂತ್ ಛಾ಼ ಅಜು಼ ಘಣಿ ಖರಾಬ್ ಹಾಲ್ಮ ಯೋ ಛಾ಼" ಕರಿ ಚಿಕ್ರಿನ್ ಬೋಲಿ.
ಕತೋಬಿ ಯೇಸುನೆ ಇನ ಶನೀಶ್ ಜವಾಬ್ ಕೋ ದಿದೋನಿ, ತದೆ ಇನ ಶಿಷ್ಯರ್ನೆ ಯೇಸುಕನ ಆಯಿನ್, "ಯೋ ತಯೇಡಾನ ಮೋಕ್ಲಿದೆ! ಯೋ ಚಿಕರ್ತಿ ಹುಯಿನ್ ಅಪ್ಣ ಪೀಠೇಸ್ ವಳಿಆವಸ್!" ಕರಿ ಗಿಂಗಾಯು.
ತದೆ ಯೇಸುನೆ ಫರೈನ್ ಬೋಲ್ಯೋಕಿ, "ಗುಮೈಗಯೂತೆ ಮೇಂಢವ್ನಿ ಘೋಣಿ ಛಾ಼ತೆ ಇಸ್ರಾಯೇಲ್ನು ಅದ್ಮಿನ ಮ್ಹೆಂದಿನ್ ಬಿಜ಼ ಕಿನಾಕನಾಬಿ ದೇವ್ನೆ ಮನ ಮೋಕ್ಲ್ಯೊಕೊಯ್ನಿ" ಕರಿ ಬೋಲ್ಯೊ.
ತದೆ ಯೋ ತಯೇಡ ಯೋಸ್ ಆಯಿನ್, ಇನ ಆಡ್ಪಡಿನ್, ಪ್ರಭು ಮನ ಮದತ್ಕರ್!" ಕರಿ ಗಿಂಗೈ.
ಯೇಸುನೆ ಇನ, "ಲಡ್ಕಾ ಖಾವಾನು ರೋಟಾವ್ನ ಪಾಡೀನ್, ಕುತ್ರ್ಯಾವ್ನ ನಾಖಾನು ಬರೋಬರ್ಕೊಯ್ನಿ" ಕರಿ ಜವಾಬ್ ದಿದೊ.
ಯೋ ತಯೇಡಾನೆ, "ಯೋ ವಾತೆ ಖ್ಹಾಚಾಸ್ಲಾ ಪ್ರಭು, ಕುತ್ರ್ಯು ಖ್ಹಾರು ಇವ್ಣೊ ಯಜಮಾನ್ನು ಮೇಜ್ಪರ್ಥು ಹೇಟ್ ಪಡಾಸ್ತೆ ರೋಟಾನು ಟುಕ್ಡಾವ್ನ ಖಾಸ್ನಿ" ಕರಿ ಬೋಲಿ.
ತದೆ ಯೇಸುನೆ ಇನ, "ಬಾಯಿ, ತಾರಿ ವಿಶ್ವಾಸ್ ಘಣಿ ಮೋಟಿ! ತಾರ ಮನ್ಮ ಛಾ಼ತೆ ಇಮ್ಮಸ್ ತುನ ಹುವಾದೆ" ಕರಿ ಜವಾಬ್ ದಿದೊ. ಯೋಸ್ ವಖ್ಹತ್ಮ ಇನಿ ಛೋ಼ರಿನ ಅಛ಼್ಛುಹುಯು.
ಯೇಸುನೆ ಭೂತ್ ಧರಿರಾಖ್ಯುಥೂತೆ ಏಕ್ ಛೋ಼ಕ್ರಾನ ಅಛ್ಛು಼ ಕರ್ಯೊತೆ
ಯೇಸು ಅಜು಼ ಇನ ಶಿಷ್ಯರ್ ಪಾಛು಼ ಫರೀನ್ ಅದ್ಮಿನಿ ಝೂ಼ಂಡ್ಕನ ಆವಾದಿನ್, ಏಕ್ ಜ಼ಣೊ ಯೇಸುಕನ ಐನ್, ಇನಖ್ಹಾಮ್ಣೆ ಗುಡ್ಘ್ಯ ಟೇಕಿನ್, "ಪ್ರಭು, ಮಾರ ಛಿಯ್ಯಾನ ಗೋರ್ ಕರ್! ಇನ ಮಿರ್ಘಿ ಲಾಗಿರ್ಹೂಸ್, ಇನೇಥಿ ಯೋ ಘಣು ತರಪ್ಡುಕರಾಸ್. ಯೋ ತದೆ-ತದೆ ಆಗ್ಮಾಬಿ ಪಾಣಿಮಾಬಿ ಪಡ್ತೊರ್ಹೇಸ್. ಮೇ ಇನ ತಾರ ಶಿಷ್ಯರ್ಕನ ಬುಲೈಲಿ ಆಯೊ, ಕತೋಬಿ ಇನ ಅಛ್ಛು಼ ಕರಾನ ಇವ್ಣ ಹಾತೆ ಕೋ ಹುಯೋನಿ" ಕರಿ ಬೋಲ್ಯೊ.
ಯೇಸುನೆ, "ಏ, ವಿಶ್ವಾಸ್ಕೊಂತೆ ಬುಧ್ಧು ಖಾಂದಾನ್ವಾಳ! ಬಿಜು಼ ಕೆತ್ರ ದನ್ ಮೇ ತುಮಾರ ಜೋ಼ಡೆ ರ್ಹೇಣು? ಬಿಜು಼ ಕೆತ್ರ ದನ್ ತುಮೂನ ಖ್ಹಮಾಳ್ಣು? ಯೋ ಛೋ಼ಕ್ರಾನ ಹಜ್ಜಾ಼ ಮಾರಕನ ಬುಲೈಲಿ ಆವೊ!" ಕರಿ ಬೋಲ್ಯೊ. ಯೇಸುನೆ ಯೋ ಛೋ಼ಕ್ರಮ ಥೂತೆ ಭೂತ್ನ ಗುರ್ಕಾವಖ್ಹತರ್, ಯೋ ಭೂತ್ ಇನ ಮ್ಹೆಂದಿನ್ ನಿಕ್ಳಿಗಯು. ಯೋಸ್ ವಖ್ಹತ್ಮ ಇನ ಅಛ್ಛು಼ ಹುಯಿಗಯು.
ತದೆ ಯೋ ಸಬೆ ಭರಾವಾನು ಮಂದಿರ್ಮ ಭೂತ್ ಧರಿರಾಖ್ಯುಥೂತೆ ಏಕ್ ಅದ್ಮಿ ಆಯು. ಯೋ ಚಿಕ್ರಿನ್, "ನಜ಼ರೇತ್ನೊ ಯೇಸು, ಹಮಾರೇಥಿ ತುನ ಶಾತ್ ಛಾ಼? ಹಮೂನ ಬರ್ಬಾತ್ ಕರಾನ ಆಯೊಕಿ ಶು? ತು ಕೋಣ್ ಕರಿ ಮನ ಮಾಲುಮ್; ತೂ ದೇವ್ನೊ ಪವಿತ್ರ್ ಛಿಯ್ಯೊ ಹುಯಿರ್ಹೋಸ್" ಕರಿ ಬೋಲ್ಯು.
ಯೇಸುನೆ ಯೋ ಭೂತ್ನ ಗುರ್ಕೈನ್, "ಖ್ಹೊಪ್ರ್ಹೆ, ಅನ ಮ್ಹೆಂದಿನ್ ಭಾರ್ನಿಕಳ್" ಕರಿ ಬೋಲ್ಯೊ.
ತದೆ ಯೋ ಭೂತ್ನೆ ಯೋ ಅದ್ಮಿನ ಧಡಾಶಮರೈನ್, ಜೋ಼ರೇಖ್ಹು ಚಿಕ್ರಿನ್ ಭಾರ್ ನಿಕ್ಳಿಗಯು.
ಯೇಸುನೆ ಭೂತ್ನಿ ದಂಡ್ ಧರಿರಾಖ್ಯುಥೂತೆ ಅದ್ಮಿನ ಗುಣ್ಕರ್ಯೋತೆ
ಬಾದ್ಮ ಯೇಸುಬಿ ಇನು ಶಿಷ್ಯರ್ ಗಲಿಲಾಯ ದರ್ಯಾವ್ನ ಪಾರ್ಲಿ ಬಾಜೂ಼ಮ ಥೂತೆ, ಗೆರಸೇನವಾಳನ ತಬರ್ಖಾಮ ಗಯ. ಯೇಸು ಡೋಣ್ಮಾಥು ಭಾರ್ ಉತ್ರ್ಯೋತೆ ತದೇಸ್, ಭೂತ್ ಧರಿರಾಖ್ಯುಥೂತೆ ಏಕ್ ಜ಼ಣೊ ಮಖ್ಹಾಣ್ಯನು ಘವಿಮಾಥೊ ನಿಕ್ಳಿನ್ ಇನ ಖ್ಹಾಮೆ ಆಯು. ಯೋ ಅದ್ಮಿ ಮಖ್ಹಾಣ್ಯನಿ ಘವಿಯೇನಿ ಝ಼ಗೋಮಸ್ ರ್ಹೇತುಥು. ಘಣಿ ಹಲ್ಲ ಇನ ಬೇಡಿಥೀಬಿ, ಲ್ಹೋಡಾನಿ ಖ್ಹಂಕ್ಳಿಥೀಬಿ ಭಾಂದ್ಯುತೋಬಿ ಯೋ ಖ್ಹಂಕ್ಳಿನ ತೋಡಿನ್, ಬೇಡಿನ ಕಾಡಿನಾಖಿದೇತೂಥು. ಬಿಜು಼ ಕೋಣ್ಬಿ ಇನ ಖ್ಹಂಕ್ಳಿಥೀಬಿ ಭಾಂದಾನ ಕೋ ಹುಯುನಿ. ಯೋ ಭೂತ್ ಧರಿರಾಖವಾಳನ ದಾಬುಕ್ಮ ಲ್ಯಾವಾನ ಕಿನೊ ಹಾತ್ಬಿ ಕೋ ಹುಯುನಿ. ಯೋ ಕದೇಬಿ ರಾತ್-ದನ್ ಮಖ್ಹಾಣ್ಯನಿ ಘವಿಯೆ಼ಮಾಬಿ, ಪಹಾಡ್ಮಾಬಿ ಚಿಕ್ರಾಣ್ ಮ್ಹೇಲ್ತುಹುಯಿನ್, ಬಂಡಾಥಿ ಇನು ಯೋಸ್ ವ್ಹಾಡಿಲೇತುಥು.
ಯೋ ದೂರ್ಥೊ ಯೇಸುನ ದೇಖಿನ್; ನಾಶಿ ಐನ್, ಇನ ಢುಕ್ಣ್ಯಟೇಕಿನ್, ಊಚಿ ಆವಾಜ಼್ಮ ಚಿಕ್ರಿನ್, "ಪರಮಂಡಲ್ನೊ ದೇವ್ನ ಛಿಯ್ಯಾ ಯೇಸು, ಮಾರೇಥಿ ತುನ ಶಾತ್ ಛಾ಼? ದೇವ್ನ ಖ್ಹಾಮ್ಬಿ, ಮನ ಖ್ಹತಾವ್ ನಕೊ" ಕರಿ ಬೋಲ್ಯು. ಶನಕತೊ, "ಏ ಭೂತ್, ಅನ ಮ್ಹೆಂದಿನ್ ಭಾರ್ ನಿಕಳ್" ಕರಿ ಯೇಸುನೆ ಅಗಾಡಿಸ್ ಬೋಲಿರಾಖ್ಯೊಥೊ, ಇನಾಖ್ಹಾಜೆ ಇನೆ ಇಮ್ ಬೋಲ್ಯುತೆ.
ಅಜು಼ ಯೇಸುನೆ ಇನ, "ತಾರು ನಾಮ್ ಶಾತ್?" ಕರಿ ಪುಛಾ಼ವಖ್ಹತರ್, "ಮಾರು ನಾಮ್ ಝೂ಼ಂಡ್, ಶನಕತೊ ಹಮೆ ಢಿಂಡ್ಪಾಳಸ್ ಛಿಯ್ಯೆ಼!" ಕರಿ ಬೋಲ್ಯು. ಅಜು಼, "ಹಮೂನ ಆ ತಬರ್ಖಾಮಾಥು ನಕೊ ನಖ್ಹಾಡ್" ಕರಿ ಯೋ ಭೂತ್ ಧರೀರಾಖ್ಯುಥೂತೆ ಅದ್ಮಿನೆ ಯೇಸುನ ಘಣು ಗಿಂಗೈಲಿದು.
ಹಿಜ್ಜಾ಼ ಖನ್ನೆಸ್ ಥೂತೆ ಪಹಾಡ್ಮ ಡೂಕರ್ನಿ ಮೋಟಿ ಝೂ಼ಂಡ್ ಚ಼ರೂಕರ್ತೂಥು. ತದೆ ಯೋ ಭೂತ್ಖ್ಹಾರು ಯೇಸುನ, "ಡೂಕರ್ನಿ ಝೂ಼ಂಡ್ನ ಮಹಿ ಪೇಖ್ಹಾನ ಹಮೂನ ಬೋಲಿಮೋಕಲ್" ಕರಿ ಗಿಂಗೈಲಿದು. ತದೆ ಯೇಸುನೆ ಇಮ್ಮಸ್ ಹುವಾದೆ, ಕರಿ ಹುಕುಮ್ ದೇತಾಖ್ಹತರ್ ಯೋ ಭೂತ್ ಖ್ಹಾರು ಯೋ ಅದ್ಮಿನ ಮ್ಹೆಂದಿನ್ ಭಾರ್ ನಿಕ್ಳಿನ್, ಡೂಕರ್ನಿ ಝೂ಼ಂಡ್ಮ ಪೇಶಿಗಯು. ತದೆ ಯೋ ಡೂಕರ್ಖ್ಹಾರು ನಾಶಿನ್, ಪಹಡ್ನಿ ಕಥಾರ್ಪರ್ಥು ದರ್ಯಾವ್ಮ ಪಡೀನ್ ದಮ್ ಘೋಟೈನ್ ಮರಿಗಯು. ಕಮ್ಶಿಕಮ್ ಬೇ ಹಜಾ಼ರ್ ಡೂಕರ್ ಥೂ.
ಡೂಕರ್ ಚ಼ರಾವವಾಳು ಖ್ಹಾರು ನಾಶಿಜೈ಼ನ್ ಯೋ ಖ್ಹಯೇರ್ಮಾಬಿ, ಗಾಮ್ಮಾಬಿ ಇನಿ ಬಾರೇಮ ಬೋಲ್ತಖ್ಹತರ್ ಇನ ದೇಖಾನಖ್ಹಾಜೆ ಅದ್ಮಿಖ್ಹಾರು ಯೇಸು ಥೋತೆ ಹಿಜ್ಜಾ಼ ಆಯು.
ಕತೋಬಿ ತುಮಾರಮ ಕೋಣ್ತೋಬಿ ಏಕ್ ಜ಼ಣು ಇನ ಆಯ-ಬಾನ ಶಾತ್ತೋಬಿ ದೀನ್, ಮದತ್ಕರ್ನು ಕರಿ ರ್ಹೇಸ್ತೆ ಯೋ ಖ್ಹಾರು ‘ಕೊರ್ಬಾನ್’ ಕರಿನಾಖ್ಯೊ" ಕರಿ ಬೋಲಿಲಿದೊತೊ, ಯೋ ಅದ್ಮಿ ಇನ ಆಯನ ರ್ಹವೊ, ಬಾನ ರ್ಹವೊ ಬಿಜು಼ ಶಾತ್ಬಿ ದೇಕ್-ಭಾಲ್ ಕರ್ನುನಾತೆ ಇಮ್ ಭಾಮ್ಥಿ ಛು಼ಕಿಜಾ಼ಸ್. ಅಮ್ ತುಮೆ ಏಕ್ಥಿ-ಏಕ್ ಬೋಲಿದೇತಾಹುಯಿನ್ ದೇವ್ನಿ ಪದತ್ತಿನ ಮರ್ಯಾದಿಕೊಂತೆ ಇಮ್ ಕರೋಸ್. ಅತ್ರೇಸ್ ಕಾಹೆತೆ ಅಮ್ನು ಖ್ಹಾರು ಬಿಜೂ಼ಬಿ ಕೈಯೆಕ್ಕಿ ಕರೋಸ್" ಕರಿ ಬೋಲ್ಯೊ.
ಅದ್ಮಿನ ಗಲೀಜ಼್ ಬಣಾವನು ರಾಛು಼.
ಬಾದ್ಮ ಯೇಸುನೆ ಅದ್ಮಿನಿ ಝೂ಼ಂಡ್ನ ಪಾಛೊ಼ ಖನ್ನೆ ಬುಲೈನ್ ಇವ್ಣುನ, "ಖ್ಹಾರು ಕಾನ್ ಜೋ಼ಡಿನ್ ಮಾರಿ ವಾತೆನ ಖ್ಹಮ್ಜೊ಼, ಅಜು಼ ಪರ್ಖಿಲೆವೊ. ಭಾರ್ಥು ಮಹಿ ಜೈ಼ನ್ ಏಕ್ ಅದ್ಮಿನ ಪದತ್ತಿನಿಘೋಣಿ ಮೈಲುಕರಾನು ಏಕ್ಬಿ ಕೊಯ್ನಿ. ಕತೋಬಿ ಏಕ್ ಅದ್ಮಿನ ಮಹಿತು ಭಾರ್ ನಿಕ್ಳಾನುಸ್ ಇನ ಮೈಲುಬಣಾವಸ್"
ಏಕ್ ತಯೇಡಾನಿ ವಿಶ್ವಾಸ್
ಹಿಜ್ಜಾ಼ಥೊ ಯೇಸು ನಿಕ್ಳಿನ್ ತೂರ್ ಕರಿ ಬೋಲಾನು ಖ್ಹಯೇರ್ನ ಖನ್ನೇನು ತಬರ್ಖಾನ ಗಯೊ. ಹಿಜ್ಜಾ಼ ಏಕ್ ಘರ್ಮ ಥೊ, ಯೋ ಹಿಜ್ಜಾ಼ ಛಾ಼ ಕರಿ ಕಿನಾಬಿ ನಾ ಮಾಲುಮ್ಪಡ್ಣು ಕರಿ ಥೊ, ಕತೋಬಿ ಯೋ ಮಾಲುಮ್ ಪಡಾಕೊಂತೆ ರ್ಹವಾನ ಕೋ ಹುಯುನಿ. ಒಗ್ಗಿಸ್ಮ ಏಕ್ ತಯೇಡನೆ ಯೇಸು ಹಾ ಛಾ಼ ಕರಿ ಖ್ಹಮ್ಜಿನ್, ಐನ್ ಯೇಸುನ ಗೋಡಾನ ಖ್ಹಾಮ್ಣೆ ಪಡಿ. ಇನಿ ಛೋ಼ರಿನ ಭೂತ್ ಧರಿರಾಖ್ಯುಥು. ಯೋ ತಯೇಡ ಪರೈ ಜಾ಼ತ್ವಾಳಿ ಹುಯಿರ್ಹೀಥಿ. ಯೋ ಸಿರಿಯ ತಬರ್ಖಾನು ಸುರೋಪೊಯಿನಿಕ್ಯಮ ಪೈದಹುಯಿತೆ ಏಕ್ ಗ್ರೀಕ್ವಾಳಿ ಹುಯಿರ್ಹೀಥಿ. ಯೋ ತಯೇಡ ಇನಿ ಛೋ಼ರಿನ ಧರಿರಾಖ್ಯುಥೂತೆ ಭೂತ್ ಕಾಡ್ಣು, ಕರಿ ಯೇಸುನ ಗಿಂಗಾವಲಗಿ. ತದೆ ಯೇಸುನೆ ಇನ, "ಪಹಿಲೆ ಲಡ್ಕಾ ಪೇಟ್ಭರೀನ್ ಖವಾದೆ. ಲಡ್ಕಾ ಖಾವಾನು ರೋಟಾವ್ನ ಪಾಡೀನ್, ಕುತ್ರ್ಯಾನ ಚೆಲ್ಕಾನ ನಾಖಾನು ಬರೋಬರ್ಕೊಯ್ನಿ" ಕರಿ ಬೋಲ್ಯೊ.
ತದೆ ಯೋ ತಯೇಡಾನೆ, "ಹೋಲಾ ಪ್ರಭು, ತೋಬಿ ಲಡ್ಕಾ ಖಾಣು ಖವಾನಿ ಮೇಜ್ಪರ್ಥು ನಾಖಿದೇಯಿತೆ ರೋಟಾನ ಟುಕ್ಡಾನ ಹೇಟ್ ರ್ಹೇಯ್ತೆ ಕುತ್ರ್ಯಾನ ಚೆಲ್ಕ ಖಾಸ್ನಿ" ಕರಿ ಬೋಲಖ್ಹತರ್,
ಯೇಸುನೆ ಇನ, "ತುನೆ ಆ ವಾತ್ ಬೋಲಿತೆ ಇನಖ್ಹಾಜೆ, ತಾರಿ ಛೋ಼ರಿನ ಧರಿರಾಖ್ಯುಥೂತೆ ಭೂತ್ ಮ್ಹೆಂದಿದು! ಘರೆ ಜಾ಼" ಕರಿ ಬೋಲ್ಯೊ. ಯೋ ಇನ ಘರೆ ಜೈ಼ನ್ ದೇಖಾತೊ ಇನಿ ಛೋ಼ರಿ ಬಿಛಾ಼ವ್ಣಿಪರ್ ಅರಾಮ್ಥಿ ಖ್ಹುತೀಥಿ; ಇನ ಧರಿರಾಖ್ಯುಥೂತೆ ಭೂತ್ ನಿಕ್ಳಿ ಗಯುಥು.
ತದೆ ಯೋ ಝೂ಼ಂಡ್ಮಾಥು ಏಕ್ ಜ಼ಣು, "ಗುರು, ಮಾರ ಛಿಯ್ಯಾನ ಏಕ್ ಮುಕ್ಕೊ ಭೂತ್ ಧರಿರಾಖ್ಯುಸ್, ಇನಾಖ್ಹಾಜೆ ತಾರಕನ ಬುಲೈಲಾಯೊಥೊ. ಯೋ ಭೂತ್ ಕದೆ ಇನಾಪರ್ ಆಯುತೋಬಿ, ಇನ ಹೇಟ್ ರಡ್ಕೈದೇಸ್, ಬಿಜು಼ ಯೋ ಮ್ಹೋಡಾವಾಟೆ ಜ಼ಲ್ಭು ಕಾಡ್ತೊಹುಯಿನ್, ಕರ್-ಕರ್ ದಾತ್ ಚಾ಼ವ್ತೊಹುಯಿನ್ ಅಕ್ಡೈಜಾ಼ಸ್. ಇನಾಮಾಥು ಯೋ ಭೂತ್ನ ಕಾಡೊ ಕರಿ ತಾರ ಶಿಷ್ಯರ್ನ ಬೋಲಿಲಿದೊ, ಕತೋಬಿ ಇವ್ಣ ಹಾತೆ ಕೋಹುಯುನಿ" ಕರಿ ಬೋಲ್ಯು.
ತದೆ ಯೇಸುನೆ "ಏ ವಿಶ್ವಾಸ್ಕೊಂತೆ ಪಿಳ್ಗಿಯೆ! ಮೇ ಬಿಜು಼ ಕೆತ್ರ ದನ್ ತುಮಾರ ಜೋ಼ಡೆ ರ್ಹೇಣು? ಅಜು಼ ಕೆತ್ರ ದನ್ ತುಮೂನ ಖ್ಹಮಾಳ್ಣು? ಇನ ಮಾರಾಕನ ಬುಲೈಲ್ಯಾವೊ" ಕರಿ ಬೋಲ್ಯೊ.
ಇವ್ಣೆ ಇನ ಯೇಸುಕನ ಬುಲೈಲಾಯು. ಯೇಸುನ ದೇಕ್ತಾಸ್ನ, ಯೋ ಭೂತ್ ಯೋ ಛೋ಼ಕ್ರಾನ ಧಡಾಶ ಮರಾವಲಗ್ಯು, ಯೋ ಛೋ಼ಕ್ರು ಜ಼ಮೀನ್ಪರ್ ಪಡೀನ್ ಮ್ಹೋಡಾವಾಟೆ ಜ಼ಲ್ಭು ಕಾಡ್ತುಹುಯಿನ್ ತರಪ್ಢಾಲಗ್ಯು. ಯೇಸು ಯೋ ಛೋ಼ಕ್ರಾನ ಬಾನ, "ಅನ ಆ ಭೂತ್ ಧರೀನ್ ಕೆತ್ರ ದನ್ ಹುಯ?" ಕರಿ ಪುಛಾ಼ವಖ್ಹತರ್,
ಇನೆ, "ಅಡ್ಡಾಣಿಪರಸ್ ಆಯುಥು; ಅಜು಼ ಅನ ಮಾರ್ನು ಕರಿ ಘಣಿ ಹಲ್ಲ ಆಗ್ಮಾಬಿ, ಪಾಣಿಮಾಬಿ ನಾಕ್ತುಥು. ತಾರ ಹಾತೆ ಶಾತ್ತೊಬಿ ಹೋತು ಉಶೇತೊ! ಹಮಾರಪರ್ ಗೋರ್ಕರೀನ್, ಮದತ್ ಕರ್" ಕರಿ ಬೋಲ್ಯು.
ಯೇಸುನೆ ಇನ, "ತಾರ ಹಾತೆ ಹೋತು ಉಶೇತೊ! ಕರಿ ಬೋಲಾಸ್ ಕಿಶು? ನಂಬವಾಳಾನ ಖ್ಹಾರುಸ್ ಹುವಾಸ್" ಕರಿ ಬೋಲ್ಯೊ.
ಇಮ್ ಬೋಲ್ತಾಸ್ನ ಯೋ ಛೋ಼ಕ್ರಾನ ಬಾನೆ, "ನಂಬುಸ್, ಮಾರಿ ವಿಶ್ವಾಸ್ಕಮ್ ಉಶೆತೋಬಿ, ಮದತ್ಕರ್" ಕರಿ ಚಿಕ್ರಿನ್ ಬೋಲ್ಯೊ.
ತದೆ ಯೇಸುನೆ ಬಿಜೂ಼ಬಿ ಅದ್ಮಿನಿ ಝೂ಼ಂಡ್ ಇವ್ಣ ಭಣಿ ನಾಶಿ ಉಳ್ಯಾವತೆ ದೇಖಿನ್, ಯೋ ಭೂತ್ನ ಗುರ್ಕೈನ್, "ಏಯ್, ಭೈರಾ ಮುಕ್ಕಾಭೂತ್, ಅನ ಮ್ಹೆಂದಿನ್ ಭಾರ್ನಿಕಳ್, ಪಾಛು಼ ಅನ ನಾ ಧರ್ನು! ಕರಿ ಮೇ ತುನ ಹುಕುಮ್ ದೆವ್ಕರುಸ್" ಕರಿ ಬೋಲ್ಯೊ.
ತದೆ ಯೋ ಭೂತ್ ಚಿಕ್ರಾಣ್ ಮ್ಹೇಲಿನ್, ಯೋ ಛೋ಼ಕ್ರಾನ ಧಡಾಶ ಮರೈನ್, ಇನ ಮಹಿತು ಭಾರ್ ನಿಕ್ಳಿಗಯು. ತದೆ ಯೋ ಛೋ಼ಕ್ರು ಮರ್ಯಾಹುಯಾನಿಘೋಣಿ ಪಡ್ಯುಥೂತೆ ದೇಖಿನ್ ಘಣ ಅದ್ಮಿನೆ, "ಆ ಮರಿಗಯು!" ಕರಿ ಬೋಲ್ಯು. ಕತೋಬಿ ಯೇಸುನೆ ಯೋ ಛೋ಼ಕ್ರಾನ ಹಾತ್ ಧರಿನ್ ಉಠಾಡ್ತಾಖ್ಹತರ್, ಯೋ ಉಠಿ ಭೀರಿಗಯು.
ಯೇಸುನೆ ಘಣ ಅದ್ಮಿನೊ ರೋಗ್ ಅಛ್ಛು಼ ಕರ್ಯೊತೆ
ಯೇಸು ಸಬಾಮಂದಿರ್ಥ ನಿಕ್ಳಿನ್ ಸೀಮೋನ್ನ ಘರ್ಕನ ಗಯೊ. ಹಿಜ್ಜಾ಼ ಸೀಮೋನನಿ ಖ್ಹಾಖ್ಹು ಜಾ಼ಖ್ಹತ್ ತಾವ್ ಚ಼ಢೀನ್ ತಲ್ಖುಕರ್ತಿಥಿ, ಇನಿ ಬಾರೇಮ ಇವ್ಣೆ ಯೇಸುನ ಬೋಲ್ಯು. ತದೆ ಯೇಸುನೆ ಇನಾಕನ ಜೈ಼ನ್ ಭೀರಿನ್, ಇನ ಮ್ಹೆಂದಿನ್ ಜಾ಼ವಾನಿ ಘೋಣಿ ಯೋ ತಾವ್ನ ಹುಕುಮ್ ದೇತಾಖ್ಹತರ್, ತಾವ್ ಉತ್ರಿಗಯೊ. ತದ್ನು ತದ್ದೇಸ್ ಯೋ ಉಠೀನ್ ಇವ್ಣಿ ಸೇವಾ-ಚಾ಼ಕ್ರಿ ಕರಿ.
ಯೇಸು ಕನಾರಿಪರ್ ಉತರ್ತಸ್ನ, ಯೋ ಗಾಮ್ನು ಏಕ್ ಜ಼ಣೊ ಇನಖ್ಹಾಮ್ಣೆ ಆಯು, ಇನ ಭೂತ್ ಖ್ಹಾರು ಧರಿರಾಖ್ಯುಥು. ಆ ಕೈಯೆಕ್ಕಿ ದನ್ಥು ಲುಂಗ್ಡುಸ್ ಫೇರ್ಯುಥು ಕೊಯ್ನಿ ಅಜು಼ ಘರ್ಮಾಬಿ ರ್ಹೇತೂಥು ಕೊಯ್ನಿ. ಮಖ್ಹಾಣ್ಯನಿ ಘವಿಯೆಮಾಸ್ ರ್ಹೇತೂಥು. ಇನೆ ಯೇಸುನ ದೇಖಿನ್ ಬಳೇಳಿನ್, ಇನಖ್ಹಾಮ್ಣೆ ಪಡೀನ್, ಚೋ಼ರ್ ಆವಾಜ಼್ಥಿ, "ಪರಮಂಡಲ್ನೊ ದೇವ್ನ ಛಿಯ್ಯಾ, ಯೇಸು! ಮಾರೇಥಿ ತುನ ಶಾತ್ ಛಾ಼? ಮನ ಖ್ಹತೈಶ್ ನಕೊ ಕರಿ ತುನ ಗಿಂಗಾವುಸ್" ಕರಿ ಬೋಲಿಲಿದೊ. ಶನಕತೊ, "ಆ ಅದ್ಮಿನ ಮ್ಹೆಂದಿನ್ ಜಾ಼!" ಕರಿ ಯೇಸುನೆ ಯೋ ಭೂತ್ನ ಹುಕುಮ್ ದಿದೋಥೊ. ಘಣಿ ಹಲ್ಲ ಯೋ ಭೂತ್ ಇನ ಧರ್ತುಥು, ಎತ್ರೇಸ್ ಕಾಹೆತೆ ಯೋ ಅದ್ಮಿನ ಕೋಂಡಿಘಾಲಿನ್, ಹಾತ್-ಗೋಡಾನ ಖ್ಹಂಕಳ್ಥಿ ಭಾಂದ್ಯುತೋಬಿ, ಯೋ ಖ್ಹಂಕ್ಳಿನ ತೋಡಿ ನಾಕ್ತೋಥೊ ಅಜು಼ ಯೋ ಭೂತ್ ಇನ ಉಜ್ಜಾ಼ಡಿ ಝ಼ಗೋಮ ನಖ್ಹಾಡ್ತೂಥು.
ಯೇಸುನೆ ಇನ, "ತಾರು ನಾಮ್ ಶಾತ್?" ಕರಿ ಪುಛಾ಼ವಖ್ಹತರ್,
ಇನೆ, "ಮಾರು ನಾಮ್ ಝೂ಼ಂಡ್" ಕರಿ ಜವಾಬ್ ದಿದೊ. ಶನಕತೊ ಇನ ಘಣು ಭೂತ್ ಧರಿರಾಖ್ಯುಥು. ಯೋ ಭೂತ್ಖ್ಹಾರು ಯೇಸುನ, "ಹಮೂನ ಅಂತಸ್ಕೊಂತೆ ಪಾತಾಳ್ಮ ನಕೊ ನಖ್ಹಾಡ್" ಕರಿ ಗಿಂಗೈಲಿದು.
ಹಿಜ್ಜಾ಼ ಖನ್ನೆಸ್ ಥೂತೆ ಪಹಾಡ್ಪರ್ ಡೂಕರ್ನಿ ಏಕ್ ಮೋಟಿ ಝೂ಼ಂಡ್ ಚ಼ರೂಕರ್ತೂಥು. ತದೆ ಯೋ ಭೂತ್ ಖ್ಹಾರು, "ಯೋ ಖ್ಹಾರ ಡೂಕರ್ಮ ಪೇಖ್ಹಾನ ಹಮೂನ ಹುಕುಮ್ ದೇ" ಕರಿ ಯೇಸುನ ಗಿಂಗೈಲಿದು. ಯೇಸುನೆ ಇಮ್ಮಸ್ ಹುವಾದೆ ಕರಿ ಬೋಲಾಖ್ಹತರ್, ಭೂತ್ಖ್ಹಾರು ಯೋ ಅದ್ಮಿನ ಮಹಿತು ಭಾರ್ ಆಯಿನ್, ಡೂಕರ್ಮ ಪೇಶಿಗಯು. ತದೆ ಯೋ ಡೂಕರ್ನಿ ಝೂ಼ಂಡ್ ನಾಶಿನ್, ಕಥಾರ್ನಿ ಝ಼ಗೋಥು, ದರ್ಯಾವ್ಮ ಪಡೀನ್, ದಮ್ ಘೋಟೈನ್ ಮರಿಗಯು.
ಡೂಕರ್ ಚ಼ರಾವವಾಳು ಚಾ಼ಲ್ಯುತೆ ಇನ ದೇಖಿನ್, ನಾಶಿಜೈ಼ನ್, ಯೋ ಗಾಮ್ಮಾಬಿ ಅಜು಼ ಅಶ್ಪಿಶ್ನು ಖೇತರ್ಮಾನು ಅದ್ಮಿನ ಚಾ಼ಲ್ಯುತೆ ಇನಿ ಬಾರೇಮ ಬೋಲ್ಯು. ತದೆ ಯೋ ಅದ್ಮಿಖ್ಹಾರು ಚಾ಼ಲ್ಯುತೆ ಇನ ದೇಖಾನಖ್ಹಾಜೆ ಯೇಸು ಥೋತೆ ಹಿಜ್ಜಾ಼ ಆಯು. ತದೆ ಭೂತ್ಖ್ಹಾರು ನಿಕ್ಳಿಗಯುಥೂತೆ ಯೋ ಅದ್ಮಿ ಲುಂಗ್ಡಾವ್ನ ಪೇರ್ಹಿಲಿನ್, ಅಛ್ಛಿ ಖ್ಹಯಾಲ್ಥಿ, ಯೇಸುನ ಗೋಡಾಕನ ಬೆಠುಥೂತೆ ದೇಖಿನ್, ಇವ್ಣೆ ಖ್ಹಾರು ಡರಿಗಯು.
ತುಮೂನ ಖ್ಹಾಚಾಮ ಬೋಲುಸ್ಕಿ, ಹಜ್ಜಾ಼ ಭಿಯುತೆ ಇವ್ಣಾಮ ಥೋಡು ಜ಼ಣು ದೇವ್ನಿ ರಾಜ್ಯ ದೇಖಾತೋಡಿ ಮರ್ಶೆಸ್ ಕೊಯ್ನಿ" ಕರಿ ಬೋಲ್ಯೊ.
ಯೇಸುನು ರೂಪ್ ಬದ್ಲ್ಯೂತೆ
ಯೇಸುನೆ ಆ ಖ್ಹಾರಿ ವಾತೇನ ಬೋಲಿನ್, ಆಟ್ದನ್ ಹುವಾನ ಬಾದ್ಮ, ಪೇತ್ರ, ಯಾಕೋಬ ಅಜು಼ ಯೋಹಾನ್ನ ಬುಲೈಲಿನ್ ಪ್ರಾರ್ಥನೆ ಕರಾನಖ್ಹಾಜೆ, ಪಹಾಡ್ಪರ್ ಗಯೊ. ಯೇಸು ಪ್ರಾರ್ಥನೆ ಕರುಕರಾನಿ ವಖ್ಹತ್ಮ, ಇನು ಮ್ಹೋಡು ಬದ್ಲಿಗಯು, ಅಜು಼ ಇನು ಲುಂಗ್ಡು ಧೋಳುಫಟ್ಹುಯಿನ್, ಝ಼ಮ್ಕಾಲಗ್ಯು. ತದ್ದೇಸ್ ಬೇ ಪರ್ಖ್ಹಾ ಇನಜೋ಼ಡೆ ವಾತೆ ಬೋಲುಕರ್ತಾಥ. ಅವ್ಣೆ ಕೋಣ್ಕತೊ, ಮೋಶೆ ಅಜು಼ ಎಲೀಯ. ಅವ್ಣೆ ಪರಲೋಕ್ನಿ ಮಹಿಮೆಥಿ ದೆಖೈನ್, ಯೆರೂಸಲೇಮ್ಮ ಯೇಸು ಮರಿನ್, ದೇವ್ನಿ ಮರ್ಜಿನ ಪೂರ ಕರ್ಶೇತೆ ಇನಿ ಬಾರೇಮ, ಇನಜೋ಼ಡೆ ವಾತೆ ಬೋಲುಕರ್ತೂಥು.
ಪೇತ್ರ ಅಜು಼ ಇನ ಜೋ಼ಡ್ಮ ರ್ಹವಾಳು ಭರ್ನಿಂದರ್ಮ ಥೂ, ಕತೋಬಿ ನಿಂದರ್ಮಾಥು ಜಾ಼ಗಿ ಉಠೀನ್, ಯೇಸುನಿ ಮಹಿಮೆನ ಅಜು಼ ಇನಜೋ಼ಡೆ ಭಿಯಾಥಾತೆ ಯೋ ಭೇ ಜ಼ಣಾನಾಬಿ ದೇಖ್ಯು. ಮೋಶೆ ಅಜು಼ ಎಲೀಯ ಯೇಸುನ ಮ್ಹೆಂದಿನ್, ಜಾ಼ವಾನಿ ವಖ್ಹತ್ಮ, ಪೇತ್ರನೆ ಯೇಸುನ, "ಗುರು, ಹಮೆ ಹಜ಼್ಜಸ್ ರ್ಹವಾನು ಕೆತ್ರೇಕ್ಕಿ ಅಛ್ಛು಼! ಹಮೆ ಹಜ಼್ಜಾ ತೀನ್ ಡೇರಾ ಠೋಕೆಸ್, ಏಕ್ ತುನ , ಏಕ್ ಮೋಶೇನ ಅಜು಼ ಏಕ್ ಎಲೀಯನ " ಕರಿ ಬೋಲ್ಯೊ. ಪೇತ್ರನ, ಯೋ ಶಾತ್ ಬೋಲುಕರಾಸ್ ಕರಿ ಇನಾಸ್ ಮಾಲುಮ್ ಕೋ ಥೂನಿ.
ಯೋ ಭೀಡ್ಮಾಥು ಏಕ್ಜ಼ಣಾನೆ, "ಗುರು, ಮಾರ ಛಿಯ್ಯಾನ ದೇಕ್ಕರಿ, ತುನ ಗಿಂಗಾವುಸ್. ಮನ ಆ ಎಕ್ಕಸ್ ಛಿಯ್ಯೊ ಛಾ಼ತೆ. ಅನ ಭೂತ್ ಧರಾಸ್, ಧರ್ತಾಸ್ನ ಆ ಬಳೆಳಾಲಗಸ್, ಮ್ಹೋಡವಾಟೆ ಜ಼ಲ್ಭು ನಿಕ್ಳಾ ಏತ್ರೆ ಅನ ಧಡಾಶ ಮರಾವಸ್, ಅಜು಼ ಘಣು ಖ್ಹತೈನ್, ಝ಼ಗ್ದಾಶೆ ಯೋ ಭೂತ್ ಅನ ಮ್ಹೇಲಾಕೊಯ್ನಿ! ಯೋ ಭೂತ್ನ ಕಾಡೊ ಕರಿ, ತಾರ ಶಿಷ್ಯರ್ನ ಗಿಂಗೈಲಿದೊ. ಕತೋಬಿ ಇವ್ಣ ಹಾತೆ ಕೋ ಹುಯೋನಿ" ಕರಿ ಚಿಕ್ರಿನ್ ಯೇಸುನ ಬೋಲ್ಯೊ.
ತದೆ ಯೇಸುನೆ, "ಏ ವಿಶ್ವಾಸ್ಕೊಂತೆ ಖರಾಬ್ ಪಿಳ್ಗಿಯೆ, ಮೇ ಬಿಜು಼ ಕೆತ್ರ ದನ್ ತುಮಾರ ಜೋ಼ಡೆ ರ್ಹೀನ್, ತುಮೂನ ಖ್ಹಮಾಳ್ಣು?" ಕರೊ ಜ಼ವಾಬ್ದಿದೊ. ಅಜು಼ ಯೋ ಅದ್ಮಿನ, "ತಾರ ಛಿಯ್ಯಾನ ಹಜ಼್ಜಾ ಬುಲೈಲಿ ಆವ್" ಕರಿ ಬೋಲ್ಯೊ.
ಯೋ ಛೋ಼ಕ್ರು ಆವ್ಕರಾನಿ ವಖ್ಹತ್ಮ, ಯೋ ಭೂತ್ ಇನ ಜ಼ಮೀನ್ಪರ್ ರಡ್ಕೈನ್, ಘಣು ಧಡಾಶ ಮರಾಯು. ಕತೋಬಿ ಯೇಸುನೆ ಯೋ ಭೂತ್ನ ಗುರ್ಕೈನ್, ಯೋ ಛೋ಼ಕ್ರಾನ ಅಛ್ಛು಼ ಕರೀನ್, ಇನ ಬಾನ ಹಾತ್ಮ ದಿದೊ. ಅನ ದೇಖಿನ್ ಅದ್ಮಿಖ್ಹಾರು ದೇವ್ನಿ ಮಹಾನ್ ಶಕತ್ನಖ್ಹಾಜೆ ಆಶ್ಚರ್ಯಖಾದು.
ಯೇಸುನೆ ಇನಿ ಮರಣ್ಣಿ ಬಾರೇಮ ಬಿಜೇಕ್ ಹಲ್ಲ ಬೋಲ್ಯೊತೆ
ಅದ್ಮಿಖ್ಹಾರು ಯೇಸುನೆ ಕರ್ಯೊತೆ ಖ್ಹಾರಿಸ್ ಕಾಮ್ನಿ ಬಾರೇಮ ಬಿಜೂ಼ಬಿ ಆಶ್ಚರ್ಯ ಕರುಕರಾತೆ ತದ್ದೇಸ್, ಯೇಸುನೆ ಇನ ಶಿಷ್ಯರ್ನ,
ಯೇಸು ಅಜು಼ ಬೆಲ್ಜಬೂಲ್
ಏಕ್ ಹಲ್ಲ ಯೇಸು ಮುಕ್ಕೊ ಭೂತ್ನ ನಖ್ಹಾಡುಕರ್ತೋಥೊ. ಕದೆ ಯೋ ಮುಕ್ಕೊ ಭೂತ್ ನಿಕ್ಳಿಗಯೂಕಿ, ತದೆ ಯೊ ಅದ್ಮಿ ವಾತೆ ಬೋಲಾಲಗ್ಯು. ಅನ ದೇಖಿನ್, ಅದ್ಮಿಖ್ಹಾರು ಆಶ್ಚರ್ಯಖಾದು.
ಅವ್ಣಾಮ ಏಕ್ ಜ಼ಣೊ, ತಲ್ವಾರ್ಥಿ ಮಾರಿನ್, ಗಲ್ಢಯಾಜಕ್ನ ಆಳ್ನ ಖಾವಿ ಬಾಜು಼ನ ಕಾನ್ನ ಕತ್ರಿನಾಖ್ಯೊ.
ಕತೋಬಿ ಯೇಸುನೆ ಇನ, "ಅತ್ರೇಸ್ ಬಶ್!" ಕರಿ ಬೋಲಿನ್, ಯೋ ಆಳ್ನು ಕಾನ್ನ ಛೀಮಿನ್, ಇನ ಅಛ್ಛು಼ ಕರ್ಯೊ.
ಯೋಹಾನನು ಶಿಷ್ಯರ್ ಚ಼ಲ್ಯೂಜಾ಼ವಾದೀನ್, ಯೇಸುನೆ ಅದ್ಮಿನಿ ಝೂ಼ಂಡ್ನ ಯೋಹಾನ್ನಿ ಬಾರೇಮ ಬೋಲಾಲಗ್ಯೋಕಿ, "ಶಾತ್ ದೇಕ್ಣು ಕರಿ ತುಮೆ ಯೋಹಾನಕನ ಉಜ್ಜಾ಼ಡಿ ಝ಼ಗೋಮ ಗಯಾಥ? ವಹಿರಾಮ ಹಲಾಸ್ತೆ ಘಾಖ್ಹ್ನ ಡಂಟ್ನಾಕಿಶು? ನಾತೊ ತುಮೆ ಶಾತ್ ದೇಕ್ಣುಕರಿ ಗಯಾಥ? ಶನ್ಗಾರ್ನ ಲುಂಗ್ಡ ಪೇರ್ಹಿರಾಖಾಸ್ತೆ ಅದ್ಮಿನಾಕಿಶು? ಅಮ್ನು ಲುಂಗ್ಡು ಪೇರ್ಹಿನ್ ಅರಾಮ್ನಿ ಜಿ಼ಂದ್ಗಿ ಚ಼ಲಾವವಾಳು ಖ್ಹಾರು ಮಹೇಲ್ಮ ರ್ಹೇಸ್! ಇಮ್ಕತೊ ಮನ ಬೋಲೊ, ಶಾತ್ ದೇಕ್ಣು ಕರಿ ಬಹರ್ ಗಯಾಥ? ಪ್ರವಾದೀನಾಕಿ ಶು? ಒಹೊ ಖ್ಹಾಚಮಾಬಿ, ಮೇ ಬೋಲುಸ್ಕಿ ಏಕ್ ಪ್ರವಾದಿಥೀಬಿ ಮೋಟಾನ ತುಮೆ ದೇಖ್ಯ. ‘ದೇವ್ನೆ ಹಂದೇಕ್, ಮಾರ ದೂತಾನ ತಾರ ಖ್ಹಾಮ್ಣೆ ಮೋಕ್ಲಿಶ್, ಯೋ ತೂ ಜಾ಼ವಾನಿ ವಾಟ್ನ ಖ್ಹೂದು ಕರ್ಶೆ’ ಕರಿ ಲೀಖೈರ್ಹೂಸ್ತೆ ಯೋ ಯೋಹಾನನಿಸ್ ಬಾರೇಮ ಮೇ ತುಮೂನ ಬೋಲುಸ್ಕಿ, "ಜ಼ಮೀನ್ಪರ್ ತಯೇಡಾನ ಪೇಟೆ ಪೈದಹುಯುತೆ ಹರೇಕ್ ಅದ್ಮಿಮ ಯೋಹಾನಸ್ ಮೋಟೊ. ಕತೋಬಿ ದೇವ್ನಿ ರಾಜ್ಯಮ ಅಖ್ಖೇಥಿ ನ್ಹಾನೊ ಜಿನ್ಕುಬಿ ಯೋಹಾನಥಿ ಮಹಾನ್ ಹುಯಿರ್ಹೋಸ್.
ಯೋಹಾನ ಬೋಲ್ಯೋತೆ ಇಮ್ ತಮಾಮ್ ಅದ್ಮಿ ಅಜು಼ ಶುಂಕ ವಶೂಲ್ ಕರಾವಾಳುಬಿ ದೇವ್ನೊ ಮಾರಗ್ ಖ್ಹಾಚಕರಿ ಮಾನಿಲಿದು. ಇನಖ್ಹಾಜೆ ಇವ್ಣೆ ಖ್ಹಾರು ಯೊಹಾನ್ನ ಹಾತೇಥಿ ಬ್ಯಾಪ್ತಿಸ್ಮ ಕರೈಲಿದು. ಕತೋಬಿ ಫರಿಸಾಯರ್ ಅಜು಼ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಇವ್ಣಿ ಬಾರೇಮ ದೇವ್ನಿ ಮರ್ಜಿನ ಝಿಟ್ಕಾರಿನ್, ಯೋಹಾನ್ನ ಹಾತೇಖ್ಹು ಬ್ಯಾಪ್ತಿಸ್ಮ ಕೋ ಲಿದೂನಿ.