28 Yasuuꞌa oontꞌa naatka timmiimtaneet toona ikan. Aflaay uktaabi bhali sidik iiktiina, Yasuuꞌa "Ani yaweebi." idi. 29 Beentooy rhasa ha ataab diwaan iifi. Aflaay asfoonjiib whaay tehooyteeb ishiyadhꞌaniit, been wꞌasfoonji hindiib yhakwirniit Yasuuꞌiib uyafiib yꞌabikna. 30 Yasuuꞌa wha gwꞌiyaayt, "Faayamaabu!" idi. Malya ugirmaayooh kuurisiyaayt eeshuuk sallamiya.

23 Ikajar Yasuuꞌaab sallabiyaanihoob, yhalakaayeeh iyheeniit fadhig mhiin yꞌadhidhna. Gaalka whalakii fardaat iyheen. Uun whalak mhakwaliisii eedhoom ookiik gaal hayuud hayaadi.

24 Baraah taktakee dehaay, "Whalak binshatiit, shirfiit thꞌiit gaalnaay dehaay dhibiiniib baꞌiikti." idiin.

Tuun tuuna aree uuktaab diyaab iiktiyeet toona sidik tiikwsi.

Uuktaab "Baraah yhalakaayi ibtikeehna yꞌadhidhna,

aree kinaameeni jillaay shirfiit eegidna." diyaabi.

Aflaay ikajar beet toona idꞌiin.

25 Yasuuꞌiib usaliibi dar tuundeewwa, tuduuraawwa, Maryam Kiloobaabiit tutakatwa, Maryam Majdaleenaabwa ingidna. 26 Yasuuꞌa toondeewwa ukwiriyaataayi wꞌareeyaab iiktiyeebwa beentooy gadee rhiya. Aflaay toondeetii dehaay, "Yaa takatay, wꞌooruuk uun ikati." idi. 27 Malya ukwiriyaataayii dehaay, "Batuuh deetookti." idi. Been udoorii fidnaab, uun ukwiriyaataayi batooh haay giigiyaayt ugawooh haay ibi.

33 Baraah "Kalhoob" ittiyuud mhiin iktimnihoob, Yasuuꞌaab toomaag sakanaayi geeb beentooy sallabiyaan. Bareeh gaal bariiyooh umaygwadii dehaay, ooraaw bariiyooh utarhagwadii dehaay sallabiyaan.

34 Yasuuꞌa "Baab, bareeh afooya! Baraah naan sakeeneeb kiikanna." idi. Aree ikajar gurꞌaat igidniit bariiyeeh yhalaka imꞌadhdhaadhna.

35 Uudehay beentooy ingadniit barooh iishbibna. Yhaakma bariiyooh faaydee, "Oodehay eeraw ishidhhan. Ukwaasanaay Umasiih Uwaasama ikatiyeek, tꞌa ugarooyooh baꞌishidhhin!" idiin.

36 Ikajar han eeyaaniit barooh haay kashiyaan. Barooh haab beeti yꞌabikna. 37 Baraah "Baruuk Iyahuudi hadꞌa tikatiyeek, ugarooyook shidhhana!" idiin.

38 Yasuuꞌi mhakwal laaftaat kataabtu: "Uun baruuh Iyahuudi hadꞌa ikati." miyaad kataabi.

39 Beentooy usaliibi kehii atishꞌigaab toomaag sakanaayee gaal barooh neewiya: "Baruuk Umasiih kittaa han? Ugarooyook shidhhana, hinin han shidhhana hoon!" idi.

40 Laakiin been uuraaw oon ootak idnin, "Baruuk Ukwaasana kitrikwiya? Baruuk han oon utakiit jasaamaab kittaa han? 41 Hinin maagnaay saknaayt jasaamnay, beet tumaagtuun astehaltiniyeeb ijasa nimeer. Laakiin uun uutak amaagna naat gwibbaab baakaay gwadoon jasaamiini." idi.

42 Malya baruuh Yasuuꞌii dehaay, "Yasuuꞌa, tehadꞌaayeetiyook hadꞌaab akiit eetniyihoob, shꞌaaheeb!" idi.

43 Yasuuꞌa bariiyooh dehaay, "Oosdik andi hook, amsi geebu tujanna daayi tindiya." idi.

33 Nabhoob, gaalhoob kastuuh tuubuur thibinamta. Kassuuh uumbꞌi wꞌasir ookiik thibin iki. 34 Himniit tuusꞌa mhayt tikayihoob, Yasuuꞌa tageega hissii aadhiya, "Eelooy Eelooy, lamaa shabagtani?" idi. Aan ibhali Iyahuudi bhaliyee, "Ukwaasanaayu! Ukwaasanaayu! Naanhooy tꞌish tidꞌiyaheeb?" miyaadi.

51 Been oodoor whalak Ukwaasanaay ugawiib salaaw mhakwaliisii eedhoom ookiik malu mhiin ishtat. Tuubuut katatta, iliilaw katꞌamiyaan. 52 Imiimasha katꞌamiyaaniit ingalna, gwida mugaddasa dehayi garu suur ayaab iiktiin, yakiyaaniit idhhanna. 53 Yasuuꞌiit tooyati yakti harꞌii, baraah imiimashaayee ifirꞌana. Malya tumadiina tumugaddas ibeena, aree gwida dehayii dehaay lawiyaan. 54 Udaabitwa ikajar geeb iifiinwa Yasuuꞌaab iigwꞌad baliin, tubuuti idhti rhiyaan. Kastooh toona tutikeet rhiyaanihoob irkwiiniit ajjabamiyaana, "Sidik uun baruuh Ukwaasanaay Ooru!" idiin.

13 Tak yꞌaraweeyooh jillaay umidhhanooh iniiwihoob, oonaayka winka reer kiihaay.

16 Ukwaasana tuduniya winneet areeyiini akay Gaalꞌoorooh yhii. Aflaay barooh aamaniiniibka iiyyi kiidi, laakiin daayim midhhan imaar indi.

10 Hinin Ukwaasana ashoosamaab niiktiyihoob, Wꞌooriitooh tuyatii bariiyooh geeb nimꞌaddaaleek, aflaay amꞌaddilaab nikatiyihoob aree bariiyooh umidhhanii kak hadiit needhhani!

16 Bak aree uureer naan ikatiyeeb nikteen: Yasuuꞌa Umasiih hini jillaay umidhhanooh nuuniya. Hinin han isanaayeen jillaay umidhhanoon niyaweet toonaati.

2 Umasiih uukna aree tumaagtuun haay afoomtinyi sabab ikati. Hineet toomaag toobhaat kitti, laakiin kasseeh tuduniyaati dehayiit maagnaay han afoomi tindi.

8 Aree wꞌaadami tꞌiiteena lawiya,

ugarooyooh ishꞌadhim

aree tooyat ookiik Ukwaasana isnaakiir iki

aree usaliibi kehii han iiya.

9 Umasiih tooyat hooy yakamiyaneet toona nikteen. Baruuh masi iiyyi kiidi, tuuyat han shaawti barooh hikim kitdi. 10 Baruuh iyaneet tuuyat kasseeh udehayiit maagnaayti jillaay gaalhoob iiya. Laakiin baruuh kwarriyeeb ookwiraay, baruuh Ukwaasanaay dehaay kwarri.

3 Tari hinin Yasuuꞌaab Umasiihii atoomsaab kassaan, bariitooh tuyatiib han geeb atoomsaab nikatiyeet toona kitkanna han? 4 Aflaay hinin nitoomaas, niyaayt bariiyooh geeb nitoobaas. Umasiih Ubaabaay umatuunii tooyat hooy yakamiyaneet toonaatiit, hinin han gayi midhhan nimeer nikati.

27 Wꞌaadami gaalhoob ibakii iyaayi, aree beenaay harꞌii haakamamiini. 28 Umasiih han gwida dehayiit maagnaay gaalhoob giigsiiniyi jillaay karaamaat iki. Baruuh malya door lawi indi, maagnaayt haay giigsiiniyee dehaay kiiki. Laakiin baliib barooh yhagit midhhan dehaay haay yꞌiiniyi jillaay lawi indi.

22 Yaa Yꞌisraaꞌiili, Yasuuꞌa Unaasiraayiib hadiidi andiyeet toona sinaakirna. Ukwaasana barooh mꞌuujisaatwa, ajaayibwa, alaamaateewwa ayyadiyaayt dehookna ifdig. Beet toona aree kassaakna tikteenna. 23 Laakiin Ukwaasana toona iikti tiid ikan. Baruuh suur niyaamaab iiktiyeeb uumkir iki. Bareekna amag da gaanuun baabariin ishamniit hookna, barooh usaliibi kehii mismaraayee tithꞌaniit tidirna. 24 Laakiin Ukwaasana barooh tuyatii yakisiyaayt ishidhhan. Tuyattiit lhanaytee isfadig. Tuuyat bariiyooh wꞌabuuk kaꞌadgirta.

11 Ani ushakwa udaayiib akati. Ushakwa udaayi tꞌanooti jillaay iyaayiibi.

26 Kassoohoob een yhadhi tamteenihoobwa, oon ookaas gwꞌiteenihoobwa, Wꞌankwana masi yꞌiiniyeeb ookiik tooyatooh sooteena!