1 Baraak Umasiihi geeb tuyatii tidhhanna. Aflaay Umasiih Ukwaasanaay umaygwadii dehaay sꞌaab ikatiyeeb oomhiin, iginꞌaayeekna tibreeteeb eefeent tinaateeb dꞌiinaa. 2 Igirmaayeekna asti eefeent tinaateeb dꞌiinaa, tubuuti kehii eefeent tinaateeb kiiki. 3 Baraakna tiyaana, aree umidhhanuukna Umasiihi geeb Ukwaasanaay kwabaas ikati. 4 Umidhhanuukna usidkiib Umasiih ikati, aree baruuh lawiiniyihoob, baraak han bariiyooh geeb laweetiit umatuunooh timꞌadhiidhna.

5 Baraak tuduniyaatiit niyaateekna ibakii hookna dirnaa: oojkuunwa, tinajaasaawwa, wꞌamaag shagaay yaktiiwwa, wꞌamaag niyaawwa, whaamtiiwwa ikatiin. Whaamti aree isanamaayeet ibaada tꞌiiteebi. 6 Teen tinaati sabbii aree baliib Ukwaasana baasinaakiir, bariiyaah igadab bareeyooh kehii dhibi iyadna. 7 Baraakna suur een isalalaayee saktiina, door gaal bak tikwiriina. 8 Oontꞌa laakiin teen teena ibakii kasteeh teeyꞌishneet toonaatu: tehasiyaaywa igadabtiiwwa, tꞌatoorbiyaaywa, toomaagwa ibakii teeyꞌishneet toonaati. Aree baaneewaana tari yꞌamag bhali iyafaayeesookna baafirꞌana. 9 Shꞌiika tiifiineeb whaal tehayꞌaatiisooh tisingadnayt, taktakee dehaay baagwaasirna. 10 Oontꞌa kassaakna gayi nafara tikeena. Baraakna Ukwaasana Ukhaalig tꞌiiteeb tikeena, aree barooh daayiib afhami tiyadna. 11 Tooy Ijintiiliiwwa Iyahuudiiwwa farig kiibariin. Kwashaabwa kwashaab baakaaywa, mutehaddirwa mutehaddir baakaaywa, kishiyaawwa hirriiwwa, farig kiibariin. Laakiin Umasiih kassooh ikati, aree Umasiih kasseeyooh eefi.

12 Baraak Ukwaasanaay oodehay tikatiina, baruuh areeya hookna, ooknaay dehaay waasiya hookna. Aflaay baraak ibakii igarooyeekna hinnaatwa, nhisuuytwa, miskiinamtiiwwa, daayiinaaytwa tarmuumaawwa tistookwiineet toonaati. 13 Taktaki geeb tarmuumaab dꞌiina. Gaal bareesookna weernaay kehii ashkiimiiniyihoob, taktak afooyaana. Wꞌankwana bareekna afooyaneet toonaatiit, baraakna han taktak afooyaana. 14 Uureer naatiika daayiikaabu, aree baruuh naatka daayiib hiddaab hankwiir. 15 Umꞌasig Umasiih bareekna yhiiyyeeb oomkir utimakirneeb mitiyaayiini hookna. Ukwaasana aree oon umꞌasgii dehaay hiddaab gaal garooy dehaay waliikiya hookna. Aflaay Ukwaasana hamidna. 16 Umasiihiit tudiigwat kassooh umraayiisooh ibakii uginꞌiyookna kwarri. Taktak kasteeh tifagaranditee allamaanaat sooyaana. Shiilaatwa, madiihwa, Eeshuuk Imugaddasaayeet kafaawwa kafaanaat Ukwaasana uginꞌiisookna hamidna. 17 Tidꞌani shagaayka tari tiyadna bhaliyeebka, ibakii Wꞌankwana Yasuuꞌiib oosmii ikati. Aree bariiyooh geebii Ukwaasana Ubaaba tehamidna.

18 Taamꞌat: yaa taamꞌa, igarooyeekna eendeeyookna whii daasaana. Wꞌankwanaay yꞌaamanana tuun waajibtoohna tikati.

19 Aanda: aanda timꞌateekna ibakii areeyaana, aree bateeh geeb baamagna.

20 Uufraay: uufraay ifarooyeekna tisnaakiirneet toona masiihiit waajibtookna tikati. Beet tuuna Wꞌankwana afirhistini.

21 Ifaru: Ifaru yꞌareekna baasehasna. Tuun tuuna bareeh tisinꞌiikw.

22 Ikishiya: ikishiya kastooh toonaatiib oodehayi ankwanaayeekna sinaakirna. Baraah bareekna rheenihoob, bareeyooh suurii tishboobiini jillaay kiiki. Laakiin Wꞌankwana tireekwni sabbii nhas ginꞌii bareeh shagaamaana. 23 Tidꞌani shagaayka kassooh uginꞌiisookna shagaamaana. Wꞌankwanaay dehaay shagaamamiiniib ushagaayt dꞌiina, wꞌaadamii dehaay daamiiniib kiiki. 24 Wꞌankwana udehayooh dehaay daasaab ikatiyeeb wꞌijir iyaaw hookna indiyeet toona baabaadhiinna. Umasiih Wꞌankwana usidkiib baraakna shagaamteeneebi. 25 Maagnaayt shagaamiiniibka tumaagtooh dehaay jasaami indi, girad kiihaayna.