1 Baawloos Yasuuꞌaab Umasiihi linguumaab ikatiyi jillaay Ukwaasana waasaab ikatiyeenaaywa, Tiimootiib usaniisoonwa, 2 tumadiina Kooloosiib eefeen Ukwaasanaay oodehay, Umasiihiib isanaayeen ikatiin ookiik:

Ukwaasana Baabuun nꞌimaatwa mꞌasigwa baꞌiyaaw hookna.

3 Hinin siileelnayeebka, diimaab bareeyookna jillaay Ukwaasana nhamid, Wꞌankwanaayoon Yasuuꞌaab Umasiihiib Ubaaba nhamid. 4 Hinin baraakna Umasiih Yasuuꞌiib wꞌiimaanookna nimaasiw. Ukwaasanaay oodehay kasseeh areeteeneet toona han nimaasiw. 5 Tudiigwat tusidkiit, Usakana Udaayi, bareekna beeti hankaab eeyanihoob, baraakna been Usakana Udaayi iniiweeb isꞌaya timaasiwna. Aflaay wꞌiimaanuuknaawwa ureeruuknaawwa baraakna sꞌayaamtaaneet tunaatiib eefeen. Beet tuuna aree tibreeteeb daayiib dehookna dabaayti. 6 Bareekna beeti eeyaab Usakana Udaayi, kastooh tuduniyaati kehii itbariir. Baruuh samaraat haay yꞌiini aree inwiin, toon bareeyookna bitik tikatiit toona tꞌiiteena baraakna hankaab timaasiwneet tuyintii Ukwaasanaayt tinꞌima kasteeh usidkooh afhamtaana. 7 Usakana Udaayiib Abaafraasii tikanna. Baruuh hini geeb Umasiihi shaga shagaamiini aree winneet nhas ginꞌii bareek shagaamiini, 8 aree baraakna Ishuukeeb tibariineeb ooreer han baruuh sooya hoon.

9 Oon usabbii, oodoor bareesookna nimaasiweet tuyintii, bareeyookna jillaay toosileel singadaab kinki aree Ukwaasana bareekna baruuh yharriiweet tukanaantii teettiibneet toona hooy nhariw. Kasteeh Ishuukeet tifagarandiiwwa tufhamaawwa teettiibneet toona Ukwaasanaay nhariw. 10 Malya Wꞌankwana harriiweeb ookwiraay tikweerneet toonaati jillaaywa kasseeh isalalaayee barooh afirhisteeneet toonaati jillaaywa hinin siileelnay: daayi shagaayka samaraat imaar tiyadna, aree Ukwaasanaayt tukanaantiib iiwin tiyadna. 11 Bariiyuuh umatuuni akrir bareekna tarmuumaawwa akrirwa naatka haay timtariimneeb iniiweetookna toonaati jillaaywa baraakna sidik afirhiteeni jillaaywa siileelnay. 12 Ukwaasana Ubaaba udehayooh waadiyaayaab ikatiyeet toona tehadꞌaayeeti nuuriib bareekna han adhidh hooy kwasaameen ikwaas, barooh afirhaa tehamidneet toonaati jillaay siileelnay. 13 Ukwaasana oobliisi akrir yhadalaayee ishidhhan hoon, aree Wꞌoorooh whayisnaayt tehadꞌaayeetii dehaay haay eeya hoon. 14 Baruuh tumaagtoon afooyiini aree fadagooyt iniiw hoon. 15 Umasiih Ukwaasana ubaalaway ookna tꞌiiteebi. Baruuh kasteeh timakhluugaati awwalfiraay ikati. 16 Naatka baruuh dꞌiyaabu: tibreeteebwa tubuutiibwa eefeent teena, tilaweentwa tibaalawaywa, ishuuki akrirwa, yꞌankwanaawwa, yhaakmaawwa, tehadꞌaayeewwa, kasseeh baruuh dꞌiyaabi. Kastaah taana bariisooh daamaata aree bariiyooh jillaay daamaata. 17 Umasiih naati hankaayka eefi, aree bariiyooh sabbii kastaah taana hiddaab daayeen. 18 Baruuh ugarooyooh ooknaay girma ikati aree beet tuuna tukaniisi tikati. Baruuh yꞌayaani bitikii tubidaayaawwa wꞌawwalfiraaywa ikati, aflaay baruuh kasteeh tinaati mhakwal daayiiniib ikati. 19 Ukwaasana kassuuh utimmiimtiyuuh Wꞌooriyooh daayiiniyeet toonaatiib afirhiya, 20 aree bariiyooh geebii kasteeh teena barooh ookna beeti isꞌagiir, tubuuti kehii eefeent teena tari tibreeteeb eefeent teena, bariiyooh oobooy usaliibi kehii ifafnaay, mꞌasig ikwaas.

21 Door gaal baraak Ukwaasanaay winneet tisgiina. Baraak tidꞌiineet timaagnayti sabbiiwwa amagt kwoonanii kwoontaani sabbiiwwa barooh ashooyeeh tikeena. 22 Laakiin oontꞌa Wꞌooriitooh bashariit tooyatii, Ukwaasana imꞌaddaal hookna. Bareekna haay yꞌiiniyi jillaay, mugaddasaawwa, nhaswa, bariiyooh suurii gwihaab anuuwwa tikatiini jillaay imꞌaddaal hookna. 23 Baraak ibakii wꞌiimaaniyookna sidik akirna aree soorarimna. Baraak Usakana Udaayiib timaasiwnihoob timriineeb isꞌaya ibakii igarooyeekna baaꞌeetehaksaana. Oon Usakana Udaayiinaay aree ani Baawloos, shagaamanaab aki. Usakana Udaayi kastooh tuduniyaati kehii bhaliimiya.

24 Oontꞌa ani bareeyookna jillaay lhamaniyeet toonaatiib atmadhiidh. Ani ubashariisu lhamani, Umasiihiib ugarooy masi mhiyaab itarab itilhanayteeb, bariiyooh ugarooy jillaay timmiisani. Aree beet tuuna tukaniisi tikati. 25 Ani tukaniiseeti shagaamani Ukwaasana ikwaaseheeb. Ani Ukwaasanaay ibhali timmiima bareekna sooyaniyi jillaay Oon ushaga Ukwaasana yhiiheeb. 26 Baruuh kasseeh idaman ishꞌiyaayeebwa gwida taseewwa kwibsaab iiktiyeena oontꞌa laakiin udehayooh dehaay lawisiya. 27 Ukwaasana toon toona haay idꞌiyeeb usabab, baraak Ijintiili bariiteeh tꞌajaayibwa umatuuniibwa kwabaasna afhamteeni jillaay idꞌi. Beet tuuna tukwabaas: Umasiih hookna kwarriib ikati, aree umatuuni sꞌaya ikati.

28 Hinin Umasiihiit tudiigwat soonay, masi aree kasteeh tifagarandiitee oodehay kasseeh hisaaboohna nisidꞌi aree allamnay. Aflaay oodehay kasseeh Umasiihiib timmiimaab ikatiini jillaay Ukwaasanaay suurii haay eenay. 29 Toon toonaati jillaay ani gallabamani, aree akraab shagaamani, baruuh hiiyyaayu ikatiyeeb yꞌakrir yꞌalyaab haay shagaamani.