1 Ani bareeyookna jillaaywa Laawdiikiyaay oodehayi jillaaywa, baliib aneeb uknaayu miraab baakayni jillaaywa kak akraab shagaamaneet toona kanaant asehariiw hookna. 2 Ani toon toona bareeh haay asꞌakiiri jillaay sakani. Malya iginꞌaayaahna ureeriib hiddaab imshawawiin ikatiina, aree timmiimaat fhama miriitiit baarakamaab ikatiin. Oontꞌaaneet aree baraah Ukwaasanaayt kwabasnay iikan iyadna, aree beet tuuna Umasiih ookna tikati. 3 Kassuuh tifagarandiiti miraaywa tukanaanwa bariiyooh kwabas ikatiin. 4 Aflaay baraak hararfiridii batꞌatootaalni jillaay ani teen teena sooyani hookna. 5 Ani ugarooy geebookna baahaayeek han, ishuukee geebookna eefi. Aree baraakna kak takwakw tikatiineebwa kak Umasiihiib wꞌiimaaniyookna akraab tikatiineebwa irhitiib afirhani.

6 Umasiih Yasuuꞌa Wꞌankwanaayt agbiltaanayt, bariiyooh soorarimni kwiriina. 7 Tugadamtookna bariiyooh dhoomaat kwaasna, umidhhanookna bariiyooh dꞌirnaa. Baraak allamamtaaneet toonaatiit, wꞌiimaaniyookna akirnaa, aree whamaadi miyaawii tabnaa.

8 Hararfiridii amgwassaartiit gaal han biitilis hookna. Oon wꞌamgwasuura fagarandiit hiiseena laakiin baruuh wꞌaadami allamti oobhaat ikati. Baruuh toon tuduniyaati akriree yꞌaabu nuun Umasiihii kiiki.

9 Ukwaasana Umasiihiib ugarooy timmiima kwarri. 10 Baraak Umasiihiib tikatiini sabbii daayiib tiwinna. Baruuh kasseeh yꞌakrirwa tehadꞌaayeeti mhakwalwa eefi. 11 Baraak han bariiyooh tikwishabna, aadami ayee daama kwishuub kiiki laakiin Umasiihii daama kwishuub tikwishabna, aree idanuubi bashar hookna yakamiya. 12 Baraak titoomaasnihoob, Umasiihi geeb titoobaasna. Aree Ukwaasanaay yꞌakrireeb wꞌiimaaniyookna geebii, Ukwaasanaay yꞌakrir ibarooh yꞌayaani bitikii yakisiyaan, bariiyooh geeb yakamtaana.

13 Baraak door gaal ayaa tiifiina, maagnaayt shagaamtiina aree Ukwaasanaay dehay kitteena. Laakiin Ukwaasana Umasiihi geeb ishidhhan hookna, aree kastooh tumaagtoon afooya hoon. 14 Hinin Muusaay whag sinaakraab binkaayi sabbii kehoon iifiib oodeen Ukwaasana hoon yhatii idꞌi. Baruuh oodeen giigisiyaayt usaliibi kehii mismaraayee ithꞌa. 15 Beentooy Umasiih kasseeh yꞌakrirwa tehadꞌaayeewwa igrib. Umasiih tinasraateet firha idꞌiyihoob, bareeh yꞌabuukiyeet fidnaab giigisiyaayt tuduniya kastooh rhisiya.

16 Baraak naan tamteeneebwa tari naan gwꞌiteeneebwa weer dehay biisooyay hookna. Baraah bareek ibakii Ootrig Ugayiinaay Wꞌiid iidsitiib biisooyayna hookna. Toosab tari weer Iid iidsitiib biisooyayna hookna. 17 Taan taana harꞌook yꞌeent tinaateet lꞌandala teebhat ikatiin. Laakiin uusdik Umasiihiib itmari. 18 Uudehay miskiin massalameetiit imalak yꞌabid biitaliisna hookna. Baraah eerhi rheenihoob eefishna. Laakiin bareeh iginꞌaayaahna iknaayeet niyaatii atabayt, kastuuh tuun tuuna hararfirid tikati. 19 Baraah Umasiih kassooh ugarooy girma ikatiinaay gal kiikeen. Umasiih ugaru taad iniiw, imararwa eebꞌiiwwa taktak isꞌabiik. Ukwaasanaay akriree aree inwiin.

20 Baraak Umasiihi geeb tiyaana. Oontꞌa tuduniyaati dheesh bareeyookna kehii akrir kiibariin. Baraak bak tꞌiiti haakma isnaakiir udehayiit naanhooy tikweerna? 21 Toon toona baaꞌabiikna! Toon baadꞌamsaana! Toona baatatehaana! 22 Taan taana faayamiyaana, shaawti naat han kaꞌanfꞌiyaan. Aflaay uudehay waseeyiit allameeneet teena naanhooy gallabamteena? 23 Oon ugaanuuniit tisnaakrooy fagarandiit barraay rhiseen. Baraah bareek Ukwaasana areestiib rhiseena, miskiinaab tikatiineet hiiseena, kassooh ugaru yharriiweet toona kaleewtiib hiiseen. Laakiin aan baraah hinin nhariweet toonaati kaleewtiib takweet kiibariin.