28 Nodäm, aus Jesus wist, daut aules vollbrocht wia, daut de Schreft wudd erfelt woaren, sajcht Hee: Mie darscht! Ps 22:16 29 Doa stunt een Jefäss voll Ädikj; See oba felden een Sponzh met Ädikj un läden daut om eenen Iessopp un hilden Am daut aum Mul. Ps 69:22 30 Aus nu Jesus dän Ädikj jenomen haud, säd Hee: Daut es vollbrocht! Un Hee neijd sienen Kopp un äwajeef dän Jeist.

23 Aus de Soldoten Jesus jekjriezicht hauden, neemen see siene Kjleeda un muaken vea Deelen, fa jieda Soldot een Deel un uk daut Hamd. Daut Hamd oba wia onen eene Not, von bowen bat unjen derchut jewowen. 24 Dan säden see unjarenaunda: Well wie daut nich verieten, oba om daut lossen, wäm daut jehieren saul; daut de Schreft wudd erfelt woaren, dee doa sajcht: "See haben miene Kjleeda unja sikj jedeelt, un äwa mienen Rock haben see daut Loss jeschmäten." Dit deeden de Soldoten. Ps 22:18

25 Doa stunden oba biem Kjriez Jesus siene Mutta un de Sesta von siene Mutta, Maria, Kleopas siene Fru, un Maria Magdalena. 26 Aus nu Jesus siene Mutta sach un dän Jinja, dän Hee leef haud, doa biesied stonen, sajcht Hee to siene Mutta: Fru, kjikj, dien Sän! Joh 13:23 27 Doaropp sajcht Hee to däm Jinja: Kjikj, diene Mutta! Un von de Stund aun neem de Jinja ar no sikj.

33 Un aus see bat de Städ kjeemen, dee Koppknoaken* jenant woat, kjriezichten see Am doa un de Vebräakja, dän eenen to de Rajchte un dän aundren to de Linkje. 34 Jesus oba säd: Voda, vejeff äant, wiels see weeten nich, waut see doonen! See oba vedeelden siene Kjleeda un schmeeten daut Loss doaräwa. Jes 53:12; Ps 22:19; Apj 7:60; 3:17 35 Un daut Volkj stunt un kjikjt too. Un met äant toop spotten Am uk de Väaschte un säden: Hee haft aundre jerat; lot Am sikj selfst raden, wan Hee de Christus es, Gott sien Uterwälda. 36 Oba uk de Soldoten spotten äwa Am, kjeemen no Am un brochten Am Ädikj 37 un säden: Wan Du de Juden äa Kjennich best, rad Die selfst! 38 Doa wia oba uk eene Äwaschreft äwa Am jeschräwen, en griechische, latiensche un hebräische Latren: Dit es de Juden äa Kjennich.

39 Oba eena von de jehongne Vebräakja lastad Am un säd: Wan Du de Christus best, rad Die selfst un ons! 40 Oba de aundra auntwuad un stroft am un säd: Un du ferchtst die uk nich ver Gott, wäarent du en dautselwje Jerecht best? 41 Un wie kjrieen doch met rajcht dän Loon, dän onse Woakjen wieet sent; oba disa haft nuscht Ojjeschekjtet jedonen. 42 Un hee säd to Jesus: Har, denkj aun mie, wan Du en dien Rikj kjemst! Mat 20:21 43 Un Jesus säd to am: Ekj saj die woarhauftich: Vondoag woascht du met Mie em Paradies sennen. 2Kor 12:4

33 Aus oba de saste* Stund wia, kjeem eene Diestanis äwa daut gaunze Launt, bat de näajende* Stund. 34 Un om de näajende Stund roopt Jesus met lude Stemm un säd: Eloi, Eloi, lama sabachtani? Daut meent äwasat: Mien Gott, mien Gott, wuarom hast Du Mie veloten? Ps 22:1

51 Un kjikj, de Gardien em Tempel vereet en twee Stekja, von bowen bat unjen, un de Ieed scheddad un de Steena spoolden, 2Mo 26:31; Heb 10:19-20 52 un de Jräwa jinjen op, un väle Kjarpasch von de enjeschlopne Heilje stunden opp; 53 un see kjeemen ut de Jräwa rut no siene Opparstonunk un kjeemen en de heilje Staut un openboaden sikj to väle. Apj 26:23

54 Aus de Hauptmaun un dee, dee met am Jesus bewoakten, daut Ieedbäben sagen un waut doa passieed, ferchten see sikj sea un säden: Woarhauftich, disa wia Gott sien Sän!

13 Kjeena haft jratre Leew aus dise, daut hee sien Läwen fa siene Frind hanjeft. Joh 10:11; 1Joh 3:16

16 Wiels Gott haft de Welt soo jeleeft, daut Hee sienen eenjebuarnen Sän jeef, daut aule, dee aun Am jleewen, nich veloaren-gonen, oba daut eewje Läwen haben. Ree 5:8; 8:32; 1Joh 4:9

10 Wiels wan wie, aus wie noch Fiend wieren, met Gott veseent worden sent derch dän Doot von sien Sän, väl mea woa wie, dee wie veseent sent, derch sien Läwen jerat woaren. Ree 8:7; 2Kor 5:18; Kol 1:21

16 Doaraun hab wie de Leew erkjant, daut Hee fa ons sien Läwen hanjejäft haft; uk wie sent schuldich, fa de Breeda daut Läwen han to jäwen. Joh 15:13

2 Un Hee es de Veseenunk fa onse Sinden, oba nich auleen mau fa dee onsaje, oba uk fa dee von de gaunze Welt. Joh 11:51-52; Kol 1:20; 1Joh 4:10

8 un en siene Jestault aus een Mensch befungen, deemooticht Hee sikj selfst un wort jehuarsom bat aum Doot, jo, toom Doot aum Kjriez. Luk 14:11; Heb 12:2; 5:8

9 un weeten, daut Christus, vom Doot opperwakjt, stoaft nich mea; de Doot harscht nich mea äwa Am. 10 Wiels daut Hee jestorwen es, es Hee eenmol to de Sind jestorwen; waut Hee oba läft, daut läft Hee fa Gott. Heb 9:26-28

3 Weet jie nich, daut aula, dee wie en Jesus Christus jedeept sent, sent en sienen Doot jedeept? Gal 3:27 4 Soo sent wie nu met Am begroft worden derch daut Deepen en dän Doot, om daut wie, jrod soo aus Christus derch de Harlichkjeit vom Voda von de Doodje opperwakjt worden es, uk en een nieet Läwen waundlen sullen. Kol 2:12; 1Pe 3:21

27 Un soo aus de Menschen daut jesat es, eenmol to stoawen, oba no dit daut Jerecht, 1Mo 3:19 28 aulsoo es Christus eenmol jeopfat worden, om väle äare Sinden to droagen; toom tweedemol woat Hee jeseenen woaren onen Sind von dee, waut no Am luaren to de Seelichkjeit. Heb 10:10,12,14

22 Jie Mana von Israel, horcht no dise Wieed: Jesus von Nazaret, een Maun von Gott, mank junt bewäsen derch majchtje Woakjen un Wunda un Tieekjens, dee Gott derch Am mank junt deed, soo aus uk jie selfst weeten; 23 disa, dee no Gott sien fausta Rot un Verhäa-Weeten hanjejäft wort, dän hab jie jenomen un derch gottloose Henj jekjriezicht un dootjemoakt. Apj 4:28 24 Dän haft Gott oppjewakjt un Am de Doodes-Weedoag aufjeleest, wiels daut onmäajlich wia, daut Hee von däm wudd faustjehoolen woaren.

11 Ekj sie de gooda Hoad; de gooda Hoad jeft sien Läwen fa de Schop. Ps 23:1-6; Jes 40:11; Hes 34:11-23; Joh 15:13; Heb 13:20

26 Wiels soo foaken aus jie dit Broot äten un dit Kuffel drinkjen, vekjindj jie däm Harn sien Doot, bat Hee kjemt. Mat 26:29