1 Em feftieende Joa von de Rejierunk von däm Kjeisa Tiberius, aus Pontius Pilatus Launt-Rejiera wia en Judäa un Herodes de Veaferscht en Galiläa un sien Brooda Filippus de Veaferscht en Ituräa un en de Jäajent Trachonitis un Liesanias de Veaferscht en Abileene, 2 en de Huagepriestaschoft von Hanas un Kaifas, kjeem Gott sien Wuat no Johanes, Zacharias sien Sän, en de Wiltnis. Hes 1:3; Hos 1:1 3 Un hee kjeem en de gaunze Omjäajent aum Jordan un prädijd de Doop von de Busse fa de Sinden-Vejäwunk, 4 soo aus jeschräwen steit em Buak, de Wieed von däm Profeet Jesaja, dee doa sajcht: "Eene Stemm von een Roopenda en de Wiltnis: Moakt däm Harn sien Wajch reed un moakt siene Stäaj jlikj! Jes 40:3-5 5 Jieda Läajcht saul jefelt, un jieda Boajch un Eewa saul raufjebrocht woaren, un waut krauslich es, saul jlikj, un de ruche Wäaj sellen glaut-jemoakt woaren. 6 Un aul daut Fleesch woat Gott sien Heil seenen."

7 Hee säd nu to daut Volkj, daut rutjinkj, sikj von am deepen to loten: Jie Schlangen-Broodsel, wäa haft junt jewoarnt, von däm komenden Oaja wajch to ranen? 8 Brinjt nu Frucht, dee de Busse wieet es, un fangt nich aun, bie junt selfst to sajen: Wie haben Abraham toom Voda. Wiels ekj saj junt: Gott es fäich, däm Abraham ut dise Steena Kjinja opp to wakjen. 9 De Akjs oba licht de Beem aul aun de Wartel. Jieda Boom dan, dee nich goode Frucht drajcht, woat aufjehakt un en daut Fia jeschmäten.

10 Un de Volkjshäaden fruagen am un säden: Waut sell wie dan doonen? 11 Un hee auntwuad un säd to äant: Wäa twee Hamden haft, dee saul däm jäwen, dee kjeent haft, un wäa Äten haft, dee saul jrod soo doonen. 12 Dan kjeemen uk Taks-Kollakjta, om sikj deepen to loten un säden to am: Liera, waut sell wie doonen? 13 Hee säd to äant: Foddat nich mea, aus waut junt aunjeordent es. 14 Dan fruagen am uk de Soldoten un säden: Un waut sell wie doonen? Hee säd to äant: Doot kjeenem Jewault aun, un kloacht kjeenem faulsch aun, un siet tofräd met junem Loon.

15 Aus oba daut Volkj doaropp luad un sikj aula en äare Hoaten befruagen wäajen Johanes, auf hee veleicht de Christus wia, Joh 1:19-28 16 auntwuad Johanes un säd to aulem: Ekj deep junt met Wota; doa kjemt oba Eena, dee stoakja es aus ekj, wäm ekj nich wirdich sie, de Reemes von siene Sandalen to leesen; Dee woat junt met däm Heiljen Jeist un met Fia deepen. 17 Hee haft de Schmietscheffel en siene Haunt, un woat siene Draschflua jrintlich reinjen un dän Weit en sienen Spikja saumlen; daut Sprie oba woat Hee met Fia vebrennen, daut nich ut to laschen jeit. 18 Un met väle aundre Ermonungen prädijd hee to daut Volkj de goode Bootschoft.

19 Oba Herodes, de Tetrarch, aus hee von am jestroft wort wäajens Herodias, de Fru von sien Brooda Filippus, un wäajen aul daut Beese, waut Herodes jedonen haud, Mat 14:3-5; Mrk 6:17-20 20 deed hee bie aul daut noch doatoo, daut hee Johanes en daut Jefenkjnis enstopt.

21 Daut passieed oba, aus aul daut Volkj sikj deepen leet un Jesus uk jedeept wia un bäd, daut de Himmel opjedonen wort, 22 un de Heilja Jeist kjeem rauf en kjarpaliche Jestault, soo aus eene Duw opp Am, un eene Stemm kjeem ut däm Himmel un säd: Du best mien leewa Sän, aun Die hab Ekj Wooljefaulen. Luk 9:35; Joh 1:32

23 Un Hee selfst, Jesus, wia onjefäa dartich Joa oolt, aus Hee aunfunk; see hilden Am aula aus een Sän von Josef, een Sän von Eli, Luk 4:22; 4Mo 4:3-47 24 een Sän von Matat, een Sän von Levi, een Sän von Melchi, een Sän von Jana, een Sän von Josef, 25 een Sän von Matatias, een Sän von Amos, een Sän von Nahum, een Sän von Esli, een Sän von Nagai, 26 een Sän von Mahat, een Sän von Matatias, een Sän von Semei, een Sän von Josef, een Sän von Juda, 27 een Sän von Johanan, een Sän von Resa, een Sän von Serubabel, een Sän von Salatiel, een Sän von Neri, 28 een Sän von Melchi, een Sän von Addi, een Sän von Kosam, een Sän von Elmodam, een Sän von Er, 29 een Sän von Joses, een Sän von Elieser, een Sän von Jorim, een Sän von Matat, een Sän von Levi, 30 een Sän von Simeon, een Sän von Juda, een Sän von Josef, een Sän von Jonan, een Sän von Eljakim, 31 een Sän von Melea, een Sän von Menan, een Sän von Matata, een Sän von Natan, een Sän von David, 2Sa 5:14 32 een Sän von Isai, een Sän von Obed, een Sän von Boas, een Sän von Salmon, een Sän von Nahasson, Rut 4:17-22 33 een Sän von Aminadab, een Sän von Aram, een Sän von Hezron, een Sän von Perez, een Sän von Juda, 1Mo 5:1-32; 11:10-26; 21:2-3; 29:35 34 een Sän von Jakob, een Sän von Isaak, een Sän von Abraham, een Sän von Terach, een Sän von Nahor, 35 een Sän von Serug, een Sän von Regu, een Sän von Peleg, een Sän von Eber, een Sän von Schelach, 36 een Sän von Kenan, een Sän von Arpachschad, een Sän von Sem, een Sän von Noah, een Sän von Lamech, 37 een Sän von Metusala, een Sän von Henoch, een Sän von Jared, een Sän von Mahalalel, een Sän von Kenan, 38 een Sän von Enos, een Sän von Sett, een Sän von Adam, dee von Gott kjeem.