1 Un daut passieed doahinja, daut Hee derch jieda Staut un Darp reisd, prädijd un vekjindijd daut Evangelium von Gott sien Rikj, un de Twalw wieren met Am, 2 un jewesse Frues, dee von beese Jeista un Krankheiten wieren jeheelt worden: Maria, dee Magdalena jenant wort, von woone säwen Diewels rutjefoaren wieren, Joh 20:1,11-18 3 un Johana, Chusa siene Fru, Herodes sien Vewaulta, un Susanna un väle aundre, dee Am deenden von äa Hab-un-Goot. Mrk 15:40-41

4 Un aus sikj eene groote Volkjshäad vesaumeld, un see ut jieda Staut no Am kjeemen, räd Hee derch een Jlikjnis: 5 De Seimaun jinkj rut, toom sien Sot seien; un aus hee seid, foll ateljet aun dän Wajch, un daut wort veklunjt, un de Väajel vom Himmel freeten daut opp. 6 Un aundret foll oppen Steen; un aus daut oppjinkj, vedrieejd daut, wiels daut kjeene Feichtichkjeit haud. 7 Un aundret foll mank de Dornen; un de Dornen, dee met oppwossen, stekjten daut. 8 Un aundret foll en goode Ieed, un daut jinkj opp un brocht hundatmol soo väl Frucht. Aus Hee dit säd, roopt Hee: Wäa Uaren haft toom hieren, däm lot hieren!

9 Dan fruagen siene Jinja Am un säden: Waut es dit fa een Jlikjnis? 10 Hee oba säd: Junt es daut jejäft, de Jeheemnissen von Gott sien Rikj to weeten; oba de Äwaje en Jlikjnissen, daut see seenent nich seenen un hierent nich vestonen. Jes 6:9-10; Kol 1:26; 1Tim 3:16

11 Daut Jlikjnis oba es dit: Daut Sot es Gott sien Wuat. 12 Dee aun däm Wajch oba sent dee, dee daut hieren; dan kjemt de Diewel un nemt daut Wuat von äare Hoaten wajch, daut see nich jleewen un jerat woaren. 13 Dee oba opp däm Steen sent dee, woone, wan see hieren, nämen see daut Wuat met Freiden opp; oba see haben kjeene Wartel, dee fa eene Tietlank jleewen; oba en de Tiet von de Vesieekjunk, faulen see auf. 14 Un daut, waut manke Dornen foll, sent dee, dee daut hieren un dan hangonen un derch Sorjen un Rikjtum un Vejnieejen* von dit Läwen vestekjt woaren un brinjen de Frucht nich batem Riepen. 15 Daut en de goode Ieed oba sent dee, dee en een rajchtet un goodet Hoat daut jehieede Wuat behoolen un Frucht brinjen en Jedult. Apj 16:14

16 Oba kjeena, dee eene Laump aunstekjt, bedakjt dee met een Jefäss ooda stalt dee unja een Bad; oba hee sat dee opp eenen Laumpenhoola, daut dee, dee nenkomen, daut Licht seenen. 17 Wiels doa es nuscht vestoaken, daut nich woat openboa woaren, uk nuscht jeheem, daut nich woat bekaunt woaren un aum Licht komen. Mat 10:26; 1Kor 4:5 18 Siet väasechtich, woo jie hieren. Wiels wäa doa haft, däm woat jejäft; un wäa nich haft, von däm woat jenomen woaren, uk waut hee docht to haben. Mat 25:29

19 Dan kjeemen siene Mutta un siene Breeda no Am; un see kunnen, wäajens de Volkjshäad, nich bat Am komen. 20 Un Am wort daut berecht un säden: Diene Mutta un diene Breeda stonen buten un wellen Die seenen. 21 Hee oba auntwuad un säd to äant: Miene Mutta un miene Breeda sent dise, dee Gott sien Wuat hieren un daut doonen.

22 Un daut passieed aun eent von de Doag, daut Hee en een Schepp stieech met siene Jinja; un Hee säd to äant: Lot ons äwafoaren no de aundre Sied See. Un see fuaren auf. 23 Un wäarent see säajelden, schleep Hee en. Dan kjeem een Wintstorm opp dän See, un daut Schepp feld met Wota, un see wieren enne Jefoa. 24 Un see kjeemen un wuaken Am opp un säden: Liera, Liera, wie komen om! Dan stunt Hee opp un beschwicht dän Wint un de Wota-Walen; un dee läden sikj, un daut wort ruich. 25 Hee oba säd to äant: Wua es jun Gloowen? See ferchten sikj oba un wundaden sikj un säden unjarenaunda: Wäa dan es disa, daut Hee dän Wint un daut Wota jebitt, un dee jehorchen Am?

26 Un see launden aum Launt von de Gadarena, waut Galiläa jäajenäwa es. 27 Un aus Hee aun daut Launt rutjestäajen wia, kjeem Am een jewessa Maun ut de Staut entjäajen, dee aul von lange Tiet häa Diewels haud un kjeene Kjleeda mea aunhaud un bleef en kjeen Hus, oba en de Jräwa. 28 Aus hee oba Jesus sach, schrieech hee un foll ver Am dol un säd met lude Stemm: Waut hab ekj met Die to doonen, Jesus, du Sän vom Hechsten Gott? Ekj bedd Die, kjwäl mie nich! 29 (Wiels Jesus haud dän onreinen Jeist jeboden, ut däm Maun rut to foaren; wiels dee haud am aul foaken aunjejräpen; un see hauden am met Kjäden jebungen un met Feetspaunsels bewoat; oba hee reet de Spaunsels entwei un wort vom Diewel en de Wiltnis nenjedräwen.) 30 Un Jesus fruach am un säd: Waut es dien Nomen? Hee säd: Legion; wiels väle Diewels wieren en am nenjefoaren. 31 Un see prachaden Am, daut Hee äant nich wudd jebeeden, en dän Aufgrunt nenn to foaren. 32 Doa wia oba eene groote Häad Schwien, dee doa oppem Boajch grosden. Un see prachaden Am, daut Hee äant erlauben wudd, en dee nenn to foaren. Un Hee erlaubd äant daut. 33 Dan fuaren de beese Jeista ut däm Mensch rut un fuaren en de Schwien; un de Häad moaracht äwa dän Eewa en dän See nenn un vesoop.

34 Un aus de Schwienshoad sagen, waut passieet wia, randen see wajch un säden daut en de Staut un oppem Launt. 35 Dan jinjen see rut, om to seenen, waut passieet wia; un see kjeemen no Jesus un fungen dän Mensch, von däm de beese Jeista rutjefoaren wieren, jekjleet un veninftich, ver Jesus siene Feet setten; un see ferchten sikj. 36 Un dee daut jeseenen hauden, vetalden äant, woo de Besätna wia jeheelt worden. 37 Dan prachad Am de gaunze Häad von de Omjäajent von de Gadarena, daut Hee von äant wajchgonen wudd, wiels äant wia eene groote Angst äwafollen. Un Hee stieech en daut Schepp nenn un fua wada trigj. 38 De Maun, ut däm de beese Jeista rutjefoaren wieren, prachad Am, daut hee bie Am bliewen kunn, oba Jesus schekjt am wajch un säd: 39 Go trigj no dien Hus un vetal, woo väl Gott die jedonen haft. Un hee jinkj un vekjindijd derch de gaunze Staut, woo väl Jesus am jedonen haud.

40 Un daut passieed, aus Jesus trigjkjeem, neem Am daut Volkj freidich opp, wiels see luaden aula no Am. 41 Un kjikj, doa kjeem een Maun met Nomen Jairus, dee wia een Synagogen-Väastona, un hee foll Jesus ver de Feet un prachad Am, en sien Hus nenn to komen; 42 wiels hee haud eene eensje Dochta, soo bie twalw Joa, un dise lieech aum Stoawen. Un aus Hee hanjinkj, drenjden Am de Volkjshäaden. 43 Un eene Fru, dee aul twalw Joa met eenem Blootfluss wia, dee aul äa Läwens-Meddel aun Doktasch vebrukt haud un kunn von kjeenem jeheelt woaren, 44 kjeem von hinjen un schieed dän Soom von sien Kjleet aun; un fuaz bleef äa Blootfluss stonen. 45 Un Jesus säd: Wäa haft Mie aunjeschieet? Wiels aula daut veluagen, säd Petrus un dee met am wieren: Liera, de Volkjshäaden drenjen un drekjen Die, un Du sajchst: Wäa haft Mie aunjeschieet? 46 Oba Jesus säd: Mie haft irjentwäa aunjeschieet; wiels Ekj weet, daut Krauft von Mie rutjegonen es.

47 Aus oba de Fru sach, daut see nich onbemoakjt jebläwen wia, kjeem see met Zetren un foll ver Am dol un säd ver aul de Menschen, wäajen waut fa Uasoak see Am aunjeschieet haud un woo see fuaz wia jesunt jeworden. 48 Hee oba säd to ar: Sie jetroost, Dochta, dien Gloowen haft die jeheelt; go han en Fräd!

49 Aus Hee noch räd, kjeem eena von däm Synagogen-Väastona sien Hus un säd to am: Diene Dochta es jestorwen, bemieej dän Liera nich. 50 Oba aus Jesus daut hieed, auntwuad Hee am un säd: Fercht die nich; jleew bloos, un see woat jesunt woaren! 51 Un aus Hee en daut Hus nenkjeem, leet Hee kjeenen met nengonen, buta Petrus un Jakobus un Johanes un dän Voda von daut Kjint un de Mutta. Mat 17:1 52 See hielden oba aula un jaumarieeden om ar. Hee oba säd: Hielt nich; see es nich jestorwen, oba see schlapt. Luk 7:13 53 Oba see lachten Am ut, wiels see wisten, daut see jestorwen wia. 54 Hee oba schekjt äant aula rut, neem ar aun de Haunt, roopt un säd: Kjint*, sto opp! 55 Un äa Jeist kjeem trigj, un see stunt fuaz opp; un Hee befool, ar Äten to jäwen. 56 Un äare Elren wieren buta sikj; Hee oba jeboot äant, kjeenem to sajen, waut passieet wia. Mrk 7:36; Luk 5:14