1 Hee säd oba uk to siene Jinja: Doa wia een jewessa rikja Maun, dee eenen Vewaulta haud; un dee wort bie am aunjekloacht, daut hee sien Hab-un-Goot vemacheld. 2 Un hee roopt am un säd to am: Waut es daut, waut ekj von die hia? Laj de Räakjninj auf von diene Vewaultunk, wiels du kaust nich lenja Vewaulta sennen. 3 Dan säd de Vewaulta en sikj selfst: Waut saul ekj doonen? wiels mien Har nemt mie de Vewaultunk wajch. Growen kaun ekj nich, un ekj schäm mie to prachren. 4 Ekj weet, waut ekj doonen woa, daut see mie dan, wan ekj von de Vewaultunk tosied-jesat sie, en äare Hiesa oppnämen. 5 Un hee roopt eenen jiedren Schildna von sien Har un säd to däm Ieeschten: Woo väl best du mienem Harn schuldich? 6 Un hee säd: Hundat Bat* Eelj. Un hee säd to am: Nemm dienen Schultzadel, sat die schwind dol un schriew feftich. 7 No daut, säd hee to däm aundren: Du oba, woo väl best du schuldich? Un hee säd: Hundat Kor* Weit. Un hee säd to am: Nemm dienen Schultzadel un schriew tachentich. 8 Un de Har lowd dän ojjerajchten Vewaulta, daut hee kluak jehaundelt haud. Wiels de Kjinja von dise Welt sent jäajen äare Jennerazion kjlieekja aus de Kjinja vom Licht. Efs 5:8-9 9 Un ekj saj junt: Moakt junt Frind derch dän ojjerajchten Mammon, om, wan jie to Enj komen, see junt dan oppnämen en de eewje Woninj. Mat 6:20; 19:21; Luk 14:14

10 Wäa em Kjlienen tru es, es uk em Grooten tru; un wäa em Kjlienen ojjerajcht es, es uk em Grooten ojjerajcht. Luk 19:17 11 Wan jie nu en däm ojjerajchten Mammon nich tru jewast sent, wäa woat junt daut Woarhauftje aunvetruen? 12 Un wan jie en däm Framden nich tru wieren, wäa woat junt jäwen, waut junt es? 13 Kjeen Kjnajcht kaun twee Haren deenen; wiels entwäda hee woat dän eenen haussen un dän aundren leewen, ooda hee woat dän eenen aunhenjen un dän aundren ve-achten. Jie kjennen nich Gott deenen un däm Mammon. Mat 6:24

14 Dit aula oba hieeden de Farisäa uk, dee jeltjierich wieren un Am vespotten. 15 Un Hee säd to äant: Jie sent dee, dee sikj selfst rajchtfoadjen ver de Menschen; oba Gott kjant june Hoaten; wiels waut bie de Menschen huach es, daut es ver Gott een Jreiel. Luk 18:9-14

16 Daut Jesaz un de Profeeten wieren bat opp Johanes; un von dan aun woat Gott sien Rikj jeevangelisieet, un aule-maun drenjt met Jewault doa nenn. 17 Daut es oba leichta, daut Himmel un Ieed vegonen, aus daut een Sträakjskje vom Jesaz wajchfelt. Mat 5:18

18 Een jiedra, dee sikj von siene Fru scheet un friet sikj eene aundre, brakjt de Ehe, un een jiedra, dee dee von däm Maun Jeschiedne friet, brakjt de Ehe. Mat 5:32; 19:9

19 Doa wia oba een jewessa rikja Maun, dee sikj met Purpur un feinet Lienzeich* kjleed, läwd froo un prachtvoll aule Dach. 20 Doa wia oba een jewessa Oama, met Nomen Lazarus, dee ver siene Däa jelajcht wia, voll Schwäaren, 21 un velangd sikj saut to moaken von de Kjreemels, dee von däm Rikjen sien Desch follen; oba uk de Hunj kjeemen un lekjten am siene Schwäaren. 22 Un daut passieed, daut de Oama storf un am wort von de Enjel en Abraham siene Schoot jedroacht. De Rikja oba storf uk un wort begroft. 23 Aus hee enne Kwol wia enne Hal, hoof hee siene Uagen opp un sach Abraham von wietauf un Lazarus en siene Schoot. 24 Un hee roopt un säd: Voda Abraham, erboarm die äwa mie un schekj Lazarus, daut hee de Spetz von sien Finja mucht en Wota ducken un miene Tung kjeelen; wiels ekj woa jekjwält en dise Flaum! 25 Abraham oba säd: Sän, denkj doaraun, daut du dien Goodet en dien Läwen jekjräajen hast un jrod soo Lazarus daut Beese; nu oba woat hee jetreest, du oba woascht jekjwält. Luk 6:24 26 Un äwa aul dit es tweschen ons un junt een groota Aufgrunt faustjemoakt, soo daut dee, dee von hia no junt äwagonen wellen, nich kjennen, uk nich dee, dee von dort no ons äwakomen wellen. 27 Hee säd: Ekj bedd die dan, Voda, daut du am no mien Voda sien Hus schekjst; 28 wiels ekj hab fief Breeda, daut hee to äant mucht zeijen, daut see nich uk en dise Städ von Kwol nenkomen. 29 Abraham oba säd to am: See haben Moses un de Profeeten. Lot äant dee hieren. 2Tim 3:16 30 Hee oba säd: Nä, Voda Abraham, oba wan von de Doodje wäa wudd no äant gonen, wudden see Busse doonen. 31 Hee oba säd to am: Wan see Moses un de Profeeten nich horchen, woaren see sikj uk nich äwazeijen loten, wan irjentwäa von de Doodje oppsteit.