1 Un aus Hee aul siene Räd ver de Uaren von daut Volkj verecht haud, jinkj Hee en Kapernaum nenn. 2 Un een jewessa Hauptmaun sien Kjnajcht, dän hee väl räakjend, wia krank un lach aum Stoawen. 3 Aus hee von Jesus hieed, schekjt hee de Juden äare Eltestasch un prachad Am, daut Hee komen wudd un sienen Kjnajcht jesunt moaken. 4 Un aus see no Jesus kjeemen, prachaden see Am iernstlich un säden: Hee es daut wieet, daut Du daut fa am deist; 5 wiels hee leeft onse Nazion, un hee haft ons de Synagoge jebut. 6 Dan jinkj Jesus met äant. Un aus Hee ieescht nich mea wietauf von daut Hus wia, schekjt de Hauptmaun Frind no Am un leet Am sajen: Har, bemieej Die nich; wiels ekj sie daut nich wieet, daut Du unja mien Dak kjemst. 7 Doawäajens hilt ekj mie selfst nich fa wirdich, no Die to komen; oba saj bloos een Wuat, dan woat mien Kjnajcht jesunt woaren. 8 Wiels ekj sie uk een Mensch, unja Vollmacht jestalt, un hab Soldoten unja mie; un ekj saj to disem: Go, un hee jeit; un toom aundren: Komm häa, un hee kjemt; un to mienem Kjnajcht: Doo dit, un hee deit daut. 9 Aus Jesus daut hieed, wundad Hee sikj äwa am un dreid sikj om un säd to daut Volkj, daut Am nofoljd: Ekj saj junt: Selfst en Israel hab Ekj soonen grooten Gloowen nich jefungen. 10 Un aus dee Jeschekjte trigj en daut Hus kjeemen, fungen see dän kranken Kjnajcht jesunt.

11 Un daut passieed aum näakjsten Dach, daut Hee en eene Staut met Nomen Nain jinkj, un väle von siene Jinja un eene groote Volkjshäad jinjen met Am. 12 Un aus Hee noda no de Stauts-Puat kjeem, kjikj, doa druagen see eenen Dooden rut, dee een eensja Sän wia von siene Mutta, un see wia eene Wätfru; un väl Volkj ut de Staut jinkj met ar. 13 Un aus de Har ar sach, jaumad Am daut äwa ar, un Hee säd to ar: Hiel nich! 14 Un Hee kjeem doa han un schieed daut Soakj aun, un de Droagasch stunden stell. Un Hee säd: Junga Maun, Ekj saj die, sto opp! Mrk 5:41 15 Un de Doodja recht sikj opp un funk aun to räden. Un Hee jeef am no siene Mutta. 1Kje 17:23; 2Kje 4:36 16 Dan äwakjeem äant aula eene Forcht, un see lowden Gott un säden: Een groota Profeet es mank ons oppjestonen, un Gott haft sien Volkj besocht. Mat 16:14; Luk 1:68 17 Un dise Räd von Am vespreed en gaunz Judäa un en de gaunze Omjäajent.

18 Un siene Jinja berechten Johanes äwa aul dit. 19 Un Johanes roopt twee von siene Jinja no sikj un schekjt dee no Jesus un leet Am froagen: Best Du de Komenda, ooda sell wie no eenem aundren luaren? 20 Aus nu de Mana no Am kjeemen, säden see: Johanes de Deepa haft ons no Die jeschekjt, un lat Die froagen: Best Du de Komenda, ooda sell wie no eenem aundren luaren? 21 En deeselwje Stund oba heeld Hee väle von Krankheiten un Ploagen un beese Jeista, un väle Blinje schenkjt Hee daut Seenen. 22 Un Jesus auntwuad un säd to äant: Got han un vetalt Johanes, waut jie jeseenen un jehieet haben: Blinje woaren seenent, Lome gonen, Leprakranke woaren rein, Doofe hieren, Doodes woaren opperwakjt, de Oame woat daut Evangelium vekjindicht; 23 un seelich es, wäa sikj nich aun Mie oajat.

24 Un aus Johanes siene Bootschofta wajchjegonen wieren, funk Hee aun to de Volkjshäaden to räden von Johanes: Waut sent jie rutjegonen en de Wiltnis to seenen? Een Schelprua, daut vom Wint jeschockelt woat? 25 Ooda waut jinj jie rut to seenen? Eenen Mensch met wieekje Kjleeda aunjetrocken? Kjikj, dee en harliche Kjleeda un en Jemietlichkjeit läwen, sent en de kjennichliche Häwa. 26 Ooda waut sent jie rutjegonen to seenen? Eenen Profeet? Jo, Ekj saj junt, un mea aus een Profeet. Luk 1:76 27 Dit es dee, von däm jeschräwen steit: "Kjikj, Ekj schekj mienen Enjel ver dien Aunjesecht, dee dienen Wajch ver Die reedmoaken woat". Mal 3:1

28 Wiels Ekj saj junt: Unja dee, dee von Frues jebuaren sent, es kjeen jratra Profeet aus Johanes de Deepa; oba, de Kjlansta en Gott sien Rikj es jrata aus hee. Luk 1:15 29 Un aul daut Volkj, daut Am hieed, un de Taks-Kollakjta, jeewen Gott rajcht, wäarent see sikj deepen leeten met Johanes siene Doop. Mat 21:32; Luk 3:7,12 30 Oba de Farisäa un Jesaz-Jelieede ve-achten Gott sien Rot jäajen sikj selfst un leeten sikj nich von am deepen. Apj 13:46

31 Un de Har säd: Met wäm saul Ekj de Menschen von dise Jennerazion vejlikjen, un wäm sent see jlikj? 32 See sent de Kjinja jlikj, dee oppem Moakjt setten un sikj eenaunda tooroopen un sajen: Wie haben junt de Fleet jespält, un jie haben nich jedaunzt; wie haben junt Kloagleeda jesungen, un jie haben nich jehielt. 33 Wiels Johanes de Deepa es jekomen, dee eet kjeen Broot un drunk kjeenen Wien; dan saj jie: Hee haft eenen Diewel. Mat 3:4 34 De Menschensän es jekomen, dee at un drinkjt, un jie sajen: Kjikj, een Fräta un een Wiensupa, de Taks-Kollakjta un Sinda äa Frint! Luk 15:2 35 Un de Weisheit es jerajchtfoadicht worden von aul äare Kjinja. 1Kor 1:24-30

36 Dan velangd eena von de Farisäa, daut Hee met am äten sull. Un Hee jinkj nenn en daut Hus von däm Farisäa un sad sikj aum Desch. Luk 11:37 37 Un kjikj, eene Fru en de Staut, dee eene Sindarin wia; aus see enwort, daut Hee en daut Hus von däm Farisäa aum Desch saut, brocht see eene Alabasta-Buddel met Saulweelj. Mrk 14:3 38 Un see stunt von hinjen bie siene Feet un hield, un funk aun siene Feet met Tronen naut to moaken un dee met de Hoa opp äa Kopp to drieejen, un kust siene Feet un saulwd dee met de Eelj. 39 Aus oba de Farisäa daut sach, dee Am enjelot haud, säd hee bie sikj selfst: Wan disa een Profeet wia, dan wudd Hee weeten, wäa un waut fa eene Fru daut es, dee Am aunschieet; wiels see es eene Sindarin. 40 Un Jesus auntwuad un säd to am: Simon, Ekj hab die waut to sajen. Hee oba säd: Liera, saj daut. 41 Een jewessa Jeltmaun haud twee Schildna. Eena wia am fief-hundat Denarius schuldich, de aundra feftich. 42 Oba aus see nuscht hauden toom betolen, schonk hee äant daut beid. Saj dan, woona von äant woat am nu daut mieeschte leewen? 43 Simon auntwuad un säd: Ekj denkj, dee, däm hee daut mieeschte jeschonken haft. Hee säd to am: Du hast rechtich je-uadeelt*. 44 Un Hee dreid sikj no de Fru un säd to Simon: Sitst du dise Fru? Ekj sie en dien Hus jekomen; du hast Mie nich Wota jejäft fa miene Feet. See oba haft miene Feet met Tronen naut-jemoakt un met de Hoa opp äa Kopp jedrieecht. 1Mo 18:4 45 Du hast Mie kjeenen Kuss jejäft; see oba haft von dan, daut Ekj nenjekomen sie, nich oppjehieet, miene Feet to kussen. Ree 16:16 46 Du hast mien Kopp nich met Eelj jesaulft; see oba haft miene Feet met Saulweelj jesaulft. 47 Doawäajen saj Ekj die: Äare väle Sinden sent vejäft, wiels see haft väl jeleeft; wäm oba weinich vejäft woat, dee leeft weinich. 48 Un Hee säd to ar: Die sent diene Sinden vejäft. 49 Dan fungen dee aun, dee met aum Desch sauten, bie sikj selfst to sajen: Wäa es disa, dee soogoa Sinden vejeft? Luk 5:21 50 Hee oba säd to de Fru: Dien Gloowen haft die jerat; go en Fräd! Luk 8:48; 17:19; 18:42