1 Un daut passieed, aus Hee aum Sabat en daut Hus von eenem Väaschten von de Farisäa kjeem, toom Broot äten, daut see no Am opppausten. Luk 6:6-11; 11:37 2 Un kjikj, doa wia een Mensch ver Am, dee wia wotasochtich.* 3 Un Jesus funk aun un säd to de Jesaz-Jelieede un Farisäa: Es daut erlaupt, aum Sabat to heelen? 4 See oba wieren stell. Un Hee foot am aun un heeld am un leet am gonen. 5 Un Hee auntwuad un säd to äant: Wäa es mank junt, däm sien Äsel ooda Oss en eenen Borm felt, dee dän doa nich fuaz aum Sabatdach ruttrakjt? Mat 12:11; Luk 13:15 6 Un see kunnen Am doaropp kjeene Auntwuat jäwen.

7 Hee säd oba een Jlikjnis to de Enjelodne, aus Hee moakjt, woo see de väaschte Plaza wälden, un säd to äant: Mat 23:6 8 Wan du von irjentwäm to Kjast enjelot woascht, sat die nich opp dän väaschten Plauz dol, daut nich met eenmol eena, dee mea je-ieet es aus du, von am enjelot es, Spr 25:6-7 9 un dee, dee die un am enjelot haft, kjemt un sajcht to die: Jeff disem Plauz; un du met Schaund dän latsten Plauz nämen motst. 10 Oba wan du enjelot woascht, dan go un sat die opp dän latsten Plauz dol, om daut, wan dee kjemt, dee die enjelot haft, dan to die sajcht: Frint, kom wieda nopp! Dan woascht du Iea haben ver aul dee, dee met die aum Desch setten. 11 Wiels wäa sikj selfst erhäft, woat raufjesat woaren; oba wäa sikj selfst raufsat, woat erhowen woaren. Mat 23:12; Luk 18:14; Jak 4:6,10

12 Hee oba säd uk to däm, dee Am enjelot haud: Wan du een Meddach- ooda een Owentmol moakst, dan lod nich diene Frind en uk nich diene Breeda uk nich dien Frintschoft uk nich diene rikje Nobasch, daut see nich met eenmol uk die wada enloden wudden un die trigj-jetolt woat. 13 Oba wan du eene Moltiet moakst, dan lod Oame, Vekjräpelde, Lome un Blinje en; 5Mo 14:29 14 dan woascht du seelich sennen, wiels see haben nich, die trigj to tolen, wiels daut woat die bie de Opparstonunk von de Jerajchte trigj-jetolt woaren. Apj 24:15; 1Kor 15:23

15 Aus eena, dee met Am aum Desch saut, dit hieed, säd dee to Am: Seelich es, wäa daut Broot en Gott sien Rikj äten woat. Luk 13:29 16 Hee oba säd to am: Een jewessa Mensch muak een grootet Owentmol un loot väle en. 17 Un hee schekjt sienen Kjnajcht to de Owentmol-Stund, om de Enjelodne to sajen: Komt, wiels daut es nu aula reed. 18 Un see fungen aula aun, no enaunda sikj to entschuldjen. De Ieeschta säd to am: Ekj hab eenen Aka jekoft un hab daut needich, rut to gonen un dän to beseenen; ekj bedd die, entschuldj mie. 19 Un een aundra säd: Ekj hab fief Joch-Ossen jekoft un go han, dee to proowen; ekj bedd die, entschuldj mie. 20 Un een aundra säd: Ekj hab eene Fru jefriet, doawäajen kaun ekj nich komen. 1Kor 7:33 21 Un de Kjnajcht kjeem un berecht daut sienem Harn. Dan wort de Hushar doll un säd to sienem Kjnajcht: Go schwind rut opp de Wäaj un Gaussen von de Staut un brinj de Oame un Vekjräpelde un Lome un Blinje hia nenn. 22 Un de Kjnajcht säd: Har, daut es jeworden, waut du befolen hast; doa es oba noch Rum. 23 Un de Har säd to däm Kjnajcht: Go rut opp de Wäaj un en de Hakjen un bedwinj äant, nenn to komen, daut mien Hus voll woat. 24 Wiels ekj saj junt, daut kjeena von jane Mana, dee enjeloden wieren, mien Owentmol schmakjen woat.

25 Doa jinjen oba groote Volkjshäaden met Am; un Hee dreid sikj om un säd to äant: 26 Wan irjentwäa no Mie kjemt un haust nich sienen Voda un Mutta un Fru un Kjinja un Breeda un Sestren un doatoo uk sien ieejnet Läwen, dee kaun nich mien Jinja sennen. 5Mo 33:9; Luk 18:29-30; 1Kor 7:29 27 Un wäa nich sien Kjriez drajcht un Mie hinjaraun-kjemt, dee kaun nich mien Jinja sennen. Luk 9:23 28 Wiels, wäa von junt, dee eenen Torm buen well, sat sikj nich ieescht dol un beräakjent de Kosten, auf hee haft, daut ut to fieren? 29 daut nich met eenmol, wan hee dän Grunt jelajcht haft, un dän nich foadich-moaken kaun, aule, dee daut seenen, aunfangen am to vespotten 30 un sajen: Dis Mensch funk aun to buen un kunn nich foadich-moaken. 31 Ooda woon Kjennich, dee doa rutjeit, met eenem aundren Kjennich Kjrich to fieren, sat sikj nich ieescht dol un äwalajcht, auf hee wudd kjennen met tieen-dusent däm bejäajnen, dee jäajen am kjemt met twintich-dusent? 32 Wan oba nich, dan schekjt hee, wäarent jana noch wietauf es, eene Bootschoft un prachat om Fräd. 33 Jrod soo uk een jiedra von junt, dee nich aules aufsajcht waut hee haft, kaun nich mien Jinja sennen. Luk 9:62

34 Daut Solt es goot; wan oba daut Solt fleiw woat, wuamet saul de Jeschmak biejebrocht? Mat 5:13; Mrk 9:50 35 Daut es nich to brucken fa daut Launt uk nich fa Dung; daut woat rutjeschmäten. Wäa Uaren haft toom hieren, däm lot hieren.