1 Un doa kjeemen noda no Am aul de Taks-Kollakjta un Sinda, Am to hieren. 2 Un de Farisäa un Schreftjelieede murden un säden: Disa nemt de Sinda aun un at met äant toop. Luk 5:30; 19:7 3 Hee oba vetald äant dit Jlikjnis un säd: 4 Waut fa Mensch mank junt, dee hundat Schop haft un eent von dee veloaren haft, lat nich de näajen-un-näajentich en de Wiltnis un jeit daut Veloarne hinjaraun, bat hee daut finjt? Luk 19:10; Hes 34:12; Joh 10:11-12 5 Un wan hee daut jefungen haft, lajcht hee daut opp siene Schullasch met Freiden. 6 Un wan hee no Hus kjemt, roopt hee de Frind un Nobasch toop un sajcht to äant: Freit junt met mie, wiels ekj hab mien Schop jefungen, daut veloaren wia! 7 Ekj saj junt: Jrod soo woat Freid sennen em Himmel äwa eenen Sinda, dee Busse deit, ver näajen-un-näajentich Jerajchte, dee daut nich aun Busse fält.

8 Ooda woone Fru, dee doa tieen Selwastekja* haft, wan see een Selwastekj velist, stekjt nich een Licht aun un fäajcht daut Hus ut un sieekjt flietich, bat see daut finjt? 9 Un wan see daut jefungen haft, roopt see de Frind un Nobasch toop un sajcht: Freit junt met mie, wiels ekj hab daut Selwastekj jefungen, daut ekj veloaren haud! 10 Jrod soo, saj ekj junt, es doa Freid ver Gott siene Enjel äwa eenen Sinda, dee Busse deit.

11 Un Hee säd: Een jewessa Mensch haud twee Säns. 12 Un de Jinjsta säd toom Voda: Voda, jeff mie daut Poat vom Vemieejen, daut mie traft. Un hee deeld äant daut Goot. 13 Un no weinje Doag neem de jinjsta Sän aules toop un reisd wajch en een Launt wietauf; un doa vemacheld hee sien Vemieejen met een willet Läwen. Spr 29:3 14 Un nodäm hee oba aules vebrukt haud, kjeem eene jewaultje Hungaschnoot äwa daut Launt, un hee selfst funk aun, Mangel to lieden. 15 Dan jinkj hee han un vemeed sikj bie eenem Birja von daut Launt; dee schekjt am opp sienen Aka, om de Schwien to heeden. 16 Un am velangd, sien Buck met de Schluwen to fellen, dee de Schwien freeten; un kjeena jeef am. Spr 23:21 17 Aus hee oba to sikj selfst kjeem, säd hee: Woo väl Loon-Oabeida von mien Voda haben Äwafluss aun Broot, ekj oba kom hia om fa Hunga! 18 Ekj woa mie oppmoaken un no mienem Voda gonen un to am sajen: Voda, ekj hab jesindicht jäajen dän Himmel un ver die Ps 51:6; Jer 3:12-13 19 un sie nich mea wieet, dien Sän to heeten; moak mie soo aus eenen von diene Loon-Oabeida! 20 Un hee muak sikj opp un jinkj no sienem Voda. Aus hee oba noch wietauf wia, sach sien Voda am un wort metliedent, rand, foll am om sienen Hauls un kust am. 21 Un de Sän säd to am: Voda, ekj hab jesindicht jäajen dän Himmel un ver die un sie nich mea wieet, dien Sän to heeten. 22 Oba de Voda säd to siene Kjnajchts: Brinjt daut baste Kjleet häa un trakjt am daut aun, un jäft am eenen Rinkj aun siene Haunt un Schoo* aun de Feet. 23 Un brinjt daut jemaste Kaulf häa un schlacht daut; lot ons äten un froo sennen! 24 Wiels disa, mien Sän, wia doot un es wada läwendich jeworden; hee wia veloaren un es jefungen worden. Un see fungen aun, froo to sennen. Efs 2:5

25 Oba sien elra Sän wia opp de Stap; un aus hee kjeem un sikj nom Hus nodad, hieed hee Musikj un Daunz. 26 Un hee roopt eenen von de Kjnajchts un fruach, waut daut wia. 27 Hee oba säd to am: Dien Brooda es jekomen, un dien Voda haft daut jemaste Kaulf jeschlacht, wiels hee am jesunt wada jekjräajen haft. 28 Dan wort hee doll un wull nich nengonen. Sien Voda oba jinkj rut un prachad am. Mat 20:15 29 Hee oba auntwuad un säd to däm Voda: Kjikj, soo väle Joaren deen ekj die un hab dien Jeboot noch niemols äwaträden; un du hast mie niemols eene Kos jejäft, daut ekj met miene Frind kunn froo sennen. 30 Oba aus disa, dien Sän, jekomen es, dee dien Goot met Huaren vemachelt haft, hast du fa am daut jemaste Kaulf jeschlacht. 31 Hee oba säd to am: Mien Sän, du best emma bie mie, un aules, waut mient es, es dient. 32 Oba ons to freien un froo to sennen wia needich; wiels disa, dien Brooda, wia doot un es wada läwendich jeworden; un wia veloaren un es wada jefungen worden.