1 Un daut passieed, daut Hee opp eene jewesse Städ wia un bäd; un aus Hee opphieed, säd eena von siene Jinja to Am: Har, lia ons bäden, soo aus uk Johanes siene Jinja lieed. 2 Un Hee säd to äant: Wan jie bäden, dan sajcht: Ons Voda, dee du em Himmel best, dien Nomen saul jeheilicht woaren. Lot dien Rikj komen. Lot dien Wellen oppe Ieed jedonen woaren soo aus em Himmel. 3 Jeff ons aule Dach ons needjet Broot. 4 Un vejeff ons onse Sinden, wiels wie vejäwen uk eenen jiedren, dee ons schuldich es; un fia ons nich enne Vesieekjunk, oba lees ons vom Beesen.

5 Un Hee säd to äant: Wäa von junt wudd eenen Frint haben un wudd medden enne Nacht no am gonen un to am sajen: Frint, lie mie dree Brood; 6 wiels mien Frint es von de Reis bat mie jekomen, un ekj hab nuscht, waut ekj am väasaten kaun; 7 un hee wudd von bennen auntwuaten un sajen: Moak mie kjeene Mieej; de Däa es aul toojeschloten, un miene Kjinja sent bie mie em Bad; ekj kaun nich oppstonen un die jäwen. 8 Ekj saj junt, wan hee uk nich wudd oppstonen un am jäwen, wiels hee sien Frint es, dan woat hee doch wäajen sien Onveschämdet haulwen oppstonen un am jäwen, soo väl aus hee brukt. 9 Un ekj saj junt: Froacht, dan woat junt jejäft woaren; sieekjt, dan woa jie finjen; klopt aun, un junt woat opjemoakt woaren. 10 Wiels een jiedra, dee doa frajcht, kjricht, un wäa doa sieekjt, finjt, un wäa doa aunklopt, däm woat opjemoakt woaren. Luk 13:25 11 Wäa von junt es een Voda, wan de Sän no Broot frajcht, am eenen Steen doafäa jeft? ooda wan hee no eenem Fesch frajcht, am enne Städ Fesch eene Schlang jeft? 12 ooda uk, wan hee no een Ei frajcht, am eenen Skorpion doafäa jeft? 13 Wan jie nu, dee jie schlajcht sent, weeten june Kjinja goode Gowen to jäwen, wooväl mea woat de himlischa Voda dän Heiljen Jeist deejanje jäwen, dee doano froagen.

14 Un Hee dreef eenen Diewel rut, dee stomm wia. Daut passieed oba, aus de Diewel rutjefoaren wia, räd de Stomma; un de Volkjshäaden vewundaden sikj. 15 Atelje von äant oba säden: Derch Beelzebub, dän Väaschten von de Diewels, drift Hee de Diewels rut. 16 Aundre oba vesochten Am un foddaden von Am een Tieekjen vom Himmel. Mrk 8:11 17 Hee oba, aus Hee äare Jedanken wist, säd to äant: Jieda Rikj, daut met sikj selfst jedeelt woat, jeit togrunt; un een Hus, daut jäajen sikj selfst es, felt. 18 Wan oba uk de Soton jäajen sikj selfst jedeelt es, woo kaun sien Rikj bestonen? Wiels jie sajen, daut Ekj de Diewels derch Beelzebub rutdriew. 19 Wan Ekj de Diewels derch Beelzebub rutdriew, derch wäm driewen june Säns dee rut? Doawäajen woaren see june Rechta sennen. 20 Wan Ekj de Diewels oba derch Gott sien Finja rutdriew, dan es Gott sien Rikj no junt jekomen. 2Mo 8:15 21 Wan een Stoakj-Bewaufneta sienen Hoff bewoakt, dan bliewen siene Jieta en Fräd. 22 Oba wan een Stoakjra aus hee äwa am kjemt un am jewent, dan nemt dee siene Jewäaren, opp dee hee sikj veleet, un vedeelt sien Jestolnet. Kol 2:15; 1Joh 4:4 23 Wäa nich met Mie es, es jäajen Mie, un wäa nich met Mie saumelt, vestreit. Luk 9:50

24 Wan de onreina Jeist von däm Mensch rutjefoaren es, dan waundat dee derch drieeje Städen, sieekjt Ru un finjt dee nich; dan sajcht hee: Ekj well trigjgonen en mien Hus, von wua ekj rutjegonen sie. 25 Un wan hee kjemt, finjt hee daut utjefäajcht un utjestraumt. 26 Dan jeit hee un nemt säwen aundre Jeista, dee schlemma sent aus hee selfst; un see gonen nenn un wonen doa, un daut woat met däm latsten Toostaunt von däm Mensch oaja aus met däm Ieeschten. Joh 5:14

27 Un daut passieed, wäarent Hee dit säd, hoof eene jewesse Fru em Volkj äare Stemm opp un säd to Am: Seelich es daut Muttalief, daut Die jedroacht haft, un de Brosten, dee Du jesoagen hast. Luk 1:28,48 28 Hee oba säd: Jo, väl mea, seelich sent dee, dee Gott sien Wuat hieren un bewoaren. Luk 8:15,21

29 Aus oba de Volkjshäaden sikj toop-drenjden, funk Hee aun to sajen: Dit es eene beese Jennerazion; dee foddat een Tieekjen, oba äant woat kjeen Tieekjen jejäft woaren, buta daut Tieekjen von däm Profeet Jona. Luk 11:16 30 Wiels jrod soo aus Jona fa de Niniviten een Tieekjen wia, soo woat uk de Menschensän sennen fa dise Jennerazion. 31 De Kjennijin vom Sieden woat em Jerecht met de Mana von dise Jennerazion oppstonen un äant vedaumen; wiels see kjeem von de Enja von de Ieed, om Salomo siene Weisheit to hieren; un kjikj, hia es mea aus Salomo. 1Kje 10:1 32 De Mana von Ninive woaren em Jerecht oppstonen met dise Jennerazion un woaren dee vedaumen; wiels see deeden Busse, opp Jona siene Prädicht; un kjikj, hia es mea aus Jona. Jona 3:5

33 Kjeena stekjt eene Laump aun un stalt dee en eene heemliche Städ, uk nich unja een Jefäss, oba opp eenen Laumpenhoola, daut dee, dee doa nenkomen, daut Licht seenen. 34 Daut Licht fa dän Kjarpa es daut Uag. Wan dien Uag eenfeltich es, dan es dien gaunza Kjarpa Licht; wan daut Uag oba schlajcht es, dan es uk dien Kjarpa diesta. 35 See aulsoo doano, daut daut Licht en die nich Diestanis es. 36 Wan nu dien gaunza Kjarpa Licht es, un kjeen Deel diesta, dan woat dee gaunz Licht sennen, soo aus wan daut Licht met siene Strol die beschient.

37 Un wäarent Hee räd, fruach Am een jewessa Farisäa, om met Am toop to äten. Un Hee jinkj nenn un sad sikj aum Desch. Luk 7:36; 14:1 38 De Farisäa oba vewundad sikj, aus hee sach, daut Hee sikj nich ieescht verem Äten jewoschen haud. Mat 15:2 39 De Har oba säd to am: Nu, jie Farisäa, jie reinjen daut Butaschte vom Kuffel un vonne Schiew, oba jun Ennalichet es voll Reibarie un Boosheit. 40 Jie Noaren! Haft nich dee, dee daut Butaschte muak, uk daut Bennaschte jemoakt? 41 Jäft Aulmoosen von daut, waut jie haben, un kjikj, junt es aules rein. 42 Oba wee junt, Farisäa! Wiels jie jäwen daut Tieende von de Mintsplaunt, Rua un aul daut Kjäakjenkrut, un gonen daut Jerecht un Gott siene Leew vebie. Dit sull jie doonen un jant nich tochloten. Joh 5:42

43 Wee junt, Farisäa! Wiels jie leewen de väaschte Setten en de Synagogen un de Bejreessungen opp de Moakjt-Plaza. Luk 14:7 44 Wee junt, Schreftjelieede un Farisäa, jie Heichla! Wiels jie sent soo aus vestoakne Jräwa, äwa dee de Menschen gonen un weeten daut nich.

45 Dan auntwuad eena von de Jesaz-Jelieede un säd to Am: Liera, met dise Räd beleidichst Du ons uk. 46 Hee oba säd: Wee uk junt Jesaz-Jelieede! Wiels jie beloden de Menschen met Lausten, schwoa to droagen, un jie selfst rieren de Lausten nich met eenem Finja aun.

47 Wee junt! Wiels jie buen de Jräwa von de Profeeten, oba june Vodasch haben dee dootjemoakt. Apj 7:52 48 Doamet jäw jie Zeichnis un stemmen met june Vodasch äare Woakjen met en. Wiels see haben dee dootjemoakt, jie oba buen äare Jräwa. 49 Doawäajen haft uk Gott siene Weisheit jesajcht: Ekj well Profeeten un Apostel no äant schekjen, un see woaren atelje von äant dootmoaken un vefoljen, 50 soo daut aule Profeeten äa Bloot von dise Jennerazion jefoddat woat, daut von de Welt-Gruntlajunk aun vegoten worden es, 51 von Abel sien Bloot bat opp daut Bloot von Zacharias, dee tweschen däm Aultoa un däm Tempel* omkjeem. Jo, Ekj saj junt: Daut woat von dise Jennerazion jefoddat woaren. 2Chr 24:20-22; Sach 1:1,7

52 Wee junt, Jesaz-Jelieede! Wiels jie haben dän Erkjantnis-Schlätel wajchjenomen; jie selfst sent nich nenjegonen, un dee, dee doa nengonen, hab jie jehindat.

53 Un aus Hee äant dit jesajcht haud, fungen de Schreftjelieede un Farisäa hoat aun, Am to drenjen un Am äwa väl to froagen, 54 un luaden opp Am un vesochten, waut ut sien Mul to fangen*, wuamet see Am beschuldjen kunnen. Luk 20:20