1 Paulus un Timotäus, Jesus Christus siene Kjnajchts, aun aule Heilje en Christus Jesus, dee en Filippi sent, met de Bischofs un Deena: Apj 16:1 2 Jnod met junt un Fräd von Gott, onsem Voda, un däm Harn Jesus Christus.

3 Ekj dank mienem Gott, wanemma ekj aun junt denkj, Ree 1:8; 1Kor 1:4 4 emma en aul mien Jebäd, wäarent ekj fa junt aula met Freid daut Jebäd doo, 5 fa june Jemeenschoft en daut Evangelium vom ieeschten Dach aun bat nu 6 un sie hiarenn uk secha, daut dee, dee daut goode Woakj en junt aunjefongen haft, daut uk vollbrinjen woat bat aun Jesus Christus sien Dach. 1Kor 1:8; Flp 2:13 7 Jrod soo aus et uk fa mie rajcht es, soo von junt aulem to denkjen, wiels ekj hab junt en mien Hoat, soogoot en miene Kjäden aus uk en de Veteidjunk un Bestädjunk vom Evangelium; jie aula sent Deelnäma aun miene Jnod. 8 Wiels Gott es miene Zeij, woo mie no junt aulem velangt met de ennalje Leew von Jesus Christus. 9 Un ekj bäd dit, daut june Leew noch mea un mea äwastreement woat en Erkjantnis un en aule Ensecht, Flp 1:6 10 om daut jie priefen* kjennen, waut daut Baste es, soo daut jie kjennen rein un onen Aunstoos sennen, bat aun Christus sien Dach, Ree 12:2; Efs 5:10; 1Tess 5:23 11 jefelt met de Fruchten von de Jerajchtichkjeit, dee derch Jesus Christus sent, to Gott siene Iea un Low. Efs 5:9

12 Oba ekj well, daut jie weeten, Breeda, daut, waut mie passieed*, bloos mea fa daut Evangelium-Wiedaranen jedeent haft, 2Tim 2:9 13 soo daut miene Kjäden en Christus en daut gaunze Rechthus sent bekaunt jeworden un bie aul de aundre, Flp 4:22 14 un daut de mieeschte von de Breeda em Harn derch miene Kjäden Vetruen jewonnen haben, väl driesta, daut Wuat to räden onen Forcht. 15 Atelje prädjen werkjlich Christus ut Aufgonst un Striet, oba aundre ut goode Meeninj. 16 Jane prädjen Christus ut Striet, nich iernstlich; see meenen, see woaren Triebsaul bie miene Kjäden biedoonen. 17 Dise oba ut Leew, wiels see weeten, daut ekj jesat sie fa de Veteidjunk vom Evangelium. 18 Waut dan? Wan emmahan Christus opp aule Wies vekjindicht woat, auf wäajens Uträd* ooda en Woarheit, doaräwa frei ekj mie, jo, un woa mie uk freien. Flp 2:17-18

19 Wiels ekj weet, daut mie dit to de Radunk utkomen woat, derch jun Jebäd un derch daut Biedroagen von däm Jeist von Jesus Christus, 2Kor 1:11 20 no miene iernste Erwoartunk un Hopninj, daut ekj en nuscht woa to Schaunden woaren, oba met aule Friemootichkjeit, soo aus emma, Christus nu uk huach jepriesen woaren woat aun mienem Kjarpa, auf derch Läwen ooda derch Doot. 21 Wiels fa mie es daut Läwen Christus, un daut Stoawen es Jewenst. Gal 2:20 22 Wan oba ekj em Fleesch läw, es dit miene Oabeits-Frucht, un ekj weet nich, waut ekj wälen saul. 23 Wiels ekj woa von beides bedrenjt, wiels ekj hab Lost, auf to scheeden un bie Christus to sennen, woont uk väl bäta wia; 2Kor 5:8 24 oba em Fleesch to bliewen es needja, om junt-haulwen. 25 Un en dit Vetruen weet ekj, daut ekj bliewen un met junt aulatoop bliewen woa, fa jun Wiedakomen un Gloowens-Freid, Flp 2:24 26 om daut jun Riemen en Christus Jesus om mient-haulwen äwastreemt, derch mien Wadakomen no junt.

27 Auleen, waundelt wirdich no Christus sien Evangelium, om daut, auf ekj kom un junt see, ooda aufwäsent sie, ekj von junt hieren mucht, daut jie fauststonen en eenem Jeist un toop en eene Jesennunk* kjamfen fa dän Gloowen vom Evangelium, 28 un daut jie junt en nuscht schrakjen loten von de Jäajna, daut fa äant een Bewiess vom Vedoawen es, oba fa junt von de Radunk, un daut von Gott. 2Tess 1:5 29 Wiels junt es daut jeschonken, om Christus sient-haulwen, nich auleen aun Am to jleewen, oba uk om sient-haulwen to lieden, 30 wäarent jie dänselwjen Kaumf haben, dän jie en mie jeseenen haben un nu von mie hieren. Apj 16:22; 1Tess 2:2