1 Wan et nu irjent eene Ermonunk jeft en Christus, wan irjent een Troost von de Leew, wan irjent eene Jemeenschoft vom Jeist, wan irjent een Metjefeel un Erboarmungen, 2 erfelt miene Freid, daut jie äwareen jesonnen sent, deeselwje Leew haben, äwareen-stemment, en eenem Senn. 3 Doot nuscht ut Zank ooda selfst Riemen, oba en Deemoot acht eena dän aundren hecha aus sikj selfst. Ree 12:10; Gal 5:26 4 Kjikjt nich een jiedra opp daut Sienje, oba een jiedra uk opp daut, von de aundre äat. 1Kor 10:24; 13:5

5 Lot dise Jesennunk* en junt sennen, dee uk en Christus Jesus wia, 6 woona, aus Hee en Gottes-Jestault wia, daut nich fa eenen Raup hilt, Gott jlikj to sennen, Joh 1:1-2; 17:5 7 oba muak sikj selfst to nuscht un neem Kjnajchts-Jestault aun un wort de Menschen jlikj Jes 53:3; Mat 20:28; 2Kor 8:9; Heb 2:14,17 8 un en siene Jestault aus een Mensch befungen, deemooticht Hee sikj selfst un wort jehuarsom bat aum Doot, jo, toom Doot aum Kjriez. Luk 14:11; Heb 12:2; 5:8 9 Doawäajen haft Gott Am uk huach erhowen un Am eenen Nomen jejäft, dee äwa jieda Nomen es, Apj 2:33; Efs 1:21; Heb 1:3-4 10 om daut sikj en Jesus sien Nomen jieda Kjnee bieejen saul von dee, waut en däm Himmel un opp de Ieed un unja de Ieed es, Jes 45:23; Joh 5:23; Opb 5:12-13 11 un daut jieda Tung sull bekjanen, daut Jesus Christus Har es, to Gott, däm Voda, siene Iea. Opb 5:13

12 Doawäajen, miene Jeleewde, soo aus jie emma jehuarsom jewast sent, nich auleen aus en miene Jäajenwuat, oba väl mea nu en miene Aufwäsenheit, wirkjt june ieejne Radunk ut met Forcht un Zetren; 1Pe 1:17 13 wiels Gott es et, dee en junt wirkjt beides, daut Wellen un daut Doonen, no sien Wooljefaulen. Flp 1:6 14 Doot aules onen Murren un Twiewel-Jedanken, 15 daut jie muchten onstrof-falich un onen Faulsch sennen, Gott siene Kjinja, nich to beschuldjen, medden mank eene vekjieede un vedreide Jennerazion, mank woone jie schienen aus Lichta en de Welt, Mat 5:14; Efs 5:8-9; Flp 1:10 16 un daut Läwens-Wuat hanhoolen, fa mie toom Riemen aun Christus sien Dach, daut ekj nich vejäfs jerant hab uk nich vejäfs jeoabeit hab. 2Kor 1:14; 1Tess 2:19 17 Un wan ekj äwa daut Opfa un dän Deenst von junem Gloowen jeopfat woa, soo frei ekj mie un frei mie met junt aulem. 2Tim 4:6 18 Un en dautselwje freit uk jie junt, un freit junt met mie. Flp 4:4

19 Oba ekj hop en däm Harn Jesus, Timotäus boolt no junt to schekjen, daut uk ekj mucht mootich sennen, wan ekj june Omstend weet. 20 Wiels ekj hab kjeenen Jlikj-Jesonnenen, dee soo iernstlich* fa daut Junje sorjen woat. 1Kor 16:10 21 Wiels aula sieekjen daut Äaje, nich daut, waut Jesus Christus sient es. 2Tim 4:10,16 22 Oba jie kjanen sien Jeprooft-Sennen, daut hee, soo aus een Sän met däm Voda, met mie jedeent haft aum Evangelium. 23 Disen nu, hop ekj, fuaz to schekjen, wan ekj ieescht jeseenen hab, woo daut om mie steit. 24 Oba ekj vetru en däm Harn, daut uk ekj selfst boolt komen woa. Flp 1:25

25 Oba ekj hab daut fa needich je-acht, Epafroditus, mienen Brooda un Metoabeida un Metkjamfa, oba jun Jeschekjta un Deena fa mien Bederfnis, no junt to schekjen; Flp 4:18 26 wäarent am no junt aulem velangd, un hee wia sea doarom bekjemmat, wiels jie jehieet hauden, daut hee krank jewast wia. 27 Wiels hee wia uk krank, däm Doot dichtbie; oba Gott haft sikj äwa am erboarmt, oba nich auleen äwa am, oba uk äwa mie, daut ekj nich Truarichkjeit äwa Truarichkjeit haud. 28 Ekj hab am aulsoo bosja jeschekjt, om daut jie, wan jie am seenen, wada froo woaren un uk ekj weinja betriept sie. 29 Nämt am nu met aule Freid em Harn opp un hoolt soone en Ieren; 1Kor 16:16 30 Wiels wäajens Christus sien Woakj es hee däm Doot dichtbie jekomen, sien Läwen nich achtent, daut hee junen Mangel em Deenst aun mie erfellen kunn.