1 Doawäajen, miene jeleewde un jewenschte Breeda, miene Freid un Kroon, stot aulsoo faust en däm Harn, Jeleewde! 2Kor 1:14; 1Tess 2:19-20

2 Ekj ermon Efodia, un ekj ermon Sintieche, daut see äwareen jesonnen sent en däm Harn. 3 Un ekj bedd uk die, mien trua Poatna, sto äant bie, dee met mie aum Evangelium jekjamft haben, uk met Klemens un de äwaje miene Metoabeida, dee äare Nomes em Läwens-Buak sent. Luk 10:20

4 Freit junt en däm Harn auletiet! un wada saj ekj: Freit junt! 2Kor 13:11; Flp 3:1; 1Tess 5:16 5 June Jelindichkjeit lot aule Menschen bekaunt woaren! De Har es dichtbie! Tit 3:2 6 Sorcht om nuscht, oba en aules lot derch Jebäd un Bedden met Danksajen jun Aunligjen ver Gott bekaunt woaren; Mat 6:25-34; 1Pe 5:7 7 Un Gott sien Fräd, dee aulet Vestentnis äwatraft, saul june Hoaten un june Sennen bewoaren en Christus Jesus. Joh 14:27; Kol 3:15

8 Äwajens, Breeda, aules, waut woarhauftich, waut ieeboa, waut jerajcht, waut rein, waut leeftolich es, aules, met eenem gooden Roop, auf irjent eene Tugent* un auf irjent een Low, doaräwa denkjt no. 9 Waut jie uk jelieet un jekjräajen un jehieet un aun mie jeseenen haben, daut doot, un de Gott von Fräd woat met junt sennen.

10 Ekj hab mie oba sea em Harn jefreit, daut jie entlich mol wada oppjeläft sent, om fa mie to sorjen; wuarenn jie uk emma jesorcht haben, oba jie hauden nich Jeläajenheit. 11 Nich, daut ekj dit wäajens Mangel haulwen saj, wiels ekj hab jelieet, wuarenn ekj sie, mie to jenieejen. 1Tim 6:6 12 Ekj vesto soogoot jedeemooticht to sennen, soo aus uk Äwafluss to haben; en jiedat, un en aulem sie ekj belieet, soogoot saut to sennen, aus uk to hungren, soogoot Äwafluss to haben, aus uk Mangel to lieden. 2Kor 6:10 13 Ekj kaun aules en Christus, dee mie stoakj moakt. 2Kor 12:10 14 Oba doch, jie haben goot jedonen, daut jie deel-jenomen haben aun mien Lieden.

15 Un jie Filippa weeten uk, daut em Aunfank vom Evangelium, aus ekj ut Mazedonien reisd, kjeene Jemeent met mie metdeeld en waut Jäwen un Kjrieen aunbelangt, aus bloos jie auleen. 2Kor 11:9 16 Wiels uk en Tessalonich hab jie mie eenmol un nochmol fa mien Bederfnis jeschekjt. 17 Nich, daut ekj daut Jeschenkj sieekj, oba ekj sieekj de Frucht, wuaderch june Räakjninj toonemt.

18 Oba ekj hab aules un hab Äwafluss. Ekj sie erfelt; von Epafroditus hab ekj de Dinja von junt jekjräajen, een scheenrikjendet Jeroch, een aunjenämet Opfa, Gott wooljefellich. Flp 2:25 19 Oba mien Gott woat aul jun Bederfnis no sienem Rikjtum erfellen en de Harlichkjeit en Christus Jesus! 20 To Gott un onsem Voda, de Iea von Eewichkjeit to Eewichkjeit! Amen.

21 Jreest aule Heilje en Christus Jesus. Doa jreessen junt de Breeda, dee bie mie sent. 22 Doa jreessen junt aule Heilje un besondasch dee, von ut däm Kjeisa sien Hus. Flp 1:13 23 De Jnod von ons Har Jesus Christus sie met junt aula! Amen. No de Filippa jeschräwen von Room, derch Epafroditus.