1 Oba aum ieeschten Dach von de Wäakj, sea tiedich, kjeemen see nom Grauf un brochten Scheenrikjendet, waut see reedjemoakt hauden, un aundre met äant. 2 See fungen oba dän Steen vom Grauf wajchjerolt. 3 Un aus see nenjinjen, fungen see dän Kjarpa vom Harn Jesus nich. 4 Un daut passieed, aus see doawäajen vebleft wieren, kjikj, doa stunden twee Mana en strolende Kjleeda bie äant. 5 Aus see oba veschrocken wieren un äa Aunjesecht no de Ieed buagen, säden dee to äant: Waut sieekj jie dän Läwendjen mank de Doodje? 6 Hee es nich hia oba es oppjestonen! Denkjt doaraun, waut Hee to junt räd, aus Hee noch en Galiläa wia, 7 aus Hee säd: De Menschensän mott en de Henj von sindje Menschen äwajäft un jekjriezicht woaren un aum dredden Dach oppstonen. Luk 9:22 8 Dan erinnaden see sikj aun siene Wieed. 9 Un see kjeemen vom Grauf trigj un vetalden de Alw aul dit un aul de Äwaje. 10 Daut wieren Maria Magdalena un Johana un Maria, Jakobus siene Mutta, un de Äwaje met äant, dee dit to de Apostel säden. Luk 8:2-3 11 Un äare Wieed scheenen ver äant soo aus Domheit, un see jleewden äant nich. 12 Petrus oba stunt opp un rand nom Grauf, bekjt sikj un sach de Lienzeich-Loakes doa auleen ligjen. Un hee jinkj no Hus, vewundat, äwa waut passieet wia. Joh 20:6-10

13 Un kjikj, twee von äant jinjen aun dämselwjen Dach no een Darp, met Nomen Emmaus, zastich Stadien* von Jerusalem. 14 Un see unjahilden sikj unjarenaunda äwa aul dit, waut doa passieet wia. 15 Un daut passieed, wäarent see metenaunda räden un äwaläden, nodad sikj Jesus selfst un jinkj met äant. 16 Oba äare Uagen worden jehoolen, soo daut see Am nich kjanden. 17 Un Hee säd to äant: Waut sent daut fa Wieed, dee jie unjarenaunda biem gonen uttuschten un sent soo truarich? 18 Dan auntwuad eena, met Nomen Kleopas, un säd to Am: Best Du de eensja Framdlinkj en Jerusalem, dee nich weet, waut doa en dise Doag passieet es? 19 Un Hee säd to äant: Waut? See säden to Am: Daut von Jesus von Nazaret, een Maun, dee een Profeet wia, majchtich em Wuat un Woakj ver Gott un aul daut Volkj; Mat 21:11 20 woo Am onse Huagepriesta un Väaschte äwajäft haben, daut Hee toom Doot ve-uadeelt un jekjriezicht wort. 21 Wie oba hopten, daut Hee dee wia, dee Israel erleesen sull. Oba äwa aul dise Dinja es daut aul de dredda Dach, nodäm daut passieet es. Apj 1:6 22 Un doabie erstaunden ons uk atelje Frues von mank ons, dee tiedich biem Grauf wieren 23 un sienen Kjarpa nich fungen, dee kjeemen un säden, daut see uk een Jesecht von Enjel jeseenen hauden, dee doa säden, daut Hee läft. 24 Un eenje von de onsaje jinjen nom Grauf un fungen daut krakjt soo, aus de Frues jesajcht hauden; oba Am haben see nich jeseenen. 25 Un Hee säd to äant: Oo jie Onvestendje un langsome Hoaten, aul daut to jleewen, waut de Profeeten jerät haben! 26 Must de Christus dit nich lieden un en siene Harlichkjeit nengonen? 27 Un Hee funk aun, von Moses un aul de Profeeten, un läd äant aul de Schreften ut, waut Am betroffen. 5Mo 18:15; Ps 22:1-31; Jes 52:13-53:12

28 Un see nodaden daut Darp, wua see hanjinjen; un Hee deed soo, aus wan Hee wieda-gonen wull. 29 Oba see prachaden Am un säden: Bliew bie ons; wiels daut well Owent woaren, un de Dach haft sikj aul jelajcht. Un Hee jinkj nenn, om bie äant to bliewen. Rech 19:9 30 Un daut passieed, aus Hee met äant aum Desch saut, neem Hee daut Broot un säajend daut; un aus Hee daut jebroaken haud, jeef Hee äant daut. Luk 9:16; 22:19 31 Dan worden äare Uagen opjemoakt, un see kjanden Am; un Hee veschwunk ver äant. 32 Un see säden eena toom aundren: Brend nich ons Hoat en ons, aus Hee oppem Wajch met ons räd un aus Hee ons de Schreften opmuak? 33 Un see stunden en deeselwje Stund opp un jinjen trigj no Jerusalem un fungen de Alw vesaumelt un dee, dee met äant wieren, 34 dee doa säden: De Har es werkjlich oppjestonen un haft sikj to Simon jewäsen. 1Kor 15:4-5 35 Un see vetalden, waut oppem Wajch passieet wia un woo Hee wia erkjant worden von äant, en daut Broot bräakjen.

36 Wäarent see oba doavon räden, stunt Jesus selfst en äare Medd un säd to äant: Fräd met junt! 37 See veschrocken un worden voll Forcht jefelt un meenden, see sagen eenen Jeist. Mat 14:26 38 Un Hee säd to äant: Wuarom sent jie soo veschrocken, un wuarom komen soone Jedanken opp en june Hoaten? 39 Kjikjt no miene Henj un miene Feet, daut Ekj dit selfst sie; schieet Mie aun un kjikjt, wiels een Jeist haft nich Fleesch un Knoakes, soo aus jie seenen, daut Ekj hab. 40 Un aus Hee daut säd, wees Hee äant de Henj un de Feet. Joh 20:20 41 Wiels see oba fa Freid noch nich jleewden un sikj vewundaden, säd Hee to äant: Hab jie hia waut to äten? 42 Un see jeewen Am een Stekj jebrodnen Fesch un von eene Honnich-Schiew. Joh 21:5,10; Apj 10:41 43 Un Hee neem daut un eet ver äant!

44 Dan säd Hee to äant: Dit sent de Wieed, dee Ekj to junt räd, aus Ekj noch bie junt wia, daut aules erfelt woaren mott, waut von Mie jeschräwen es en Moses sien Jesaz un en de Profeeten un en de Psalmen. Luk 18:31-33; 24:27 45 Dan muak Hee äant daut Vestentnis op, de Schreften to vestonen, Luk 9:45; Joh 12:16 46 un Hee säd to äant: Soo steit jeschräwen, un soo must de Christus lieden un aum dredden Dach von de Doodje oppstonen; Hos 6:2 47 un en sienem Nomen sull jeprädicht woaren de Busse un Sinden-Vejäwunk mank aule Velkja, aunfangen von Jerusalem. Apj 2:38; 17:30 48 Jie oba sent Zeijen von dit. 49 Un kjikj, Ekj schekj de Vespräakjunk von mien Voda opp junt; jie oba, blieft en de Staut Jerusalem, bat jie aunjedonen woaren met Krauft vom Huagen. Joh 15:26; 16:7; Apj 2:1-4

50 Hee leid äant oba rut bat Betanien un hoof siene Henj opp un säajend äant. 51 Un daut passieed, wäarent Hee äant säajend, scheed Hee sikj von äant un wort noppjehowen en dän Himmel. 52 Un see bäden Am aun un jinjen trigj no Jerusalem met groote Freid 53 un wieren de gaunze Tiet em Tempel un preisden un lowden Gott. Amen.