Evangelium Johanes 20

Jesus finjt sikj en bie de Jinja

19 Aun dämselwjen ieeschten Dach enne Wäakj, aus daut Owent wia un de Däaren, wua de Jinja vesaumelt wieren, veschloten wieren ut Forcht fa de Juden, kjeem Jesus un stunt enne Medd un sajcht to äant: Fräd met junt! 20 Un aus Hee dit jesajcht haud, wees Hee äant siene Henj un siene Sied. Dan worden de Jinja froo, aus see dän Harn sagen. 21 Dan säd Jesus wada to äant: Fräd met junt! Jrod soo, aus de Voda Mie jeschekjt haft, soo schekj Ekj junt. 22 Un aus Hee daut jesajcht haud, pust Hee äant aun un sajcht: Nämt dän Heiljen Jeist aun! 23 Wämemma jie de Sinden vejäwen, däm sent dee vejäft; un wämemma jie dee behoolen, sent dee behoolen.