1 Jesus oba jinkj nom Oliewen-Boajch. 2 Un tiedich zemorjes kjeem Hee wada en dän Tempel, un aul daut Volkj kjeem no Am, un Hee sad sikj dol un lieed äant. 3 Dan brochten de Schreftjelieede un Farisäa eene Fru no Am, em Ehebruch jejräpen, un stalden ar doa enne Medd han 4 un säden to Am: Meista, dise Fru es bie de Dot em Ehebruch jejräpen worden. 5 Moses oba haft ons em Jesaz befolen, soone to steenjen; waut sajchst Du nu? 3Mo 20:10; 5Mo 22:23-24 6 Dit säden see oba, Am to vesieekjen, daut see Am aunkloagen kunnen. Jesus oba bekjt sikj dol un schreef met däm Finja opp de Ieed. 7 Aus see oba aunhilden, Am to froagen, recht Hee sikj opp un säd to äant: Wäa mank junt onen Sind es, dän lot dän ieeschten Steen opp ar schmieten. Ree 2:1 8 Un Hee bekjt sikj wada dol un schreef opp de Ieed. 9 Aus see daut oba hieeden, jinjen see, von äa Jewessen äwafieet, eena nom aundren rut, un fungen vom Elsten aun bat dän Latsten; un Jesus wort auleen jeloten met de Fru doa enne Medd stonen. 10 Aus Jesus sikj opprecht un buta de Fru kjeenen doa sach, säd Hee to ar: Fru, wua sent see, diene Vekjläaja? Haft die kjeena vedaumt? 11 See säd: Har, nich eena. Jesus oba säd to ar: Ekj vedaum die uk nich; go, un sindj nich mea. Joh 5:14

12 Dan räd Jesus wada to äant un säd: Ekj sie daut Licht fa de Welt. Wäa Mie nofolcht, dee woat nich en de Diestanis waundlen, oba woat daut Läwens-Licht haben. Jes 49:6; 60:20; Mat 5:14-16; Joh 1:5,9 13 Dan säden de Farisäa to Am: Du zeichst von Die selfst, dien Zeichnis es nich woa. 14 Jesus auntwuad un säd to äant: Uk wan Ekj von Mie selfst zeij, es mien Zeichnis woa, wiels Ekj weet, wuahäa Ekj jekomen sie un wuahan Ekj go; jie weeten oba nich, wua Ekj häakom un wua Ekj hango. Joh 5:31; 7:28 15 Jie rechten nom Fleesch, Ekj oba recht kjeenen. Joh 3:17 16 Oba uk wan Ekj recht, es mien Jerecht woa, wiels Ekj sie nich auleen, oba Ekj un de Voda, dee Mie jeschekjt haft. 17 Doa steit uk en jun Jesaz jeschräwen, daut daut Zeichnis von twee Menschen woa es. 5Mo 19:15 18 Ekj sie daut, dee Ekj von Mie selfst zeij, un de Voda, dee Mie jeschekjt haft, zeicht von Mie. 19 Dan säden see to Am: Wua es dien Voda? Jesus auntwuad: Jie kjanen nich Mie uk nich mienen Voda; wan jie Mie kjanden, dan wudd jie uk mienen Voda kjanen. Joh 14:7 20 Dise Wieed räd Jesus bie däm Gotteskausten, aus Hee em Tempel lieed; un kjeena jreep Am, wiels siene Stund wia noch nich jekomen. Joh 7:30

21 Dan säd Jesus wada to äant: Ekj go wajch, un jie woaren Mie sieekjen un en june Sind stoawen. Wua Ekj hango, doa kjenn jie nich hankomen. Joh 7:34-35; 13:33 22 Dan säden de Juden: Well Hee sikj selfst dootmoaken, wiels Hee sajcht: "Wua Ekj hango, doa kjenn jie nich hankomen"? 23 Hee oba säd to äant: Jie sent von unjen häa, Ekj sie von bowen häa. Jie sent von dise Welt, Ekj sie nich von dise Welt. Joh 3:31 24 Doawäajen hab Ekj junt jesajcht, daut jie en june Sinden stoawen woaren; wiels wan jie nich jleewen, daut Ekj dee sie, woa jie en june Sinden stoawen. Jes 43:10 25 Dan säden see to Am: Wäa best Du? Un Jesus säd to äant: Krakjt daut, waut Ekj junt vom Aunfank säd. 26 Ekj hab väl äwa junt to räden un to rechten; oba dee Mie jeschekjt haft, es woarhauftich; un waut Ekj von Am jehieet hab, daut räd Ekj to de Welt. 27 See vestunden oba nich, daut Hee vom Voda to äant räd. 28 Doawäajens säd Jesus to äant: Wan jie dän Menschensän woaren oppjehowen haben, dan woa jie erkjanen, daut Ekj daut sie, un von Mie selfst doo Ekj nuscht, oba soo aus mien Voda Mie jelieet haft, soo räd Ekj. Joh 3:14; 12:32 29 Un dee Mie jeschekjt haft, es met Mie; de Voda lat Mie nich auleen, wiels Ekj aule Tiet doo, waut Am jefelt. 30 Aus Hee dit räd, jleewden väle aun Am.

31 Dan säd Jesus to de Juden, dee aun Am jleewden: Wan jie en miene Wieed bliewen, dan sent jie woarhauftich miene Jinja; Joh 15:7 32 un jie woaren de Woarheit erkjanen, un de Woarheit woat junt frie moaken. 33 See auntwuaden Am: Wie sent Abraham sien Somen un sent kjeenmol irjentwäm siene Kjnajchts jewast; woo sajchst Du: "Jie sellen frie woaren"? Mat 3:9 34 Jesus auntwuad äant: Woarhauftich, woarhauftich, Ekj saj junt: Wäa Sind deit, es de Sind äa Kjnajcht. 35 De Kjnajcht oba blift nich fa emma em Hus; de Sän oba blift fa emma. 36 Wan nu de Sän junt frie moaken woat, dan sent jie werkjlich frie. Ree 6:16,18,22 37 Ekj weet, daut jie Abraham sien Somen sent; oba jie sieekjen Mie doot to moaken, wiels mien Wuat finjt kjeenen Rum en junt. 38 Ekj räd, waut Ekj von mienem Voda jeseenen hab; un soo doo jie uk, waut jie von junem Voda jeseenen haben.

39 See auntwuaden un säden to Am: Abraham es ons Voda. Jesus säd to äant: Wan jie Abraham siene Kjinja wieren, dan wudd jie Abraham siene Woakjen doonen; 40 oba nu sieekj jie Mie doot to moaken, een Mensch, dee junt de Woarheit jesajcht haft, dee Ekj von Gott jehieet hab; daut haft Abraham nich jedonen. 41 Jie doonen jun Voda siene Woakjen. Dan säden see to Am: Wie sent nich derch Huararie jebuaren; wie haben eenen Voda, Gott. 42 Jesus säd to äant: Wan Gott jun Voda wia, wudd jie Mie leewen, wiels Ekj sie von Gott rutjegonen un jekomen; wiels von Mie selfst sie Ekj nich jekomen, oba Hee haft Mie jeschekjt. 43 Wuarom vesto jie miene Sproak nich? Wiels jie mien Wuat nich hieren kjennen. 1Kor 2:14 44 Jie sent von däm Voda, däm Diewel, un no jun Voda siene Lost well jie doonen. Dee es een Merda von Aunfank un es nich en de Woarheit bestonen, wiels en am es kjeene Woarheit. Wan hee ne Lieej rät, dan rät hee ut sien Ieejnet, wiels hee es een Läajna un de Voda von deeselwje. 1Mo 3:4,19; 1Joh 3:8-10 45 Oba wiels Ekj de Woarheit saj, jleew jie Mie nich. 46 Wäa von junt kaun Mie eene Sind nowiesen? Wan Ekj de Woarheit saj, wuarom jleew jie Mie nich? 2Kor 5:21; Heb 4:15; 1Pe 2:22; 1Joh 3:5 47 Wäa von Gott es, dee hieet Gott siene Wieed; doawäajen hia jie nich, wiels jie nich von Gott sent. Joh 18:37

48 Dan auntwuaden de Juden un säden to Am: Saj wie nich rajcht, daut Du een Samarita best un eenen Diewel hast? Joh 7:20 49 Jesus auntwuad: Ekj hab kjeenen Diewel, oba Ekj Iea mienen Voda un jie ve-onieren Mie. 50 Un Ekj sieekj nich miene Iea; doa es oba Eena, Wäa dee sieekjt un recht. 51 Woarhauftich, woarhauftich, Ekj saj junt: Wan wäa mien Wuat helt, dee woat dän Doot nich seenen en Eewichkjeit. Joh 6:40,47

52 Dan säden de Juden to Am: Nu erkjan wie, daut Du eenen Diewel hast. Abraham es jestorwen un de Profeeten, un Du sajchst: "Wan wäa mien Wuat helt, dee woat dän Doot en Eewichkjeit nich schmakjen!" 53 Best Du jrata aus ons Voda Abraham, dee jestorwen es? Un de Profeeten sent uk jestorwen. To wäm moakst Du Die selfst? 54 Jesus auntwuad: Wan Ekj Mie selfst iea, es miene Iea nuscht; daut es mien Voda, dee Mie ieet, von wäm jie sajen, daut Hee jun Gott es. Jes 63:16 55 Un jie haben Am nich jekjant; Ekj oba kjan Am. Un wan Ekj sajen wudd: Ekj kjan Am nich, dan wia Ekj een Läajna, jrod soo aus jie. Oba Ekj kjan Am un hool sien Wuat. Joh 7:28-29 56 Jun Voda Abraham wia froo, daut hee mienen Dach seenen sull, un hee sach dän un freid sikj.

57 Dan säden de Juden to Am: Du best noch nich feftich Joa oolt un hast Abraham jeseenen? 58 Jesus säd to äant: Woarhauftich, woarhauftich, Ekj saj junt: Ver Abraham wia, sie Ekj. Joh 1:1-2 59 Dan hoowen see Steena opp, om no Am to schmieten. Jesus oba vestuak sikj un jinkj ut däm Tempel rut, wäarent Hee medden derch äant jinkj un kjeem soo wajch. Joh 10:31