1 Ver daut Passafast oba, aus Jesus wist, daut siene Stund jekomen wia, daut Hee ut dise Welt nom Voda gonen sull: Soo aus Hee de Sienje jeleeft haud, dee en de Welt wieren, leewd Hee äant bat aum Enj. Joh 7:30; 17:1 2 Un wäarent daut Owentkost wia, aus de Diewel aul däm Judas, Simon sien Sän, dän Iskariot, daut en daut Hoat jejäft haud, Am to veroden, Luk 22:3 3 wist Jesus, daut de Voda Am aules en de Henj jejäft haud un daut Hee von Gott rutjegonen wia un no Gott jinkj, Joh 3:35; 16:28 4 stunt Hee vom Owentkost opp, läd siene Kjleeda auf, neem een Haunduak un bunk sikj daut om. 5 Doaropp goot Hee Wota en eene Komm, funk aun, de Jinja äare Feet to wauschen un met daut Haunduak auf to drieejen, met daut Hee sikj omjebungen haud. 6 Dan kjemt Hee no Simon Petrus, un dee sajcht to Am: Har, wauschst Du mie de Feet? 7 Jesus auntwuad un säd to am: Waut Ekj doo, weetst du nu nich; oba du woascht daut nohäa vestonen. 8 Petrus sajcht to Am: Du saust niemols mea miene Feet wauschen! Jesus auntwuad am: Wan Ekj die nich wausch, hast du kjeen Poat met Mie. 9 Simon Petrus sajcht to Am: Har, nich bloos miene Feet, oba uk de Henj un dän Kopp! 10 Jesus sajcht to am: Wäa jewoschen es, haft nich needich, sikj to wauschen, buta de Feet, wiels hee es gaunz rein; un jie sent rein, oba nich aula. Joh 15:3 11 Wiels Hee kjand dän, dee Am veroden wudd. Doawäajen säd Hee: Jie sent nich aula rein.

12 Aus Hee äant ieescht de Feet jewoschen un siene Kjleeda jenomen haud, sad Hee sikj wada dol un säd to äant: Weet jie, waut Ekj junt jedonen hab? 13 Jie nanen Mie Liera un Har un sajen rajcht, wiels Ekj sie daut uk. Mat 23:8,10 14 Wan nu Ekj, de Har un Liera, june Feet jewoschen hab, soo sell jie uk junt unjarenaunda de Feet wauschen. Luk 22:27 15 Wiels Ekj hab junt een Biespell jejäft, daut jie uk doonen, soo aus Ekj junt jedonen hab. Flp 2:5; 1Pe 2:21 16 Woarhauftich, woarhauftich, Ekj saj junt: De Kjnajcht es nich jrata aus sien Har, uk nich de Jeschekjta jrata aus dee, dee am jeschekjt haft. Mat 10:24 17 Wan jie daut weeten, jlekjseelich sent jie, wan jie daut doonen. Mat 7:24

18 Ekj räd nich von junt aula; Ekj weet, woone Ekj utjewält hab; oba daut de Schreft wudd erfelt woaren: "Dee met Mie daut Broot at, haft siene Hak jäajen Mie oppjehowen". Ps 41:9 19 Ekj saj junt nu, ea daut passieet, daut, wan et jeworden es, daut jie jleewen, daut Ekj daut sie. 20 Woarhauftich, woarhauftich, Ekj saj junt: Wäa oppnemt, wämemma Ekj schekjen woa, dee nemt Mie opp; wäa oba Mie oppnemt, dee nemt dän opp, dee Mie jeschekjt haft. Mat 10:40

21 Aus Jesus dit jesajcht haud, wort Hee em Jeist bewäajcht un bezeijd un säd: Woarhauftich, woarhauftich, Ekj saj junt: Eena von junt woat Mie veroden. Joh 12:27 22 Dan kjikjten de Jinja sikj unjarenaunda aun un wisten nich, von wäm Hee räd. 23 Eena oba von siene Jinja, dän Jesus leewd, saut aum Desch aun Jesus siene Brost. Joh 19:26; 20:2; 21:20 24 Däm nekjt Simon Petrus too, daut hee forschen sull, wäa daut wia, von däm Hee räd. 25 Dan länd hee sikj aun Jesus siene Brost un sajcht to Am: Har, wäa es daut? 26 Jesus auntwuad: Daut es dee, däm Ekj daut Biet woa enducken un jäwen. Un Hee dukt daut Biet en un jeef daut däm Judas, Simon sien Sän, däm Iskariot. 27 Un no daut Biet fua de Soton en am nenn. Dan säd Jesus to am: Waut du deist, daut doo boolt. 28 Oba kjeena von dee, dee aum Desch sauten, vestunt, wuarom Hee daut säd. 29 Wiels atelje meenden, wäajens Judas de Jelttausch haud, säd Jesus to am: Kjeep, waut wie fa daut Fast brucken, ooda, daut hee de Oame waut jäwen sull. 30 Aus hee nu daut Biet jenomen haud, jinkj hee fuaz rut. Un daut wia Nacht.

31 Aus hee nu rutjegonen wia, säd Jesus: Nu es de Menschensän veharlicht, un Gott es veharlicht en Am. Joh 12:23,28 32 Wan Gott en Am veharlicht es, dan woat Gott Am uk en sikj selfst veharlichen, un Hee woat Am fuaz veharlichen. Joh 17:1-5 33 Kjinjakjes, noch een kjlienet Stootje sie Ekj bie junt; jie woaren Mie sieekjen, un soo aus Ekj to de Juden säd: Wua Ekj hango, kjenn jie nich hankomen, soo saj Ekj nu uk junt. Joh 8:21 34 Een nieet Jeboot jäw Ekj junt, daut jie junt unjarenaunda leewen, daut uk, soo aus Ekj junt jeleeft hab, jie junt unjarenaunda leewen. 3Mo 19:18; Joh 15:12-13,17 35 Doaraun woat aulemaun erkjanen, daut jie miene Jinja sent, wan jie Leew unjarenaunda haben.

36 Simon Petrus sajcht to Am: Har, wua jeist Du han? Jesus auntwuad am: Wua Ekj hango, kaust du Mie nu nich foljen; du woascht Mie oba lota foljen. Joh 21:18-19 37 Petrus sajcht to Am: Har, wuarom kaun ekj Die nu nich foljen? Ekj well mien Läwen fa Die loten. 38 Jesus auntwuad am: Dien Läwen west du fa Mie loten? Woarhauftich, woarhauftich, Ekj saj die: De Hon woat nich kjreien, bat du Mie dreemol veloagen hast.