1 Dit hab Ekj to junt jerät, daut jie kjeenen Aunstoos nämen. 2 See woaren junt ut de Synagoge utschluten; doa kjemt oba de Stund, daut, wäaemma junt dootmoakt, meenen woat, Gott doamet eenen Deenst to doonen. Mat 10:17,22; 24:9 3 Un dit woaren see junt doonen, wiels see nich dän Voda uk nich Mie kjanen. Joh 15:21

4 Oba Ekj hab dit to junt jerät, om daut, wan de Stund kjemt, jie doaraun denkjen, daut Ekj junt daut jesajcht hab. Dit oba hab Ekj junt nich von Aunfank aun jesajcht, wiels Ekj wia bie junt. 5 Nu oba go Ekj han no däm, dee Mie jeschekjt haft, un kjeena von junt frajcht Mie: Wua jeist Du han? 6 Oba wiels Ekj dit to junt jerät hab, haft Truarichkjeit jun Hoat jefelt. 7 Oba Ekj saj junt de Woarheit: Daut es goot fa junt*, daut Ekj wajchgo, wiels wan Ekj nich wajchgo, woat de Treesta nich no junt komen. Wan Ekj oba wajchgo, well Ekj Am no junt schekjen. Joh 14:16,26 8 Un wan Hee kjemt, woat Hee de Welt äwazeijen von Sind un von Jerajchtichkjeit un von Jerecht: 9 Von Sind, wiels see nich aun Mie jleewen; Joh 15:22,24 10 von Jerajchtichkjeit, wiels Ekj no mienem Voda go un jie Mie nich mea seenen; Apj 5:31; Ree 4:25 11 von Jerecht, wiels de Väaschta von dise Welt jerecht es. Joh 12:31

12 Ekj hab junt noch välet to sajen, oba jie kjennen daut nu noch nich vedroagen. 1Kor 3:1 13 Oba wan Hee kjemt, de Jeist von de Woarheit, woat Hee junt en de gaunze Woarheit leiden; wiels Hee woat nich von sikj selfst räden, oba waut Hee hieren woat, daut woat Hee räden, un waut doa kjemt woat Hee junt vekjindjen. 14 Hee woat Mie veharlichen; wiels von daut Mienje woat Hee nämen un woat junt daut vekjindjen. 15 Aules, waut de Voda haft, es mient; doawäajen säd Ekj, daut Hee woat von daut Mienje nämen un junt daut vekjindjen. Joh 3:35; 17:10

16 Een kjlienet Stootje, un jie woaren Mie nich seenen, un wada een kjlienet Stootje, un jie woaren Mie seenen, wiels Ekj go nom Voda. Joh 14:19 17 Dan säden atelje von siene Jinja unjarenaunda: Waut es daut, waut Hee to ons sajcht: Een kjlienet Stootje, un jie woaren Mie nich seenen, un wada een kjlienet Stootje, un jie woaren Mie seenen, un: Wiels Ekj go nom Voda? 18 Dan säden see: Waut es daut, waut Hee sajcht: Een kjlienet Stootje? Wie weeten nich, waut Hee rät.

19 Dan moakjt Jesus, daut see Am froagen wullen, un Hee säd to äant: Jie befroagen junt unjarenaunda doaräwa, daut Ekj jesajcht hab: Een kjlienet Stootje, un jie woaren Mie nich seenen; un wada een kjlienet Stootje, un jie woaren Mie seenen? 20 Woarhauftich, woarhauftich, Ekj saj junt: Jie woaren hielen un weekloagen, oba de Welt woat sikj freien; un jie woaren truarich sennen; doch june Truarichkjeit saul en Freid vewaundelt woaren. Mrk 16:10 21 De Fru, wan see jebuaren deit, haft Truarichkjeit, wiels äare Stund jekomen es; wan see oba daut Kjint jebuaren haft, denkjt see nich mea aun de Angst, om de Freid haulwen, daut een Mensch en de Welt nenjebuaren es. Jes 26:17 22 Un soo hab jie nu uk Truarichkjeit; oba Ekj woa junt wada seenen, un jun Hoat woat sikj freien, un june Freid saul kjeena von junt nämen. 23 Un aun däm Dach woa jie Mie nuscht froagen. Woarhauftich, woarhauftich, Ekj saj junt: Wautemma jie dän Voda bedden woaren en mienem Nomen, daut woat Hee junt jäwen. Joh 14:13-14 24 Bat nu hab jie nuscht en mienem Nomen jefroacht. Froacht, un jie woaren kjrieen, daut june Freid voll woat. Joh 15:11

25 Dit hab Ekj en Jlikjnissen to junt jerät; doa kjemt oba de Stund, wua Ekj nich en Jlikjnissen to junt räden woa, oba junt frie von däm Voda vekjindjen woa. 26 Aun däm Dach woa jie en mienem Nomen bedden, un Ekj saj junt nich, daut Ekj dän Voda fa junt bedden woa; 27 wiels de Voda selfst leeft junt, wiels jie Mie leewen un jleewen, daut Ekj von Gott rutjegonen sie. Joh 14:21 28 Ekj sie vom Voda rutjegonen un sie en de Welt jekomen. Wada velot Ekj de Welt un go nom Voda.

29 Siene Jinja sajen to Am: Kjikj, nu rätst Du frie un sajchst kjeen Jlikjnis. 30 Nu weet wie, daut Du aules weetst un nich needich hast, daut Die irjentwäa frajcht; doawäajen jleew wie, daut Du von Gott rutjegonen best. 31 Jesus auntwuad äant: Nu jleew jie? 32 Kjikj, doa kjemt de Stund, un dee es nu jekomen, daut jie woaren vestreit woaren, een jiedra en daut Sienje un Mie auleen loten woaren; oba Ekj sie nich auleen, wiels de Voda es bie Mie. Sach 13:7; Mat 26:31 33 Dit hab Ekj to junt jerät, daut jie en Mie Fräd haben. En de Welt hab jie Triebsaul; oba siet jetroost, Ekj hab de Welt äwakomen. Joh 14:27; Ree 5:1; 1Joh 5:4